Kuja Dosha: ಕುಜದೋಷ ಇದ್ರೆ ಮದುವೆ ಆಗಲ್ವಾ? ಇಲ್ಲಿದೆ ನೋಡಿ ಸಂಪೂರ್ಣ ಮಾಹಿತಿ

ಜ್ಯೋತಿಷ್ಯ ಶಾಸ್ತ್ರದಲ್ಲಿ ಕುಜದೋಷ ಬಹಳ ಮುಖ್ಯ. ಕಾಳಗ, ಯುದ್ಧ, ಕೋಪ, ಕ್ರೋಧ ಮತ್ತು ಆತುರಕ್ಕೆ ಮಂಗಳ ಕಾರಣ ಎನ್ನಲಾಗುತ್ತದೆ. ಆದ್ದರಿಂದ, ಜಾತಕದಲ್ಲಿ ಮಂಗಳನ ಸ್ಥಾನವು ಮುಖ್ಯವಾಗುತ್ತದೆ. ಮಂಗಳ ದುಷ್ಟ ಗ್ರಹ ಎನ್ನಲಾಗುತ್ತದೆ. ಹಠಾತ್ ಕೆಟ್ಟದ್ದನ್ನು ಮಾಡುವುದರಲ್ಲಿ ಮಂಗಳಕ್ಕಿಂತ ಬೇರೆ ಗ್ರಹವಿಲ್ಲ. ಕುಜ ಲಗ್ನದಿಂದ 1, 2, 4, 7, 8, 12 ನೇ ಸ್ಥಾನದಲ್ಲಿದ್ದಾಗ ಕುಜ ದೋಷ ಉಂಟಾಗುತ್ತದೆ. ವೈವಾಹಿಕ ಜೀವನದಲ್ಲಿ ಈ ಸ್ಥಾನಗಳು ಬಹಳ ಮುಖ್ಯ. ಆದ್ದರಿಂದ ಮಂಗಳದಂತಹ ದೋಷಪೂರಿತ ಗ್ರಹವು ಈ ಸ್ಥಾನದಲ್ಲಿದ್ದಾಗ, ವೈವಾಹಿಕ ಜೀವನವು ಹಾನಿಗೊಳಗಾಗುವ ಸಾಧ್ಯತೆಯಿದೆ.

ಮಾಂಗಲ್ಯಕ್ಕೆ ಅಪಾಯ: ವಧು-ವರರಿಬ್ಬರಿಗೂ ಕುಜದೋಷವಿದ್ದರೆ ಆ ದೋಷ ಪರಿಹಾರವಾಗುತ್ತದೆ. ಪತಿ ಪತ್ನಿಯರಲ್ಲಿ ಒಬ್ಬರಿಗೆ ಮಾತ್ರ ದೋಷ ಇರುವುದು ಒಳ್ಳೆಯದಲ್ಲ. ಸಾಮಾನ್ಯವಾಗಿ ಇದು ವೈವಾಹಿಕ ಜೀವನವನ್ನು ಹಾಳು ಮಾಡುತ್ತದೆ. ಕುಜ ದೋಷವನ್ನು ಅಂಗಾರಕ ದೋಷ ಮತ್ತು ಮಾಂಗಲ್ಯ ದೋಷ ಎಂದೂ ಕರೆಯುತ್ತಾರೆ. ಅಂದರೆ ಮಾಂಗಲ್ಯಕ್ಕೆ ಧಕ್ಕೆ ಬರುತ್ತದೆ. ಹಾಗಾಗಿ ಮದುವೆಗೂ ಮುನ್ನ ವಧು-ವರರ ಜಾತಕ ನೋಡಿ ದೋಷ ಇದೆಯೋ ಇಲ್ಲವೋ ಎಂಬುದನ್ನು ನಿರ್ಧರಿಸಬೇಕು.

1 ನೇ ಸ್ಥಾನ: ಯಾವುದೇ ಜಾತಕದಲ್ಲಿ ಮಂಗಳ 1 ನೇ ಸ್ಥಾನದಲ್ಲಿದ್ದಾಗ ಪ್ರಧಾನ ಕುಜ ದೋಷ ಉಂಟಾಗುತ್ತದೆ. ಲಗ್ನದಲ್ಲಿ ಅಥವಾ 1ನೇ ಮನೆಯಲ್ಲಿ ಮಂಗಳ ಇರುವ ವ್ಯಕ್ತಿಗೆ ಕೋಪ ಜಾಸ್ತಿಯಂತೆ. ಆತುರದ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಾರಂತೆ. ಇದಲ್ಲದೇ, ಲೈಂಗಿಕತೆಯಲ್ಲಿ ಸಹ ಸಮಸ್ಯೆ ಅವರನ್ನು ಕಾಡುತ್ತದೆ. ಸಾಮಾನ್ಯವಾಗಿ ಇಂತಹ ರೋಗಲಕ್ಷಣಗಳು ವೈವಾಹಿಕ ಜೀವನವನ್ನು ಹಾಳುಮಾಡುವ ಸಾಧ್ಯತೆಯಿದೆ.

ಎರಡನೇ ಮನೆ: ಜಾತಕ ಚಕ್ರದಲ್ಲಿ ಎರಡನೇ ಮನೆಯನ್ನು ಸಂಪತ್ತಿನ ಮನೆ ಎನ್ನಲಾಗುತ್ತದೆ. ಹಾಗಾಗಿ ಮಂಗಳ ಎರಡನೇ ಮನೆಯಲ್ಲಿದ್ದಾಗ ಕೌಟುಂಬಿಕ ಜೀವನದಲ್ಲಿ ಸಮಸ್ಯೆ ಬರುತ್ತದೆ. ಮಾಥಿನ ಮೇಲೆ ಹಿಡಿತ ಇರುವುದಿಲ್ಲ. ಯಾರ ಮಾತನ್ನೂ ಕೇಳುವ ಅಭ್ಯಾಸ ಸಹ ಅವರಿಗೆ ಇರುವುದಿಲ್ಲ. ವಿವಾದಗಳು ಮತ್ತು ಭಿನ್ನಾಭಿಪ್ರಾಯಗಳು ಹೆಚ್ಚಾಗುತ್ತದೆ.

ನಾಲ್ಕನೇ ಮನೆ: ನಾಲ್ಕನೇ ಮನೆಯಲ್ಲಿ ಮಂಗಳ ಇರುವ ವ್ಯಕ್ತಿಯ ಭಾವನೆಗಳನ್ನು ನಿಯಂತ್ರಿಸುವುದು ಕಷ್ಟ. ಕುಟುಂಬದಲ್ಲಿ ಯಾವಾಗಲೂ ಒತ್ತಡ ಇರುತ್ತದೆ. ದಾಂಪತ್ಯ ಜೀವನದಲ್ಲಿ ಬರೀ ಸಮಸ್ಯೆಗಳಾಗುತ್ತದೆ. ಆಗಾಗ ನಿರ್ಧಾರಗಳನ್ನು ಬದಲಾಯಿಸುತ್ತಾರೆ. ಇದರ ಜೊತೆಗೆ ಅನಾರೋಗ್ಯಕ್ಕೆ ತುತ್ತಾಗುವ ಸಾಧ್ಯತೆಯೂ ಇರುತ್ತದೆ.

ಏಳನೇ ಮನೆ: ಜಾತಕದಲ್ಲಿ ಏಳನೇ ಮನೆಯನ್ನು ಜೀವನ ಸಂಗಾತಿಗೆ ಸಂಬಂಧಿಸಿದ ಮನೆ ಎನ್ನಲಾಗುತ್ತದೆ. ಹಾಗಾಗಿ ಮಂಗಳ ಗ್ರಹ ಈ ಮನೆಯಲ್ಲಿ ಇದ್ದರೆ ಸಂಗಾತಿಯ ಜೊತೆ ಜಗಳ ಆಗುತ್ತದೆ. ಜಗಳ ಹೆಚ್ಚಾಗುತ್ತದೆ. ಈ ಸಂಬಂಧದಲ್ಲಿ ಪ್ರೀತಿಗಿಂತ ಸಮಸ್ಯೆ ಜಾಸ್ತಿ ಇರುತ್ತದೆ. ಈ ಸಮಯದಲ್ಲಿ ಡಿವೋರ್ಸ್ ಸಹ ಆಗಬಹುದು.

ಎಂಟನೇ ಮನೆ: ಜಾತಕದಲ್ಲಿ ಎಂಟನೇ ಮನೆಯನ್ನು ಮಾಂಗಲ್ಯ ಸ್ಥಾನ ಎನ್ನಲಾಗುತ್ತದೆ. ಈ ಸ್ಥಾನದ ಮೂಲಕ ಒಂದು ದಾಂಪತ್ಯ ಎಷ್ಟು ಕಾಲ ಉಳಿಯಬಹುದು ಎಂಬುದನ್ನ ತಿಳಿದುಕೊಳ್ಳಬಹುದು. ಹಾಗಾಗಿ ಮಂಗಳ ಈ ಸ್ಥಾನದಲ್ಲಿ ಇದ್ದರೆ ವೈವಾಹಿಕ ಜೀವನ ಅರ್ಧದಲ್ಲಿ ಮುಗಿಯುತ್ತದೆ, ಅಲ್ಲದೇ, ಸಂಗಾತಿಗೆ ಅಪಘಾತ ಡಿವೋರ್ಸ್​ ಆಗುವ ಸಂಭವ ಹೆಚ್ಚು.

ಸಾಮಾನ್ಯವಾಗಿ ಕುಜ ದೋಷ ಇರುವವರಿಗೆ ಮದುವೆ ತಡವಾಗುತ್ತದೆ. ಆದರೆ ಕುಜ ದೋಷವನ್ನು ಇಡೀ ಜಾತಕವನ್ನು ನೋಡಿ ನಿರ್ಧರಿಸಬೇಕು. ಮೇಲಿನ ಎಲ್ಲಾ ಗುಣಲಕ್ಷಣಗಳು ಎಲ್ಲಾ ಜಾತಕಗಳಿಗೆ ಅನ್ವಯಿಸುವುದಿಲ್ಲ. ಇವು ಕೇವಲ ಸಾಮಾನ್ಯ ಲಕ್ಷಣಗಳಾಗಿವೆ. ವಧು-ವರರಿಬ್ಬರಿಗೂ ಈ ಕುಜದೋಷವಿದ್ದರೆ ಯಾವುದೇ ಸಮಸ್ಯೆ ಆಗುವುದಿಲ್ಲ.

ಪರಿಹಾರಗಳು ಯಾವುವು?: ನವಾಂಶ ಚಕ್ರದಲ್ಲಿ ಕುಜದೋಷ ಇಲ್ಲದಿದ್ದರೂ ಕುಜದೋಷ ಬರುವುದಿಲ್ಲ. ಕುಜ ದೋಷ ಇರುವವರು ಪ್ರತಿದಿನ ಬೆಳಗ್ಗೆ ಸುಬ್ರಹ್ಮಣ್ಯಾಷ್ಟಕವನ್ನು ಪಠಿಸುವುದರಿಂದ ಈ ದೋಷದಿಂದ ಮುಕ್ತಿ ಪಡೆಯಬಹುದು. ಅಲ್ಲದೇ ಪ್ರತಿದಿನ ಸುಬ್ರಹ್ಮಣ್ಯಸ್ವಾಮಿ ದೇವಸ್ಥಾನಕ್ಕೆ ಹೋಗಿ ಅರ್ಚನ ಮಾಡಿಸಬೇಕು. ಆಗ ಮಾತ್ರ ಸಂಸಾರದಲ್ಲಿ ಯಾವುದೇ ಸಮಸ್ಯೆ ಬರುವುದಿಲ್ಲ.

(ಹಕ್ಕುತ್ಯಾಗ: ಈ ಲೇಖನದಲ್ಲಿ ನೀಡಲಾದ ಮಾಹಿತಿಯು ಜನರ ನಂಬಿಕೆಗಳು ಮತ್ತು ಅಂತರ್ಜಾಲದಿಂದ ಸಂಗ್ರಹಿಸಿದ ಮಾಹಿತಿಯನ್ನು ಆಧರಿಸಿದೆ. ನ್ಯೂಸ್ 18 ಇದನ್ನು ಖಚಿತಪಡಿಸಿಲ್ಲ ಎಂಬುದನ್ನು ದಯವಿಟ್ಟು ಗಮನಿಸಿ.)