Hotel Room: ಅಬ್ಬಬ್ಬಾ, ಈ ಹೋಟೇಲ್​ ರೂಮ್​ಗೆ ಗೋಡೆನೂ ಇಲ್ಲ, ಬಾಗಿಲುಗಳಂತು ಮೊದಲೇ ಇಲ್ಲ! ಆದ್ರೂ ಸಖತ್ತಾಗಿದೆ

ಹೋಟೆಲ್  (Hotel) ಎಂದರೆ ಐಷಾರಾಮಿಯಾಗಿರುವ ಸರ್ವ ಸುಸಜ್ಜಿತ ವ್ಯವಸ್ಥೆಗಳನ್ನೊಳಗೊಂಡಿರುವ ಸುಂದರ ಕೋಣೆ ಎಂಬುದೇ ಎಲ್ಲರ ಲೆಕ್ಕಾಚಾರವಾಗಿರುತ್ತದೆ. ವಿಶ್ವದಲ್ಲಿ ಅದೆಷ್ಟೋ ಒಂದನ್ನೊಂದು ಮೀರಿಸುವ ಪಂಚತಾರಾ ಹೋಟೆಲ್‌ಗಳಿವೆ, ತ್ರಿ ಸ್ಟಾರ್ ಹೋಟೆಲ್‌ಗಳಿವೆ ಆದರೆ ಪ್ರಕೃತಿಯ ನಡುವೆಯೇ ಯಾವುದೇ ಕಟ್ಟಡಗಳ ಬಂಧನವಿಲ್ಲದೆ ಮುಕ್ತವಾಗಿರುವ ಹೋಟೆಲ್ ಕೊಠಡಿಗಳನ್ನೆಲ್ಲಾದರೂ ನೋಡಿರುವಿರಾ?  ಓಪನ್ ಏರ್ ಹೋಟೆಲ್ ಎಂದೇ ಕರೆಯಲಾದ ನಲ್ ಸ್ಟರ್ನ್ ಗೋಡೆ ಹಾಗೂ ತಾರಸಿಗಳಿಂದ ಮುಕ್ತವಾಗಿರುವ ಹೋಟೆಲ್ ಕೊಠಡಿಗಳನ್ನು ತನ್ನ ಅತಿಥಿಗಳಿಗಾಗಿ ಒದಗಿಸುತ್ತಿದೆ. ಸ್ವಿಡ್ಜರ್‌ಲ್ಯಾಂಡ್‌ನ (Switzerland) ಪ್ರಕೃತಿಯ ನಡುವೆಯೇ ಯಾವುದೇ ಬಂಧನವಿಲ್ಲದೆ ಪರ್ವತದಿಂದ ಸುತ್ತುವರಿದಿರುವ ಸ್ವಿಸ್ ಆಲ್ಪ್ಸ್ ಅತಿಥಿಗಳ ಹೋಟೆಲ್ ಕೊಠಡಿಯಾಗಿದೆ. ಸ್ವಿಡ್ಜರ್‌ಲ್ಯಾಂಡ್‌ನ ಇನ್ನಷ್ಟು ಆಕರ್ಷಕ ಪ್ರದೇಶಗಳಲ್ಲಿ ನಲ್ ಸ್ಟರ್ನ್ ಇಂತಹುದೇ ಮುಕ್ತ ಹೋಟೆಲ್ (Hotel) ಸೌಲಭ್ಯವನ್ನು ಅತಿಥಿಗಳಿಗೆ ಏರ್ಪಡಿಸುತ್ತಿದೆ.

ಈ ಹೋಟೆಲ್ ಕೊಠಡಿಗಳಿಗೆ ತಾರಸಿ ಹಾಗೂ ಗೋಡೆಗಳೇ ಇಲ್ಲ ಸ್ನಾನಗೃಹ ಇಲ್ಲವೇ ಇಲ್ಲ

ತಾರಸಿ ಹಾಗೂ ಗೋಡೆ ಮುಕ್ತವಾಗಿರುವ ಈ ಹೋಟೆಲ್ ಕೊಠಡಿ, ಹಾಸಿಗೆ ಹಾಗೂ ಮಂಚ ಇವಿಷ್ಟನ್ನೇ ಹೊಂದಿವೆ ಜೊತೆಗೆ ಬೆಡ್ ಪಕ್ಕದಲ್ಲಿ ಎರಡು ಬೆಡ್ ಲ್ಯಾಂಪ್‌ಗಳಿವೆ. ಯಾವುದೇ ತಾರಸಿ, ಗೋಡೆಗಳ ಬಂಧನವಿಲ್ಲದೆ ಪ್ರಕೃತಿಯ ನಡುವೆ ಮುಕ್ತವಾಗಿರುವ ಈ ಹೋಟೆಲ್ ಕೋಣೆಗೆ ಅತಿಥಿಗಳ ದಂಡೇ ಬರುತ್ತಿದೆ. ಬೇಡಿಕೆ ಕೂಡ ಸಖತ್ ಆಗಿದೆ ಎಂಬುದು ಹೋಟೆಲ್ ಸಹಸ್ಥಾಪಕರ ಮಾತಾಗಿದೆ.

ಹೋಟೆಲ್‌ನ ಸಹ ಸ್ಥಾಪಕರಾದ ಡೇನಿಯಲ್ ಚಾರ್‌ಬೊನಿರ್ ಈ ಹೋಟೆಲ್‌ನ ವಿಶೇಷತೆಯ ಬಗ್ಗೆ ತಿಳಿಸಿದ್ದು, ಇಲ್ಲಿ ತಂಗುವವರು ಹಾಗೂ ಅವರ ಅನುಭವ ನಮ್ಮ ಹೋಟೆಲ್‌ನ ಸ್ಟಾರ್ ಕೌಂಟ್‌ಗಳಾಗಿವೆ ಎಂದು ಮಾಧ್ಯಮಗಳಿಗೆ ತಿಳಿಸಿದ್ದಾರೆ. 2016 ರಲ್ಲಿ ನಲ್ ಸ್ಟರ್ನ್ ಹೋಟೆಲ್ ರೂಪುಗೊಂಡಿತು. ಅಂತೆಯೇ 2017 ರ ಕೊನೆಯಲ್ಲಿ ಬುಕಿಂಗ್‌ಗಳನ್ನು ಕೂಡ ಪಡೆದುಕೊಂಡಿತು ಎಂಬುದು ಡೇನಿಯಲ್ ಮಾತಾಗಿದೆ.

ಇದನ್ನೂ ಓದಿ:  ಈ ವಾಚ್‌ನ ಬೆಲೆ ಬರೋಬ್ಬರಿ 164 ಕೋಟಿಯಂತೆ! 'ಟೈಮ್' ಚೆನ್ನಾಗಿರೋರು ಮಾತ್ರ ಇದನ್ನ ಖರೀದಿಸ್ತಾರೆ

ಈ ಹೋಟೆಲ್‌ಗೆ ಎಷ್ಟು ಬೇಡಿಕೆ ಇದೆ ಎಂದರೆ ಹೋಟೆಲ್ ಸಿಬ್ಬಂದಿ ವರ್ಗ ಸ್ವಿಡ್ಜರ್‌ಲ್ಯಾಂಡ್‌ನ ಮತ್ತಷ್ಟು ಜನಪ್ರಿಯ ಪ್ರದೇಶಗಳಲ್ಲಿ ಹೋಟೆಲ್‌ನ ಮುಕ್ತ ಕೊಠಡಿಗಳನ್ನು ನಿರ್ಮಿಸಲು ಟೂರಿಸ್ಟ್ ಏಜೆನ್ಸಿಗಳೊಂದಿಗೆ ಕೆಲಸ ಮಾಡುತ್ತಿದೆ.

ಸ್ವಿಡ್ಜರ್‌ಲ್ಯಾಂಡ್‌ನ ಸುಂದರ ಪ್ರದೇಶದಲ್ಲಿರುವ ಓಪನ್ ಏರ್ ಹೋಟೆಲ್

ಸಮುದ್ರ ಮಟ್ಟದಿಂದ 6,463 ಅಡಿ ಎತ್ತರದಲ್ಲಿದೆ, ನಲ್ ಸ್ಟರ್ನ್ ಸ್ವಿಸ್ ಆಲ್ಪ್ಸ್ ಮಧ್ಯದಲ್ಲಿದೆ. ಹಾಗೂ ಒಂದು ರಾತ್ರಿಗೆ ತಗುಲುವ ವೆಚ್ಚ $210 ಆಗಿದೆ. ಈ ಹೋಟೆಲ್‌ನ ವಿಶೇಷತೆ ಏನೆಂದರೆ ಮೊದಲೇ ತಿಳಿಸಿದಂತೆ ಯಾವುದೇ ಛಾವಣಿ, ಗೋಡೆ, ಸ್ನಾನ ಗೃಹ ಇಲ್ಲದಿರುವುದಾಗಿದೆ. ಒಂದು ಮಂಚ, ಹಾಸಿಗೆ ಹಾಗೂ ಪಕ್ಕದಲ್ಲಿ ಎರಡು ದೀಪಗಳು. ಸಾರ್ವಜನಿಕ ಶೌಚಾಲಯ ಪರ್ವತದ ಕೆಳಗೆ ಐದು ನಿಮಿಷಗಳ ಕಾಲು ದಾರಿಯಲ್ಲಿ ಸಿಗುತ್ತದೆ ಎಂದು ಚಾರ್ಬೊನಿಯರ್ ತಿಳಿಸುತ್ತಾರೆ.

ಇದನ್ನೂ ಓದಿ: ನಾಯಿಗೆ ಮರುಜನ್ಮ ನೀಡಿದ ChatGPT! ಇಡೀ ವೈದ್ಯಲೋಕವನ್ನೇ ಅಚ್ಚರಿಗೊಳಿಸಿದ ಟೆಕ್ನಾಲಜಿ

ಹೋಟೆಲ್ ಛಾವಣಿ ರಹಿತವಾಗಿರುವುದರಿಂದ ಇಲ್ಲಿ ತಂಗಿರುವವರು ಮಲಗಿಕೊಂಡೇ ಆಗಸದ ವಿಹಂಗಮ ನೋಟವನ್ನು ಕಣ್ತುಂಬಿಕೊಳ್ಳಬಹುದು ಹಾಗೆಯೇ ಪರ್ವತಗಳ ಸುಂದರ ದೃಶ್ಯಾವಳಿ ಆಕಾಶದಲ್ಲಿ ಹೊಳೆಯುವ ನಕ್ಷತ್ರಗಳ ಸುಂದರತೆಯ ಆಹ್ಲಾದತೆಯನ್ನು ಪಡೆದುಕೊಳ್ಳಬಹುದು ಒಟ್ಟಿನಲ್ಲಿ ಈ ಹೋಟೆಲ್‌ನಲ್ಲಿ ತಂಗುವವರಿಗೆ ಸ್ವಿಟ್ಜರ್ಲೆಂಡೇ ಹೋಟೆಲ್‌ ಆಗುತ್ತದೆ ಎಂದು ಚಾರ್ಬೊನಿಯರ್ ತಿಳಿಸುತ್ತಾರೆ.

ರೂಮ್ ಸರ್ವೀಸ್ ಊಟೋಪಚಾರದ ವ್ಯವಸ್ಥೆ ಇದೆ

ಇತರ ಹೋಟೆಲ್‌ಗಳಂತೆಯೇ ಇಲ್ಲಿ ಕೂಡ ರೂಮ್ ಸರ್ವೀಸ್ ಇರುತ್ತದೆ ಎಂಬ ಅಂಶವನ್ನು ಚಾರ್ಬೊನಿಯರ್ ತಿಳಿಸುತ್ತಾರೆ. ರೂಮ್ ಸರ್ವೀಸ್‌ಗಾಗಿ ಸಿಬ್ಬಂದಿ ಕೂಡ ಇದ್ದು ಹತ್ತಿರದಲ್ಲಿರುವ ಕ್ಯಾಬಿನ್‌ನಲ್ಲಿಯೇ ಅವರಿರುತ್ತಾರೆ ಎಂದು ಚಾರ್ಬೊನಿಯರ್ ತಿಳಿಸಿದ್ದಾರೆ. ಅತಿಥಿಗಳಿಗೆ ಬೇಕಾಗುವ ರಾತ್ರಿಯೂಟ, ಉಪಹಾರ ಮಧ್ಯಾಹ್ನದೂಟ ಸ್ನ್ಯಾಕ್ಸ್ ಎಲ್ಲವನ್ನೂ ಇವರು ಸಿದ್ಧಪಡಿಸುತ್ತಾರೆ. ಇನ್ನು ವಾತಾವರಣ ಕೆಟ್ಟದಾಗಿದ್ದರೆ ಅತಿಥಿಗಳು ಕೊನೆಯ ನಿಮಷಗಳಲ್ಲಿ ತಮ್ಮ ರಿಸರ್ವೇಶನ್ ಕ್ಯಾನ್ಸಲ್ ಮಾಡಿಕೊಳ್ಳುವ ಅವಕಾಶ ಕೂಡ ಇದೆ ಎಂದು ಚಾರ್ಬೊನಿಯರ್ ತಿಳಿಸುತ್ತಾರೆ.