YouTube ನೋಡಿ ಕೃಷಿ ಆರಂಭಿಸಿದ ಇಟ್ಟಿಗೆ ವ್ಯಾಪಾರಿ, ತರಕಾರಿ ಬೆಳೆದು 20 ಲಕ್ಷ ಸಂಪಾದನೆ!

ಕೊರೊನಾ ಸಾಕಷ್ಟು ಕಷ್ಟ-ನಷ್ಟಗಳನ್ನು ಉಂಟು ಮಾಡಿದರೂ , ಲಾಕ್‌ಡೌನ್ ಸಮಯದಲ್ಲಿ ಯೂಟ್ಯೂಬ್​ನಿಂದ ಅನೇಕ ಜನರ ಹಣೆಬರಹಗಳೇ ಬದಲಾಗಿದೆ. ಇಟ್ಟಿಗೆ ಮಾರಾಟ ಮಾಡುತ್ತಿದ್ದ ವ್ಯಾಪಾರಿಯೊಬ್ಬರು ಯೂಟ್ಯೂಬ್ ಸಹಾಯದಿಂದ ವರ್ಷಕ್ಕೆ 20 ಲಕ್ಷ ಸಂಪಾದಿಸುತ್ತಿದ್ದಾರೆ. ಅದು ಹೇಗೆ ಎನ್ನುವುದನ್ನು ಇಲ್ಲಿ ತಿಳಿದುಕೊಳ್ಳಿ.

ಛತ್ತೀಸ್‌ಗಢದ ರಾಮನಗರ ಗ್ರಾಮ ಜಿಲ್ಲಾ ಕೇಂದ್ರವಾದ ಸೂರಜ್‌ಪುರದಿಂದ 10 ಕಿ.ಮೀ ದೂರದಲ್ಲಿದೆ. ಇಲ್ಲೊಬ್ಬ ರೈತ ಬಾಬುಲಾಲ್ ಯಾದವ್ 10-15 ವರ್ಷಗಳಿಂದ ಇಟ್ಟಿಗೆ ವ್ಯಾಪಾರ ಮಾಡುತ್ತಿದ್ದರು.. ಕೊರೊನಾದಿಂದಾಗಿ ಇಟ್ಟಿಗೆ ವ್ಯಾಪಾರದಲ್ಲಿ ಬರುವ ಲಾಭ ಕಡಿಮೆಯಾಯಿತು.

ಹಾಗಾಗಿ ಬಾಬುಲಾಲ್ ಅವರು ರೆನ್ ನದಿಯ ದಡದಲ್ಲಿರುವ ಗ್ರಾಮದ ಜನರಿಂದ 30 ಎಕರೆ ಜಮೀನನ್ನು ಗುತ್ತಿಗೆಗೆ ಪಡೆದು ವೈಜ್ಞಾನಿಕ ಪದ್ಧತಿಯಲ್ಲಿ ಸಾಗುವಳಿ ಮಾಡಿದ್ದಾರೆ. 2022ರ ಮೇ ತಿಂಗಳಲ್ಲಿ ಕೃಷಿ ಆರಂಭಿಸಿರುವುದಾಗಿ ರೈತ ಬಾಬುಲಾಲ್ ಯಾದವ್ ತಿಳಿಸಿದ್ದಾರೆ. ಆರಂಭದಲ್ಲಿ ಡ್ರಿಪ್, ಬಿದಿರು, ತಂತಿ ಎಲ್ಲಾ ಸೇರಿ 40 ರಿಂದ 45 ಲಕ್ಷ ರೂಪಾಯಿ ಖರ್ಚು ಮಾಡಿರುವುದಾಗಿ ತಿಳಿಸಿದ್ದಾರೆ.

ಈಗ ಕೃಷಿ ಮಾಡುತ್ತಿರುವ ಇಟ್ಟಿಗೆ ವ್ಯಾಪಾರಿ 30 ಎಕರೆಯಲ್ಲಿ ತರಕಾರಿ, ಹಣ್ಣು ಬೆಳೆದು ತಿಂಗಳಿಗೆ 1.50 ಲಕ್ಷ ರೂ.ಗೂ ಹೆಚ್ಚು ಆದಾಯ ಗಳಿಸುತ್ತಿದ್ದಾರೆ. ಅಂದರೆ ವರ್ಷಕ್ಕೆ ಸುಮಾರು 20 ಲಕ್ಷ ರೂಪಾಯಿ ಸಂಪಾದಿಸುತ್ತಿದ್ದಾರೆ.

ಇನ್ನೂ ಈ ವರ್ಷ ಅವರು ಕಲ್ಲಂಗಡಿ, ಬೆಂಡೆಕಾಯಿ ಮತ್ತು ಸೌತೆಕಾಯಿಯ ಬೆಳೆ ಬೆಳೆದಿದ್ದು, ಅತ್ಯುತ್ತಮ ಇಳುವರಿಯನ್ನು ಪಡೆದುಕೊಂಡಿದ್ದಾರೆ. ಈ ವರ್ಷ ಆದಾಯದಲ್ಲಿ 30 ಲಕ್ಷ ರೂಪಾಯಿ ಸಿಗುತ್ತದೆ ಎಂಬ ವಿಶ್ವಾಸದಲ್ಲಿದ್ದಾರೆ.

ಗಮನಾರ್ಹವೆಂದರೆ, ಕೃಷಿ ಲಾಭ ಕಂಡ ನಂತರ, ಅವರು ತಮ್ಮ ಜಮೀನಿನಲ್ಲಿ ಹಳ್ಳಿಯ ಅನೇಕ ಮಹಿಳೆಯರಿಗೆ ಉದ್ಯೋಗ ನೀಡಿದ್ದಾರೆ. ಮತ್ತೊಂದೆಡೆ, ತರಕಾರಿಗಳ ಬಂಪರ್ ಇಳುವರಿ ಬಂದ ಸಂದರ್ಭದಲ್ಲಿ, ಅವುಗಳನ್ನು ಕೊಯ್ಯಲು 40-45 ಕಾರ್ಮಿಕರನ್ನು ನೇಮಿಸುತ್ತಾರಂತೆ.

ಬಾಬುಲಾಲ್ ಕೃಷಿಯಲ್ಲಿ ಅತ್ಯುತ್ತಮ ಆದಾಯ ಕಂಡಿರುವುದರಿಂದ ಈ ಭಾಗದ  5 ರಿಂದ 10 ಯುವಕರು ಕೂಡ ಅವರನ್ನ ಪ್ರೇರಣೆಯಾಗಿ ತೆಗೆದುಕೊಂದು ಕೃಷಿಯನ್ನೇ ಮುಖ್ಯ ಕಸುಬನ್ನಾಗಿ ಮಾಡಿಕೊಂಡು ಲಾಭ ಗಳಿಸುತ್ತಿದ್ದಾರೆ.

ಈ ಹಿಂದೆ ಬಾಬುಲಾಲ್ ಟೊಮ್ಯಾಟೊ ಮತ್ತು ಸೋರೆಕಾಯಿ ಬೆಳೆ ಬೆಳೆದಿದ್ದರು. ಇದರಿಂದ ಉತ್ತಮ ಲಾಭವನ್ನು ಪಡೆದು, ಸುಮಾರು 20 ಲಕ್ಷ ರೂಪಾಯಿ ಗಳಿಸಿದ್ದಾರೆ. ಬೆಂಡೆಕಾಯಿ ಬೆಳೆಯಲ್ಲೂ ಉತ್ತಮ ಇಳುವರಿ ಬಂದಿದೆ. ಸಾವಯವ ಕೃಷಿಯಿಂದ ಉತ್ತಮ ಇಳುವರಿ ಬರುತ್ತಿದೆ ಎನ್ನುತ್ತಾರೆ ಬಾಬುಲಾಲ್. ಈ ಪದ್ಧತಿಯಲ್ಲಿ ಕೃಷಿ ಮಾಡಿದರೆ ಉತ್ತಮ ಲಾಭದ ಜೊತೆಗೆ ಬೆಳೆಗಳ ಜೀವಿತಾವಧಿ ಹೆಚ್ಚುತ್ತದೆ ಎಂದು ಹೇಳಿದ್ದಾರೆ.

ಬಿಡುವಿನ ವೇಳೆಯಲ್ಲಿ ಯೂಟ್ಯೂಬ್​ನಲ್ಲಿ ಕೃಷಿ ವಿಡಿಯೋ ನೋಡುತ್ತಿದ್ದೆ. ಆ ನಂತರ ನನ್ನ ಮನಸಲ್ಲೂ ಬೇಸಾಯದ ಯೋಚನೆ ಬಂತು. ಅಂದಿನಿಂದ ಕೃಷಿ ಮಾಡಲು ಪ್ರಾರಂಭಿಸಿದೆ. ಯೂಟ್ಯೂಬ್ ಮತ್ತು ಗೂಗಲ್ ಅನ್ನು ಕೃಷಿಗೆ ನನ್ನ ಮಾರ್ಗದರ್ಶಕರಾಗಿ ಪರಿಗಣಿಸಿದ್ದೇನೆ. ನೆಟ್‌ನಲ್ಲಿ ಕೃಷಿ ಮಾಡುವ ಸೂಚನೆಗಳನ್ನು ಅನುಸರಿಸಿ ವೈಜ್ಞಾನಿಕ ರೀತಿಯಲ್ಲಿ ಕೃಷಿ ಆರಂಭಿಸಿದೆ.. ಕೃಷಿ ಸಂಬಂಧಿತ ಸಮಸ್ಯೆಗಳಿದ್ದರೆ ಗೂಗಲ್, ಯೂಟ್ಯೂಬ್​ನಲ್ಲಿ ಪರಿಹಾರ ಹುಡುಕಿಕೊಂಡು ಸಲಹೆ ಪಡೆಯುತ್ತೇನೆ ಎನ್ನುತ್ತಾರೆ ಬಾಬುಲಾಲ್​.