Watermelon Farming: ಕಲ್ಲಂಗಡಿ ಬೆಳೆದು ಲಕ್ಷಾಧಿಪತಿಗಳಾಗುತ್ತಿರುವ ಇಲ್ಲಿನ ರೈತರು! ಒಂದೇ ಬೆಳೆಯಲ್ಲಿ 10 ಲಕ್ಷ ಆದಾಯ

ಬೇಸಿಗೆ ಆರಂಭವಾಗುತ್ತಿದ್ದು, ಈ ಸಂದರ್ಭದಲ್ಲಿ ನೀರಿನ ಅಂಶ ಹೆಚ್ಚಿರುವ ತರಕಾರಿ ಹಾಗೂ ಹಣ್ಣುಗಳಿಗೆ ಹೆಚ್ಚಿನ ಬೇಡಿಕೆ ಇರುತ್ತದೆ. ಸೌತೇಕಾಯಿ, ಕಲ್ಲಂಗಡಿ ಹಣ್ಣುಗಳಿ ಬೇಸಿಗೆಯಲ್ಲಿ ಲಾಭದಾಯಕ ಬಳೆಯಾಗಿವೆ. ಇಲ್ಲೊಬ್ಬ ರೈತ ತನ್ನ 5 ಎಕರೆಯಲ್ಲಿ ಕಲ್ಲಂಗಡಿ ಬೆಳೆದು ಲಕ್ಷ ಲಕ್ಷ ಸಂಪಾದಿಸುತ್ತಿದ್ದಾರೆ.

ಬಿಹಾರದ ಬಕ್ಸಾರ್​ ಜಿಲ್ಲೆಯ ನಯಾ ಭೋಜ್‌ಪುರ್ ಗ್ರಾಮದ ನಿವಾಸಿ ಅಶುತೋಷ್ ಪಾಂಡೆ ಅವರು ಸಾಂಪ್ರದಾಯಿಕ ಕೃಷಿ ಬಿಟ್ಟು ವಾಣಿಜ್ಯ ಬೆಳೆ ಮೂಲಕ ಕೃಷಿ ಕ್ಷೇತ್ರದಲ್ಲಿ ಹೊಸ ಆಯಾಮವನ್ನು ಸೃಷ್ಟಿಸುತ್ತಿದ್ದಾರೆ. ಈ ಹಿಂದೆ ಕ್ಯಾಪ್ಸಿಕಂ, ಟೊಮ್ಯಾಟೊ, ಗುಲಾಬಿ, ಎಲೆಕೋಸು ಕೃಷಿಯಲ್ಲಿ ಯಶಸ್ಸುಗಳಿಸಿದ್ದ ಅವರು ಈಗ ದೊಡ್ಡ ಪ್ರಮಾಣದಲ್ಲಿ ಕಲ್ಲಂಗಡಿ ಬೆಳೆಯುವ ಮೂಲಕ ಕಡಿಮೆ ವೆಚ್ಚದಲ್ಲಿ ಲಕ್ಷಾಂತರ ರೂಪಾಯಿ ಲಾಭ ಗಳಿಸುತ್ತಿದ್ದಾರೆ.

ಇಡೀ ಜಿಲ್ಲೆಯಲ್ಲಿ ಪಾಂಡೆ ಬಗ್ಗೆಯೇ ಚರ್ಚೆ ನಡೆಯುತ್ತಿದೆ. ಇಲ್ಲಿಯವರೆಗೆ ಕಲ್ಲಂಗಡಿ ಕೃಷಿಯನ್ನ ಮರಳು ಮಣ್ಣಿನಲ್ಲಿ ಮಾತ್ರ ಈ ಬೆಳೆ ಬೆಳೆಯುತ್ತದೆ ಎಂದು ಜನರು ನಂಬಿದ್ದರು, ಆದರೆ ಜಿಲ್ಲೆಯ ಭೋಜ್‌ಪುರ ಗ್ರಾಮದಲ್ಲಿ ಕಲ್ಲಂಗಡಿ ಉತ್ತಮ ಕೃಷಿ ಎಂಬ ಕಲ್ಪನೆಯನ್ನು ಪಾಂಡೆ ಮೂಡಿಸಿದ್ದಾರೆ.

ಸತತ ಎರಡನೇ ವರ್ಷ ಕಲ್ಲಂಗಡಿ ಕೃಷಿ ಮಾಡುತ್ತಿದ್ದೇನೆ. ಕಳೆದ ವರ್ಷ ಮೂರು ಎಕರೆಯಲ್ಲಿ ಕಲ್ಲಂಗಡಿ ಬೆಳೆಯಲಾಗಿದ್ದ ಕಲ್ಲಂಗಡಿಯನ್ನ ಈ ಬಾರಿ ಐದು ಎಕರೆಗೆ ಹೆಚ್ಚಿಸಿದ್ದೇನೆ. ಹೊಲದಲ್ಲಿ ಒಟ್ಟು 4 ತಳಿಯ ಕಲ್ಲಂಗಡಿ ನಾಟಿ ಮಾಡಲಾಗಿದೆ ಎಂದು ತಿಳಿಸಿದರು.

ಜನ್ನತ್, ಸರಸ್ವತಿ, ರೆಡ್ ಚೀಫ್ ಮತ್ತು ಅಭಿಷೇಕ್ ಎಂಬ ತಳಿಯ ಕಲ್ಲಂಗಡಿಗಳನ್ನು ಬಿತ್ತಲಾಗಿದೆ. ಇದರಲ್ಲಿ ಜನ್ನತ್ ಮತ್ತು ರೆಡ್ ಚೀಫ್ ಇಳುವರಿ ಉತ್ತಮವಾಗಿದ್ದರೆ ಸರಸ್ವತಿ ಮತ್ತು ಅಭಿಷೇಕ ಹಣ್ಣುಗಳು ತುಂಬಾ ಸಿಹಿಯಾಗಿರುತ್ತವೆ ಎಂದು ಹೇಳಿದರು.

ಪ್ರತಿ ಕೊಯ್ಲಿಗೂ ತೋಟದಿಂದ 3ರಿಂದ 3.5 ಟನ್ ಕಲ್ಲಂಗಡಿ ಉತ್ಪಾದನೆಯಾಗುತ್ತಿದೆ. ವರ್ತಕರು ಕ್ವಿಂಟಲ್​ಗೆ 1300 ರೂಪಾಯಿ ದರದಲ್ಲಿ ಖರೀದಿಸಿ ಸ್ಥಳೀಯ ಮಾರುಕಟ್ಟೆಯಲ್ಲಿ ಹಾಗೂ ಆರಾ, ರೋಹ್ಟಾಸ್, ಬಲ್ಲಿಯಾ ಮೊದಲಾದ ಮಾರುಕಟ್ಟೆಗಳಲ್ಲಿ ಮಾರಾಟ ಮಾಡುತ್ತಿದ್ದಾರೆ. ಪಾಂಡೆ ಪ್ರಕಾರ ಎಕರೆಗೆ ಕಡಿಮೆ ಅಂದರೂ ಖರ್ಚು ಕಳೆದು 2 ಲಕ್ಷ ಸಿಗುತ್ತದೆ ಅಂದರೆ 5 ಎಕರೆಯಲ್ಲಿ ಒಂದು ಬೆಳೆಗೆ 10 ಲಕ್ಷದ ವರೆಗೆ ಸಂಪಾದಿಸುತ್ತಿದ್ದಾರೆ.

ಫೆಬ್ರವರಿಯಲ್ಲಿ ಸುಮಾರು ಐದು ಎಕರೆಯಲ್ಲಿ ಕಲ್ಲಂಗಡಿ ಬೆಳೆ ಹಾಕಲಾಗಿತ್ತು. ಇದೀಗ 60 ರಿಂದ 75 ದಿನಗಳಲ್ಲಿ ಬೆಳೆ ಸಂಪೂರ್ಣವಾಗಿ ಸಿದ್ಧವಾಗಿದೆ. ಒಂದು ಎಕರೆ ಕಲ್ಲಂಗಡಿ ಕೃಷಿಗೆ ಒಟ್ಟು ಅರವತ್ತು ಸಾವಿರ ಖರ್ಚಾಗುತ್ತದೆ ಎಂದು ರೈತ ಅಶುತೋಷ್ ಪಾಂಡೆ ತಿಳಿಸಿದ್ದಾರೆ.