Karnataka vs Gujarat: ಅಮುಲ್ ಆಯ್ತು ಈಗ 'ಪುಷ್ಪ'ನ ಸರದಿ, ಗುನ್ನಾ ಕೊಡೋಕೆ ಬಂದ ಗುಜರಾತ್​ಗೆ ಕನ್ನಡಿಗರ ಡಿಚ್ಚಿ!

Amul vs Nandini: ಕನ್ನಡಿಗರು ಶಾಂತ ಸ್ವಭಾವದವರು. ಹಾಗಂತ ಎಲ್ಲದ್ದಕ್ಕೂ ಪ್ರತಿಕ್ರಿಯೆ ಮಾಡದೇ ಸುಮ್ಮನ್ನೆ ಕೂರುವವರಲ್ಲ ಕನ್ನಡಿಗರು. ಕಳೆದ ಕೆಲ ದಿನಗಳಿಂದ ರಾಜ್ಯದಲ್ಲಿ ಅಮುಲ್​ ಫೈಟ್​ ಜೋರಾಗಿದೆ. ರಾಜ್ಯದಲ್ಲಿ ಹೇಗಾದರೂ ಮಾಡಿ ನಂದಿನಿ ಎದುರು ಅಮುಲ್​ ಬ್ರ್ಯಾಂಡ್ ತಂದು ಗುನ್ನಾ ಇಡಬೇಕು ಅಂತ ಗುಜರಾತ್​ ಮಾಸ್ಟರ್​ ಪ್ಲ್ಯಾನ್ ಮಾಡಿಕೊಂಡಿತ್ತು.

ಆದರೆ ಇದಕ್ಕೆ ಕನ್ನಡಿಗರು ಡಿಚ್ಚಿ ಕೊಟ್ಟಿದ್ದರು. ನಾವು ಕುಡಿಯೋದೇ ನಮ್ಮ ನಂದಿನಿ ಹಾಲು ಅಂತ ಗುಜರಾತ್​ಗೆ ಟಾಂಗ್​ ಕೊಟ್ಟಿದ್ದಾರೆ. ಇಲ್ಲಿ ಯಾಕೆ ಅಮುಲ್ ಬರೋಕೆ ಇಷ್ಟು ಪ್ರಯತ್ನ ಪಡುತ್ತಿದೆ ಅಂದ್ರೆ ಅದು ಮಾರ್ಕೆಟ್​. ಕರ್ನಾಟಕ ಮಾರ್ಕೆಟ್​ ಗುಜರಾತ್​ ಮಾರ್ಕೆಟ್​ಗಿಂತ ಹೆಚ್ಚಿದೆ.

ಅಮುಲ್​ ಬರೋಕೆ ಬಿಡಲ್ಲ ಅಂತ ಕನ್ನಡಿಗರು ಪಟ್ಟು ಹಿಡಿದಿದ್ದಾರೆ. ಅತ್ತ ಹಾವೇರಿಯಲ್ಲಿ ಮತ್ತೊಂದು ಸಂಚು ಮಾಡೋಕೆ ಗುಜರಾತ್​ ಸಿದ್ಧವಾಗಿದೆ. ಅದ್ಯಾವುದಪ್ಪಾ ಅಂತೀರಾ? ಅದೇ ಪುಷ್ಪ. ಇದೇನಪ್ಪಾ ಅಲ್ಲು ಅರ್ಜುನ್​ ಸಿನಿಮಾನಾ ಅಂತ ಕನ್ಫೂಸ್​ ಆಗ್ಬೇಡಿ.

ಪುಷ್ಪ ಅಂದ್ರೆ ಗುಜರಾತ್​ನ ಮೆಣಸಿನಕಾಯಿ. ಬ್ಯಾಡಗಿ ಮೆಣಸಿನಕಾಯಿಗೆ ಟಾಂಗ್ ಕೊಡೋಕೆ ಪುಷ್ಪ ಮೆಣಸಿನಕಾಯಿ ಕಾಲಿಟ್ಟಿದೆ.ಅಮುಲ್ ಹಾಲಿನ ನಂತರ ಇದೀಗ ಗುಜರಾತ್ ಮೆಣಸಿನಕಾಯಿ ಸರದಿ. ಗುಜರಾತಿ ಮೆಣಸಿನಕಾಯಿಯ 'ಪುಷ್' ಹವಾ ಜೋರಾಗಿದೆ. ಏಷ್ಯಾದ ಅತಿದೊಡ್ಡ ಮಾರುಕಟ್ಟೆಗಳಲ್ಲಿ ಒಂದಾದ ಬ್ಯಾಡಗಿಯಲ್ಲಿ ಸಾಕಷ್ಟು ಸಂಚಲನವನ್ನು ಸೃಷ್ಟಿಸುತ್ತಿದೆ.

ಮೂಲಗಳ ಪ್ರಕಾರ, ಇತ್ತೀಚಿನ ತಿಂಗಳುಗಳಲ್ಲಿ ಬ್ಯಾಡಗಿ ಮಾರುಕಟ್ಟೆಯಲ್ಲಿ ಕನಿಷ್ಠ 20,000 ಕ್ವಿಂಟಲ್ ಗುಜರಾತಿ ಮೆಣಸಿನಕಾಯಿ ಮಾರಾಟವಾಗಿದೆ. ಪುಷ್ಪ ಸ್ಥಳೀಯ ಡಬ್ಬಿ ಮತ್ತು ಕಡ್ಡಿ ತಳಿಗಳಿಗೆ ಪ್ರತಿಸ್ಪರ್ಧಿಯಲ್ಲದಿದ್ದರೂ, ಗುಜರಾತ್ ತಳಿಯ ದೊಡ್ಡ ಪ್ರಮಾಣದ ಸ್ಥಳೀಯ ಮಾರುಕಟ್ಟೆಯನ್ನು ತಲುಪಿದೆ.

ಪುಷ್ಪ ಮೆಣಸಿನಕಾಯಿಗಳು ಸ್ಥಳೀಯ ತಳಿಗಳಿಗಿಂತ ಕೆಂಪಾಗಿ ಕಾಣುತ್ತವೆ. ಕನಿಷ್ಠ 70 ಮೆಣಸಿನಕಾಯಿ ಮಾರಾಟಗಾರರು ಮಾರುಕಟ್ಟೆಯ ಸಮೀಪವಿರುವ ವಿವಿಧ ಕೋಲ್ಡ್ ಸ್ಟೋರೇಜ್‌ಗಳಲ್ಲಿ ಗುಜರಾತ್ ಮೆಣಸಿನಕಾಯಿಯನ್ನು ಸ್ವಲ್ಪ ಪ್ರಮಾಣದಲ್ಲಿ ಸಂಗ್ರಹಿಸಿದ್ದಾರೆ ಎಂದು ಬ್ಯಾಡಗಿ ಮಾರುಕಟ್ಟೆಯ ಮೂಲಗಳು ತಿಳಿಸಿವೆ.

ಬ್ಯಾಡಗಿಯಲ್ಲಿ ಏಕಾಏಕಿ ಬೆಲೆ ಏರಿಕೆಯ ಲಾಭವನ್ನು ಪಡೆದುಕೊಂಡು ಗುಜರಾತ್ ಮೆಣಸಿನಕಾಯಿ ಭರ್ಜರಿ ವ್ಯಾಪಾರ ಕಂಡಿದೆ. ವಿವಿಧ ದೇಶಗಳು ಮತ್ತು ಕಂಪನಿಗಳು ವರ್ಷಗಳಿಂದ ಬ್ಯಾಡಗಿ ಮೆಣಸಿನಕಾಯಿಯನ್ನು ಅವಲಂಬಿಸಿವೆ.

ಆದ್ದರಿಂದ ಈ ಸ್ಥಳೀಯ ಮೆಣಸಿನಕಾಯಿಯ ಖ್ಯಾತಿಗೆ ಧಕ್ಕೆಯಾಗದಂತೆ ಸರ್ಕಾರ ನೋಡಿಕೊಳ್ಳಬೇಕು ರೈತರ ಸರ್ಕಾರಕ್ಕೆ ಮನವಿ ಮಾಡಿಕೊಂಡಿದ್ದಾರೆ.