Special Music Program: ಬೆಂಗಳೂರಿನಲ್ಲಿ ವಿಶೇಷ ಸಂಗೀತ ಕಾರ್ಯಕ್ರಮ, ನೀವೂ ಹೋಗಿ

ಕನ್ನಡ ಸಿನಿಮಾರಂಗದಲ್ಲಿ ಹೀರೋ-ಹೀರೋಯಿನ್​ಗಳ ಜೋಡಿಯನ್ನು ಮಾತ್ರವಲ್ಲ ಸಂಗೀತ ನಿರ್ದೇಶಕರ ಜೋಡಿಯನ್ನ ಸಹ ಜನ ಮೆಚ್ಚಿದ್ದಾರೆ. ಮುಖ್ಯವಾಗಿ ಸಂಗೀತ ನಿರ್ದೇಶಕರ ಜೋಡಿ ಎಂದರೆ ತಕ್ಷಣ ನೆನಪಾಗುವುದು ರಾಜನ್-ನಾಗೇಂದ್ರ ಜೋಡಿ. ಈ ಜೋಡಿಯ ಸಂಗೀತ ಮೆಚ್ಚದವರು ಯಾರೂ ಇಲ್ಲ.

ಇವರು ಸಂಗೀತ ನೀಡಿದ ಪ್ರತಿಯೊಂದು ಹಾಡುಗಳು ಈಗಲೂ ಸಹ ಜನರಿಗೆ ಬಹಳ ಇಷ್ಟ. ಈ ಜೋಡಿಯಲ್ಲಿ ರಾಜನ್​ ಅವರು ಮೇ 27 1933ರಲ್ಲಿ ಜನಿಸಿ, 2020ರಲ್ಲಿ ನಿಧನರಾಗಿದ್ದಾರೆ. ನಾಳೆ ಅವರ ಜನ್ಮದಿನದ ಪ್ರಯುಕ್ತ ವಿಶೇಷ ಗಾನಯಾನ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದ್ದು, ಆಸಕ್ತರು ಭಾಗವಹಿಸಬಹುದಾಗಿದೆ.

ರಾಜನ್ - ನಾಗೇಂದ್ರ ಟ್ರಸ್ಟ್​ ವತಿಯಿಂದ ಈ ಕಾರ್ಯಕ್ರಮವನ್ನು ಆಯೋಜಿಸಲಾಗಿದ್ದು, ಕನ್ನಡ ಸಿನಿಮಾ ರಂಗದ ಹಿರಿಯ ನಿರ್ದೇಶಕರಾದ ಭಾರ್ಗವ ಹಾಗೂ ಲಹರಿ ವೇಲು ವಿಶೇಷ ಕಾರ್ಯಕ್ರಮದ ಮುಖ್ಯ ಅತಿಥಿಗಳಾಗಿ ಆಗಮಿಸುತ್ತಿದ್ದಾರೆ.

ಈ ಕಾರ್ಯಕ್ರಮದಲ್ಲಿ ಸಂಗೀತ ಮಾತ್ರವಲ್ಲದೇ ಹೊಸ ಪ್ರತಿಭೆಗಳ ಅನಾವರಣ ಸಹ ಆಗಲಿದ್ದು, ಬೆಳಗ್ಗೆ 11 ಗಂಟೆಗೆ ಈ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದೆ. ಈ ಕಾರ್ಯಕ್ರಮ ರೇಣುಕಾಂಬ ಡಿಜಿಟಲ್ ಸ್ಟೋಡಿಯೋ, ಲಾವಣ್ಯ ಟವರ್ಸ್​, 4ನೇ ಮೇನ್ 28 ನೇ ಅಡ್ಡರಸ್ತೆ ಮಲ್ಲೇಶ್ವರಂನಲ್ಲಿ ನಡೆಯಲಿದೆ.

ಇನ್ನು ಈ ರಾಜನ್ ಮತ್ತು ನಾಗೇಂದ್ರ ಜೋಡಿ ಒಡಹುಟ್ಟಿದ ಸಹೋದರರಾಗಿದ್ದು. ಇವರ ತಂದೆ ರಾಜಪ್ಪ ಸಹ ಕನ್ನಡದ ಮೂಕಿ ಚಿತ್ರಗಳಲ್ಲಿ ಹಿನ್ನಲೆ ಸಂಗೀತ ನೀಡುತ್ತಿದ್ದರು. ಹಾಗಾಗಿ ರಕ್ತಗತವಾಗಿದ್ದ ಕಲೆ ಅವರನ್ನು ಕನ್ನಡ ಸಿನಿಮಾರಂಗ ಮಾತ್ರವಲ್ಲದೇ ಬೇರೆ ಭಾಷೆಗಳಲ್ಲಿ ಸಹ ಪ್ರಸಿದ್ಧಿ ಪಡೆಯಲು ಕಾರಣವಾಗಿತ್ತು.

ಈ ಜೋಡಿಯ ಸಿನಿಮಾಗಳ ಲಿಸ್ಟ್​ ಬಹಳ ಉದ್ದವಾಗಿದ್ದು, ಅವುಗಳ ಬಹಳ ಫೇಮಸ್​ ಎಂದರೆ ನಾ ನಿನ್ನ ಮರೆಯಲಾರೆ, ಎರಡು ಕನಸು, ,ಚಂದನದ ಗೊಂಬೆ ,ಗಂಧದ ಗುಡಿ ,ಬಯಲು ದಾರಿ ,ಗಿರಿ ಕನ್ಯೆ ಮುಂತಾದವು. ಹಾಗೆಯೇ, ಕೆಲ ಸಿನಿಮಾಗಳ ಹಾಡುಗಳನ್ನು ಈಗಲೂ ಜನ ಗುನುಗುತ್ತಾರೆ.

ಆಕಾಶ ದೀಪವು ನೀನು, ಭಾನಲ್ಲೂ ನೀನೆ ಭುವಿಯಲ್ಲೂ ನೀನೇ, ನೀರ ಬಿಟ್ಟು ನೆಲದ ಮೇಲೆ ದೋಣಿ ಸಾಗದು, ಮಾಮರವೆಲ್ಲೋ ಕೋಗಿಲೆಯಲ್ಲೋ, ಬಿಸಿಲಾದರೇನು ಮಳೆಯಾದರೇನು ಹೀಗೆ ಈ ಜೋಡಿಯ ಅದ್ಭುತ ಹಾಡುಗಳ ಪಟ್ಟಿ ಮುಗಿಯುವುದಿಲ್ಲ.