Bharat Gaurav Train: ಶ್ರಾವಣದಿಂದ ಬೆಂಗಳೂರು To ಕಾಶಿ ಪ್ರವಾಸ ನಡೆಸಿ; ಹೇಗಿರಲಿದೆ ಈ ಯಾತ್ರೆ

ರಾಜ್ಯದಿಂದ ಕಾಶಿ ಯಾತ್ರೆ ಕೈಗೊಳ್ಳುವ ಯಾತ್ರಾರ್ಥಿಗಳಿಗೆ ಬೆಂಗಳೂರಿನಿಂದಲೇ ನೇರ ರೈಲು ಸಂಚಾರ ವ್ಯವಸ್ಥೆ ಇಲ್ಲದೆ ಪರದಾಡುತ್ತಿದ್ದರು. ಆದರೆ, ಈಗ ಬೆಂಗಳೂರಿನಿಂದಲೇ ಕಾಶಿಗೆ ನೇರ ರೈಲು ಸಂಚಾರ ಆರಂಭವಾಗಲಿದೆ. ಅಲ್ಲದೇ, ಯಾತ್ರಾರ್ಥಿಗಳು ರಾಜ್ಯ ಸರ್ಕಾರದ ಸಹಾಯಧನದಲ್ಲಿ ಈ ಕಾಶಿ ಯಾತ್ರೆ ನಡೆಸಬಹುದಾಗಿದೆ.

ಧಾರ್ಮಿಕ ದತ್ತಿ ಇಲಾಖೆ ಭಾರತ್​ ಗೌರವ್​ ರೈಲು ಯೋಜನೆ ಬಳಸಿಕೊಂಡು ಈ ಕಾಶಿಯಾತ್ರೆ ಯೋಜನೆ ಅನುಷ್ಠಾನಕ್ಕೆ ಮುಂದಾಗಿದೆ. ಈ ಸಂಬಂಧ ಈಗಾಗಲೇ ನೈರುತ್ಯ ರೈಲ್ವೆ ಇಲಾಖೆ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದ್ದು, ಇದೇ ಶ್ರಾವಣದಲ್ಲಿ ಅಂದರೆ, ಆಗಸ್ಟ್​ನಲ್ಲಿ ಮೊದಲ ಕಾಶಿ ಯಾತ್ರೆ ಪ್ರವಾಸ ಆರಂಭವಾಗಲಿದೆ.

ಈ ಪ್ರವಾಸ ಏಳು ದಿನ ಕಾಲ ನಡೆಯಲಿದ್ದು, ಯಾತ್ರಿಕರ ವಸತಿ, ಆಹಾರ ಮತ್ತು ಸಾರಿಗೆ ಯೋಜನೆಯನ್ನು ಐಆರ್​ಸಿಟಿಸಿ ನಡೆಸಲಿದೆ. ಈ ಪ್ರವಾಸದಲ್ಲಿ ಯಾತ್ರಿಕರು ಕಾಶಿ, ಅಯೋಧ್ಯೆ, ಪ್ರಯಾಗರಾಜ್​ ಸೇರಿದಂತೆ ಅನೇಕ ಧಾರ್ಮಿಕ ಸ್ಥಳಗಳಿಗೆ ಪ್ರವಾಸ ನಡೆಸಬಹುದು.

ಈಗಾಗಲೇ ಸರ್ಕಾರ ಬಜೆಟ್​ನಲ್ಲಿ ಕಾಶಿಯಾತ್ರೆಗೆ ತೆರಳುವ ಯಾತ್ರಾರ್ಥಿಗಳಿಗೆ ತಲಾ 5 ಸಾವಿರ ಸಹಾಯಧನ ಘೋಷಿಸಿದೆ. ಈ ಯೋಜನೆಯ ಅರ್ಹ ಫಲಾನುಭವಿಗಳು ಮತ್ತು ಇರೆ ಯಾತ್ರಿಗಳ ಜೊತೆಗೆ ಶೀಘ್ರದಲ್ಲೇ ಧಾರ್ಮಿಕ ದತ್ತಿ ಇಲಾಖೆ ನೋಂದಣಿ ಪ್ರಕ್ರಿಯೆಗೆ ಚಾಲನೆ ನೀಡಲಿದೆ

ಇನ್ನು ಈ ಪ್ರವಾಸದಲ್ಲಿ ಯಾತ್ರಾರ್ಥಿಗಳಿಗೆ 15 ಸಾವಿರ ವೆಚ್ಚ ಆಗಲಿದ್ದು, ರಾಜ್ಯ ಸರ್ಕಾರ 5 ಸಾವಿರ ಸಹಾಯಧನ ನೀಡಲಿದೆ. ಏಳು ದಿನದ ಈ ಪ್ರವಾಸ ಎಲ್ಲಿ, ಯಾವ ಸ್ಥಳಗಿಗೆ ಭೇಟಿ ನೀಡಲಿದೆ ಎಂಬ ಕುರಿತ ರೂಪು ರೇಷವನ್ನು ಶೀಘ್ರದಲ್ಲೇ ಐಆರ್​ಸಿಟಿಸಿ ಬಿಡುಗಡೆ ಮಾಡಲಾಗಿದೆ.

ಈ ಪ್ರಯಾಣದಲ್ಲಿ 4,161 ಕಿ.ಮೀ ದೂರ ಕ್ರಮಿಸಲಾಗುವುದು. ಈ ರೈಲಿನಲ್ಲಿ (ಭಾರತ್ ಗೌರವ್ ತೀರ್ಥಯಾತ್ರೆ ರೈಲು) ಒಟ್ಟು 14 ಕೋಚ್‌ಗಳು ಇರಲಿದ್ದು, ಈ ಪೈಕಿ 11 ಬೋಗಿಗಳು ಪ್ರಯಾಣಕ್ಕಾಗಿ ಇರುತ್ತವೆ.

ಪ್ರತಿ ಕೋಚ್‌ನಲ್ಲಿ ರಾಜ್ಯದ ಪ್ರಮುಖ ದೇವಾಲಯಗಳ ಕಲಾಕೃತಿಗಳನ್ನು ಮಾಡಲಾಗುವುದು. ಜನರ ಪೂಜೆಗಾಗಿ ಬೋಗಿಯನ್ನು ದೇವಸ್ಥಾನವನ್ನಾಗಿ ಪರಿವರ್ತಿಸಲಾಗಿದೆ. ಇದರಿಂದ ಯಾತ್ರಾರ್ಥಿಗಳಿಗೆ ಧಾರ್ಮಿಕ ಚಟುವಟಿಕೆಗೆ ಅವಕಾಶ ಕಲ್ಪಿಸಲಾಗಿದೆ.

ದೇಗುಲ ಪ್ರವಾಸೋದ್ಯಮವನ್ನು  ಹಾಗೂ ಪ್ರಧಾನಿ ಮೋದಿ ಅವರ ದಿವ್ಯ ಕಾಶಿ, ಭವ್ಯ ಕಾಶಿ ಅಭಿಯಾನವನ್ನು ಉತ್ತೇಜಿಸಲು ಕರ್ನಾಟಕದ ಜನರಿಗೆ ಈ ವಿಶೇಷ ರೈಲು ಸೇವೆಯನ್ನು ಪ್ರಾರಂಭಿಸಲಾಗುತ್ತಿದೆ