Viral Photos: ಮೃತ ತಾತನ ಹಣೆಗೆ ಮುತ್ತಿಟ್ಟ ಕೋತಿ, ಸಂಬಂಧ ಅಂದ್ರೆ ಇದು ಕಣ್ರೀ!

ಮಂಗನಿಂದ ಮಾನವ ಅಂತಾರೆ. ಇದೀಗ ಕೋತಿಯೊಂದು ಓರ್ವ ಅಜ್ಜನ ಜೊತೆ ಇಟ್ಟುಕೊಂಡಿರೋ ಸಂಬಂಧವೊಂದು ಮನಃಕಲಕುವಂತಿದೆ.

ತನಗೆ ನಿತ್ಯವೂ ಬಾಳೆಹಣ್ಣು ನೀಡುತ್ತಿದ್ದ ವೃದ್ದ ಮೃತಪಟ್ಟ ಸಂದರ್ಭ ಕೋತಿ ಬಂದು ಹಣೆಗೆ ಮುತ್ತಿಟ್ಟ ಹೃದಯಸ್ಪರ್ಶಿ ಘಟನೆ ವಿಜಯನಗರ ಜಿಲ್ಲೆ ಹಗರಿಬೊಮ್ಮನಹಳ್ಳಿಯಲ್ಲಿ ನಡೆದಿದೆ.

ಹಗರಿಬೊಮ್ಮನ ಹಳ್ಳಿ ಪಟ್ಟಣದ ಹಳೆ ಹಗರಿಬೊಮ್ಮನಹಳ್ಳಿಯಲ್ಲಿ ಈ ಘಟನೆ ನಡೆದಿದೆ. ಪರಶುರಾಮ್ ಷಾ ಎಂಬ 88 ವರ್ಷದ ಅಜ್ಜನೋರ್ವ ಮೃತಪಟ್ಟಿದ್ದರು. ಈ ಸಂದರ್ಭದಲ್ಲಿ ಮೃತರ ಕುಟುಂಬಸ್ಥರು ಶವದ ಬಳಿ ಕುಳಿತಿದ್ದಾಗ ಕೋತಿರಾಯ ಆಗಮಿಸಿದ್ದಾನೆ.

ತುಸು ಹೊತ್ತು ಸುಮ್ಮನೆ ಕುಳಿತು, ನಂತರ ಮೃತ ತಾತನ ಬಳಿಗೆ ಹೋಗಿ ಹಣೆಗೆ ಮುತ್ತಿಟ್ಟಿದೆ. ಇದನ್ನು ಕಂಡು ನೆರೆದವರೆಲ್ಲರೂ ಭಾವುಕರಾಗಿದ್ದಾರೆ.

ಈ ಕೋತಿಗೆ ಮೃತ ಪರಶುರಾಮ್ ಷಾ ಅವರು ನಿತ್ಯ ಬಾಳೆಹಣ್ಣು ನೀಡುತ್ತಿದ್ದರು. ಇವರ ಸಾವಿಗೆ ಎರಡು ತಿಂಗಳ ಹಿಂದಿನಿಂದ ಅವರಿಗೆ ಕೋತಿಯ ಒಡನಾಟ ಪ್ರಾರಂಭವಾಗಿತ್ತಂತೆ.

ಪರಶುರಾಮ್ ಷಾ ಅವರು ಶ್ರೀರಾಮ ನವಮಿಯ ದಿನ ಸಾವನ್ನಪ್ಪಿದ್ದರು. ಸಾವಿನ ಹಿಂದಿನ ದಿನ ಅವರ ಹುಟ್ಟುಹಬ್ಬವಿತ್ತು.

ಪರಶುರಾಮ್ ಷಾ ಅವರು ಮದ್ಯಪ್ರಿಯರಾಗಿದ್ದರು. ಹೀಗಾಗಿ ಮದ್ಯದ ಬಾಟಲ್ ಮಾದರಿಯ ಕೇಕ್ ಕತ್ತರಿಸಿ ಹುಟ್ಟುಹಬ್ಬವನ್ನು ಸಹ ಕುಟುಂಬಸ್ಥರು ಆಚರಿಸಿದ್ದರು. ಸದ್ಯ ಈ ವಿಡಿಯೋ ವೈರಲ್ ಆಗಿದೆ.

ಒಟ್ಟಾರೆ ಕೋತಿಯೊಂದಿಗೆ 88ರ ಹರೆಯದ ಪರಶುರಾಮ್ ಹೊಂದಿದ್ದ ಸಂಬಂಧ ಅವರು ಮೃತಪಟ್ಟ ನಂತರವೂ ಮುಂದುವರೆದ್ದು ತುಂಬಾ ವೈರಲ್ ಆಗ್ತಿದೆ.