Study Room Vastu: ಮಕ್ಕಳ ಸ್ಟಡಿ ರೂಮ್​ನಲ್ಲಿ ಈ ರೀತಿಯ ಫೋಟೋ ಇಡಿ, ಆಷಾಢ ಕಳೆದು ಶ್ರಾವಣ ಬಂದಾಗ ಟಾಪ್​ ಅಲ್ಲಿ ಬರ್ತಾರೆ

ವಾಸ್ತುಶಾಸ್ತ್ರ ಒಂದು ಪುರಾತನ ವಿಜ್ಞಾನ. ಮನೆಯ ನೆಮ್ಮದಿ, ಶೈಕ್ಷಣಿಕ ಬೆಳವಣಿಗೆ, ಸಂಪತ್ತು ವೃದ್ಧಿ, ಉತ್ತಮ ಸಂಬಂಧ ಹೀಗೆ ಹಲವುವಿಷಯಗಳಿಗೆ ಪರಿಹಾರ ನೀಡುವ ಶಾಸ್ತ್ರ. ಹಾಗಾಗಿ ಪ್ರತಿ ಮನೆಯನ್ನು ವಾಸ್ತುವಿನಿಂದ ಕೂಡಿರಲಿ ಎಂದು ಇಚ್ಛಿಸಿ ವಾಸ್ತುವಿನ ಪ್ರಕಾರವೇ ರೂಪಿಸಲಾಗುತ್ತದೆ. ಇದು ಮಾನಸಿಕ ನೆಮ್ಮದಿಯನ್ನು ತಂದು ಕೊಡುವುದರ ಜೊತೆಗೆ ಧನಾತ್ಮಕ ಅಂಶಗಳನ್ನು ವೃದ್ಧಸುತ್ತದೆ ಎಂಬ ನಂಬಿಕೆ ಇಂದಿಗೂ ಇದೆ.

ಹಾಗಾಗಿ ಮನೆಯ ಪ್ರತಿಯೊಂದು ಕೋಣೆಯನ್ನು ವಾಸ್ತುಶಾಸ್ತ್ರದ ಅನ್ವಯ ನಿರ್ಮಾಣ ಮಾಡಲಾಗುತ್ತದೆ. ಅಡುಗೆ ಮನೆಯಲ್ಲಿ ಅಗ್ನಿ ಮೂಲೆ, ವಾಸ್ತು ಬಾಗಿಲಿನ ದಿಕ್ಕು, ಕೋಣೆಗಳಲ್ಲಿ ಕುಬೇರನ ಮೂಲೆ, ಅಧ್ಯಯನ ಕೊಠಡಿಗಳಲ್ಲಿ ಓದಲು ಕುಳಿತುಕೊಳ್ಳುವ ಸ್ಥಳ, ಮಲಗುವ ಕೋಣೆಯಲ್ಲಿ ತಲೆಹಾಕಿ ಮಲಗುವ ದಿಕ್ಕು ಪ್ರತಿಯೊಂದನ್ನು ನೋಡಲಾಗುತ್ತದೆ.

ವಿದ್ಯಾಭ್ಯಾಸ ಮಕ್ಕಳ ಬೆಳವಣಿಗೆಗೆ ಮಹತ್ವದ ಪಾತ್ರ ವಹಿಸುತ್ತದೆ. ಹಾಗಾಗಿ ವಿದ್ಯಾಭ್ಯಾಸ ಮಾಡುತ್ತಿರುವ ಮಕ್ಕಳ ಮನೆಯಲ್ಲಿ ಅಧ್ಯಯನ ಕೋಣೆ ಇದ್ದೇ ಇರುತ್ತದೆ. ಅಧ್ಯಯನ ಕೊಠಡಿ ಎಂಬುದು ವಿದ್ಯಾಭ್ಯಾಸದ ಮೇಲೆ ಕೇಂದ್ರೀಕರಿಸುವ ಜಾಗ. ಅಧ್ಯಯನದ ವೇಳೆ ಯಾವ ದಿಕ್ಕಿಗೆ ಕುಳಿತುಕೊಳ್ಳಬೇಕು. ಅಧ್ಯಯನ ಕೋಣೆಯಲ್ಲಿ ವಿದ್ಯಾಭ್ಯಾಸ ಟೇಬಲ್ ಅನ್ನು ಯಾವ ದಿಕ್ಕಿಗೆ ಇಡಬೇಕು ಹಾಗೂ ಯಾವ ಬಣ್ಣ ಹಚ್ಚಬೇಕು ಎಂಬುದೆಲ್ಲವನ್ನು ನಿರ್ಣಯಿಸಲಾಗುತ್ತದೆ.

ಅದೇ ರೀತಿಯಲ್ಲಿ ಕೆಲವರು ಓದಿನ ಮೇಲೆ ಏಕಾಗ್ರತೆಯಿರಲಿ, ಮಕ್ಕಳಲ್ಲಿ ಭಯ ಹೋಗಲಿ ಎಂಬ ಕಾರಣಕ್ಕೆ ಅಧ್ಯಯನ ಕೋಣೆಯಲ್ಲಿ ಕೆಲವು ಫೋಟೋಗಳನ್ನು ಹಾಕಲು ಸಹ ವಾಸ್ತು ಶಾಸ್ತ್ರಜ್ಞರು ಸಲಹೆ ನೀಡುತ್ತಾರೆ. ಏಕೆಂದರೆ ಅಧ್ಯಯನ ಕೊಠಡಿಯಲ್ಲಿ ಹಾಕುವ ಪ್ರತಿಯೊಂದು ಫೋಟೋಗಳು ಮಕ್ಕಳ ಮನಸ್ಸಿನ ಮೇಲೆ ಪ್ರಭಾವ ಬೀರುತ್ತದೆ. ಹಾಗಾಗಿ ಯಾವ್ಯಾವುದೋ ಫೋಟೋಗಳನ್ನು ಹಾಕುವಂತಿಲ್ಲ.

ಹಾಗಾಗಿ ಬೆಳೆಯುವ ಸಿರಿ ಮೊಳಕೆಯಲ್ಲಿ ಎನ್ನುವಂತೆ ಪೋಷಕರು ಮಕ್ಕಳಿಗೆ ಯಾವ ರೀತಿಯ ವಾತಾವರಣ ನಿರ್ಮಿಸುತ್ತಾರೋ ಅದೇ ರೀತಿಯಲ್ಲಿ ಮಕ್ಕಳ ಮನಸ್ಸು ಬೆಳವಣಿಗೆಯಾಗುತ್ತದೆ. ಹಾಗಾಗಿ ಸಾಧ್ಯವಾದಷ್ಟರ ಮಟ್ಟಿಗೆ ಉತ್ಸಾಹ ಹೆಚ್ಚಿಸುವ, ಸಕಾರಾತ್ಮಕ ಅಂಶಗಳನ್ನು ಪಸರಿಸುವ ಫೋಟೋಗಳನ್ನು ಹಾಕುವುದು ಉತ್ತಮ.

ಸೂರ್ಯೋಯದ ಫೋಟೋ: ಸೂರ್ಯ ಉದಯಿಸುತ್ತಿರುವ ಚಿತ್ರವನ್ನು ಹಾಕಲು ವಾಸ್ತು ಶಾಸ್ತ್ರಜ್ಞರು ಹೇಳುತ್ತಾರೆ. ಏಕೆಂದರೆ ಸೂರ್ಯೋದಯ ಎಲ್ಲಾ ಜೀವಿಗಳ ಜೀವಂತಿಕೆಯ ಹಾಗೂ ಉತ್ಸಾಹದ ಪ್ರತಿರೂಪ ಎಂದೇ ಭಾವಿಸಲಾಗುತ್ತದೆ.

ಏಳು ಕುದುರೆಗಳು ಓಡುತ್ತಿರುವ ಚಿತ್ರ: ಏಳು ಕುದುರೆಗಳು ಶ್ರೇಯಸ್ಸು, ಯಶಸ್ಸು, ಅಧಿಕಾರದ ಪ್ರತೀಕ. ಹಾಗಾಗಿ ಏಳು ಕುದುರೆಗಳು ಒಂದೇ ದಿಕ್ಕಿನ ಕಡೆಗೆ ಓಡುತ್ತಿರುವಂತೆ ಇರಬೇಕು. ಏಕೆಂದರೆ ಇದು ಸಕಾರಾತ್ಮಕ ಭಾವನೆಯನ್ನು ವೃದ್ಧಿಸುತ್ತದೆ ಎಂಬ ನಂಬಿಕೆ ಇದೆ. ಹಾಗಾಗಿ ಏಳು ಕುದುರೆಗಳು ಅಡ್ಡದಿಡ್ಡಿಯಾಗಿ ಓಡುವಂತೆ ಇರಬಾರದು.

ಆಕಾಶದಲ್ಲಿ ಪಕ್ಷಿಗಳು ಹಾರುವ ಚಿತ್ರ: ಹಾರುವ ಪಕ್ಷಿಗಳು ಉತ್ಸಾಹ, ಶಕ್ತಿಯ, ಮುಕ್ತ ಬದುಕಿನ ದ್ಯೋತಕ. ಆಕಾಶದಲ್ಲಿ ಪಕ್ಷಿಗಳ ಹಾರಾಟ ಮನಸ್ಸಿಗೆ ಮುದ ನೀಡುವಂತೆ ಏಕಾಗ್ರತೆಯನ್ನು ಹೆಚ್ಚಿಸುವ ಶಕ್ತಿಯನ್ನು ಹೊಂದಿದೆ. ಹಾಗಾಗಿ ಅಧ್ಯಯನ ಕೋಣೆಯಲ್ಲಿ ಪಕ್ಷಿಗಳ ಚಿತ್ರ ಇರಿಸಲು ಸಲಹೆ ನೀಡಲಾಗುತ್ತದೆ.

ಸಾಧಕರ ಚಿತ್ರ: ಸಾಧಕರು ಪ್ರತಿ ವ್ಯಕ್ತಿಯ ಜೀವನದಲ್ಲಿ ಸ್ಫೂರ್ತಿಯ ಚಿಲುಮೆಗಳಾಗಿರುತ್ತದೆ. ಅವರ ಬದುಕು, ಕಷ್ಟಗಳು, ನೋವಿನ ಕ್ಷಣಗಳು, ಅನುಭವಗಳು ಮತ್ತೊಬ್ಬರಿಗೆ ಗಟ್ಟಿತನವನ್ನು ಕಟ್ಟಿಕೊಡುತ್ತದೆ. ಶ್ರಮ ವಹಿಸಿದರೆ ಎಲ್ಲವೂ ಸಾಧ್ಯ ಎಂಬ ಮನೋಭಾವವನ್ನು ಹೆಚ್ಚಿಸಿ ಅಧ್ಯಯನದ ಕಡೆಗೆ ಹೆಚ್ಚು ನಿಗಾ ವಹಿಸುವಂತೆ ಮಾಡುತ್ತದೆ. ಹಾಗಾಗಿ ಸಾಧಕರ ಫೋಟೋಗಳು ಇದ್ದಷ್ಟು ಒಳ್ಳೆಯದು.