World Costliest Mango: ಭಾರತಕ್ಕೂ ಕಾಲಿಟ್ಟ ವಿಶ್ವದ ದುಬಾರಿ ಮಾವು! ಇದರ ಬೆಲೆ ಕೇಳಿದ್ರೆ ತಲೆ ತಿರುಗುತ್ತೆ!

ಮಾವನ್ನು ಭಾರತದಲ್ಲಿ ಹಣ್ಣುಗಳ ರಾಜ ಎಂದು ಹೇಳಲಾಗುತ್ತದೆ. ನಮ್ಮ ದೇಶದಲ್ಲಿ ವಿವಿಧ ರೀತಿಯ ಮಾವಿನ ಹಣ್ಣುಗಳಿವೆ. ಆದರೆ ಅವುಗಳಲ್ಲಿ ಯಾವುದೂ ದುಬಾರಿ ಎನಿಸುವುದಿಲ್ಲ. ಏಕೆಂದರೆ ಅವು ಕೆಜಿಗೆ 200-250 ಇರುತ್ತದೆ. ಆದರೆ ಈಗ ರೈತರು ಕೆಜಿಗೆ ಲಕ್ಷ ರೂಪಾಯಿ ಸಿಗುವ ಅತ್ಯಂತ ದುಬಾರಿ ಮಾವು ಬೆಳೆಯಲು ಸಿದ್ಧರಾಗಿದ್ದಾರೆ. ಪಶ್ಚಿಮ ಬಂಗಾಳದ ಮಾಲ್ಡಾದಲ್ಲಿ ವಿವಿಧ ರೀತಿಯ ಮಾವುಗಳನ್ನು ಬೆಳೆಯಲು ಎಲ್ಲಾ ರೀತಿಯ ಸಿದ್ಧತೆ ನಡೆಸಲಾಗುತ್ತಿದೆ.

ಈ ದುಬಾರಿ ಮಾವು ಮಿಯಾಜಾಕಿ ಜಾತಿಗೆ ಸೇರಿದೆ. ಇದು ವಿಶ್ವದ ಅತ್ಯಂತ ದುಬಾರಿ ಮಾವಿನ ಹಣ್ಣುಗಳಲ್ಲಿ ಒಂದಾಗಿದೆ. ಜಪಾನ್‌ನಲ್ಲಿ ಕೇವಲ ಈ ಮಿಯಾಜಾಕಿ ಎಂಬ ಸ್ಥಳದಲ್ಲಿ ಈ ಮಾವನ್ನು ಮಾತ್ರ ಬೆಳೆಯಲಾಗುತ್ತದೆ. ಫೋಲಿಕ್​ ಆಮ್ಲ ಮತ್ತು ಉತ್ಕರ್ಷಣ ನಿರೋಧಕ ಅಂಶದಿಂದ ಸಮೃದ್ಧಿಯಾಗಿರುವ ವಿಶೇಷ ಹಣ್ಣು ಇದಾಗಿದೆ. ದೃಷ್ಟಿಹೀನತೆಯನ್ನು ಸುಧಾರಿಸುವ ಶಕ್ತಿ ಇದರಲ್ಲಿದೆ.

ಹಾಗಾಗಿ ಈ ಮಾವನ್ನು ವಿಶೇಷವಾಗಿ ಬೆಳೆಯಲಾಗುತ್ತದೆ. ಪ್ರತಿ ಹಣ್ಣು 300- 400 ಗ್ರಾಂ ತೂಗುತ್ತದೆ. ಪರಿಪೂರ್ಣ ಗಾತ್ರ ಮತ್ತು ಬಣ್ಣವನ್ನು ಹೊಂದಿರುವ ಹಣ್ಣಿಗೆ ಹೆಚ್ಚಿನ ಬೆಲೆ ಸಿಗುತ್ತದೆ. ಒಂದು ವೇಳೆ ಆ ರೀತಿ ಬರದ ಹಣ್ಣನ್ನು ರೈತರು ಮಾರುವುದಿಲ್ಲ.

ಪಶ್ಚಿಮ ಬಂಗಾಳದ ಮಾಲ್ಡಾದಲ್ಲಿ ಈ ದುಬಾರಿ ಮಾವನ್ನು ವಾಣಿಜ್ಯಿ ಬೆಳೆಯಾಗಿ ಬೆಳೆಸಲು ಕೃಷಿ ಇಲಾಖೆಯಿಂದ ಯೋಜನೆ ರೂಪಿಸಲಾಗಿದೆ. ಮಾಲ್ಡಾದ ಇಂಗ್ಲಿಷ್ ಬಜಾರ್ ಬ್ಲಾಕ್‌ನಲ್ಲಿರುವ ಉದ್ಯಾನದಲ್ಲಿ ಮಿಯಾಜಾಕಿ ಸಸಿಗಳನ್ನು ನೆಡಲಾಗಿದೆ. ಈ ಮಿಯಾಜಾಕಿ ಮಾವಿನ ಗಿಡಗಳನ್ನು ಜಪಾನ್‌ನಿಂದ ತರಿಸಿಕೊಳ್ಳಲಾಗಿದೆ. ಈ ಗಿಡಗಳು ಒಂದು ವಾರದಲ್ಲಿ ಜಪಾನ್​ನಿಂದ ಮಾಲ್ಡಾ ತಲುಪಿವೆ. ಮಾಲ್ಡಾದಲ್ಲಿ ಈಗಾಗಲೇ ಸುಮಾರು 100 ವಿಧದ ಮಾವುಗಳನ್ನು ಬೆಳೆಯಲಾಗುತ್ತದೆ. ಇದೀಗ ಮಿಯಾಜಾಕಿ ಕೂಡ ಅವುಗಳ ಜೊತೆ ಸೇರಿಕೊಂಡಿದೆ.

ಡಾ. ಸೈಫುರ್ ರೆಹಮಾನ್ ಅವರು ಮಿಯಾಜಾಕಿ ಮಾವಿನಹಣ್ಣುಗಳನ್ನು ಮಾಲ್ಡಾಕ್ಕೆ ತರುವ ಜವಾಬ್ದಾರಿಯನ್ನು ತೆಗೆದುಕೊಂಡಿದ್ದಾರೆ. ಡಾ.ಸೈಫುರ್ ರೆಹಮಾನ್ ಇಂಗ್ಲೀಷ್ ಬಜಾರ್ ಬ್ಲಾಕ್ ಕೃಷಿ ಇಲಾಖೆ ಅಧಿಕಾರಿ. ಮಿಯಾಜಾಕಿ ಮಾವಿನ ಗಿಡಗಳನ್ನು ಖಾಸಗಿ ಏಜೆನ್ಸಿಯೊಂದು ಜಪಾನ್‌ನಿಂದ ತರಿಸಿದೆ.

ಕೃಷಿ ಇಲಾಖೆಯ ಮೂಲಗಳ ಪ್ರಕಾರ, ಜಪಾನ್‌ನಿಂದ ಸುಮಾರು 50 ಮಿಯಾಜಾಕಿ ಸಸ್ಯಗಳನ್ನು ತರಲಾಗಿದೆ. ಮಿಯಾಜಾಕಿ ಮಾವಿನ ಒಂದು ಗಿಡದ ಬೆಲೆ ಸುಮಾರು 1000 ರೂಪಾಯಿ ಎಂದು ತಿಳಿದುಬಂದಿದೆ.

ಜಪಾನಿನ ರೈತರು ಈ ಮಾವು ಕೃಷಿ ಮಾಡಿ ಲಕ್ಷಗಟ್ಟಲೆ ಆದಾಯ ಗಳಿಸುತ್ತಿದ್ದಾರೆ. ವಿದೇಶಗಳಿಗೆ ರಫ್ತು ಮಾಡಲಾಗುತ್ತಿದೆ. ಭಾರತದ ರೈತರು ಕೂಡ ಅದೇ ಮಾನದಂಡಗಳನ್ನು ಅನುಸರಿಸಬೇಕು. ಕೃಷಿ ವಿಧಾನಗಳಲ್ಲೂ ಜಪಾನೀಸ್ ಶೈಲಿಯ ವಿಧಾನಗಳನ್ನು ಅನುಸರಿಸಬೇಕು. ಗುಣಮಟ್ಟದಲ್ಲಿ ರಾಜಿ ಮಾಡಿಕೊಳ್ಳಬಾರದು. ಹಾಗಾದಾಗ ಮಾತ್ರ ಮಿಯಾಜಾಕಿಗೆ ಭಾರತದಲ್ಲಿ ಒಳ್ಳೆಯ ಮಾನ್ಯತೆ ಸಿಗುತ್ತದೆ.

ಜಪಾನೀಸ್​ ಮಿಯಾಜಾಕಿ ಮಾವಿನ ಹಣ್ಣು ವಿಶ್ವದಲ್ಲಿಯೇ ಅತಿ ದುಬಾರಿ ಮಾವಿನ ಹಣ್ಣುಗಳಲ್ಲಿ ಒಂದಾಗಿದೆ. ಅಪರೂಪದಲ್ಲಿ ಅಪರೂಪದ ಈ ತಳಿಯ ಹಣ್ಣಿಗೆ ಕೆಜಿಗೆ 8000 ರೂಪಾಯಿಗಳಿಂದ ಆರಂಭವಾಗಲಿದೆ. ಕಳೆದ ವರ್ಷ ಜಪಾನ್​ನಲ್ಲಿ ಒಂದು ಕೆಜಿಗೆ 2.7 ಲಕ್ಷ ರೂಪಾಯಿಗೆ ಮಾರಾಟವಾಗಿ ಜಗತ್ತನ್ನೇ ನಿಬ್ಬೆರಗಾಗಿಸಿತ್ತು. ಈ ತಳಿಯ ಹಣ್ಣಿಗೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಹೆಚ್ಚು ಬೇಡಿಕೆ ಇದೆ.