Namma Metro: ಬೆಂಗಳೂರಿನ ಮೆಟ್ರೋ ಪ್ರಯಾಣಿಕರಿಗೆ ಗುಡ್​ ನ್ಯೂಸ್​

ಬೆಂಗಳೂರಿನಲ್ಲಿ ಪ್ರತಿನಿತ್ಯ ಆಫೀಸ್​, ಕಾಲೇಜು ಎಂದೆಲ್ಲಾ ಹೋಗುವವರ ಪಾಲಿಗೆ ಮೆಟ್ರೋ ವರದಾನವಾಗಿದೆ ಎಂದರೆ ಅನುಮಾನವಿಲ್ಲ. ಯಾವುದೇ ಟ್ರಾಫಿಕ್ ಸಮಸ್ಯೆ ಇಲ್ಲದೇ, ಸುಲಭವಾಗಿ ಹಾಗೂ ಬೇಗನೆ ನಿರ್ದಿಷ್ಟ ಸ್ಥಳಕ್ಕೆ ತಲುಪಬಹುದು. ಹಾಗಾಗಿ ಬಹುತೇಕ ಜನರು ಮೆಟ್ರೋ ಅವಲಂಭಿಸಿದ್ದಾರೆ.

ಸದ್ಯ ಮೆಟ್ರೋ ಪ್ರಯಾಣಿಕರಿಗೆ ಸಿಗುತ್ತಿರುವ ಸಿಹಿ ಸುದ್ದಿ ಏನೆಂದರೆ ರೈಲಿಗಾಗಿ ಕಾಯುವ ಸಮಯ 3 ರಿಂದ 3.5 ನಿಮಿಷಗಳ ವರೆಗೆ ಇಳಿಕೆ ಆಗುತ್ತದೆ. ಇದಕ್ಕೆ ಕಾರಣ ಹೊಸ 36 ರೈಲು ಸೆಟ್​ಗಳನ್ನು ಬೆಂಗಳೂರು ಮೆಟ್ರೋ ರೈಲು ಕಾರ್ಪೋರೇಷನ್ ಪಡೆದಿರುವುದು.

ಸದ್ಯದ ಮಾಹಿತಿ ಪ್ರಕಾರ ಕೋಲ್ಕತ್ತಾ ಮೂಲದ Titagarh Wagon Limited ಹಾಗೂ CRRC ಕಾರ್ಪೋರೇಷನ್​ ಪಾಲುದಾರಿಕೆಯಲ್ಲಿ 36 ಹೊಸ ರೈಲು ಸೆಟ್​ಗಳು ಲಭಿಸಲಿದ್ದು, ಈ ಕಾರಣದಿಂದ ಗ್ರೀನ್ ಹಾಗೂ ಪರ್ಪಲ್ ಲೈನ್​ ಗಳಲ್ಲಿ ಪ್ರಯಾಣಿಕರಿಗೆ ಕಾಯುವ ಸಮಯ ಇನ್ನೂ ಕಡಿಮೆ ಆಗಲಿದೆ.

Titagarh Wagon Limited ಕಂಪನಿಯು ಬಹುತೇಕ ರೈಲು ಸೆಟ್​ಗಳನ್ನು ಪೂರೈಸಲಿದ್ದು, CRRC ಕೇವಲ 2 ಸೆಟ್​ ಪೂರೈಸಲಿದೆ. ಈ 2 ಸೆಟ್​ ಅನ್ನು ಪರೀಕ್ಷಾರ್ಥವಾಗಿ ಬಳಸಲಾಗುತ್ತದೆ. ಮೂಲಗಳ ಪ್ರಕಾರ ಮೊದಲ ಸೆಟ್​ ಅನ್ನು ಆಗಸ್ಟ್ ಅಂತ್ಯದಲ್ಲಿ​ ಹಾಗೂ 2ನೇ ಸೆಟ್​ ಅನ್ನು ಸೆಪ್ಟೆಂಬರ್ ಆರಂಭದಲ್ಲಿ ಕಳುಹಿಸಲಾಗುತ್ತದೆ.

ಸುಮಾರು 216 ಕೋಚ್​ಗಳ ಈ ಸೆಟ್​ ಗೆ 1,578 ಕೋಟಿ ರೂ.ಗಳ ಒಪ್ಪಂದವನ್ನು ಡಿಸೆಂಬರ್ 2019 ರಲ್ಲಿ ಸಹಿ ಹಾಕಿದ್ದು, ಇನ್ನು ಈ ಸೆಟ್​ಗಳಲ್ಲಿ 21 ಡಿಸೈನ್​ ಟೂ ಗೋ ಕೋಚ್​ ಗಳನ್ನು ಹೊಂದಿರುತ್ತದೆ. ಇವುಗಳನ್ನು ಸರ್ಕ್ಯೂಟ್‌ಗಳ ಮೂಲಕ ಟ್ರ್ಯಾಕ್ ಮಾಡಬಹುದು ಎಂದು ಕಂಪನಿ ತಿಳಿಸಿದೆ.

ಕಂಪನಿ ತಿಳಿಸಿರುವಂತೆ ಮೊದಲ ಮಾದರಿಯ DTG ರೈಲು ಸೆಟ್ ಅನ್ನು ನವೆಂಬರ್‌ನಲ್ಲಿ ಪರೀಕ್ಷೆ ನಡೆಸಲಾಗುತ್ತದೆ. ನಂತರ ಅದನ್ನು ಪ್ರಾಯೋಗಿಕವಾಗಿ ಕೆಲ ದಿನಗಳ ಕಾಲ ರನ್ ಮಾಡಿಸಲಾಗುತ್ತದೆ. ಇನ್ನು ಉಳಿದ ರೈಲು ಸೆಟ್​ಗಳನ್ನು ಕೋಲ್ಕತ್ತಾ ಮೂಲಕದ TWL ಕಂಪನಿ 2024ರ ಮಾರ್ಚ್ ನಂತರ ಪೂರೈಸುತ್ತದೆ.

ನಂತರ ಪ್ರತಿ ತಿಂಗಳು 2 ಸೆಟ್​ ಒದಗಿಸಲಾಗುತ್ತದೆ ಎಂದು ಕಂಪನಿ ಮಾಹಿತಿ ನೀಡಿದೆ. ಈ ಹೊಸ ರೈಲು ಸೆಟ್​ಗಳ ಕಾರಣದಿಂದ 5 ನಿಮಿಷವಿದ್ದು ಮೆಟ್ರೋ ಕಾಯುವಿಕೆ ಸಮಯ 3 ನಿಮಿಷಕ್ಕೆ ಇಳಿಕೆಯಾಗುತ್ತಿರುವುದು ನಿಜಕ್ಕೂ ಸಂತಸದ ಸಂಗತಿ