Burude Falls: ಇದು ಅಘನಾಶಿನಿಯ ಅದ್ಭುತ ಸೃಷ್ಟಿ, ಬುರುಡೆ ಫಾಲ್ಸ್​ಗೆ ಹೀಗೆ ಹೋಗ್ಬನ್ನಿ

ಉತ್ತರ ಕನ್ನಡ: ಬಂಡೆ ಕಲ್ಲಿನ ಮಧ್ಯೆ ಧುಮ್ಮಿಕ್ಕೋ ಜಲಪಾತದ ಸೊಬಗು. ಹಾಲ್ನೊರೆಯಾಗಿ ಚಿಮ್ಮುತ್ತಾ ಕಣ್ಮನ ಸೆಳೆಯೋ ಜಲರಾಶಿಯ (Waterfalls Travel Plan) ಕಣ್ಣೋಟ. ಅಘನಾಶಿನಿ ಎಂಬ ಪಶ್ಚಿಮ ಘಟ್ಟದ ಸುಂದರಿ ಹುಟ್ಟುಹಾಕಿದ ಅದ್ಭುತವೇ ಈ ಫಾಲ್ಸ್. ಹಾಗಿದ್ರೆ ಯಾವುದಿದು ಜಲಪಾತ  (Burude Falls) ಅಂತೀರ? ಅದೆಲ್ಲಕ್ಕೂ ಉತ್ತರ ಇಲ್ಲಿದೆ ನೋಡಿ.

ಯೆಸ್‌, ಅಘನಾಶಿನಿ ನದಿ ಉತ್ತರ ಕನ್ನಡದಲ್ಲಿ ಹಲವು ಬೆರಗುಗಳನ್ನೇ ಸೃಷ್ಟಿಸಿದೆ. ಪಶ್ಚಿಮ ಘಟ್ಟದ ಸುಂದರಿ, ಪವಿತ್ರ ಜಲಸಿರಿಯಾಗಿರುವ ಅಘನಾಶಿನಿ ಸಿದ್ದಾಪುರದ ಆಳ ಕಣಿವೆಯಲ್ಲಿ ಈ ಅದ್ಭುತ ಜಲಪಾತವನ್ನು ಸೃಷ್ಟಿಸಿದೆ. ಇದುವೇ ಬುರುಡೆ ಫಾಲ್ಸ್.‌

ವರ್ಷವಿಡೀ ಸುಮ್ಮನಿದ್ದು ಮಳೆಗಾಲದಲ್ಲಿ ಭೋರ್ಗರೆವ ಸುಂದರಿ!
ಬಂಡೆ ಕಲ್ಲುಗಳ ಮಧ್ಯೆ ಧುಮ್ಮುಕ್ಕಿ ಹರಿಯೋ ಈ ಫಾಲ್ಸ್‌ ವರ್ಷವಿಡೀ ಕಣ್ಮನ ಸೆಳೆಯುತ್ತೆ. ಬೇಸಿಗೆಯಲ್ಲಿ ಶಾಂತವಾಗಿ ಕಾಣೋ ಈ ಬುರುಡೆ ಜಲಪಾತ, ಮಳೆ ಬೀಳ್ತಿದ್ದಂತೆ ತನ್ನ ಉಗ್ರ ರೂಪ ತಾಳುತ್ತೆ. ಆದ್ರೆ ಸಾಮಾನ್ಯರಿಗೆ ಈ ಫಾಲ್ಸ್‌ ತಲುಪೋದು ಕಷ್ಟ.

ಸಾಹಸ ಪ್ರಿಯರಿಗೆ ಸಖತ್ ಪ್ಲೇಸ್
ಹಾಗಾಗಿ ಮಕ್ಕಳು, ಮಹಿಳೆಯರು, ಹಿರಿಯರು ಯಾರೇ ಇದ್ರು ದೂರದಿಂದಲೇ ವೀವ್‌ ಪಾಯಿಂಟ್​ನಲ್ಲಿ ನಿಂತು ನೋಡ್ತಾ ಎಂಜಾಯ್‌ ಮಾಡಬಹುದಷ್ಟೇ. ಇನ್ನು ತುಸು ಗಟ್ಟಿಯಾಗಿದ್ದವರು, ಸಾಹಸ ಪ್ರಿಯರಷ್ಟೇ ಈ ಫಾಲ್ಸ್‌ ತಲುಪಿ ಸಂಭ್ರಮಿಸಬಹುದು.

ಎಲ್ಲಿದೆ ಈ ಫಾಲ್ಸ್?‌
ಈ ಬುರುಡೆ ಜಲಪಾತವಿರುವುದು ಸಿದ್ದಾಪುರ ಹಾಗೂ ಕುಮಟಾ ರಸ್ತೆಯ ಮಧ್ಯದಲ್ಲಿ. ಕ್ಯಾದಗಿ ಪಂಚಾಯತ್​ನ ಅಳ್ಳಿಮಕ್ಕಿಯಿಂದ ಒಳಗೆ 3 ಕಿಲೋಮೀಟರ್ ಮಾರ್ಗವಾಗಿ ಸಾಗಿದರೆ, ಅಲ್ಲಲ್ಲಿ ಒಂಟಿ ಮನೆಗಳು, ಅಂಗಡಿಗಳು, ವಿಶಾಲ ಮರಗಳ ಉಬ್ಬುತಬ್ಬಿನ ರಸ್ತೆ.

ಇದನ್ನೂ ಓದಿ: Business Idea: ಬೇಸಿಗೆ ರಜೆ ಬ್ಯುಸಿನೆಸ್! ಮಾವಿನ ಹಣ್ಣು ಮಾರಿ ದಿನಕ್ಕೆ 5 ಸಾವಿರ ದುಡಿಯುವ ಮಕ್ಕಳು

ಆ ಗಾಢ ಶಾಂತ ಪರಿಸರದಲ್ಲಿ ಇನ್ನೂ ನಾಲ್ಕು ಕಿಲೋಮೀಟರ್ ಎಂದರೆ ಅಳ್ಳಿಮಕ್ಕಿಯಿಂದ ಸರಿಯಾಗಿ ಇಳಿಮನೆ ಮಾರ್ಗವಾಗಿ 7 ಕಿಲೋಮೀಟರ್ ಕ್ರಮಿಸಿದರೆ ಈ ಜಲಪಾತ ಸಿಗುತ್ತದೆ. ಸುಮಾರು 50 ಅಡಿ ಎತ್ತರದಿಂದ ಧುಮ್ಮಿಕ್ಕುವ ಈ ಜಲಪಾತವು 2 ಭಾಗವಾಗಿ ಹರಿಯುತ್ತದೆ. ಮುಂದೆ ಇದೇ ಜಲಪಾತದ ನೀರು ಕುಮಟಾ ತಲುಪಿ ಸಮುದ್ರ ಸೇರುತ್ತದೆ.

ಸುಂದರ ನೋಟ
ಈ ಕಣಿವೆಗೆ 351 ಮೆಟ್ಟಿಲುಗಳಿದ್ದು, ಅದನ್ನ ಇಳಿದು ಈ ಕಣಿವೆ ಪ್ರವೇಶಿಸಬಹುದು. ಒಟ್ಟಾರೆ ಮೂರು ಕಿಲೋಮೀಟರ್​ನಷ್ಟು ಆಳದ ಕಣಿವೆ ಇಳಿದರೆ ಜಲಪಾತದ ಸೊಬಗನ್ನು ಹತ್ತಿರದಿಂದ ಕಣ್ತುಂಬಿಕೊಳ್ಳಬಹುದು.

ಇದನ್ನೂ ಓದಿ: Leaf Helmet: ನೇರಳೆ ಮರದ ಎಲೆಯಿಂದ ಹೆಲ್ಮೆಟ್! ಇದರಿಂದ ತಲೆ ಆಗುತ್ತೆ ಕೂಲ್‌

ಈ ವಿಷಯವನ್ನು ಮರೆಯಬೇಡಿ
ಇಲ್ಲಿ ಸುತ್ತಮುತ್ತಲು ಕಾಡುಗಳೇ ಇದ್ದು ಯಾವುದೇ ಹೋಟೆಲುಗಳು ಸಿಗದು. ಹೀಗಾಗಿ ಇಲ್ಲಿಗೆ ಹೋಗಬೇಕಿದ್ರೆ ಪೂರ್ತಿ ಸಿದ್ಧತೆ ಮಾಡಿಕೊಂಡೇ ತೆರಳಬೇಕಾಗುತ್ತದೆ. ಹಾಗೂ ಬೆಳಗ್ಗೆ 9 ಗಂಟೆಯಿಂದ 6 ಗಂಟೆಯರಿಗೆ ಮಾತ್ರ ಇಲ್ಲಿಗೆ ಪ್ರವೇಶ ನೀಡಲಾಗುತ್ತೆ. ಒಟ್ಟಿನಲ್ಲಿ ಬುರುಡೆ ಜಲಪಾತ ಅನ್ನೋದು ಸಾಹಸಪ್ರಿಯ ಯುವಕ, ಯುವತಿಯರಿಗಂತೂ ಖಂಡಿತಾ ಮಜಾ ನೀಡೋ ಫಾಲ್ಸ್‌ ಅನ್ನೋದನ್ನ ಮಾತ್ರ ಬಿಡಿಸಿ ಹೇಳಬೇಕಿಲ್ಲ.