Success Story: ಹಾಲು ಮಾರಿ 30 ಲಕ್ಷ ಸಂಪಾದಿಸುವ ಮಹಿಳೆ! ಕೆಲಸ ಇಲ್ಲ ಎಂದು ಕೂರುವವರಿಗೆ ಇವರೇ ಸ್ಫೂರ್ತಿ

ಭಾರತದಲ್ಲಿರುವ 140 ಕೋಟಿ ಜನಸಂಖ್ಯೆಯಲ್ಲಿ ಕನಿಷ್ಠ 45 ಕೋಟಿ ಜನರು ಉದ್ಯೋಗ ಹುಡುಕುತ್ತಿದ್ದಾರೆ. ದೇಶದಲ್ಲಿ ಅನೇಕ ಯುವಕರು ಮತ್ತು ಮಧ್ಯವಯಸ್ಕ ಜನರು ಉದ್ಯೋಗ ಮಾಡುತ್ತಾ ಜೀವನ ಸಾಗಿಸುತ್ತಿದ್ದಾರೆ. ಇವರಲ್ಲಿ ವ್ಯಾಪಾರ ಕೌಶಲ ಹೊಂದಿರುವ ಅನೇಕ ಜನರಿದ್ದಾರೆ ಮತ್ತು ತಮ್ಮ ಕೌಶಲ್ಯವನ್ನು ಬಳಸಿಕೊಂಡು ಅವರು ಲಕ್ಷ ರೂಪಾಯಿಗಳನ್ನು ಗಳಿಸುವಲ್ಲಿ ಯಶಸ್ವಿಯಾಗುತ್ತಿದ್ದಾರೆ.

ನೀವು ಯಾವುದೇ ಕೆಲಸ ಮಾಡಲು ಸರಿಯಾದ ಮಾರ್ಗ ತಿಳಿದಿದ್ದರೆ ಮತ್ತು ನಿಮ್ಮೊಳಗೆ ವ್ಯವಹಾರ ಕೌಶಲ್ಯವನ್ನುಇದ್ದರೆ ನೀವು ಯಾವುದೇ ವ್ಯಾಪಾರ ಮಾಡಿ ಹಣ ಗಳಿಸಬಹುದು ಎಂಬುದನ್ನು ಇಲ್ಲೊಬ್ಬ ಮಹಿಳೆ ಸಾಬೀತು ಪಡಿಸಿದ್ದಾರೆ.

ರಾಜಸ್ಥಾನದ ಡುಂಗರ್‌ಪುರ ಜಿಲ್ಲೆಯ ನಿವಾಸಿ ಕೋಮಲ್ ಕುನ್ವರ್ ಸಿಸೋಡಿಯಾ ಒಂದು ವರ್ಷದಲ್ಲಿ 30 ಲಕ್ಷ ರೂಪಾಯಿ ಮೌಲ್ಯದ ಹಾಲು ಮಾರಾಟ ಮಾಡಿದ್ದಾರೆ. ಕೋಮಲ್ ಕುನ್ವರ್ ಅವರಂತಹ ಮಹಿಳೆಯರು ದೇಶದ ಕೋಟ್ಯಂತರ ಜನರಿಗೆ ಸ್ಫೂರ್ತಿಯ ಮೂಲವಾಗಿ ಹೊರಬರುತ್ತಿದ್ದಾರೆ.

ರಾಜಸ್ಥಾನದ ಡುಂಗರಪುರದ ಘವಾಡಿ ಗ್ರಾಮದ ಕೋಮಲ್ ಕುನ್ವರ್ ಸಿಸೋಡಿಯಾ ತಮ್ಮ ಜಿಲ್ಲೆಯಲ್ಲಿ ಕ್ರಾಂತಿಯನ್ನೇ ಮಾಡಿದ್ದಾರೆ. ಕೋಮಲ್ ಅವರು ದಿನಕ್ಕೆ 160 ಲೀಟರ್ ಹಾಲು ಮಾರಾಟ ಮಾಡುತ್ತಿದ್ದು, ವಾರ್ಷಿಕ 30 ಲಕ್ಷ ರೂಪಾಯಿ ಗಳಿಸುತ್ತಿದ್ದಾರೆ.

ಅವರು ತಿಂಗಳಿಗೆ 2.5 ಲಕ್ಷದವರೆಗೆ ಹಾಲು ಮಾರಾಟ ಮಾಡುತ್ತಿದ್ದಾರೆ. ಕೋಮಲ್ ಅವರು ಖರ್ಚೆಲ್ಲಾ ಕಳೆದು ತಿಂಗಳಿಗೆ ಒಂದು ಲಕ್ಷಕ್ಕೂ ಹೆಚ್ಚು ಲಾಭಗಳಿಸುತ್ತಿದ್ದಾರೆ. ವಿಶೇಷವೆಂದರೆ ಕೋಮಲ್ ಈ ಹಾಲನ್ನು ಯಾವುದೇ ಕಂಪನಿ ಅಥವಾ ಡೈರಿಗೆ ಮಾರಾಟ ಮಾಡುತ್ತಿಲ್ಲ. ಅವರು ಮನೆ ಮನೆಗೆ ಹಾಲನ್ನು ಸರಬರಾಜು ಮಾಡುತ್ತಿದ್ದಾರೆ.

ಕೋಮಲ್ ಅವರ ಗಂಡ ಗೋಪಾಲ್ ಸಿಂಗ್ ಸಿಸೋಡಿಯಾ ಅವರಿಗೆ ಹಸುಗಳ ಮೇಲೆ ವಿಪರೀತ ಪ್ರೀತಿ, ಇದೇ ಕಾರಣದಿಂದ 2014ರಲ್ಲಿ 5 ಗಿರ್​ ತಳಿಯ ಹಸುಗಳನ್ನು ತಂಡು ಸಾಕಿದರು. ದಂಪತಿ ಮೊದಲು 5 ಹಸುಗಳ ಹಾಲನ್ನು ಸುತ್ತಮುತ್ತಲಿನ ಮನೆಗಳಲ್ಲಿ ಮಾರಾಟ ಮಾಡಲು ಶುರು ಮಾಡಿದರು. ಕ್ರಮೇಣ ಹಾಲಿನ ಬೇಡಿಕೆ ಹೆಚ್ಚಾಗತೊಡಗಿತು. ಸದ್ಯ ಕೋಮಲ್ ಬಳಿ 35 ಹಸುಗಳು ಮತ್ತು 15 ಕರುಗಳಿವೆ, ಒಂದಷ್ಟು ಎಮ್ಮೆಗಳೂ ಇವೆ. ಹಸು-ಎಮ್ಮೆಗಳಿಂದ ದಿನಕ್ಕೆ 160 ಲೀಟರ್ ಹಾಲು ಪಡೆಯುತ್ತಿದ್ದಾರೆ. ಕೊಟ್ಟಿಗೆ ನಿರ್ವಹಣೆಗಾಗಿ ಇಬ್ಬರು ಕೆಲಸಗಾರರನ್ನು ಸಹ ನೇಮಿಸಿಕೊಂಡಿದ್ದಾರೆ.

ಕೋಮಲ್ ಕುನ್ವರ್ ಅವರ ಪತಿ ಗೋಪಾಲ್ ಸಿಂಗ್ ಖಾಸಗಿ ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದಾರೆ. ನಿತ್ಯ ಬೆಳಗ್ಗೆ ಬೈಕ್​ನಲ್ಲಿ ಗ್ರಾಹಕರ ಮನೆಗೆ ಹಾಲು ತಲುಪಿಸುತ್ತಾರೆ. ನಂತರ ಅವರು ಕೆಲಸಕ್ಕೆ ಹೋಗುತ್ತಾರೆ. ಸಂಜೆ ಕೆಲಸ ಮುಗಿಸಿ ಬಂದ ನಂತರ ಮತ್ತೆ ಬೈಕ್ ತೆಗೆದುಕೊಂಡು ಮನೆಗಳಿಗೆ ಹಾಲು ಕೊಡಲು ಹೋಗುತ್ತಿದ್ದರು. ಇದಲ್ಲದೆ, ಗೋಪಾಲ್ ಸಿಂಗ್ ಹಸುಗಳು ಮತ್ತು ಎಮ್ಮೆಗಳಿಗೆ ಅನಾರೋಗ್ಯಕ್ಕೆ ಒಳಗಾಗದರೆ ಸ್ವತಃ ಚಿಕಿತ್ಸೆ ನೀಡುತ್ತಾರೆ. ಬೆಳಗ್ಗೆ ಮತ್ತು ಸಂಜೆ ಮಾತ್ರ ದುಡಿಯಬೇಕಾಗಿರುವುದರಿಂದ ಅರೆಕಾಲಿಕ ಉದ್ಯೋಗವಾಗಿ ಹಾಲಿನ ವ್ಯಾಪಾರ ಆರಂಭಿಸಿದ್ದಾಗಿ ಗೋಪಾಲ್ ತಿಳಿಸಿದ್ದು, ನಂತರ ಈ ಕೆಲಸ ಪೂರ್ಣಾವಧಿಯಾಗಿದೆ.

ಹಸು ಸಾಗಾಣಿಕೆ ಆರಂಭಿಸಲು ಮೊದಲು ಹಸು, ಎಮ್ಮೆಗಳಿಗೆ ಒಳ್ಳೆಯ ಮೇವಿನ ನೀರಿನ ವ್ಯವಸ್ಥೆ ಮಾಡಬೇಕು ಎನ್ನುತ್ತಾರೆ ಕೋಮಲ್ ಮತ್ತು ಗೋಪಾಲ್. ಮೇವಿಗಾಗಿ ಸಾಕಷ್ಟು ಜಮೀನು ಹೊಂದಿರಬೇಕು. ನೀವೇನಾದರೂ ಮೇವು ಖರೀದಿಸಿ ಹಸು ಸಾಗಾಣಿಕೆ ಮಾಡಿದರೆ ಖಂಡಿತ ಯಾವುದೇ ಲಾಭ ಸಿಗುವುದಿಲ್ಲ ಎನ್ನುತ್ತಾರೆ ಈ ದಂಪತಿ.