Vasant Panchami 2023: ವಸಂತ ಪಂಚಮಿ ಯಾವಾಗ? ಪೂಜಾ-ವಿಧಿ ವಿಧಾನ ಹೇಗೆ? ಇಲ್ಲಿದೆ ವಿವರ

ವಸಂತ ಪಂಚಮಿಗೆ ಹಿಂದೂ ಧರ್ಮದಲ್ಲಿ ಬಹಳ ಪ್ರಾಮುಖ್ಯತೆ ಇದೆ. ಈ ದಿನ ಜ್ಞಾನದ ಅಧಿದೇವತೆ ಸರಸ್ವತಿಯನ್ನು ಪೂಜೆ ಮಾಡಲಾಗುತ್ತದೆ. ಈ ಹಬ್ಬವನ್ನು ಮಾಘ ಮಾಸದ ಶುಕ್ಲ ಪಕ್ಷದ 5ನೇ ದಿನ ಆಚರಿಸಲಾಗುತ್ತದೆ.

ವಸಂತ ಪಂಚಮಿಯನ್ನು ಬಸಂತ ಪಂಚಮಿ ಎಂದೂ ಸಹ ಕರೆಯಲಾಗುತ್ತದೆ. ಇದನ್ನು ಭಾರತದ ವಿವಿಧ ರಾಜ್ಯಗಳಲ್ಲಿ ವಿಭಿನ್ನವಾಗಿ ಆಚರಣೆ ಮಾಡಲಾಗುತ್ತದೆ. ಕೆಲವೆಡೆ ಗಾಳಿಪಟ ಹಬ್ಬ ಆಚರಿಸಿದರೆ ಇನ್ನೂ ಕೆಲವೆಡೆ ಮಲ್ಲಿಗೆಯನ್ನು ಮುಡಿದು ವಿಭಿನ್ನವಾಗಿ ತಯಾರಾಗಿ ಸಂಭ್ರಮಿಸುತ್ತಾರೆ.

ಸಂಪ್ರದಾಯದ ಪ್ರಕಾರ, ವಸಂತ ಪಂಚಮಿಯನ್ನು ಮಾಘ ಮಾಸದ ಶುಕ್ಲ ಪಕ್ಷದ ಪಂಚಮಿ ತಿಥಿ 25 ಜನವರಿ 2023ರಂದು ಈ ಬಾರಿ ಆಚರಿಸಲಾಗುತ್ತಿದೆ. ಈ ವರ್ಷ ಪಂಚಮಿ ತಿಥಿ ಮಧ್ಯಾಹ್ನ 12.34ಕ್ಕೆ ಪ್ರಾರಂಭವಾಗಿ ಮರುದಿನ ಅಂದರೆ 26 ಜನವರಿಯಂದು ಬೆಳಗ್ಗೆ 10.38ಕ್ಕೆ ಮುಗಿಯುತ್ತದೆ..

ವಸಂತ ಪಂಚಮಿ ಪೂಜೆ ಮುಹೂರ್ತ 26 ಜನವರಿ 07:07 am - 12:35 pm ಆಗಿದ್ದು, ಈ ದಿನ ಸರಸ್ವತಿಯ ಪೂಜೆಯನ್ನು ಮಾಡಲಾಗುತ್ತದೆ. ಈ ದಿನ ವಿಶೇಷವಾಗಿ ದೇವರಿಗೆ ಹಳದಿ ಬಟ್ಟೆ, ಹಳದಿ ಹೂವುಗಳು, ಅಕ್ಷತೆ, ಧೂಪ, ದೀಪಗಳನ್ನು ಅರ್ಪಿಸಲಾಗುತ್ತದೆ.

ಈ ದಿನ ಹಳದಿ ವಸ್ತ್ರಕ್ಕೆ ಬಹಳ ಮಹತ್ವವಿದೆ. ಪುರಾಣಗಳ ಪ್ರಕಾರ ತಾಯಿ ಸರಸ್ವತಿಗೆ ಹಳದಿ ಬಣ್ಣ ಎಂದರೆ ಬಹಳ ಶ್ರೇಷ್ಠವಂತೆ. ಹಾಗಾಗಿ ಈ ದಿನ ಹಳದಿ ವಸ್ತ್ರಗಳನ್ನು ದಾನ ಮಾಡುವುದು, ಹಳದಿ ಬಟ್ಟೆ ಧರಿಸುವುದರಿಂದ ಒಳ್ಳೆಯದಾಗುತ್ತದೆ.

ಅಲ್ಲದೇ ಹಳದಿ ಬಟ್ಟೆ ಪಾಸಿಟಿವ್ ಎನರ್ಜಿಯ ಸಂಕೇತವಾಗಿದ್ದು, ಇದನ್ನು ಧರಿಸಿ ಪೂಜೆ ಮಾಡುವುದರಿಂದ ಮನೆಯಲ್ಲಿ ಶಾಂತಿ ಹಾಗೂ ನೆಮ್ಮದಿ ನೆಲೆಸಿರುತ್ತದೆ ಎನ್ನುವ ನಂಬಿಕೆ ಇದೆ.

ಇನ್ನು ಈ ಹಬ್ಬವನ್ನು ರಾಶಿಗನುಗುಣವಾಗಿ ಆಚರಣೆ ಮಾಡುವುದರಿಂದ ಸಹ ಹೆಚ್ಚಿನ ಲಾಭ ಪಡೆಯಬಹುದು ಎನ್ನುತ್ತದೆ ಜ್ಯೋತಿಷ್ಯ ಶಾಸ್ತ್ರ.

(Disclaimer: ಮೇಲಿನ ಲೇಖನದ ವರದಿಯು ಧಾರ್ಮಿಕ ನಂಬಿಕೆಗಳು ನಡೆದು ಬಂದ ಶಾಸ್ತ್ರದ ಪ್ರಕಾರವಾಗಿದೆ. ಇವುಗಳನ್ನು ನ್ಯೂಸ್ 18 ಕನ್ನಡ ಖಚಿತಪಡಿಸುವುದಿಲ್ಲ)