• Home
  • »
  • News
  • »
  • vijayapura
  • »
  • Kolhar Curd: ಕೋಲಾರ ಅಲ್ಲ ಕೋಲ್ಹಾರ! ಇಲ್ಲಿಯ ಗಟ್ಟಿ ಮೊಸರ ರುಚಿಗೆ ಮಾರುಹೋಗಿ ಬನ್ನಿ!

Kolhar Curd: ಕೋಲಾರ ಅಲ್ಲ ಕೋಲ್ಹಾರ! ಇಲ್ಲಿಯ ಗಟ್ಟಿ ಮೊಸರ ರುಚಿಗೆ ಮಾರುಹೋಗಿ ಬನ್ನಿ!

ಕೊಲ್ಹಾರ ಗಡಿಗೆ ಮೊಸರು

ಕೊಲ್ಹಾರ ಗಡಿಗೆ ಮೊಸರು

ಏನಿದು ಕೊಲ್ಹಾರದ ಗಟ್ಟಿ ಮೊಸರು? ಇದರ ರುಚಿ ಹೇಗಿರುತ್ತೆ? ಅಷ್ಟಕ್ಕೂ ಎಲ್ಲಿ ಸಿಗುತ್ತೆ ಇದು? ಬೆಲೆ ಎಷ್ಟು? ನಿಮ್ಮ ರಸಗ್ರಂಥಿಗಳಲ್ಲಿ ನೀರೂರಿಸಬಲ್ಲ ಅದ್ಭುತ ಮೊಸರಿನ ಸಕಲ ವಿವರಗಳೂ ಇಲ್ಲಿವೆ!

  • Share this:

    ವಿಜಯಪುರ ಜಿಲ್ಲೆಯ ಕೊಲ್ಹಾರ ಎಂದಾಕ್ಷಣ ಎಲ್ಲರಿಗೂ ಥಟ್ಟನೆ ನೆನಪಾಗುವುದೇ ಮಡಿಕೆ ಮೊಸರು! ಇಲ್ಲಿನ ರುಚಿಕಟ್ಟಾದ ಗಟ್ಟಿ ಕೆನೆ ಮೊಸರಿಗೆ ಶತಮಾನದ ಇತಿಹಾಸವಿದೆ. ಅಂದಹಾಗೆ ಇದೇನಿದು ಕೊಲ್ಹಾರ ಅಂತ ಬರೆದಿದ್ದಾರೆಂದು ಗೊಂದಲ ಆಗಬೇಡಿ, ಇದು ಕೋಲಾರ ಅಲ್ಲ, ಕೊಲ್ಹಾರ! ಕೋಲಾರ ಚಿನ್ನದ ಗಣಿ ಬಂಗಾರಕ್ಕೆ ಹೆಸರಾದರೆ ವಿಜಯಪುರ ಜಿಲ್ಲೆಯ (Vijayapura) ಕೊಲ್ಹಾರ ಮೊಸರಿನ ಖಣಿಗೆ ಹೆಸರಾಗಿದೆ. ಹಾಗಾದರೆ  ಏನಿದು ಕೊಲ್ಹಾರದ ಗಟ್ಟಿ ಮೊಸರು? ಇದರ ರುಚಿ ಹೇಗಿರುತ್ತೆ? ಕೊಲ್ಹಾರದ ಗಟ್ಟಿ ಮೊಸರನ್ನು (Kolhar Curd) ಹೇಗೆ ತಯಾರಿಸಬಹುದು? ನಾವೂ ಮನೆಯಲ್ಲಿ ತಯಾರಿಸಬಹುದೇ? (Kolhar Curd Preparation) ನಿಮ್ಮ ನಾಲಿಗೆಯಲ್ಲಿ ನೀರೂರಿಸುವಂತಹ ಕೊಲ್ಹಾರ ಗಟ್ಟಿ ಮೊಸರಿನ ರುಚಿರುಚಿಯಾದ ಸ್ಟೋರಿ ಇಲ್ಲಿದೆ. 


    ಈ ಹಿಂದೆ ಬಿಜಾಪುರ ಜಿಲ್ಲೆ ಇದ್ದಾಗ ಈ ಕೊಲ್ಹಾರ ಗ್ರಾಮ ಮುಳುಗಡೆಗೊಂಡಿತು. ಇದರಿಂದಾಗಿ ಲಕ್ಷಾಂತರ ಹೆಕ್ಟೇರ್ ಕೃಷಿ ಭೂಮಿ ಜಲಾವೃತಗೊಂಡು ಸಾವಿರಾರು ಜನರು ಮನೆ ಮಠ ಕಳೆದುಕೊಂಡು ಬೇರೆಡೆ ಸ್ಥಳಾಂತರಗೊಂಡಿದ್ದರು. ಆಸ್ತಿಪಾಸ್ತಿ ಕಳೆದುಕೊಂಡವರಿಗೆ ಸರ್ಕಾರ ಪರಿಹಾರದ ಜೊತೆಗೆ ಜಮೀನು ನೀಡಿದೆ.


    ಎಲ್ಲಿದೆ ಈ ಕೊಲ್ಹಾರ ಊರು? ಎಲ್ಲಿ ಸಿಗುತ್ತೆ?
    ಸದ್ಯ ವಿಜಯಪುರದಿಂದ ಬಾಗಲಕೋಟೆ ಮತ್ತು ಹುಬ್ಬಳ್ಳಿ ಮಾರ್ಗವಾಗಿ ಸಂಚರಿಸುವ ರಾಷ್ಟೀಯ ಹೆದ್ದಾರಿ ಪಕ್ಕದಲ್ಲಿ ಈ ಕೊಲ್ಹಾರ ಊರು ಸಿಗುತ್ತದೆ. ಈ ಊರಿಗೆ ಹೊಂದಿಕೊಂಡಿರುವ (ಯುಕೆಪಿ ಕ್ರಾಸ್) ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚರಿಸುವ ವಾಹನ ಸವಾರರು ಸೇರಿದಂತೆ ಗೋಳಗುಮ್ಮಟ ವೀಕ್ಷಣೆಗೆ ಹೋಗುವ ಪ್ರವಾಸಿಗರು ಇಲ್ಲಿ ಇಳಿದು ಕೆನೆ ಮೊಸರನ್ನು ಬಾಯಿ ಚಪ್ಪರಿಸಿ ಮನೆಗೆ ಹತ್ತಾರು ಮೊಸರಿನ ಕುಡಿಕೆಗಳನ್ನ ತೆಗೆದುಕೊಂಡು ಹೋಗುವುದನ್ನು ನೀವಿಲ್ಲಿ ಕಾಣಬಹುದು.


    ಸಾವಿರಾರು ಕೆನೆ ಮೊಸರಿನ ಗಡಿಗೆ ಮಾರಾಟ!
    ಕಳೆದೊಂದು ಶತಮಾನದಿಂದಲೂ ಇಲ್ಲಿಯವರೆಗೆ ರಾಜ್ಯದಲ್ಲಿ ಈ ಕೆನೆ ಮೊಸರಿಗೆ ಭಾರೀ ಬೇಡಿಕೆ ಇದೆ. ಪ್ರತಿ ದಿನ ಇಲ್ಲಿ ಸಾವಿರಾರು ಕೆನೆ ಮೊಸರಿನ ಗಡಿಗೆಗಳು ಮಾರಾಟವಾಗುತ್ತವೆ. ಸದ್ಯ ಇದೊಂದು ಉದ್ಯಮವಾಗಿ ಮಾರ್ಪಟ್ಟಿದೆ. ಹೈನುಗಾರಿಕೆ ಮಾಡುವ ರೈತರು, ಮಡಿಕೆ ತಯಾರಿಸುವ ಕುಂಬಾರರ ಕುಟುಂಬಗಳಿಗೆ ಆರ್ಥಿಕವಾಗಿ ಸದೃಢರಾಗಲು ಈ ಉದ್ಯಮ ಸಹಕಾರಿಯಾಗಿದೆ ಎಂದರೆ ತಪ್ಪಾಗಲಾರದು.


    ಹೇಗೆ ತಯಾರಾಗುತ್ತೆ ಕೊಲ್ಹಾರ ಮೊಸರು?
    ಹೈನುಗಾರಿಕೆ ಮಾಡುವ ರೈತ ಮಹಿಳೆಯರು ಹಾಲಿಗೆ ನೀರನ್ನು ಬೆರೆಸುವುದಿಲ್ಲ, ಕಟ್ಟಿಗೆ ಒಲೆಯಮೇಲೆ ಗಟ್ಟಿಯಾಗುವವರೆಗೆ ಹೆಚ್ಚು ಸಮಯ ಕಾಯಿಸಿ ಉಗುರು ಬೆಚ್ಚಗಿನ ಹಾಲಿಗೆ ಹೆಪ್ಪು ಹಾಕುತ್ತಾರೆ. ಹಾಲಿಗೆ ಹೆಪ್ಪು ಹಾಕಿದ ಸುಮಾರು ಗಂಟೆಗಳಲ್ಲಿ ಮೊಸರು ಸಿದ್ಧವಾಗುತ್ತದೆ. ಗಟ್ಟಿ ಮೊಸರಾದ ಮೇಲೆ ಮಾರಾಟಕ್ಕೆ ಸಿದ್ಧವಾಗುತ್ತದೆ. ಸರಿಸುಮಾರು ಮೂರು ನಾಲ್ಕು ದಿನದವರೆಗೆ ಈ ಮೊಸರು ಕೆಡುವುದಿಲ್ಲ. ಹುಳಿಯೂ ಆಗುವುದಿಲ್ಲ! ಮೊಸರು ಮಡಿಕೆಯಲ್ಲಿರುವುದರಿಂದ ಮೊಸರಿನಲ್ಲಿನ ನೀರನ್ನು ಸಹ ಮಡಿಕೆ ಹೀರಿಕೊಳ್ಳುತ್ತದೆ. ಹೀಗಾಗಿ ಪರಿಶುದ್ಧ ಗಟ್ಟಿ ಕೆನೆ ಮೊಸರು ರಾಜ್ಯದಲ್ಲಿ ಹೆಸರು ಪಡೆದಿದೆ.

    Kolhar Curd
    ಮೊಸರು ಮಾರಾಟಗಾರ


    ಪ್ರತಿನಿತ್ಯ 10 ಸಾವಿರಕ್ಕೂ ಅಧಿಕ ಮಡಿಕೆ ಖರೀದಿ!
    ರೈತರಿಂದ ಹೋಟಲ್ ಮಾಲೀಕರು, ಮೊಸರು ವ್ಯಾಪಾರಸ್ಥರು ರೈತರಿಂದ ಖರೀದಿ ಮಾಡಿ ವ್ಯಾಪಾರ ಮಾಡುತ್ತಾರೆ. ಪ್ರತಿ ಗಡಿಗೆ ಮೊಸರು ಬೇರೆಡೆ ತೆರಳಿ ಮಾರಾಟ ಮಾಡಿದರೆ 40 ರಿಂದ 50 ರೂಪಾಯಿ ವ್ಯಾಪಾರಿಗಳಿಗೆ ಸಿಗುತ್ತೆ. ಆದರೆ ಇಲ್ಲಿ ಹೈನುಗಾರಿಕೆ ಹೆಚ್ಚಿದ್ದರಿಂದ ಕೇವಲ 20 ರೂಪಾಯಿಗೆ ಮಾರಾಟ ಮಾಡಲಾಗುತ್ತದೆ. ನಿಡಗುಂದಿ ತಾಲೂಕಿನ ಚಿಮ್ಮಲಗಿ ಕೊಲ್ಹಾರ ತಾಲೂಕಿನ ಕೋಳುರು ಗ್ರಾಮಗಳ ಕುಂಬಾರರು ಕೆರೆ ಮತ್ತು ಸಮೀಪದ ಕೃಷ್ಣಾ ನದಿ ತಟದಲ್ಲಿ ದೊರೆಯುವ ಮಣ್ಣನ್ನು ತಂದು ಸಣ್ಣ ಸಣ್ಣ ಮಡಿಕೆಗಳನ್ನು ತಯಾರಿಸಿ ವ್ಯಾಪಾರಿಗಳಿಗೆ ಪೂರೈಸುತ್ತಾರೆ. ಸರಿಸುಮಾರು ಪ್ರತಿನಿತ್ಯ 10 ಸಾವಿರಕ್ಕೂ ಅಧಿಕ ಮಡಿಕೆಗಳನ್ನು ಮೊಸರು ತಯಾರಿಕೆಗೆ ರೈತರು ಖರೀದಿಸುತ್ತಾರೆ. ಇಲ್ಲಿ ಕುಂಬಾರರು ತಯಾರಿಸುವ ಮಡಿಕೆಗಳಿಗೂ ಸಹ ಭಾರಿ ಬೇಡಿಕೆ ಇದೆ.


    ದಿನಕ್ಕೆ ಎಷ್ಟು ಲಾಭ ಸಿಗುತ್ತೆ?
    ಕೆನೆ ಮೊಸರಿನ ಮಾರಾಟವನ್ನೇ ಮುಖ್ಯ ಉದ್ಯೋಗವನ್ನಾಗಿಸಿಕೊಂಡಿರುವ ಕೊಲ್ಹಾರ ಸುತ್ತಮುತ್ತಲಿನ ವ್ಯಾಪಾರಿಗಳು ಇದರಿಂದಲೇ ಜೀವನ ಸಾಗಿಸುತ್ತಿದ್ದಾರೆ. ಯುಕೆಪಿ ಕ್ರಾಸಿನ ಎರಡು ಬದಿಗೆ ಹತ್ತಾರು ವ್ಯಾಪಾರಿಗಳು ಟೆಂಟ್ ನಿರ್ಮಿಸಿಕೊಂಡು ಮೊಸರು ಮಾರಾಟ ಮಾಡುತ್ತಾರೆ. ಪ್ರತಿ ದಿನ ಬೆಳಗ್ಗೆ 7 ಗಂಟೆಗೆ ವ್ಯಾಪಾರ ಆರಂಭವಾದರೆ ಸಂಜೆ 7 ಗಂಟೆವರೆಗೂ ವ್ಯಾಪಾರ ಬಲು ಜೋರಾಗಿರುತ್ತದೆ. ದಿನಕ್ಕೆ 1 ಸಾವಿರದಿಂದ 2 ಸಾವಿರದವರೆಗೆ ಲಾಭ ಸಿಗುತ್ತದೆ ಎನ್ನುತ್ತಾರೆ ವ್ಯಾಪಾರಿಗಳು.  




    ಮೊಸರು ಸವಿಯಲು ದಂಡು ದಂಡು ಜನ!
    ಈ ತಾಲೂಕಿನ ಹೋಟೆಲ್ ಮಾಲೀಕರು ಈ ಗಟ್ಟಿ ಕೆನೆ ಮೊಸರನ್ನೇ ಆಧಾರವಾಗಿಟ್ಟುಕೊಂಡು ತಮ್ಮ ಆದಾಯದ ಮೂಲವನ್ನು ಹೆಚ್ಚಿಸಿಕೊಂಡಿದ್ದಾರೆ. ಪ್ರತಿದಿನ ತಯಾರಿಸುವ ಮೊಸರು, ಅವಲಕ್ಕಿ ಸೇರಿದಂತೆ ಊಟಕ್ಕೂ ಕೆನೆ ಮೊಸರು ನೀಡುವುದರಿಂದ ಇಲ್ಲಿನ ಹೋಟೆಲ್​ಗಳಿಗೆ ಹೆಚ್ಚಿನ ಜನರು ಮೊಸರು ಸವಿಯಲು ದಂಡು ದಂಡಾಗಿ ಆಗಮಿಸುತ್ತಾರೆ.


    ಇನ್ನೂ ಇದೆ ವಿಶೇಷ!
    ಅಷ್ಟೇ ಅಲ್ಲ, ಈ ಕೊಲ್ಹಾರಕ್ಕೆ ಹೊಂದಿಕೊಂಡಿರುವ ವಿಜಯಪುರ - ಹುಬ್ಬಳ್ಳಿ ರಾಷ್ಟ್ರೀಯ ಹೆದ್ದಾರಿ 2018 ರಲ್ಲಿ ಕೃಷ್ಣಾ ನದಿಗೆ ಅಡ್ಡಲಾಗಿ ಬೃಹತ್ ಸೇತುವೆ ನಿರ್ಮಿಸಲಾಗಿದೆ. ಈ ಸೇತುವೆ ದಕ್ಷಿಣ ಭಾರತದಲ್ಲಿ ಅತಿ ಉದ್ದವಾದ ಸೇತುವೆ ಎಂದು ಹೆಸರು ಪಡೆದಿದೆ.   ಕೃಷ್ಣಾ ನದಿಯನ್ನು ಉತ್ತರ ಕರ್ನಾಟಕದ ಜೀವನದಿ ಎಂದು ಕರೆಯುತ್ತಾರೆ.  ಕರ್ನಾಟಕ ರಾಜ್ಯದಲ್ಲಿಯೇ ಅತಿ ದೊಡ್ಡ ನೀರಾವರಿ ಯೋಜನೆಯಾದ ಕೃಷ್ಣಾ ಮೇಲ್ದಂಡೆ ಯೋಜನೆಯನ್ನು ಈ ನದಿಯಿಂದ ಕೈಗೆತ್ತಿಕೊಳ್ಳಲಾಗಿದೆ. ಈ ನದಿಯು ಉತ್ತರ ಕರ್ನಾಟಕದ ಜೀವ ನದಿಯಾಗಿದೆ. ರಾಯಚೂರ ಜಿಲ್ಲೆಯ ಕುಡ್ಲು ಎಂಬಲ್ಲಿ ಭೀಮಾ ನದಿಯು ಕೃಷ್ಣಾ ನದಿಯನ್ನು ಸೇರುತ್ತದೆ.


    ಇದನ್ನೂ ಓದಿ: Vijayapura: ವಿಜಯಪುರ ಜಿಲ್ಲೆಯ ಯುವಕ ಯುವತಿಯರೇ, ನಿಮ್ಮನ್ನೇ ಹುಡುಕಿ ಬಂದಿದೆ ಈ ಅವಕಾಶ!


    ರಾಜ್ಯದಲ್ಲಿ ಈ ಊರಿಗೆ ಕೆನೆ ಮೊಸರಿನ ಖಣಿ ಅಂತಲೇ ಕರೆಯುತ್ತಾರೆ. ಕೊಲ್ಹಾರದ ಮುಳುಗಡೆಗೆ ತುತ್ತಾಗುತ್ತಿರುವ ಪ್ರದೇಶ. ಇಂಥ ಸಂಕಟದ ನಡುವೆಯೂ ಇಲ್ಲಿ ದೊರೆಯುವ ಮೊಸರಿಗೇನೂ ಕುಂದಾಗಿಲ್ಲ. ತಾವು ಆಕಸ್ಮಿಕವಾಗಿ ಈ ಮಾರ್ಗದಲ್ಲಿ ಹೊರಟರೆ ಗಡಿಗೆಗಳಲ್ಲಿ ಕೆನೆ ಮೊಸರನ್ನು ಸವಿಯಬಹುದು.


    ಮೊಸರವಲಕ್ಕಿ, ಮೊಸರನ್ನ, ಪೇಪರ್ ಮೊಸರವಲಕ್ಕಿ, ಮೊಸರ ಸೂಸಲ..
    ಒಂದೇ ಉದ್ಯಮದಲ್ಲಿ ಹೈನುಗಾರಿಕೆ ಮತ್ತು ಕುಂಬಾರಿಕೆ ಎರಡಕ್ಕೂ ಮಾರುಕಟ್ಟೆ ದೊರೆತಿದೆ. ಮೊಸರನ್ನು ಪ್ಯಾಕ್ ಮಾಡದೇ ಗಡಿಗೆಗಳಲ್ಲಿ ತುಂಬಿ ಮೇಲೊಂದು ಕಾಗದದ ಮುಚ್ಚಳವಿಟ್ಟು ರಸ್ತೆಯ ಉದ್ದಕ್ಕೂ ಹೈನುಗಾರರು ಮಾರಾಟಕ್ಕೆ ಕೂತಿರುತ್ತಾರೆ. ಮೊಸರಷ್ಟೇ ಅಲ್ಲದೇ ಮೊಸರಿನ ತಿನಿಸುಗಳಾದ ಮೊಸರವಲಕ್ಕಿ, ಮೊಸರನ್ನ, ಪೇಪರ್ ಮೊಸರವಲಕ್ಕಿ, ಮೊಸರ ಸೂಸಲ ಇತ್ಯಾದಿಗಳಿಗೂ ಒಳ್ಳೆಯ ಬೇಡಿಕೆ ಇದೆ.


    ಇದನ್ನೂ ಓದಿ: Hindu Gods Worship in Dargah: ದರ್ಗಾದಲ್ಲಿ ಶ್ರೀಕೃಷ್ಣ-ಸಾಯಿಬಾಬಾ ವಿಗ್ರಹ ಸ್ಥಾಪಿಸಿ ಮುಸ್ಲಿಂ ಸಮುದಾಯದಿಂದಲೇ ಪೂಜೆ, ಪುನಸ್ಕಾರ!


    ಕೊಲ್ಹಾರ ಹಾದು ಹೋಗುವವರು ಮೊಸರಿನ ಗಡಿಗೆಗಳ ಖರೀದಿ ಮಾಡದೇ ಹೋಗುವುದಿಲ್ಲ. ಇನ್ನೂ ಸಮಯವಿದ್ದರೇ ಇಳಿದು ಮೊಸರು ಸವಿದೇ ಹೋಗುತ್ತಾರೆಂದು ಮೊಸರು ಮಾರಾಟಗಾರ ಬಸವರಾಜ್ ಸಿಂಹಾಸನ ಲೋಕಲ್ 18ಗೆ ತಿಳಿಸಿದರು.


    ವರದಿ: ಪ್ರಶಾಂತ ಹೂಗಾರ, ವಿಜಯಪುರ

    Published by:guruganesh bhat
    First published: