Success Story: ಡಬಲ್​ ಡಿಗ್ರಿ ಮಾಡಿದ್ರೂ ಸಿಗದ ಕೆಲಸ, ಅಪ್ಪನ ಜೊತೆ ಗುಲಾಬಿ ಕೃಷಿ ಆರಂಭಿಸಿದ ಯುವಕನ ಜೀವನವೇ ಬದಲಾಯ್ತು

ಆ ಯುವಕ ಸ್ನಾತಕೋತ್ತರ ಪದವಿ ​​ಜೊತೆಗೆ ಬಿಇಡಿ ಪೂರ್ಣಗೊಳಿಸಿದ್ದ, ಆದರೆ ಒಳ್ಳೆಯ ಕೆಲಸ ಸಿಗಲಿಲ್ಲ. ಆದರೂ ಧೃತಿಗೆಡಲಿಲ್ಲ. ಎಲ್ಲಾ ನೋವನ್ನು ಹೊಟ್ಟೆಯಲ್ಲಿ ಬಚ್ಚಿಟ್ಟುಕೊಂಡು, ಏನು ಮಾಡಬೇಕೆಂದು ಯೋಚಿಸಿದ. ಕೊನೆಗೆ ಅವನು ತೆಗೆದುಕೊಂಡ ನಿರ್ಧಾರದಿಂದ ಜೀವನವೇ ಬದಲಾಗಿದೆ.

ರಾಜಸ್ಥಾನದ ಭಿಲ್ವಾರಾ ಜಿಲ್ಲೆಯ ಖಾರಿಕಾ ಲಂಬಾ ಗ್ರಾಮದ ಯುವಕನೊಬ್ಬ ಕೆಲಸ ಸಿಗದ ಹಿನ್ನೆಲೆಯಲ್ಲಿ ತನ್ನ ತಂದೆಯೊಂದಿಗೆ ಸಾಂಪ್ರದಾಯಿಕ ಕೃಷಿಯನ್ನು ತೊರೆದು ಆಧುನಿಕ ಕೃಷಿ ಆರಂಭಿಸಿದ. ಆ ನಂತರ ಅಪ್ಪ-ಮಗನ ಜೀವನವೇ ಬದಲಾಗಿದೆ.

ಸಾಂಪ್ರದಾಯಿಕ ಬೇಸಾಯವನ್ನು ಬಿಟ್ಟು ತಮ್ಮ ಹೊಲದಲ್ಲಿ ಗುಲಾಬಿ ಕೃಷಿಯನ್ನು ಆರಂಭಿಸಿದರು. ಜಮೀನಿನಲ್ಲೇ ರೋಸ್ ವಾಟರ್, ಗುಲ್ಕಂದ್ ಸಿರಪ್, ಸುಗಂಧ ದ್ರವ್ಯಗಳನ್ನು ತಯಾರಿಸಿ ಸಾಮಾಜಿಕ ಜಾಲತಾಣಗಳ ಮೂಲಕ ಮಾರಾಟ ಮಾಡಿ ಭಾರೀ ಲಾಭ ಗಳಿಸುತ್ತಿದ್ದಾರೆ.

ಹಿಂದಿನ ಕಾಲದಲ್ಲಿ ಪಾರಂಪರಿಕ ಕೃಷಿ ಮಾಡುತ್ತಿದ್ದು ಹೆಚ್ಚು ಲಾಭ ಬರುತ್ತಿರಲಿಲ್ಲ. ನನ್ನ ತಾತ ಮನೆಯಲ್ಲಿಯೂ ಪನ್ನೀರು, ಗುಲ್ಕಂದ, ಸುಗಂಧ ದ್ರವ್ಯ ತಯಾರಿಸುತ್ತಿದ್ದರು. ಪ್ರಸ್ತುತ ತನ್ನ ಮಗ ಮಕ್ಸೂದ್ ಜೊತೆಗೆ ಜಮೀನಿನಲ್ಲಿ ಗುಲಾಬಿ ಬೆಳೆದು, ಅವುಗಳನ್ನು ರೋಸ್ ವಾಟರ್, ಸುಗಂಧ ದ್ರವ್ಯ, ಗುಲ್ಕಂದ್ ಮತ್ತು ಗುಲಾಬಿ ಸಿರಪ್ ಮಾಡುತ್ತಿದ್ದೇವೆ ಎಂದು ತಂದೆ ಸೈಫುದ್ದೀನ್​ ತಿಳಿಸಿದ್ದಾರೆ.

ಒಂದು ಬಿಘಾ(0.6 ಎಕರೆ) ಜಮೀನಿನಲ್ಲಿ ಗುಲಾಬಿ ಕೃಷಿಯ ಮಾಡುತ್ತಿದ್ದು, ಪ್ರತಿದಿನ 15 ರಿಂದ 30 ಕೆಜಿ ಗುಲಾಬಿ ಬೆಳೆಯಲಾಗುತ್ತಿದೆ. 30 ಕೆಜಿ ಗುಲಾಬಿ ಹೂಗಳಿಂದ 5 ರಿಂದ 10 ಲೀಟರ್ ರೋಜ್​ ವಾಟರ್​ ತಯಾರಿಸಲಾಗುತ್ತದೆ. ಅಲ್ಲದೆ ಗುಲಾಭಿಗೆ ಭಿಲ್ವಾರದಲ್ಲಿ ಕೆಜಿಗೆ 200 ರಿಂದ 250 ರೂ.ಗೆ ಮಾರಾಟ ಮಾಡುತ್ತೇವೆ ಎಂದು ತಿಳಿಸಿದ್ದಾರೆ.

ಪ್ರಸ್ತುತ ಡಿಜಿಟಲ್ ಮಾಧ್ಯಮದ ಯುಗವಾಗಿದ್ದು, ಜಮೀನಿನಲ್ಲಿ ತಯಾರಿಸಿದ ಪನ್ನೀರು, ಗುಲ್ಕನ್, ಸುಗಂಧ ದ್ರವ್ಯ, ಶರಬತ್ತುಗಳನ್ನು ಡಿಜಿಟಲ್ ಪ್ಲಾಟ್​ಫಾರ್ಮ್​ ಮೂಲಕ ಮಾರಾಟ ಮಾಡುವುದರಿಂದ ಉತ್ತಮ ಲಾಭ ಬರುತ್ತಿದೆ ಎಂದು ಮಕ್ಸೂದ್ ತಿಳಿಸಿದ್ದಾರೆ.

ಗುಲಾಬಿ ಅತ್ಯಂತ ಸುಂದರವಾದ ಹೂವುಗಳಲ್ಲಿ ಒಂದಾಗಿದೆ. ಹೂವುಗಳಲ್ಲಿ ರಾಣಿ ಗುಲಾಬಿ ಹೂವು. ವಾಣಿಜ್ಯ ಬೆಳೆಯಾಗಿ ಗುಲಾಬಿ ಕೃಷಿಯ ಲಾಭವನ್ನು ರೈತರು ಈಗ ಅರಿತುಕೊಳ್ಳುತ್ತಿದ್ದಾರೆ. ರೈತರು ಗುಲಾಬಿ ಕೃಷಿಯ ತಂತ್ರಗಳತ್ತ ಗಮನ ಹರಿಸುತ್ತಿದ್ದಾರೆ. ಗುಲಾಬಿ ಕೃಷಿಗೆ ಕಡಿಮೆ ವೆಚ್ಚ, ಕಡಿಮೆ ಭೂಮಿ ಸಾಕಾಗುತ್ತದೆ, ಆದರೆ ಹೆಚ್ಚು ಆದಾಯ ಪಡೆಯಬಹುದು ಎಂದು ತಂದೆ ಮಗ ತಿಳಿಸಿದ್ದಾರೆ.