Lalbagh Flower Show 2023: ಬೆಂಗಳೂರಿನಲ್ಲಿ ಹೂಗಳ ಹಬ್ಬ! ಲಾಲ್​ಬಾಗ್​ ಪುಷ್ಪಲೋಕದ ವೈಭವ ನೋಡಿ

ಬೆಂಗಳೂರಿನ ಲಾಲ್​ಬಾಗ್​ನಲ್ಲಿ ಮತ್ತೆ ಪುಷ್ಪಲೋಕವೇ ಅರಳಿದೆ. ವಿಶ್ವಪ್ರಸಿದ್ಧ ಲಾಲ್​ಬಾಗ್ ಬೊಟಾನಿಕಲ್ ಗಾರ್ಡನ್ ಮತ್ತೆ ಸೌಂದರ್ಯವನ್ನೇ ಹೊದ್ದು ಪ್ರವಾಸಿಗರನ್ನ ಕೈಬೀಸಿ ಕರೆಯುತ್ತಿದೆ.

ಇಂದು, ಅಂದರೆ ಜನವರಿ 19ರಿಂದ ಜನವರಿ 29ರವರೆಗೆ ಲಾಲ್​ಬಾಗ್​ನಲ್ಲಿ ಗಣರಾಜ್ಯೋತ್ಸವದ ನಿಮಿತ್ತ ಫಲಪುಷ್ಪ ಪ್ರದರ್ಶನ ಹಮ್ಮಿಕೊಳ್ಳಲಾಗಿದೆ.

ಲಾಲ್​ಬಾಗ್ ಫ್ಲವರ್ ಶೋವನ್ನು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಉದ್ಘಾಟಿಸಿದ್ದಾರೆ. "ಈ ಫ್ಲವರ್ ಶೋನಿಂದ ಸಸ್ಯ ಸಂಪತ್ತು ಪ್ರದರ್ಶನ ಆಗ್ತಿದೆ. ರಾಜ್ಯಾದ್ಯಂತ ಹಸಿರು ಪರಿಸರ ವಿಸ್ತರಣೆ ಆಗಬೇಕಿದೆ. ರಾಜ್ಯದಲ್ಲಿ ಹಸಿರೀಕರಣ ವಿಸ್ತರಣೆಗೆ ಬಜೆಟ್ ನಲ್ಲಿ 100 ಕೋಟಿ ಮೀಸಲಿಡುತ್ತೇವೆ. ಗುಡ್ಡಗಾಡು ಪ್ರದೇಶದಲ್ಲಿ ಹಸಿರು ಸಮೃದ್ದಿಯಾಗಬೇಕು ಎಂದು ಅವರು ಕರೆ ನೀಡಿದ್ದಾರೆ.

ಅಷ್ಟೇ ಅಲ್ಲದೇ, “ತೋಟಗಾರಿಕೆ ಫಾರ್ಮ್ ಅಭಿವೃದ್ಧಿಗೆ ಬಜೆಟ್ ನಲ್ಲಿ ಅನುದಾನ ನೀಡಲು ತೀರ್ಮಾನ ಮಾಡಲಾಗಿದೆ ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಘೋಷಿಸಿದ್ದಾರೆ.

ಬೆಂಗಳೂರಿಗೆ ಗಾರ್ಡನ್ ಸಿಟಿ ಎನ್ನಲಾಗುತ್ತಿತ್ತು. ಆದರೆ ಇತ್ತೀಚಿಗೆ ಗಾರ್ಡನ್​ಗಳ ಸಂಖ್ಯೆ ಕಡಿಮೆಯಾಗಿದೆ. ಲಾಲ್ ಬಾಗ್, ಕಬ್ಬನ್ ಪಾರ್ಕ್ ಸೇರಿ ಬಿಬಿಎಂಪಿ ಪಾರ್ಕ್ ಅಭಿವೃದ್ಧಿಗೆ ಒತ್ತು ನೀಡಲಿದೆ. ನಗರದ ಹೊರ ವಲಯದಲ್ಲಿ ಗಾರ್ಡನ್​ಗಳ ಅಭಿವೃದ್ಧಿ ಮಾಡಲಾಗುತ್ತದೆ ಎಂದು ಸಹ ಸಿಎಂ ತಿಳಿಸಿದ್ದಾರೆ.

ಈ ಫಲಪುಷ್ಪ ಪ್ರದರ್ಶನದಲ್ಲಿ ಲಾಲ್​ಬಾಗ್ ಗಾಜಿನ ಉದ್ಯಾನವನ ಹೂವುಗಳಿಂದ ಅಲಂಕಾರವಾಗಿರೋದನ್ನು ನೋಡೋದೇ ಕಣ್ಣಿಗೆ ಹಬ್ಬದಂತಿದೆ.

ಲಾಲ್​ಬಾಗ್ ಫಲಪುಷ್ಪ ಪ್ರದರ್ಶನದ ಜೊತೆಗೆ ತೋಟಗಾರಿಕಾ ಇಲಾಖೆಯು ಜನವರಿ 20 ಮತ್ತು 21ರಂದು ಪ್ರತ್ಯೇಕವಾಗಿ ತೋಟಗಾರಿಕಾ ಪ್ರದರ್ಶನವನ್ನು ಆಯೋಜಿಸಿದೆ.

ಡಾರ್ಜಿಲಿಂಗ್, ಕೇರಳ, ತಮಿಳುನಾಡು ಮುಂತಾದ ರಾಜ್ಯಗಳಿಂದಲೂ ಲಾಲ್​ಬಾಗ್​ ಫಲಪುಷ್ಪ ಪ್ರದರ್ಶನಕ್ಕೆ ಹೂಗಳನ್ನು ತರಿಸಲಾಗಿದೆ.

ಬೆಂಗಳೂರಿನ ಇತಿಹಾಸವನ್ನೇ ಥೀಮ್ ಆಗಿಟ್ಟುಕೊಂಡು ಹೂಗಳಿಂದ ಸುಂದರ ಆಕೃತಿಗಳನ್ನು ರಚಿಸಿರುವುದು ಕಣ್ಣಿಗೆ ಮುದ ನೀಡುತ್ತದೆ.

ಫಲಪುಷ್ಪ ಪ್ರದರ್ಶನಕ್ಕೆ ಸಂಬಂಧಿಸಿದ ವಿಷಯಗಳನ್ನೇ ಆಧರಿಸಿ ವಿವಿಧ ಪ್ರತಿಕೃತಿಗಳನ್ನು ತಯಾರಿಸೋದು ಇಲ್ಲಿ ಇನ್ನೊಂದು ಹೆಗ್ಗಳಿಕೆ. 

ನೀವೂ ಒಮ್ಮೆ ಬೆಂಗಳೂರಿನ ಲಾಲ್​ಬಾಗ್​ ಫಲಪುಷ್ಪ ಪ್ರದರ್ಶನಕ್ಕೆ ಭೇಟಿ ನೀಡಿ ಖುಷಿಪಡಬಹುದು. ಆದರೆ ನೆನಪಿಡಿ, ಜನವರಿ 29ರವರೆಗೆ ಮಾತ್ರ ಈ ಹೂಗಳ ಹಬ್ಬ ನಡೆಯಲಿದೆ.