Varuthini Ekadashi 2023: ಈ ದಿನ ಉಪವಾಸ ಮಾಡಿ, ದಾನ ಕೊಟ್ರೆ 7 ಜನ್ಮದ ಪಾಪ ಪರಿಹಾರವಾಗುತ್ತೆ

ಹಿಂದೂ ಕ್ಯಾಲೆಂಡರ್ ಪ್ರಕಾರ, ವೈಶಾಖ ಮಾಸದ ಕೃಷ್ಣ ಪಕ್ಷದ ಏಕಾದಶಿಯನ್ನು ವರುತಿನಿ ಅಥವಾ ವರುಧಿನಿ ಏಕಾದಶಿ ಎಂದು ಕರೆಯಲಾಗುತ್ತದೆ. ಈ ಬಾರಿ ವರುತಿನಿ ಏಕಾದಶಿಯನ್ನು 16 ಏಪ್ರಿಲ್ 2023 ರಂದು ಆಚರಿಸಲಾಗುತ್ತದೆ.

ಏಕಾದಶಿ ಉಪವಾಸವು ಮನಸ್ಸು ಮತ್ತು ದೇಹ ಎರಡರ ಮೇಲೆ ನೇರ ಪರಿಣಾಮ ಬೀರುವುದರಿಂದ ಗ್ರಹಗಳ ಪ್ರಭಾವವನ್ನು ಸಹ ಬಹಳ ಮಟ್ಟಿಗೆ ಕಡಿಮೆ ಮಾಡಬಹುದು ಎನ್ನುವ ನಂಬಿಕೆ ಇದೆ. ಹಾಗಾಗಿ ಈ ದಿನ ವಿಷ್ಣುವಿನ ಪೂಜೆ ಮಾಡಿ, ಉಪವಾಸ ಮಾಡಲಾಗುತ್ತದೆ.

ಏಕಾದಶಿ ಪ್ರಾರಂಭ- ಏಪ್ರಿಲ್ 15, 2023 ರಂದು ರಾತ್ರಿ 08:45 ಕ್ಕೆ, ಏಕಾದಶಿ ಕೊನೆಯಾಗುವುದು- ಏಪ್ರಿಲ್ 16, 2023 ರಂದು ಸಂಜೆ 06:14 ಕ್ಕೆ. ಈ ಬಾರಿ ವರುತಿನಿ ಏಕಾದಶಿಯ ದಿನದಂದು ತ್ರಿಪುಷ್ಕರ ಯೋಗವು ರೂಪುಗೊಳ್ಳಲಿದೆ ಎನ್ನಲಾಗುತ್ತಿದೆ.

ಈ ಯೋಗವು ಏಪ್ರಿಲ್ 17 ರಂದು ಬೆಳಗ್ಗೆ 4:07 ರಿಂದ ಏಪ್ರಿಲ್ 17 ರ ಬೆಳಗ್ಗೆ 5:54 ರವರೆಗೆ ಇರುತ್ತದೆ. ವರುತಿನಿ ಏಕಾದಶಿಯ ದಿನದಂದು ಈ ಯೋಗದ ರಚನೆಯು ಅತ್ಯಂತ ಮಂಗಳಕರವೆಂದು ಪರಿಗಣಿಸಲಾಗಿದೆ. ಈ ದಿನ ಉಪವಾಸ ಮಾಡುವುದು ತುಂಬಾ ಒಳ್ಳೆಯದು.

ಪ್ರೀತಿ, ಸಂತೋಷ ಮತ್ತು ಐಶ್ವರ್ಯಕ್ಕಾಗಿ ವರುತಿನಿ ಏಕಾದಶಿಯಂದು ಮಧುರಾಷ್ಟಕವನ್ನು ಪಠಿಸಬೇಕು, ಹಾಗೆಯೇ, ಅತ್ಯಂತ ಕಷ್ಟಕರವಾದ ಸಮಸ್ಯೆಗಳಿಂದ ಮುಕ್ತಿ ಪಡೆಯಲು ಗಜೇಂದ್ರ ಮೋಕ್ಷವನ್ನು ಪಠಿಸಬೇಕು ಎನ್ನುತ್ತಾರೆ ಹಿರಿಯರು. ಹಾಗೆಯೇ ಈ ದಿನ ತಪ್ಪದೇ ವಿಷ್ಣು ಸಹಸ್ತ್ರನಾಮವನ್ನು ಪಠಿಸಬೇಕು.

ಕೇವಲ ಇದೊಂದೇ ಅಲ್ಲ ಪ್ರತಿ ಏಕಾದಶಿಯು ತನ್ನದೇ ಆದ ವಿಭಿನ್ನ ವೈಭವವನ್ನು ಹೊಂದಿದೆ. ಈ ಏಕಾದಶಿಯಂದು ಉಪವಾಸ ಮಾಡುವುದರಿಂದ ವ್ಯಕ್ತಿಯು ಯಾವಾಗಲೂ ಸಮೃದ್ಧಿ ಮತ್ತು ಅದೃಷ್ಟವನ್ನು ಪಡೆಯುತ್ತಾನೆ ಎನ್ನುವ ನಂಬಿಕೆ ಇದೆ,

ಇನ್ನು ಈ ಏಕಾದಶಿಯಂದು ಅಕ್ಕಿ ಹಾಗೂ ಬೆಳೆಕಾಳುಗಳನ್ನು ದಾನ ಮಾಡಬೇಕು. ಅಲ್ಲದೇ, ಈ ದಿನ ಸಾಧ್ಯವಾದಷ್ಟು ಬಡವರಿಗೆ ಸಹಾಯ ಮಾಡುವುದರಿಂದ ನಿಮ್ಮ ಪಾಪಗಳು ನಿವಾರಣೆ ಆಗುತ್ತದೆ ಎನ್ನುವ ನಂಬಿಕೆ ಇದೆ.

(ಹಕ್ಕುತ್ಯಾಗ: ಈ ಲೇಖನದಲ್ಲಿ ನೀಡಲಾದ ಮಾಹಿತಿಯು ಜನರ ನಂಬಿಕೆಗಳು ಮತ್ತು ಅಂತರ್ಜಾಲದಿಂದ ಸಂಗ್ರಹಿಸಿದ ಮಾಹಿತಿಯನ್ನು ಆಧರಿಸಿದೆ. ನ್ಯೂಸ್ 18 ಇದನ್ನು ಖಚಿತಪಡಿಸಿಲ್ಲ ಎಂಬುದನ್ನು ದಯವಿಟ್ಟು ಗಮನಿಸಿ.)