ಸಿನಿಮೀಯ ಶೈಲಿಯಲ್ಲಿ ನಡೆದಿತ್ತು ಡಿಜೆ ಹಳ್ಳಿ ಪ್ರಕರಣದ ಪ್ರಮುಖ ಆರೋಪಿ ಸಂಪತ್​ರಾಜ್ ಬಂಧನ!

ಬೆಂಗಳೂರು (ನವೆಂಬರ್ 17): ಕೆಜೆ ಹಳ್ಳಿ, ಡಿಜೆ ಹಳ್ಳಿ ಗಲಭೆ ಪ್ರಕರಣದ ಪ್ರಮುಖ ಆರೋಪಿ ಹಾಗೂ ಮಾಜಿ‌ ಮೇಯರ್ ಸಂಪತ್ ರಾಜ್ ಬಂಧನವಾಗಿದೆ.. ಇಷ್ಟು ದಿನ ತಲೆ ಮರೆಸಿಕೊಂಡು‌ ಓಡಾಡುತ್ತಿದ್ದ ಸಂಪತ್ ರಾಜ್​ನನ್ನು ಸಿಸಿಬಿ ಪೊಲೀಸರು ಸಿನಿಮೀಯ ಶೈಲಿಯಲ್ಲಿ ಬಂಧಿಸಿದ್ದಾರೆ. ಸಿಸಿಬಿ ಕಾರ್ಯಾಚರಣೆ ಇಂಚಿಂಚೂ ಮಾಹಿತಿಯನ್ನು ನಾವು ನಿಮ್ಮ ಮುಂದಿಡುತ್ತಿದ್ದೇವೆ.

ಸಿಸಿಬಿ ಕೈಗೆ ಸಿಕ್ಕಿ ಬಿದ್ದಿದ್ದ ರಿಯಾಜುದ್ದೀನ್​ ಸಂಪತ್​ ರಾಜ್​ ಬಗ್ಗೆ ಕೆಲವಷ್ಟು ಮಾಹಿತಿ ನೀಡಿದ್ದ. ಸಂಪತ್ ರಾಜ್ ಪುಲಿಕೇಶಿನಗರದ ಸ್ನೇಹಿತರ ಮನೆಗೆ ಬರಬಹುದು ಎಂದು ತಿಳಿಸಿದ್ದ. ರಿಯಾಜುದ್ದೀನ್​ ನೀಡಿದ ಮಾಹಿತಿ ಆಧರಿಸಿ ಸೋಮವಾರ  ಪುಲಿಕೇಶಿನಗರದಲ್ಲಿ 20 ಸಿಸಿಬಿ ಪೊಲೀಸರು ಮಫ್ತಿಯಲ್ಲಿ ತಿರುಗಾಡುತ್ತಿದ್ದರು. ಅನುಮಾನದ ಮೇಲೆ ಇಡೀ ದಿನ ಮನೆಯ ಸುತ್ತಮುತ್ತ ಪೊಲೀಸರು ಓಡಾಟ ನಡೆಸಿದ್ದರು. ಕೆಲವು ತಾಂತ್ರಿಕ ದಾಖಲೆ ಆಧರಿಸಿ ಸಂಪತ್​ ರಾಜ್​ ಗೆಳೆಯನ ಮನೆಯಲ್ಲಿ ಇರುವುದರ ಬಗ್ಗೆ ಮಾಹಿತಿ ಕಲೆ ಹಾಕಿದ್ದರು. 9:45 ಕ್ಕೆ ಎಸಿಪಿ ವೇಣುಗೋಪಾಲ್ ಪುಲಿಕೇಶಿನಗರ ಸಂಪತ್ ರಾಜ್ ಸ್ನೇಹಿತನ ಮನೆ‌ ಬಳಿ ಆಗಮಿಸಿದ್ದರು. ರಾತ್ರಿ 10 ಗಂಟೆಗೆ ಸರಿಯಾಗಿ ಸಂಪತ್ ರಾಜ್​ನನ್ನು ಪೊಲೀಸರು ಬಂಧಿಸಿದ್ದಾರೆ.

ಸಂಪತ್ ರಾಜ್ ಬಂಧಿಸದಿದ್ದರೆ ಇತ್ತು ಸಂಕಷ್ಟ:  

ಸಂಪತ್ ರಾಜ್​ ಬಂಧನ ಆಗದೆ ಇದ್ದರೆ ಎಸಿಪಿ‌ ಹಾಗೂ ಇನ್ಸ್ಪೆಕ್ಟರ್​​ಗೆ ಸಂಕಷ್ಟ ಕಟ್ಟಿಟ್ಟ ಬುತ್ತಿಯಾಗಿತ್ತು. ನಿನ್ನೆಯ ಸಭೆಯಲ್ಲಿ ಒಂದು ದಿನದಲ್ಲಿ ಸಂಪತ್​ ರಾಜ್​ ಬಂಧನ ಆಗಬೇಕು. ಇಲ್ಲದಿದ್ದರೆ ಎಸಿಪಿ‌ ಹಾಗೂ ಇನ್ಸ್ಪೆಕ್ಟರ್​​ನ ಸಸ್ಪೆಂಡ್ ​ ಆಗುತ್ತಾರೆ ಎಂದು ಕಮಿಷನರ್​ ಎಚ್ಚರಿಕೆ ನೀಡಿದ್ದರು. ಈ ವೇಳೆ ಎರಡು ದಿನ ಕಾಲಾವಕಾಶ ಕೊಡುವಂತೆ ಸಿಸಿಬಿ ಮುಖ್ಯಸ್ಥರು ಕೇಳಿದ್ದರು. ಹೀಗಾಗಿ, ನಿನ್ನೆ ಶತಾಯಗತಾಯ ಬಂಧನ ಮಾಡಲೇಬೇಕು ಎನ್ನುವ ತೀರ್ಮಾನಕ್ಕೆ ಸಿಸಿಬಿ ಪೊಲೀಸರು ಬಂದಿದ್ದರು. ಅದರಂತೆ ನಿನ್ನೆ ಬಂಧನ ಮಾಡಲಾಗಿದೆ.

10 ದಿನಗಳಿಂದ ಪುಲಿಕೇಶಿನಗರದಲ್ಲೇ ಉಳಿದಿದ್ದ ಸಂಪತ್ ರಾಜ್:

ಕಳೆದ 10 ದಿನಗಳಿಂದ ಸಂಪತ್​ ರಾಜ್​ ಸ್ನೇಹಿತನ ಮನೆಯಲ್ಲೇ ಉಳಿದುಕೊಂಡಿದ್ದ.  ಮೊಬೈಲ್ ಸ್ವಿಚ್ ಆಫ್​ ಮಾಡಿಕೊಂಡು‌‌ ಮನೆಯಲ್ಲಿಯೇ ಮಾಜಿ ಮೇಯರ್ ಉಳಿದಿದ್ದ. ಸಿಕ್ಕಿ ಬೀಳುವ ಭಯದಿಂದ ಹೊರಗಡೆ ಬರುತ್ತಿರಲಿಲ್ಲ ಮತ್ತು ಯಾರೊಂದಿಗೂ ದೂರವಾಣಿ ಮೂಲಕ ಮಾತನಾಡುತ್ತಿರಲಿಲ್ಲ. ಹೀಗಾಗಿ ಸಂಪತ್​ ರಾಜ್​ ಬೆಂಗಳೂರಿನಲ್ಲಿ ಇರುವುದ ಹೌದೋ ಅಥವಾ ಇಲ್ಲವೋ ಎನ್ನುವ ಅನುಮಾನ ಕಾಡಿತ್ತು.