Men Not Allowed: ಭಾರತದ ಈ ದೇವಸ್ಥಾನಗಳಲ್ಲಿ ಪುರುಷರಿಗೆ ನೋ ಎಂಟ್ರಿ!

ಭಗವತಿ ದೇವಿ ಮಂದಿರ, ಕನ್ಯಾಕುಮಾರಿ: ತಮಿಳುನಾಡಿನ ಕನ್ಯಾಕುಮಾರಿಯಲ್ಲಿರುವ ಭಗವತಿ ದೇವಸ್ಥಾನದಲ್ಲಿ ಭಗವತಿ ದೇವಿಯ ಕನ್ಯಾ ರೂಪದ ಮೂರ್ತಿಯನ್ನು ಪ್ರತಿಸ್ಠಾಪಿಸಲಾಗಿದೆ. ಈ ಮಂದಿರಕ್ಕೆ ಪುರುಷರ ಪ್ರವೇಶವನ್ನು ಸಂಪೂರ್ಣ ನಿಷೇಧಿಸಲಾಗಿದೆ. ಆದರೆ ಬ್ರಹ್ಮಚಾರಿಗಳು ದೇಗುಲದ ದ್ವಾರದ ತನಕ ಹೋಗಬಹುದಾಗಿದೆ.

ತ್ರೈಬಂಕೇಶ್ವರ ದೇವಾಲಯ, ನಾಸಿಕ್: ಮಹಾರಾಷ್ಟ್ರದಲ್ಲಿರುವ ಈ ದೇವಾಲಯದ ಒಂದು ಪರಿಧಿವರೆಗೆ ಮಾತ್ರ ಮಹಿಳೆಯರಿಗೆ ಪ್ರವೇಶವಿದೆ. ಆದರೆ ಈ ಹಿಂದೆ ಪುರುಷರಿಗೆ ದೇವಸ್ಥಾನ ಪ್ರವೇಶಿಸಲು ಸಂಪೂರ್ಣ ಸ್ವಾತಂತ್ರ್ಯವಿತ್ತು. ಇಲ್ಲಿನ ಅಸಮಾನತೆ ವಿರುದ್ಧ ಪ್ರಕರಣ ದಾಖಲಿಸಲಾಗಿತ್ತು. ಈ ಹಿನ್ನೆಲೆಯಲ್ಲಿ ಬಾಂಬೆ ಹೈಕೋರ್ಟ್​ ಪುರುಷರ ಪ್ರವೇಶಕ್ಕೂ ನಿಷೇಧ ಹೇರಿದೆ ಎನ್ನಲಾಗಿದೆ.

ಬ್ರಹ್ಮ ದೇವಸ್ಥಾನ, ಪುಷ್ಕರ್: ರಾಜಸ್ಥಾನದ ಪುಷ್ಕರ್​ನಲ್ಲಿರುವ ಬ್ರಹ್ಮ ದೇವಸ್ಥಾನವನ್ನು 14 ನೇ ಶತಮಾನದಲ್ಲಿ ನಿರ್ಮಿಸಲಾಗಿದೆ. ಇದು ಏಕೈಕ ಬ್ರಹ್ಮ ದೇವಾಲಯವಾಗಿದ್ದು, ಇಲ್ಲಿನ ಪುಷ್ಕರ್ ಸರೋವರದಲ್ಲಿ ದೇವಿ ಸರಸ್ವತಿಯೊಂದಿಗೆ ಬ್ರಹ್ಮ ದೇವ ಯಜ್ಞ ಮಾಡಿದ್ದರು. ಈ ವೇಳೆ ಸರಸ್ವತಿ ದೇವಿಯು ಯಾವುದೋ ವಿಷಯಕ್ಕೆ ಕೋಪಗೊಂಡು ಈ ದೇವಾಲಯಕ್ಕೆ ಶಾಪ ನೀಡಿದ್ದರು ಎಂದು ಹೇಳಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಈ ದೇವಾಲಯಕ್ಕೆ ವಿವಾಹಿತ ಪುರುಷರಿಗೆ ಅನುಮತಿ ನಿರಾಕರಿಸಲಾಗಿದೆ. ಆದರೂ ಹೋದರೆ ಅವರ ವೈವಾಹಿಕ ಜೀವನದಲ್ಲಿ ತೊಂದರೆಗಳು ಕಾಣಿಸಿಕೊಳ್ಳುತ್ತದೆ ಎನ್ನಲಾಗುತ್ತದೆ. ಇಲ್ಲಿ ಅವಿವಾಹಿತರಿಗೆ ಪ್ರವೇಶವಿದ್ದು, ವಿವಾಹಿತರಿಗೆ ನಿರ್ಬಂಧ ವಿಧಿಸಲಾಗಿದೆ.

ಸಂತೋಷಿ ಮಾತೆ ಮಂದಿರ: ಸಂತೋಷಿ ಮಾತೆಯ ಉಪವಾಸ ವೃತವನ್ನು ಮಹಿಳೆಯರು ಮತ್ತು ಕನ್ಯಾ ಸ್ತ್ರೀಯರು ಕೈಗೊಳ್ಳುತ್ತಾರೆ. ಆದರೆ ಪುರುಷರು ಶುಕ್ರವಾರ ದೇವಸ್ಥಾನವನ್ನು ಪ್ರವೇಶಿಸುವಂತಿಲ್ಲ. ಆದರೆ ಇಲ್ಲಿ ಇತರೆ ದಿನಗಳಲ್ಲಿ ಪುರುಷರು ದೇವಾಲಯ ಪ್ರವೇಶಿಸಬಹುದಾದರೂ, ಶುಕ್ರವಾರದಂದು ಮಾತ್ರ ದೇವಸ್ಥಾನಕ್ಕೆ ಹೋಗುವಂತಿಲ್ಲ.

ಮಾತಾ ದೇವಾಲಯ, ಮುಜಫರ್​ಪುರ್​: ಬಿಹಾರದಲ್ಲಿರುವ ಈ ದೇವಾಲಯದ ಆವರಣಕ್ಕೆ ನಿರ್ದಿಷ್ಟ ಸಮಯದಲ್ಲಿ ಪುರುಷರ ಪ್ರವೇಶವನ್ನು ನಿಷೇಧಿಸಲಾಗಿದೆ. ಈ ಸಮಯದಲ್ಲಿ ದೇವಾಲಯ ಆರ್ಚಕರು ಕೂಡ ಹೋಗುವಂತಿಲ್ಲ. ಆದರೆ ಇಲ್ಲಿಗೆ ಮಹಿಳೆಯರು ಯಾವುದೇ ಸಮಯದಲ್ಲಿ ಬೇಕಾದರೂ ಭೇಟಿ ನೀಡಬಹುದು.

ಕಾಮರೂಪ ಕಾಮಾಕ್ಯ ದೇವಾಲಯ: ಅಸ್ಸಾಂ ರಾಜ್ಯದಲ್ಲಿರುವ ಈ ದೇವಾಲಯದ ಆವರಣಕ್ಕೆ ಮಹಿಳೆಯರ ಪ್ರವೇಶಕ್ಕೆ ಮಾತ್ರ ಅನುಮತಿಯಿದೆ. ಇಲ್ಲಿ ಪುರುಷರ ಬದಲಾಗಿ ಮಹಿಳಾ ಆರ್ಚಕರನ್ನು ನೇಮಿಸಲಾಗುತ್ತದೆ. ಭಗವಾನ್​ ವಿಷ್ಣು ಅವರ ತಾಯಿ ಸತಿ ಮಾತೆಯ ನೆನಪಿಗಾಗಿ ಈ ದೇವಾಲಯವನ್ನು ನಿರ್ಮಿಸಲಾಗಿದ್ದು, ಇಲ್ಲಿ ಪುರುಷರ ಪ್ರವೇಶವನ್ನು ನಿಷೇಧಿಸಲಾಗಿದೆ.

ಚಕ್ಕುಲತುಕಾವು ದೇವಾಲಯ: ಕೇರಳದ ಅಲೆಪ್ಪಿ ಜಿಲ್ಲೆಯಲ್ಲಿರುವ ಚಕ್ಕುಲತುಕಾವು ದೇವಾಲಯದಲ್ಲಿ ಭಗವತಿ ದೇವಿಯನ್ನು ಪ್ರತಿಸ್ಠಾಪಿಸಲಾಗಿದೆ. ದುರ್ಗಾ ಮಾತೆಯ ಅವತಾರವನ್ನು ಪೂಜಿಸಲಾಗುತ್ತಿರುವ ಈ ದೇವಾಲಯದಲ್ಲಿ ವಿಶೇಷ ಮಹಿಳಾ ಪೂಜೆಗಳನ್ನು ನೆರವೇರಿಸಲಾಗುತ್ತದೆ. ಆ ದಿನಗಳಲ್ಲಿ ಈ ದೇವಾಲಯಕ್ಕೆ ಪುರುಷರಿಗೆ ನಿಷೇಧ ಹೇರಲಾಗುತ್ತದೆ.

ಅಟ್ಟುಕಲ್ ಮಂದಿರ: ಕೇರಳದ ಅಟ್ಟುಕಲ್ ಭಗವತಿ ಮಂದಿರದಲ್ಲಿ ಮಹಿಳೆಯರೇ ಪೂಜಾ ಕಾರ್ಯಗಳನ್ನು ನೆರವೇರಿಸುತ್ತಾರೆ. ಈ ದೇವಾಲಯದಲ್ಲಿ ಸುಮಾರು ಮೂರು ಮಿಲಿಯನ್ ಮಹಿಳೆಯರು ಸೇರಿ ಪೊಂಗಲ್ ಆಚರಿಸಿ ಗಿನ್ನಿಸ್ ದಾಖಲೆಯನ್ನು ಬರೆದಿದ್ದಾರೆ. ಇಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳಾ ಭಕ್ತರು ಇರುವುದರಿಂದ ಈ ದೇವಾಲಯಕ್ಕೆ ಪುರುಷರಿಗೆ ಪ್ರವೇಶವಿಲ್ಲ.