Napier Grass: ಕಡಿಮೆ ಖರ್ಚು, ಕೈತುಂಬಾ ದುಡ್ಡು! ಈ ಹುಲ್ಲು ಬೆಳೆದರೆ ನೀವು ಲಕ್ಷಾಧಿಪತಿಯಾಗಬಹುದು, ಹೈನುಗಾರಿಕೆಗೂ ವರದಾನ!

ಹೈನುಗಾರಿಕೆಯಲ್ಲಿ ಪ್ರತಿ ರಾಸುವಿನ ಉತ್ಪಾದನೆಯು ಅವುಗಳಿಗೆ ನೀಡುವ ಗುಣಮಟ್ಟದ ಹಸಿರು ಮೇವು, ಒಣ ಮೇವು ಹಾಗೂ ಸಮತೋಲನ ಆಹಾರದ ಮೇಲೆ ಅವಲಂಬಿತವಾಗಿರುತ್ತದೆ. ಇತ್ತೀಚಿನ ದಿನಗಳಲ್ಲಿ ರೈತರು ಹಾಲಿನಿಂದ ಸಿಗುವ ಆದಾಯದಲ್ಲಿ ಶೇಕಡಾ 60 ರಷ್ಟು ಅದರ ಆಹಾರಕ್ಕಾಗಿ ಖರ್ಚು ಮಾಡುತ್ತಿದ್ದಾರೆ. ಪ್ರತಿ ಲೀಟರ್ ಹಾಲಿನ ಉತ್ಪಾದನೆಗೆ ವ್ಯಯ ಮಾಡುತ್ತಿರುವ ಖರ್ಚು ಅಧಿಕವಾಗುತ್ತಿದೆ ಹಾಗೂ ಆದಾಯ ಕಡಿಮೆಯಾಗುತ್ತಿದೆ.

ಅದಕ್ಕಾಗಿಯೇ ಭಾರತ ಕೃಷಿ ಸಂಶೋಧನೆ ಕೇಂದ್ರಗಳು ಮೇವಿನ ಬಳೆಯಾದ ನೇಪಿಯರ್​ ಹುಲ್ಲನ್ನು ಅಭಿವೃದ್ಧಿ ಪಡಿಸಿವೆ. ಇವುಗಳನ್ನು ಹೈನುಗಾರಿಕೆ ಬಳಸಿಕೊಳ್ಳಬಹುದು, ಜೊತೆಗೆ ಮಾರಾಟ ಮಾಡಿ ಹಣವನ್ನು ಗಳಿಸಿಕೊಳ್ಳಬಹುದು.

ನೇಪಿಯರ್ ಹುಲ್ಲನ್ನು 2012 ರಲ್ಲಿ ಥ್ಯೆಲ್ಯಾಂಡ್​ನಲ್ಲಿ ಅಭಿವೃದ್ಧಿಪಡಿಸಲಾಗಿದೆ, ಭಾರತದಲ್ಲಿ ಇದು ಆಂಧ್ರಪ್ರದೇಶದಲ್ಲಿ ಹೆಚ್ಚು ಜನಪ್ರಿಯವಾಗಿದೆ. ಈ ಹುಲ್ಲು ಅತ್ಯಂತ ಎತ್ತರವಾಗಿ ಮತ್ತು ಹುಲುಸಾಗಿ ಬೆಳೆಯುತ್ತದೆ. ಪ್ರಸ್ತುತ ಈ ಹುಲ್ಲನ್ನು ವಾಣಿಜ್ಯ ಬೆಳೆಯಾಗಿ ಬಾಂಗ್ಲಾದೇಶದ ರಂಗ್​ಪುರ್​ ಪ್ರದೇಶದ ರೈತರು ವಾರ್ಷಿಕವಾಗಿ ಲಕ್ಷಾಂತರ ರೂಪಾಯಿ ಗಳಿಸುತ್ತಿದ್ದಾರೆ.

ಈ ಹುಲ್ಲನ್ನು ಒಮ್ಮೆ ನಾಟಿ ಮಾಡಿದರೆ ಐದು ವರ್ಷಗಳವರೆಗೆ ಇಳುವರಿ ನೀಡುತ್ತಿರುತ್ತದೆ. ಇದು ಬಿದಿರಿನಂತೆ ಎತ್ತರವಾಗಿ ಬೆಳೆಯುತ್ತದೆ. ಇದನ್ನು ಪರಿಸರ ವಿಜ್ಞಾನಿಗಳು ಭವಿಷ್ಯದ ಹುಲ್ಲು ಎಂದು ಪರಿಗಣಿಸುತ್ತಾರೆ.

ಇದರ ಮತ್ತೊಂದು ವಿಶೇಷವೆಂದರೆ ಕಡಿಮೆ ನೀರು ಹಾಗೂ ಗೊಬ್ಬರದಲ್ಲಿ ಬೆಳೆಯುತ್ತದೆ. ಕೀಟಕ್ಕೆ ಒಳಗಾಗುವ ಸಾಧ್ಯತೆ ತುಂಬಾ ಕಡಿಮೆ. ಆದರೆ ಈ ಹುಲ್ಲಿನಲ್ಲಿ ಸಮೃದ್ಧ ಪೋಷಕಾಂಶಗಳಿವೆ.

ಇತ್ತೀಚಿನ ದಿನಗಳಲ್ಲಿ ನೇಪಿಯರ್ ಹುಲ್ಲು ಬಹಳ ಜನಪ್ರಿಯಯವಾಗುತ್ತಿದೆ. ಒಮ್ಮೆ ಬಿತ್ತಿದರೆ ಐದು ವರ್ಷಗಳ ಕಾಲ ನಿರಂತರವಾಗಿ ಫಸಲು ಕೊಡುತ್ತದೆ. ಪ್ರತಿ 2 ರಿಂದ 3 ತಿಂಗಳಿಗೊಮ್ಮೆ ಹುಲ್ಲು 15 ಅಡಿ ಎತ್ತರ ಬೆಳೆಯುತ್ತದೆ. ವರ್ಷಕ್ಕೆ 7ರಿಂದ 8 ಬಾರಿ ಕಟಾವಿಗೆ ಬರುತ್ತದೆ.

ಅತ್ಯಂತ ಕಡಿಮೆ ವೆಚ್ಚದಲ್ಲಿ ಬೆಳೆಯಬಹುದಾದ ಈ ಹುಲ್ಲಿನಿಂದ ಒಂದು ಎಕರೆಯಲ್ಲಿ ಒಂದು ವರ್ಷದಕ್ಕೆ ಕಡಿಮೆ ಅಂದರೂ 2. 5 ಲಕ್ಷದಿಂದ 4 ಲಕ್ಷದ ವರೆಗೆ ರೈತರು ಗಳಿಸಿಕೊಳ್ಳಬಹುದಾಗಿದೆ. ನೀರಿನ ಅಭಾವ ಇರುವ ಜಾಗದಲ್ಲೂ ಬೆಳೆ ಬೆಳೆಯಬಹುದು. ಜೊತೆಗೆ ಮೇಕೆ, ಹಸು, ಎಮ್ಮೆ ಸಾಕಾಣಿಕೆ ಮಾಡುವವರಿಗೂ ಈ ಬೆಳೆ ಸೂಕ್ತವಾಗಿದೆ.

ನೇಪಿಯರ್ ಹುಲ್ಲಿನ ವಿವಿಧ ತಳಿಗಳು ಇತ್ತೀಚಿಗೆ ಎಲ್ಲಾ ಕೃಷಿ ಮಹಾವಿದ್ಯಾಲಯಗಳು, ಕೃಷಿ ವಿಜ್ಞಾನ ಕೇಂದ್ರಗಳು, ಸಮೀಪದ ಪಶು ವೈದ್ಯಕೀಯ ಮಹಾವಿದ್ಯಾಲಯಗಳಲ್ಲಿ ಲಭ್ಯವಿರುತ್ತದೆ. ಬೆಂಗಳೂರಿನಲ್ಲಿ ಭಾರತೀಯ ಪಶುಚಿಕಿತ್ಸಾ ಅನುಸಂಧಾನ ಸಂಸ್ಥೆ, ಪಶು ವೈದ್ಯಕೀಯ ಮಹಾವಿದ್ಯಾಲಯ ಮತ್ತು ಗಾಂಧಿ ಕೃಷಿ ವಿಜ್ಞಾನ ಕೇಂದ್ರದಲ್ಲಿ ಈ ಹುಲ್ಲಿನ ಕಾಂಡಗಳನ್ನು ಸಿಗುತ್ತವೆ.