Sabarimala Temple: ಮತ್ತೆ ತೆರೆದ ಶಬರಿಮಲೆ ದೇಗುಲ ದ್ವಾರ, ಭಕ್ತರಿಗೆ ಅಯ್ಯಪ್ಪ ಸ್ವಾಮಿ ದರ್ಶನ

ಮಂಗಳವಾರ ಮುಚ್ಚಲಾಗಿದ್ದ ಶಬರಿಮಲೆಯ ಅಯ್ಯಪ್ಪ ದೇಗುಲ 21 ದಿನಗಳ ಮಕರವಿಳಕ್ಕು ಹಬ್ಬದ ನಿಮಿತ್ತ ಶುಕ್ರವಾರ ಮತ್ತೆ ತೆರೆಯಲಾಗಿದ್ದು, ಶನಿವಾರ ಬೆಳಗ್ಗೆಯಿಂದ ಭಕ್ತಾಧಿಗಳಿಗೆ ದರ್ಶನಕ್ಕೆ ಅವಕಾಶ ಮಾಡಿಕೊಡಲಾಗಿದೆ.

ದೇವಸ್ಥಾನದ ಪ್ರಮುಖ ನೈವೇದ್ಯಗಳಲ್ಲಿ ಒಂದಾದ ನೆಯ್ಯಭಿಷೇಕ ಶನಿವಾರ ಬೆಳಗ್ಗೆ 3.30ಕ್ಕೆ ಆರಂಭವಾಗಿದ್ದು, ಮಕರವಿಳಕ್ಕು ಆಚರಣೆಯ ಮೊದಲ ದಿನದಂದು ಕಲಭಾಭಿಷೇಕವು ಬಹಳ ವಿಶೇಷವಾಗಿದ್ದು, ಬೆಳಗ್ಗೆ 9.30ಕ್ಕೆ ಮಂಟಪದಲ್ಲಿ ತಂತ್ರಿ ಅವರು ಬ್ರಹ್ಮಕಲಶ ಪೂಜೆ ನೆರವೇರಿಸಿದ್ದಾರೆ.

ಅಷ್ಟಾಭಿಷೇಕ ಮತ್ತು ಪುಷ್ಪಾಭಿಷೇಕ ಈ ಸಮಯದಲ್ಲಿ ಮೊದಲ ದಿನ ದೇವಾಲಯದಲ್ಲಿ ಮಾಡಲಾಗುವ ಇತರ ವಿಶೇಷ ಆಚರಣೆಗಳಾಗಿದ್ದು, ಇನ್ನು ಈ ಸಮಯದಲ್ಲಿ ಜನವರಿ 11 ರಂದು ಎರುಮೇಲಿ ಪೆಟ್ಟತುಳ್ಳಲ್, ಜನವರಿ 12 ರಂದು ತಿರುವಾಭರಣಂ ಮೆರವಣಿಗೆ ನಡೆಯಲಿದೆ.

ಹಾಗೆಯೇ, ಜನವರಿ 14 ರಂದು ಮಕರವಿಳಕ್ಕು ಸಮಾರಂಭ ಮತ್ತು ಜನವರಿ 18 ರಂದು ಪಥಿನೆಟ್ಟು ಕಲಭಂ ನಡೆಯಲಿದ್ದು, ಜನವರಿ 20 ರಂದು ಬೆಳಗ್ಗೆ 7 ಗಂಟೆಗೆ ದೇವಾಲಯವನ್ನು ಮುಚ್ಚಲಾಗುತ್ತದೆ.

ಈಗಾಗಲೇ ಶಬರಿಮಲೆಗೆ ಭೇಟಿ ನೀಡುವ ಭಕ್ತಾಧಿಗಳ ಸಂಖ್ಯೆ ಹೆಚ್ಚಾಗಿದ್ದು, ಜನ ಹೆಚ್ಚಿರುವ ಕಾರಣ ಸಹ ದರ್ಶನಕ್ಕೆ ಸಮಯ ಹೆಚ್ಚು ಬೇಕಾಗಿದ್ದು, ಜನರಿಗೆ ಸರಿಯಾಗಿ ದರ್ಶನ ಸಿಗಬೇಕು ಎನ್ನುವ ಕಾರಣದಿಂದ ಭಕ್ತರ ಸಂಖ್ಯೆಯನ್ನು ದಿನ್ಕಕೆ 90 ಸಾವಿರಕ್ಕೆ ಮಿತಿಗೊಳಿಸಲಾಗಿದೆ.

ಕಳೆದ 2 ವರ್ಷದಿಂದ ಕೊರೊನಾ ಕಾರಣದಿಂದ ಹಲವಾರು ಜನರಿಗೆ ಶಬರಿಮಲೆ ಯಾತ್ರೆ ಮಾಡಲು ಸಾಧ್ಯವಾಗಿರಲಿಲ್ಲ. ಹಾಗಾಗಿ ಈ ವರ್ಷ ಹೆಚ್ಚಿನ ಜನರು ಯಾತ್ರೆ ಕೈಗೊಂಡಿದ್ದು, ಕಳೆದ ಸುಮಾರು 39 ದಿನಗಳಲ್ಲಿ ದೊಡ್ಡ ಸಂಖ್ಯೆಯಲ್ಲಿ ಭಕ್ತರು ಶಬರಿಮಲೆಗೆ ಭೇಟಿ ನೀಡಿದ್ದಾರೆ. ಈ ವರ್ಷ ಇಲ್ಲಿಯವರೆಗೆ ಅಂದಾಜು 30 ಸಾವಿರ ಜನರು ಯಾತ್ರೆ ಕೈಗೊಂಡಿದ್ದಾರೆ.

ಕೇವಲ ಒಂದು ತಿಂಗಳ ಸಮಯದಲ್ಲಿ ಸುಮಾರು 225 ಕೋಟಿ ರೂ ಆದಾಯ ಸಂಗ್ರಹವಾಗಿದೆ ಎಂದು ಆಡಳಿತ ಮಂಡಳಿ ತಿಳಿಸಿದೆ. ಇನ್ನು ಮಾಹಿತಿಯ ಪ್ರಕಾರ ಡಿಸೆಂಬರ್ 25ರವರೆಗೆ ಶಬರಿಮಲೆಗೆ ಯಾತ್ರೆ ಕೈಗೊಂಡಿರುವವರ ಜೊತೆ ಹಾಗೆಯೇ ಭೇಟಿ ನೀಡಿದ ಭಕ್ತರ ಸಂಖ್ಯೆ ಸುಮಾರು 30 ಲಕ್ಷ ಎನ್ನಲಾಗುತ್ತಿದ್ದು, ಈ 39 ದಿನಗಳಲ್ಲಿ ಬಂದ ಆದಾಯದಲ್ಲಿ ಸುಮಾರು 70.10 ಕೋಟಿ ದೇಣಿಗೆ ರೂಪದಲ್ಲಿ ಬಂದಿದೆ ಎಂದು ದೇವಾಲಯ ತಿಳಿಸಿದೆ.