Black Pigeon: 140 ವರ್ಷಗಳ ನಂತರ ಕ್ಯಾಮೆರಾದಲ್ಲಿ ಸೆರೆಸಿಕ್ಕ ಕಪ್ಪು ಬಣ್ಣದ ಪಾರಿವಾಳ!

ನಮ್ಮಲ್ಲಿ ಎಷ್ಟೋ ಬಗೆಯ ಪ್ರಾಣಿ ಪಕ್ಷಿಗಳಿವೆ ಅಂತ ನಿಖರವಾಗಿ ಲೆಕ್ಕವಿಡಲು ಸಾಧ್ಯವೇ ಆಗುವುದಿಲ್ಲ. ಹೌದು, ಎಷ್ಟೋ ಪಕ್ಷಿಗಳನ್ನು (Bird) ನಾವು ನಮ್ಮ ಸುತ್ತಮುತ್ತಲೂ ಪರಿಸರದಲ್ಲಿ ನೋಡಿರುತ್ತೇವೆ. ಆದರೆ ಆ ಪಕ್ಷಿಗಳಲ್ಲೂ ಅನೇಕ ಪ್ರಭೇದಗಳಿರುವುದು ನಮಗೆ ಯಾರಾದರೂ ಪಕ್ಷಿ ಮತ್ತು ಪ್ರಾಣಿಯ ಫೋಟೋಗಳನ್ನು ಕ್ಲಿಕ್ಕಿಸಿ (Photo click) ತೋರಿಸಿದಾಗ ಮಾತ್ರ ತಿಳಿಯುತ್ತದೆ. ಎಷ್ಟೋ ಬಾರಿ ಸುಮಾರು ವರ್ಷಗಳ ಹಿಂದೆ ಕಾಣಿಸಿಕೊಂಡ ಪಕ್ಷಿಯ ಪ್ರಭೇದಗಳು ನಮಗೆ ಅಪರೂಪಕ್ಕೆ ಎಂಬಂತೆ ಮತ್ತೆ ನೋಡಲು ಸಿಗುತ್ತವೆ ಅಂತಾನೆ ಹೇಳಬಹುದು. ನಾವೆಲ್ಲರೂ ಬೂದು ಬಣ್ಣದ ಪರಿವಾಳವನ್ನು ನೋಡಿರುತ್ತೇವೆ, ಆದರೆ ಕಪ್ಪು ಮತ್ತು ಹಳದಿ ಮಿಶ್ರಿತ ಬಣ್ಣದ ಪಾರಿವಾಳವನ್ನು(Pigeon) ನಾವೆಂದಿಗೂ ನೋಡಿರುವುದಿಲ್ಲ. ಆದರೆ ಇಲ್ಲಿ ಅದೇ ರೀತಿಯ ಒಂದು ಪಾರಿವಾಳದ ಅಪರೂಪದ ಪ್ರಭೇದ ನೋಡಲು ಸಿಕ್ಕಿದೆ ನೋಡಿ.

140 ವರ್ಷಗಳ ಹಿಂದೆ ಕಾಣಿಸುತಿತ್ತಂತೆ ಈ ಅಪರೂಪದ ಪಾರಿವಾಳ

ಬಿಬಿಸಿಯ ವರದಿಯ ಪ್ರಕಾರ, 140 ವರ್ಷಗಳ ಹಿಂದೆ ಕಾಣಿಸಿಕೊಂಡ ಅಪರೂಪದ ಪಕ್ಷಿಯಾದ ಕಪ್ಪು-ನೇಪ್ಡ್ ಫೆಸೆಂಟ್-ಪಾರಿವಾಳವನ್ನು ವಿಜ್ಞಾನಿಗಳು ಮತ್ತೆ ಈಗ ಮರು ಶೋಧಿಸಿದ್ದಾರೆ ಅಂತ ಹೇಳಲಾಗುತ್ತಿದೆ.

ಇದನ್ನೂ ಓದಿ: ಕೆಲಸಕ್ಕಿಂತ ಮಗಳೇ ಮುಖ್ಯ ಎಂದ ತಂದೆ! ಇದಲ್ಲವೇ ಅಪ್ಪನ ಪ್ರೀತಿ

ಪಪುವಾ ನ್ಯೂ ಗಿನಿಯಾದ ಅರಣ್ಯದಲ್ಲಿ ಪಕ್ಷಿಯನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯಲಾಗಿದೆ. ವೀಡಿಯೋವನ್ನು ಸೆರೆಹಿಡಿದ ತಂಡವು ಸ್ಥಳೀಯರನ್ನು ಸಂದರ್ಶಿಸಿ ಮತ್ತು ಕ್ಯಾಮೆರಾ ಟ್ರ್ಯಾಪ್ ಗಳನ್ನು ಸ್ಥಾಪಿಸುತ್ತಾ ಒಂದು ತಿಂಗಳ ಕಾಲ ಹುಡುಕಾಟ ನಡೆಸಿತು ಎಂದು ಔಟ್ಲೆಟ್ ತಿಳಿಸಿದೆ.

ಅವರು ಅಂತಿಮವಾಗಿ ಸೆಪ್ಟೆಂಬರ್ ನಲ್ಲಿ ಈ ಅಪರೂಪದ ಪಕ್ಷಿಯ ನೋಟವನ್ನು ತಮ್ಮ ಕ್ಯಾಮೆರಾದಲ್ಲಿ ಸೆರೆ ಹಿಡಿಯಲು ಯಶಸ್ಸನ್ನು ಕಂಡರು. ಜಾಗತಿಕ ಸಂರಕ್ಷಣಾ ಉಪಕ್ರಮವಾದ ಎಡ್ಜ್ ಆಫ್ ಎಕ್ಸಿಸ್ಟೆಂಟ್ ಪ್ರಕಾರ, ಕಪ್ಪು-ನಾಪ್ಡ್ ಫೆಸೆಂಟ್-ಪಾರಿವಾಳವು ಪಪುವಾ ನ್ಯೂಗಿನಿಯಾದ ಫರ್ಗುಸನ್ ದ್ವೀಪದಲ್ಲಿ ಕಂಡು ಬಂದಿದೆ ಎಂದು ಹೇಳಲಾಗುತ್ತಿದೆ.

ಸಂಶೋಧನಾ ತಂಡದವರು ಏನ್ ಹೇಳ್ತಾರೆ ಇದರ ಬಗ್ಗೆ?

"ಇದು ಯುನಿಕಾರ್ನ್ ಅನ್ನು ಕಂಡು ಹಿಡಿಯುವಂತೆ ಭಾಸವಾಯಿತು" ಎಂದು ಅಮೇರಿಕನ್ ಬರ್ಡ್ ಕನ್ಸರ್ವೆನ್ಸಿಯ ಕಳೆದು ಹೋದ ಪಕ್ಷಿಗಳ ಕಾರ್ಯಕ್ರಮದ ನಿರ್ದೇಶಕ ಮತ್ತು ಎಂಟು ಸದಸ್ಯರ ತಂಡದ ನಾಯಕ ಜಾನ್ ಸಿ ಮಿಟರ್ಮೇಯರ್ ಬಿಬಿಸಿಗೆ ತಿಳಿಸಿದರು.

ಸಂಶೋಧನಾ ತಂಡವು ದಿ ಸರ್ಚ್ ಫಾರ್ ಲಾಸ್ಟ್ ಬರ್ಡ್ಸ್ ನ ಒಂದು ಭಾಗವಾಗಿದೆ, ಇದು ಬರ್ಡ್ ಲೈಫ್ ಇಂಟರ್ನ್ಯಾಷನಲ್, ರೀವಿಲ್ಡ್ ಮತ್ತು ಅಮೇರಿಕನ್ ಬರ್ಡ್ ಕನ್ಸರ್ವೆನ್ಸಿ ನಡುವಿನ ಸಹಯೋಗವಾಗಿದೆ. ಅಳಿದು ಹೋಗಿದೆ ಎಂದು ಘೋಷಿಸದ ಆದರೆ 10 ವರ್ಷಗಳಿಗಿಂತ ಹೆಚ್ಚು ಕಾಲದಿಂದ ಕಂಡು ಬರದ ಪಕ್ಷಿ ಪ್ರಭೇದಗಳನ್ನು ಮರುಶೋಧಿಸುವುದು ಇದರ ಉದ್ದೇಶವಾಗಿದೆ. ಅಂತಹ 150 ಪ್ರಭೇದಗಳಿವೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.

2019 ರಲ್ಲಿಯೂ ಸಹ ಈ ಪಾರಿವಾಳವನ್ನು ಪತ್ತೆಹಚ್ಚಲು ಪ್ರಯತ್ನಿಸಿದ್ದರಂತೆ

ಸಂಶೋಧಕರು 2019 ರಲ್ಲಿಯೂ ಈ ಪಾರಿವಾಳವನ್ನು ಪತ್ತೆಹಚ್ಚಲು ಪ್ರಯತ್ನಿಸಿದ್ದರು, ಆದರೆ ವಿಫಲರಾದರು. ಈ ಬಾರಿ, ದ್ವೀಪದ ಅತ್ಯುನ್ನತ ಶಿಖರವಾದ ಮೌಂಟ್ ಕಿಲ್ಕೆರಾನ್ ನ ಪಶ್ಚಿಮ ಇಳಿಜಾರಿನಲ್ಲಿ ಅವರು ಯಶಸ್ಸನ್ನು ಕಂಡುಕೊಂಡರು ಎಂದು ಬಿಬಿಸಿ ತನ್ನ ವರದಿಯಲ್ಲಿ ತಿಳಿಸಿದೆ.

140 ವರ್ಷಗಳ ನಂತರ ಕ್ಯಾಮೆರಾದಲ್ಲಿ ಸೆರೆಸಿಕ್ಕ ಕಪ್ಪು ಬಣ್ಣದ ಪಾರಿವಾಳ

ಕಡಿದಾದ ಕಣಿವೆಗಳನ್ನು ಹೊಂದಿರುವ ಈ ಪ್ರದೇಶದಲ್ಲಿ ಪಕ್ಷಿಯನ್ನು ಗುರುತಿಸಲಾಗಿದೆ ಎಂದು ಸ್ಥಳೀಯರು ಸಂಶೋಧನಾ ತಂಡಕ್ಕೆ ತಿಳಿಸಿದರು. ನಂತರ ತಂಡವು ಆ ಪ್ರದೇಶದಲ್ಲಿ ಅನೇಕ ಕ್ಯಾಮೆರಾಗಳನ್ನು ಅಳವಡಿಸಿತು ಮತ್ತು ಅಂತಿಮವಾಗಿ ಕೆಲವು ದಿನಗಳ ಮೊದಲು ಆ ಪಕ್ಷಿಯನ್ನು ಕ್ಯಾಮೆರಾದಲ್ಲಿ ಸೆರೆ ಹಿಡಿಯಲಾಯಿತು ಎಂದು ಬಿಬಿಸಿ ವರದಿ ತಿಳಿಸಿದೆ. ಅಸ್ತಿತ್ವದ ಅಂಚಿನಲ್ಲಿರುವ ಈ ಕಪ್ಪು ಬಣ್ಣದ ಪಾರಿವಾಳವು ಚಿಕ್ಕಪುಟ್ಟ ಬೀಜಗಳು ಮತ್ತು ಬಿದ್ದ ಹಣ್ಣುಗಳನ್ನು ತಿನ್ನುತ್ತದೆ ಎಂದು ವರಡಿಯೊಂದು ಹೇಳಿದೆ.