IRCTCಯಿಂದ ದಕ್ಷಿಣ ಭಾರತದ ಧಾರ್ಮಿಕ ಕ್ಷೇತ್ರ ಪ್ರವಾಸ; 14ದಿನಗಳ ಟೂರ್​ ಮಾಹಿತಿ ಇಲ್ಲಿದೆ

ಭಾರತೀಯ ರೈಲ್ವೆ ಆರಂಭಿಸಿರುವ ಈ ರೈಲು ಜನವರಿ 29 ರಂದು ಬಿಹಾರದ ಜೈನಗರದಿಂದ ಆರಂಭವಾಗಲಿದ್ದು, ಫೆಬ್ರವರಿ 11ಕ್ಕೆ ಮುಕ್ತಾಯಗೊಳ್ಳಲಿದೆ. ಇನ್ನು ಈ ವಿಶೇಷ ರೈಲಿನಲ್ಲಿ ಎಲ್ಲಾ ಪ್ರಯಾಣಿಕರಿಗೆ ಸಸ್ಯಾಹಾರಿ ಆಹಾರ ಮತ್ತು ಇತರ ಅಗತ್ಯ ವಸ್ತುಗಳನ್ನು ಒದಗಿಸಲಾಗುವುದು ಎಂದು ಐಆರ್​ಸಿಟಿಸಿ ತಿಳಿಸಿದೆ

ರೈಲ್ವೆ ಮಂಡಳಿಯು ಪ್ರತಿ ವ್ಯಕ್ತಿಗೆ ದಿನಕ್ಕೆ 900 ರೂ. ರೈಲು ಪ್ರಯಾಣದ ಶುಲ್ಕ ವಿಧಿಸಿದೆ. ಅದರಂತೆ ಈ 14 ದಿನದ ಪ್ರವಾಸದ ಒಟ್ಟು ಪ್ರಯಾಣ ದರ ರೂ. 13,230 ರೂ ಆಗಿರಲಿದೆ. ಇದರ ಜೊತೆಗೆ IRCTC ವಿವಿಧ ಸ್ಥಳಗಳಿಗೆ ಪ್ರಯಾಣಿಸಲು ಅಲ್ಲಲ್ಲಿ ವಿಶೇಷ ಬಸ್ಸುಗಳು, ವಸತಿ ಮತ್ತು ರೈಲು ಭದ್ರತಾ ಸಿಬ್ಬಂದಿಗಳನ್ನು ವ್ಯವಸ್ಥೆ ಮಾಡಲಿದೆ.

ಇನ್ನು ಕೋವಿಡ್​ನ ಈ ಸಮಯದಲ್ಲಿ ಪ್ರಯಾಣಿಕರ ಸುರಕ್ಷತೆಗೆ ಒತ್ತು ನೀಡಿರುವ IRCTC ಪ್ರತಿ ಸ್ಥಳದಲ್ಲಿ ಯಾತ್ರಾರ್ಥಿಗಳಿಗೆ ಮಾಸ್ಕ್​, ಸ್ಯಾನಿಟೈಜರ್‌ಗಳು ಮತ್ತು ಟೂರ್ ಎಸ್ಕಾರ್ಟ್‌ಗಳ ಲಭ್ಯತೆಯನ್ನು ಖಚಿತಪಡಿಸಲಿದೆ

ರೈಲು ಜನವರಿ 29 ರಂದು ಜೈನಗರ, ಬಿಹಾರದಿಂದ ಹೊರಟು ಮಧುಬನಿ, ದರ್ಭಾಂಗ, ಸಮಸ್ತಿಪುರ್, ಮುಜಾಫರ್‌ಪುರ, ಹಾಜಿಪುರ್, ಪಾಟ್ನಾ, ಭಕ್ತಿಯಾರ್‌ಪುರ, ಬಿಹಾರ ಷರೀಫ್, ರಾಜ್‌ಗೀರ್ ಮತ್ತು ಗಯಾವನ್ನು ತಲುಪುತ್ತದೆ. ಈ ರೈಲು ಜಾರ್ಖಂಡ್‌ನ ಕೊಡೆರ್ಮಾ ಮತ್ತು ಧನ್‌ಬಾದ್ ಜಂಕ್ಷನ್ ನಿಲ್ದಾಣಗಳ ಮೂಲಕವೂ ಹಾದುಹೋಲಿದೆ. ಇಲ್ಲಿಂದ ಪ್ರಯಾಣಿಕರು ರೈಲು ಹತ್ತಬಹುದು.

ನಂತರ ರೈಲು ರಾಮೇಶ್ವರಂ, ಮಧುರೈ, ಕನ್ಯಾಕುಮಾರಿ, ತಿರುವನಂತಪುರಂ, ಮಲ್ಲಿಕಾರ್ಜುನ, ಜಗನ್ನಾಥ ಪುರಿ, ಸೂರ್ಯ ಮಂದಿರ ಮತ್ತು ಜ್ಯೋತಿರ್ಲಿಂಗ ತಲುಪಲಿದೆ.

ಈ ನಿರ್ದಿಷ್ಟ ಪ್ರವಾಸಿ ರೈಲಿನ ಪ್ಯಾಕೇಜ್ ಕೋಡ್ EZBD 67 ಆಗಿದೆ. ದಕ್ಷಿಣ ಭಾರತ ವಿಶೇಷ ರೈಲು 750 ಸ್ಲೀಪರ್ ಬರ್ತ್‌ಗಳನ್ನು ಹೊಂದಿದೆ. ಆಯಾ ಬುಕಿಂಗ್‌ನ ಅಧಿಕೃತ ವೆಬ್‌ಸೈಟ್ www.irctctourism.com ನಲ್ಲಿ ವಿವರವಾದ ಮಾಹಿತಿಗಾಗಿ ಧನ್​ಬಾದ್​ ಕೇಂದ್ರದಲ್ಲಿ ಸಂಪರ್ಕಿಸಬಹುದಾಗಿದೆ.