Bengaluru: ಕಾರ್ ಮೇಲೆ ನಾಯಿ ಮೂತ್ರ ಮಾಡಿದ್ದ ವಿಚಾರಕ್ಕೆ ಗಲಾಟೆ: ವೃದ್ಧನ ಮೇಲೆ ಕಲ್ಲಿನಿಂದ ಹಲ್ಲೆ

ಹಲ್ಲೆಯ ಬಳಿಕ ಆರೋಪಿ ಚಾರ್ಲ್ಸ್ ಪರಾರಿಯಾಗಿದ್ದಾನೆ. ಕಲ್ಲಿನಿಂದ ಹಲ್ಲೆಗೊಳಗಾದ ವೃದ್ಧ ಗೇರಿ ರೋಜಾರಿಯೊ ಅವರ ಎರಡು ಹಲ್ಲುಗಳು ಮುರಿದಿವೆ. ಭಾನುವಾರ ರಾತ್ರಿ 11.30 ರ ಸುಮಾರಿಗೆ ನಡೆದ ಘಟನೆ ನಡೆದಿದೆ. ಚಿನ್ನಪ್ಪ ಲೇಔಟ್ ನಲ್ಲಿ ಈ ಘಟನೆ ನಡೆದಿದೆ.

ಗೇರಿ ರೋಜಾರಿಯಾ ಅವರ ಸಾಕು ನಾಯಿ ಎದುರು ಮನೆಯ ಚಾರ್ಲ್ಸ್ ಕಾರಿನ ಮುಂದೆ ಮೂತ್ರ ಮಾಡಿದೆ. ಇದೇ ವಿಚಾರಕ್ಕೆ ಚಾರ್ಲ್ಸ್ ಮತ್ತು ರೋಜಾರಿಯಾ ಕುಟುಂಬದ ನಡುವೆ ಗಲಾಟೆ ನಡೆದಿದೆ. ಈ ವೇಳೆ ಮನೆಯ ಎರಡನೇ ಮಹಡಿಯ ಬಾಲ್ಕನಿಯಲ್ಲಿ ನಿಂತಿದ್ದ ಚಾರ್ಲ್ಸ್ ವೃದ್ಧ ಅಂತಾನೂ ನೋಡದೇ ಕಲ್ಲು ಎಸೆದಿದ್ದಾನೆ.

ರಭಸವಾಗಿ ಬಂದ ಕಲ್ಲು ಗೇರಿ ಅವರ ಗದ್ದದ ಭಾಗಕ್ಕೆ ಬಿದ್ದು ರಕ್ತ ಚಿಮ್ಮಿದ್ದು, ಎರಡು ಹಲ್ಲುಗಳ ಸಹ ಬಿದ್ದಿವೆ, ಸದ್ಯ ಗೇರಿ ಅವರು ಚಿಕಿತ್ಸೆ ಪಡೆದುಕೊಂಡು ಮನೆಗೆ ಹಿಂದಿರುಗಿದ್ದಾರೆ, ಘಟನೆ ಬಳಿಕ ಚಾರ್ಲ್ಸ್ ನಾಪತ್ತೆಯಾಗಿದ್ದಾನೆ.

ನಾಯಿ ಮೂತ್ರ ಮಾಡಿದ್ದಕ್ಕೆ ಜಗಳ ನಡೆದಿತ್ತು. ಈ ಹಿಂದೆಯೂ ಹಲವು ಬಾರಿ ನಮ್ಮ ಜೊತೆ ಚಾರ್ಲ್ಸ್ ಜಗಳ ಮಾಡಿದ್ದಾರೆ. ಗಲಾಟೆ ನಡೆದ ದಿನ ಮನೆಯಲ್ಲಿ ಅತ್ತೆ ಮತ್ತು ಮಾವ ಇಬ್ಬರೇ ಇದ್ರು. ಆದ್ರೆ ಭಾನುವಾರ ಕಲ್ಲಿನಿಂದ ಹಲ್ಲೆ ಮಾಡಿದ್ದಕ್ಕೆ ದೂರು ದಾಖಲಿಸಿದ್ದೇವೆ. ನಮ್ಮ ಮನೆ ಮೇಲೆ ಬಾಡಿಗೆಗೆ ಇರುವ ಅರುಣ್ ಎಂಬವರು ಕೂಡಲೇ ಆಸ್ಪತ್ರೆಗೆ ದಾಖಲಿಸಿದ್ದಾರೆ ಎಂದು ಗೇರಿ  ಅವರ ಸೊಸೆ ಮಾರಿಯಾ ಹೇಳಿದ್ದಾರೆ.

ಈ ಸಂಬಂಧ ಗೇರಿ ರೋಜರಿಯಾ ಕುಟುಂಬ ಬಾಣಸವಾಡಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಕಲ್ಲಿನಿಂದ ಹೊಡೆದು, ಅವಾಚ್ಯ ಪದ ಬಳಸಿ ನಿಂದಿಸಿದ್ದಾರೆ ಎಂದು ದೂರಿನಲ್ಲಿ ಗೇರಿ ರೋಜಾರಿಯಾ ಉಲ್ಲೇಖಿಸಿದ್ದಾರೆ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಆರೋಪಿಯ ಬಂಧನಕ್ಕೆ ಬಲೆ ಬೀಸಿದ್ದಾರೆ.