Uttara Kannada Artist: ಕಾಫಿ ಸ್ಟಿಕ್​​ನಲ್ಲಿ ಅದ್ಭುತ ಕಲಾಕೃತಿ, ಇವರ ನೈಪುಣ್ಯಕ್ಕೆ ಭೇಷ್ ಅಂತೀರಿ!

ಕಾರವಾರ: ವಾವ್! ಐಫೆಲ್ ಟವರ್, ಹಂಪಿಯ ಏಕಶಿಲಾ ರಥ, ಕೇದಾರನಾಥ ಮಂದಿರ, ಗೇಟ್ ವೇ ಆಫ್ ಇಂಡಿಯಾ. ಗಾತ್ರದಲ್ಲಿ ಪುಟ್ಟದಾದ್ರೂ ಕಣ್ಣಿಗಂತೂ ನಿಜವೇನೋ ಅನ್ನಿಸ್ಬಿಡುತ್ತೆ. ಅಷ್ಟರ ಮಟ್ಟಿಗೆ ಸ್ಟಿಕ್​ನಲ್ಲಿ ಈ ಮಟ್ಟಿಗೆ ಜಗದ್ವಿಖ್ಯಾತಿ ಸ್ಮಾರಕಗಳು ಕಣ್ಮನ ಸೆಳೆಯುತ್ತೆ. ಜೊತೆಗೆ ಕಲಾವಿದನ (Uttara Kannada Artist) ಕಲಾ ನೈಪುಣ್ಯತೆಗೆ ಈ ಪುಟ್ಟ ಗಾತ್ರದ ಸ್ಮಾರಕಗಳ ತದ್ರೂಪಿ ಸಾಕ್ಷಿ ನುಡಿಯುತ್ತಿದೆ.

ಯೆಸ್, ಹೀಗೆ ಕಾಫಿ ಸ್ಟಿಕ್​ಗಳಿಂದ ಇಂತಹ ಅತ್ಯಮೋಘ ಕಲಾಕೃತಿಗಳನ್ನ ರಚಿಸೋ ಇವರು ಉತ್ತರ ಕನ್ನಡ ಕಾರವಾರದ ಪ್ರಶಾಂತ ಗಡ್ಕರ. ಪಿಎಂಟಿ ಕ್ವಾಟರ್ಸ್ ಸಮೀಪದ ನಿವಾಸಿ ಆಗಿರುವ ಪ್ರಶಾಂತ ಗಡ್ಕರ ಹೋಟೆಲ್, ರೆಸ್ಟೋರೆಂಟ್​ಗಳಲ್ಲಿ ಕಾಫಿ, ಚಹಾಗೆ ಸಕ್ಕರೆ ಬೆರೆಸಿಕೊಳ್ಳಲು ನೀಡುವ ಕಾಫಿ ಸ್ಟಿಕ್ ಕಡ್ಡಿಗಳನ್ನೇ ಹೀಗೆ ತನ್ನ ಕಲಾ ನೈಪುಣ್ಯತೆಗೆ ಬಳಸಿಕೊಂಡಿದ್ದಾರೆ.

ಅಬ್ಬಬ್ಬಾ! ಅದ್ಭುತ
ಈ ಮೂಲಕ ಎಂತಹಾ ಅದ್ಭುತ ಅನ್ನೋವಂತಹ ಸ್ಮಾರಕಗಳ ತದ್ರೂಪವನ್ನ ಪುಟ್ಟದಾಗಿ ರಚಿಸಿ ಸೈ ಎನಿಸಿಕೊಂಡಿದ್ದಾರೆ. ಬಿದಿರಿನಿಂದ ತಯಾರಿಸುವ ಈ ಕಾಫಿ ಸ್ಟಿಕ್ ಬಳಕೆ ಮಾಡಿ ಐಫೆಲ್ ಟವರ್, ಹಂಪಿಯ ಏಕಶಿಲಾ ರಥ, ಕೇದಾರನಾಥ ಮಂದಿರ, ಅಮೃತಸರದ ಸ್ವರ್ಣ ಮಂದಿರ, ಮುಂಬೈನ ಗೇಟ್ ವೇ ಆಫ್ ಇಂಡಿಯಾ, ಆಗ್ರಾದ ತಾಜ್​ಮಹಲ್ ಒಳಗೊಂಡು ಪ್ರಖ್ಯಾತ ತಾಣಗಳ ಕಲಾಕೃತಿಗಳನ್ನು ಸಿದ್ಧಪಡಿಸಿದ್ದಾರೆ.

ಅಪರೂಪದ ಕಲಾ ಚಾತುರ್ಯ
ಸದ್ಯ ಪ್ರಶಾಂತ್ ಅವರು ಅಯೋಧ್ಯೆಯ ರಾಮಮಂದಿರ ನಿರ್ಮಾಣದಲ್ಲಿ ತೊಡಗಿದ್ದು, ಸ್ವ ಉದ್ಯಮದಲ್ಲಿರುವ ಅವರು ಬಿಡುವಿನ ವೇಳೆಯಲ್ಲಿ ಇಂತಹ ಕಲಾಕೃತಿಗಳನ್ನು ರಚಿಸುತ್ತಾರೆ. ಒಂದು ಕಲಾಕೃತಿ ತಯಾರಿಸಲು ಒಂದು- ಒಂದೂವರೆ ತಿಂಗಳು ಶ್ರಮವಹಿಸುತ್ತಾರೆ.

ಇದನ್ನೂ ಓದಿ: Hanuman Temple: ನುಗ್ಗಿಕೇರಿಯ ಈ ಆಂಜನೇಯ ಬಲಭೀಮ ಎಂದೇ ಫೇಮಸ್!

ಪ್ರಾರಂಭದಲ್ಲಿ ಪ್ರಶಾಂತ ಬೆಂಕಿ ಕಡ್ಡಿಗಳನ್ನು ಬಳಸಿ ಪ್ರಖ್ಯಾತ ಕಲಾಕೃತಿಯನ್ನು ತಯಾರಿಸುವ ಪ್ರಯತ್ನವನ್ನು ಮಾಡಿ ಯಶಸ್ವಿಯಾಗಿದ್ದರು. ಬಳಿಕ ಹೋಟೆಲ್​ಗೆ ಹೋದಾಗ ಅಲ್ಲಿ ನೀಡಿದ್ದ ಕಾಫಿ ಸ್ಟಿಕ್​ಗಳನ್ನ ಬಳಸಿ ಇಂತಹ ಅಪರೂಪದ ಕಲಾ ಚಾತುರ್ಯತೆಯನ್ನು ಪ್ರಶಾಂತ್ ಅವರು ಮೆರೆದಿದ್ದಾರೆ.

ಅಷ್ಟೇ ಅಲ್ದೇ, ತನಗೆ ಬೇಕಾದ ಕಾಫಿ ಸ್ಟಿಕ್ ಗಳನ್ನು ಆನ್ಲೈನ್ನಿಂದಾನೂ ತರಿಸಿಕೊಳ್ಳುತ್ತಾರೆ. 500 ಸ್ಟಿಕ್​ಗೆ 350 ರೂ. ಖರೀದಿಸುತ್ತಾರೆ. ಜೊತೆಗೆ ಫ್ಲೆಕ್ಸ್ ಗಮ್​ಗಳನ್ನು ತರಿಸಿಕೊಂಡು ಇಂತಹ ಕಲಾಕೃತಿಗಳಿಗೆ ಜೀವ ತುಂಬುತ್ತಾರೆ.

ಇದನ್ನೂ ಓದಿ: Sharavati Hanging Bridge: ನದಿಯ ಮೇಲಿನ ತೂಗುಯ್ಯಾಲೆ, ಇಲ್ಲಿ ನಿಂತ್ರೆ ಗಾಳಿಯಲ್ಲೇ ತೇಲಿದಂತಾಗುತ್ತೆ!

ಖರ್ಚು ಎಷ್ಟೇ ಬಂದ್ರೂ ಇಷ್ಟಪಟ್ಟು ಇಂತಹ ಕಲಾಕೃತಿಗಳ ರಚನೆಯಲ್ಲಿ ಆಸಕ್ತಿಯಿಂದ ತೊಡಗಿಕೊಳ್ಳುತ್ತಾರೆ. ಒಟ್ಟಿನಲ್ಲಿ ಸ್ವಂತ ಉದ್ಯೋಗದ ನಡುವೆಯೂ ಇಂತಹ ಅಪರೂಪದ ಕಲೆಯ ಮೂಲಕ ಪ್ರಶಾಂತ ಗಡ್ಕರ್ ಹೆಸರುವಾಸಿಯಾಗುತ್ತಿರುವುದು ಖುಷಿಯ ಸಂಗತಿಯೇ ಸರಿ.