Ramadan 2023: ಮುಸ್ಲಿಂ ಬಾಂಧವರಿಗೆ ಅತ್ಯಂತ ವಿಶೇಷ ದಿನವಿದು, ಪವಿತ್ರ ರಂಜಾನ್​ ಹಬ್ಬದ ಹಿಂದಿನ ಮಹತ್ವ ಹೀಗಿದೆ

ಉಪವಾಸದ ಆಚರಣೆಯೊಂದಿಗೆ ಶುರುವಾಗುವ ರಂಜಾನ್ ಹಬ್ಬವನ್ನು ಇಸ್ಲಾಂ ಧರ್ಮದ ಐದು ಸ್ತಂಭಗಳಲ್ಲಿ ಒಂದೆಂದು ಪರಿಗಣಿಸಲಾಗುತ್ತದೆ. ಈ ಹಬ್ಬದ ಒಂದು ತಿಂಗಳ ಮೊದಲೇ ದಿನ ಪೂರ್ತಿ ಉಪವಾಸ ಮಾಡುತ್ತಾರೆ.

ಈ ತಿಂಗಳಲ್ಲಿ ಮುಸ್ಲಿಮರು ಸೂರ್ಯೋದಯದಿಂದ ಸೂರ್ಯಾಸ್ತದವರೆಗೆ ಅನ್ನ-ನೀರು ಸೇವಿಸದೆ ಉಪವಾಸ ಇರುತ್ತಾರೆ. ಈ ಸಮಯದಲ್ಲಿ ಹಲವು ಕಟ್ಟು ನಿಟ್ಟಿನ ಕ್ರಮಗಳನ್ನು ಅನುಸರಿಸುವ ಮೂಲಕ ಮುಸ್ಲಿಮರು ತಮ್ಮನ್ನು ದೇವರಿಗೆ ಅರ್ಪಿಸಿಕೊಳ್ಳುತ್ತಾರೆ.

ಈ ವರ್ಷ, ರಂಜಾನ್ ಅನ್ನು ಏಪ್ರಿಲ್ 21, ಶುಕ್ರವಾರದಿಂದ ಏಪ್ರಿಲ್ 22 (ಶನಿವಾರ) ವರೆಗೆ ಆಚರಿಸುವ ನಿರೀಕ್ಷೆಯಿದೆ. ಆದರೆ ಚಂದ್ರನ ದೃಷ್ಟಿಗೆ ಅನುಗುಣವಾಗಿ ದಿನಾಂಕ ಬದಲಾಗುತ್ತದೆ. ಸದ್ಯ ಬೆಂಗಳೂರಿನಲ್ಲಿ ಹಬ್ಬವನ್ನು ಇಂದು ಆಚರಣೆ ಮಾಡಲಾಗುತ್ತಿದೆ.

ಈ ದಿನ, ಜನರು ಬೆಳಗ್ಗೆ ಬೇಗ ಎದ್ದು, ಹೊಸ ಬಟ್ಟೆಗಳನ್ನು ಧರಿಸುತ್ತಾರೆ. ನಂತರ ಮಸೀದಿಯಲ್ಲಿ ಪ್ರಾರ್ಥನೆ ಸಲ್ಲಿಸುತ್ತಾರೆ. ಬಡವರಿಗೆ ಝಕಾತ್ ಅಥವಾ ದಾನವನ್ನು ಈ ದಿನ ತಪ್ಪದೇ ನೀಡುತ್ತಾರೆ.

ಪ್ರಾರ್ಥನೆಯ ನಂತರ, ಕುಟುಂಬ ಸದಸ್ಯರು ಒಟ್ಟಿಗೆ ಸೇರುತ್ತಾರೆ. ಹಬ್ಬದ ವಿಶೇಷ ಬೋಜನ ತಯಾರಿಸಿ ಪ್ರೀತಿಪಾತ್ರರ ಜೊತೆ ಊಟ ಮಾಡುತ್ತಾರೆ. ರಂಜಾನ್‌ನ ವಿಶೇಷ ತಿನಿಸುಗಳೆಂದರೆ ಹಲೀಮ್, ನಿಹಾರಿ, ಕಬಾಬ್‌ಗಳು ಮತ್ತು ಪಾಯಸ.

ಇನ್ನು ಈ ಹಬ್ಬವನ್ನು ವಿವಿಧ ದೇಶಗಳಲ್ಲಿ ಒಂದೊಂದು ರೀತಿಯಾಗಿ ಆಚರಿಸುತ್ತಾರೆ. ರಂಜಾನ್ ಅನ್ನು ವಿಭಿನ್ನ ಸಂಪ್ರದಾಯಗಳನ್ನು ಅನುಸರಿಸುವ ಮೂಲಕ ಆಚರಿಸಲಾಗುತ್ತದೆ. ಭಾರತದಲ್ಲಿ ಹಾಗೂ ಪಾಕಿಸ್ತಾನದಲ್ಲಿ ಸಿಹಿ ಹಂಚಿಕೆ ಹಾಗೂ ಪ್ರಾರ್ಥನೆಗಳ ಮೂಲಕ ಆಚರಿಸಲಾಗುತ್ತದೆ.

ಟರ್ಕಿಯಲ್ಲಿ, ಡ್ರಮ್ಮರ್‌ಗಳು ಸಾಂಪ್ರದಾಯಿಕ ಒಟ್ಟೋಮನ್ ವೇಷಭೂಷಣಗಳನ್ನು ಧರಿಸುತ್ತಾರೆ. ಹಾಗೆಯೇ,ಇಂಡೋನೇಷ್ಯಾದಲ್ಲಿ, ಮುಸ್ಲಿಮರು ನೀರಿನಲ್ಲಿ ತಮ್ಮನ್ನು ಶುದ್ಧೀಕರಿಸುತ್ತಾರೆ, ತಮ್ಮ ದೇಹವನ್ನು ತಲೆಯಿಂದ ಕಾಲ ಬೆರಳಿನವರೆಗೆ ನೆನೆಸುತ್ತಾರೆ. ಈ ಸಂಪ್ರದಾಯವನ್ನು ಇಲ್ಲಿ ಪಡುಸನ್ ಎಂದು ಕರೆಯಲಾಗುತ್ತದೆ.

ಕುವೈತ್‌ನಲ್ಲಿ ರಂಜಾನ್ ಅನ್ನು ಕರ್ಕಿಯಾನ್ ಎಂದು ಕರೆಯಲಾಗುತ್ತದೆ. ಇದರಲ್ಲಿ ಸಣ್ಣ ಮಕ್ಕಳು ಸಾಂಪ್ರದಾಯಿಕ ಉಡುಗೆಯನ್ನು ಧರಿಸುತ್ತಾರೆ ಮತ್ತು ಹಾಡುಗಳನ್ನು ಹಾಡುತ್ತಾರೆ. ಇನ್ನು ಸಿಂಗಾಪುರದಲ್ಲಿ ಹರಿ ರಾಯ ಎಂದು ಕರೆಯಲಾಗುತ್ತದೆ.

(ಹಕ್ಕುತ್ಯಾಗ: ಈ ಲೇಖನದಲ್ಲಿ ನೀಡಲಾದ ಮಾಹಿತಿಯು ಜನರ ನಂಬಿಕೆಗಳು ಮತ್ತು ಅಂತರ್ಜಾಲದಿಂದ ಸಂಗ್ರಹಿಸಿದ ಮಾಹಿತಿಯನ್ನು ಆಧರಿಸಿದೆ. ನ್ಯೂಸ್ 18 ಇದನ್ನು ಖಚಿತಪಡಿಸಿಲ್ಲ ಎಂಬುದನ್ನು ದಯವಿಟ್ಟು ಗಮನಿಸಿ.)