Zero Shadow Day: ನಮ್ಮ ನೆರಳೇ ನಮಗೆ ಕಾಣಿಸಲ್ಲ! ನಿಮ್ಮೂರಿನ ದಿನಾಂಕ, ಸಮಯ ಚೆಕ್ ಮಾಡಿ

ಬಿಸಿಲಲ್ಲಿ ಇರುವಾಗ ನಮ್ಮ ನೆರಳು ನಮಗೆ ಕಾಣುವುದು ಮಾಮೂಲಿ. ಆದರೆ ಕರ್ನಾಟಕದಲ್ಲಿ ಇನ್ನು ಕೆಲವು ದಿನ ನಮ್ಮ ನೆರಳು ನಮಗೆ ಕಾಣಿಸುವುದೇ ಇಲ್ಲ! ಹೌದು, ಹೀಗೊಂದು ಕುತೂಹಲದ ವಿದ್ಯಮಾನ ಈಗಾಗಲೇ ಆರಂಭವಾಗಿದೆ.

ಸೂರ್ಯ ಆಕಾಶದಲ್ಲಿ ಉತ್ತರ ದಿಕ್ಕಿನತ್ತ ಚಲಿಸುವಾಗ ನಮ್ಮ ನೆತ್ತಿಯ ನೇರವಾಗಿ ಹಾದು ಹೋಗುತ್ತಾನೆ. ನಮ್ಮ ತಲೆಯ ಮೇಲೆ ಸೂರ್ಯನು ಇರುವಾಗ ನಮ್ಮ ನೆರಳು ನೇರವಾಗಿ ನಮ್ಮ ಕಾಲ ಕೆಳಗಿರುತ್ತದೆ. ಆ ಕ್ಷಣದಲ್ಲಿ ನಾವು ಸ್ವತಃ ನಮ್ಮ ನೆರಳಿನ ಮೇಲೆ ನಿಂತಿರುತ್ತೇವೆ. ಹೀಗಾಗಿ ಶೂನ್ಯ ನೆರಳಿನ ಕ್ಷಣದಲ್ಲಿ ನಮ್ಮ ನೆರಳು ನಮಗೆ ಕಾಣುವುದಿಲ್ಲ.

ಬೆಂಗಳೂರು ನಿವಾಸಿಗಳು ಏಪ್ರಿಲ್ 25 ರಂದು ಮಧ್ಯಾಹ್ನ 12.17 ಕ್ಕೆ ತಮ್ಮ ಶೂನ್ಯ ನೆರಳಿನ ವಿದ್ಯಮಾನವನ್ನು ಅನುಭವಿಸಬಹುದಾಗಿದೆ.

ದಕ್ಷಿಣ ಕನ್ನಡದಲ್ಲಿ ಏಪ್ರಿಲ್ 24 ರಂದು ಮಧ್ಯಾಹ್ನ 12:28 ಕ್ಕೆ ಶೂನ್ಯ ನೆರಳಿನ ಕ್ಷಣ ಉಂಟಾಗಲಿದೆ. ಉಡುಪಿಯಲ್ಲಿ ಏಪ್ರಿಲ್ 25 ರಂದು ಮಧ್ಯಾಹ್ನ 12:29 ಕ್ಕೆ ಈ ವಿಶಿಷ್ಟ ವಿದ್ಯಮಾನ ಸಂಭವಿಸಲಿದೆ.

ಯಾವುದೇ ವಿಶೇಷ ಉಪಕರಣಗಳು ಅಥವಾ ಉಪಕರಣಗಳಿಲ್ಲದೆ ಶೂನ್ಯ ನೆರಳು ಕ್ಷಣವನ್ನು ವೀಕ್ಷಿಸಬಹುದು ಎಂದು ಉಡುಪಿಯ ಪೂರ್ಣಪ್ರಜ್ಞ ಕಾಲೇಜಿನ ಭೌತಶಾಸ್ತ್ರ ವಿಭಾಗದ ಸಹಾಯಕ ಪ್ರಾಧ್ಯಾಪಕ ಅತುಲ್ ಭಟ್ ಮಾಹಿತಿ ನೀಡಿದ್ದಾರೆ.

ಏಪ್ರಿಲ್ 24ರಂದು ಹಾಸನದಲ್ಲೂ ಈ ವಿದ್ಯಮಾನವನ್ನು ಅನುಭವಿಸಬಹುದಾಗಿದೆ. ಏಪ್ರಿಲ್ 25ರಂದು ಚಿಕ್ಕಮಗಳೂರು, ತುಮಕೂರು, ಚಿಕ್ಕಬಳ್ಳಾಪುರದಲ್ಲಿ ಈ ವಿದ್ಯಮಾನ ನಡೆಯಲಿದೆ. ತೀರ್ಥಹಳ್ಳಿ, ಗೌರಿಬಿದನೂರು, ಕುಂದಾಪುರದಲ್ಲಿ ಏಪ್ರಿಲ್ 26 ರಂದು ಈ ಘಟನೆ ನಡೆಯಲಿದೆ.

ಏಪ್ರಿಲ್ 30ರಂದು ಕಾರವಾರದಲ್ಲಿ, ಮೇ 1ರಂದು ಹುಬ್ಬಳ್ಳಿ, ಹೊಸಪೇಟೆ, ಬಳ್ಳಾರಿಯಲ್ಲಿ, ಮೇ 2ರಂದು ಧಾರವಾಡ, ಗದಗದಲ್ಲಿ, ಮೇ 3ರಂದು ಸಿಂಧನೂರು, ಬೆಳಗಾವಿಯಲ್ಲಿ ಇದನ್ನು ಅನುಭವಿಸಬಹುದಾಗಿದೆ.