Sanjana Galrani: ಪ್ರಶಾಂತ್​ ಸಂಬರಗಿಯನ್ನು ನಾನು ಸುಮ್ಮನೆ ಬಿಡಲ್ಲ; ಕಣ್ಣೀರಿಟ್ಟ ಸಂಜನಾ ಗಲ್ರಾನಿ

ಸ್ಯಾಂಡಲ್​ವುಡ್​ನಲ್ಲಿ ಡ್ರಗ್​ ಆರೋಪ ದೊಡ್ಡ ಮಟ್ಟದಲ್ಲಿ ಚರ್ಚೆ ಆಗುತ್ತಿದೆ. ಈ ಪ್ರಕರಣದಲ್ಲಿ ಕೆಲ ಹೀರೋ ಹಾಗೂ ಹೀರೋಯಿನ್​ಗಳ ಹೆಸರು ಕೂಡ ಮುನ್ನೆಲೆಗೆ ಬಂದಿದೆ. ಕೆಲವರು ಡ್ರಗ್​ ಇದೆ ಎಂದು ಒಪ್ಪಿಕೊಂಡರೆ ಇನ್ನೂ ಕೆಲವರು ಡ್ರಗ್​ ಬಗ್ಗೆ ನನಗೆ ಗೊತ್ತಿಲ್ಲ ಎಂದಿದ್ದಾರೆ. ಈ ಮಧ್ಯೆ ಪ್ರಶಾಂತ್​ ಸಂಬರಗಿ ಎಂಬುವವರು ನಟಿ ಸಂಜನಾ ಗಲ್ರಾನಿ ವಿರುದ್ಧ ಡ್ರಗ್​ ಆರೋಪ ಮಾಡಿದ್ದರು. ಇದಕ್ಕೆ ನಟಿ ಸಂಜನಾ ಸಿಟ್ಟಾಗಿದ್ದು, ನಾನು ಪ್ರಶಾಂತ್​ ಸಂಬರಗಿಯನ್ನು ಸುಮ್ಮನೆ ಬಿಡುವುದಿಲ್ಲ ಎಂದು ಏಕವಚನದಲ್ಲಿ ವಾಗ್ದಾಳಿ ನಡೆಸಿದ್ದಾರೆ.

"ಪ್ರಶಾಂತ್​ ಸಂಬರಗಿ ಇಷ್ಟು ದಿನ ಎಲ್ಲಿದ್ದ? ಈಗ ಬಂದು ಒಂದಾದ ಮೇಲೊಂದು ಆರೋಪಗಳು ಮಾಡುತ್ತಿದ್ದಾನೆ. ಸಂಜನಾ ಡ್ರಗ್ಸ್ ನಲ್ಲಿದ್ದಾರೆ ಅಂತ ಏನೂ ಸಾಕ್ಷಿ ಇಲ್ಲದೆ ಹೇಗೆ ಹೇಳುತ್ತಾನೆ? ಪ್ರಶಾಂತ್​ ಸಂಬರಗಿಯನ್ನು ನಾನು ಸುಮ್ಮನೆ ಬಿಡುವುದಿಲ್ಲ,"ಎಂದು ಸಂಜನಾ ಆಕ್ರೋಶ ಹೊರಹಾಕಿದರು.

"ಈಗಾಗಲೇ ಸಿಸಿಬಿ ಪ್ರಕರಣದ ತನಿಖೆ ಮಾಡುತ್ತಿದೆ. ಪೊಲೀಸರ ಬಗ್ಗೆ ನಂಬಿಕೆ ಇದೆ. ನಾನು ಅವರನ್ನು ಗೌರವಿಸುತ್ತೇನೆ.  ಎಫ್​ಐಆರ್​ನಲ್ಲಿ ನನ್ನ ಹೆಸರೂ ಇಲ್ಲ. ನನಗಿದು ಕಿರುಕುಳದ ರೀತಿ ಭಾಸವಾಗುತ್ತಿದೆ. ನಾನು ಸ್ಟ್ರಗಲ್ ಮಾಡಿ ಈ ಮಟ್ಟಕ್ಕೆ ಬಂದಿದ್ದೇನೆ. ನಾನೇನೂ ತಪ್ಪು ಮಾಡಿಲ್ಲ.  ಈ ಪ್ರಕರಣದಲ್ಲಿ ನನಗೇನು ಸಂಬಂಧವೇ ಇಲ್ಲ. ಹೀಗಾಗಿ ಇದನ್ನು ದಯವಿಟ್ಟು ಇಲ್ಲೇ ನಿಲ್ಲಿಸಿ," ಎಂದು ಕಣ್ಣೀರಿಟ್ಟರು.

ಶ್ರೀಲಂಕಾ ಬ್ಯಾಲೀಸ್ ಕೆಸಿನೋದ ಪಾರ್ಟಿಯಲ್ಲಿ ಸಂಜನಾ ಡಾನ್ಸ್​ ಮಾಡಿದ ವಿಡಿಯೋ ಒಂದು ವೈರಲ್​ ಆಗಿತ್ತು. ಶಾಸಕ ಜಮೀರ್​ ಅಹ್ಮದ್​ ಹಾಗೂ ಸಂಜನಾ ಒಂದೇ ದಿನ ಶ್ರೀಲಂಕಾ ತೆರಳಿದ್ದೇಕೆ ಎಂದು ಪ್ರಶಾಂತ್​ ಸಂಬರಗಿ ಪ್ರಶ್ನಿಸಿದ್ದರು. ಈ ಬಗ್ಗೆ ಪ್ರತಿಕ್ರಿಸಿರುವ ಸಂಜನಾ, ಅಲ್ಲಿಗೆ ಚೀಫ್ ಗೆಸ್ಟ್ ಆಗಿ ಹೋಗಿದ್ದೆ. ಯಶ್, ಉಪೇಂದ್ರ ಸೇರಿ ತುಂಬಾ ಜನ ಸೆಲೆಬ್ರಿಟಿಗಳು ಹೋಗಿದ್ದಾರೆ. ವಿವೇಕ್ ಓಬೆರಾಯ್ ಮುಖ್ಯ ಅತಿಥಿ ಆಗಿ ಬಂದಿದ್ದರು. ನನ್ನ ಅಪ್ಪ, ಅಮ್ಮ ಕೂಡ ಜೊತೆಗೆ ಬಂದಿದ್ದರು. ಈ ಬಗ್ಗೆ ಊಹಾಪೋಹಗಳು ಮಾಡಬೇಡಿ. ಜಮೀರ್​ ಅವರೇ ಪ್ರಶಾಂತ್​ ವಿರುದ್ಧ ಕ್ರಮ ಕೈಗೊಳ್ಳಿ,  ಎಂದು ಆಗ್ರಹಿಸಿದರು.