Virus: 48,500 ವರ್ಷಗಳ ಹಳೆಯ ಜೋಂಬಿ ವೈರಸ್‌ಗೆ ಮರುಜೀವ ನೀಡಿದ ವಿಜ್ಞಾನಿಗಳು!

ಕೊರೋನಾ ವೈರಸ್(Corona Virus)‌ ಅಟ್ಟಹಾಸ ನೋಡಿದ ನಂತರ ಯಾವುದೇ ವೈರಸ್‌ ಹೆಸರು ಕೇಳಿದರೂ ಜನ ಬೆಚ್ಚಿಬೀಳುವಂತಾಗಿದೆ. ಜಗತ್ತಿನಾದ್ಯಂತ ನಡೆಯುತ್ತಿರುವ ಹವಮಾನ ವೈಪರಿತ್ಯಗಳು ಕೂಡ ಹೊಸ ಹೊಸ ಸಾಂಕ್ರಾಮಿಕಗಳನ್ನು ಲೋಕಕ್ಕೆ ಧಾರೆ ಎಳೆಯುತ್ತಿವೆ ಎನ್ನಬಹುದು. ಅದರಲ್ಲಿ ಒಂದು ಈ ಜಾಗತಿಕ ತಾಪಮಾನ ಏರಿಕೆ. ಇದರಿಂದ ಉಂಟಾಗುವ ದುಷ್ಪರಿಣಾಮಗಳ ಪಟ್ಟಿಯಲ್ಲಿ ಪುರಾತನ ವೈರಸ್‌ಗಳ(Virus) ಮರುಕಳಿಸುವಿಕೆ ಸಾಂಕ್ರಾಮಿಕ ಭೀತಿಯನ್ನು ಮತ್ತಷ್ಟು ಹೆಚ್ಚಿಸಿದೆ ಎನ್ನಬಹುದು.

ಜಾಗತಿಕ ತಾಪಮಾನ ಅಂತೂ ಪ್ರಸ್ತುತ ಈಗ ಎಗ್ಗಿಲ್ಲದೇ ಮುಂದುವರೆಯುತ್ತಲೇ ಇದೆ. ಹೀಗಾಗಿ ಶೀತಲ ಮರುಭೂಮಿಯಲ್ಲಿ ಸಹಸ್ರಾರು ವರ್ಷಗಳಿಂದ ಹೆಪ್ಪುಗಟ್ಟಿರುವ ವೈರಸ್‌ಗಳು ಮತ್ತೆ ಮರುಕಳಿಸಿ ಸೋಂಕು ಹರಡಬಹುದು ಎಂದು ವಿಜ್ಞಾನಿಗಳು ಆತಂಕವನ್ನು ವ್ಯಕ್ತಪಡಿಸಿದ್ದಾರೆ.

48,500 ವರ್ಷಗಳ ಹಳೆಯ ಜೋಂಬಿ ವೈರಸ್‌ಗೆ ಮರುಜೀವ

ಆರ್ಕ್ಟಿಕ್‌ನಲ್ಲಿನ ಪ್ರಸ್ತುತ ತಾಪಮಾನ ಏರಿಕೆಯಿಂದಾಗಿ ಹಿಮ ಕರಗಿ ಹೆಪ್ಪುಗಟ್ಟಿದ ಸರೋವರದ ಅಡಿಯಲ್ಲಿ ಹೂತುಹೋಗಿರುವ 48,500 ವರ್ಷಗಳಷ್ಟು ಹಳೆಯದಾದ ಜೋಂಬಿ( Zombie)ವೈರಸ್​ಗೆ ಮರುಜೀವ ದೊರೆತಿದೆ.

ನ್ಯೂಯಾರ್ಕ್ ಪೋಸ್ಟ್ ಪ್ರಕಾರ, ಫ್ರೆಂಚ್ ವಿಜ್ಞಾನಿಗಳು ಜೋಂಬಿ ವೈರಸ್ ಅನ್ನು ಪುನರುಜ್ಜೀವನಗೊಳಿಸಿದ್ದು, ವಿಶ್ವ ಮತ್ತೊಂದು ವೈರಸ್​ನ್ ‌ ಭೀತಿ ಎದುರಿಸುತ್ತಿದೆ.

ಇನ್ನೂ ಸಾಂಕ್ರಾಮಿಕವಾಗಿ ಉಳಿದಿದೆ ವೈರಸ್

ರಷ್ಯಾ, ಜರ್ಮನಿ ಹಾಗೂ ಫ್ರಾನ್ಸಿನ ವಿಜ್ಞಾನಿಗಳು ಜಂಟಿಯಾಗಿ ಅಧ್ಯಯನ ನಡೆಸಿ ರಷ್ಯಾದ ಶೀತಲ ಮರುಭೂಮಿಯಾಗಿರುವ ಸೈಬೀರಿಯಾದಲ್ಲಿ ಹಿಮದಡಿಯಲ್ಲಿ ಹೂತಿರುವ 24ಕ್ಕೂ ಹೆಚ್ಚು ವೈರಸ್ಗಳನ್ನು ಪತ್ತೆಹಚ್ಚಿದ್ದಾರೆ.

ಇವುಗಳಲ್ಲಿ ಒಂದು ವೈರಸ್ 48,500 ವರ್ಷಗಳಿಂದಲೂ ಹೆಪ್ಪುಗಟ್ಟಿದೆ ಎನ್ನಲಾಗಿದೆ. ಇದನ್ನು 'ಜೋಂಬಿ ವೈರಸ್’ ಎಂದು ಹೆಸರಿಸಲಾಗಿದೆ. ಈ ವೈರಸ್‌ ಸಹಸ್ರಾರು ವರ್ಷದಿಂದ ನೀರಿನಲ್ಲಿ ಹೆಪ್ಪುಗಟ್ಟಿದ್ದರೂ ಅವು ಇನ್ನೂ ಸಾಂಕ್ರಾಮಿಕವಾಗಿವೆ ಎನ್ನಲಾಗಿದೆ.

ಫ್ರಾನ್ಸ್‌ನ ಮಾರ್ಸಿಲ್ಲೆಯಲ್ಲಿರುವ ಐಕ್ಸ್-ಮಾರ್ಸಿಲ್ಲೆ ಯೂನಿವರ್ಸಿಟಿ ಸ್ಕೂಲ್ ಆಫ್ ಮೆಡಿಸಿನ್‌ನಲ್ಲಿ ವೈದ್ಯಕೀಯ ಮತ್ತು ಜೀನೋಮಿಕ್ಸ್‌ನ ಎಮೆರಿಟಸ್ ಪ್ರೊಫೆಸರ್ ಜೀನ್-ಮೈಕೆಲ್ ಕ್ಲಾವೆರಿ ಎಂಬುವವರು ಸಹ ವೈರಸ್‌ ಇನ್ನೂ ಸಹ ಜೀವಂತವಾಗಿದ್ದು, ಸಾಂಕ್ರಾಮಿಕ ಹರಡುವ ಎಲ್ಲಾ ಸಾಧ್ಯತೆಗಳಿವೆ ಎಂದಿದ್ದಾರೆ.

ಈ ಬಾರಿ ಪತ್ತೆಯಾದ ವೈರಸ್‌ ಹೆಚ್ಚು ಅಪಾಯಕಾರಿ

ಕ್ಲಾವೆರಿ ಅವರು 2003 ರಲ್ಲಿ ಮೊದಲು ಕಂಡುಹಿಡಿದ ನಿರ್ದಿಷ್ಟ ರೀತಿಯ ವೈರಸ್‌ಗಿಂತ ಈ ವೈರಸ್‌ ದೊಡ್ಡದಾಗಿದೆ. ಅಲ್ಲದೇ ಅವುಗಳು ವಿಶಿಷ್ಟವಾದ ವೈವಿಧ್ಯಕ್ಕಿಂತ ದೊಡ್ಡದಾಗಿದೆ ಮತ್ತು ಹೆಚ್ಚು ಶಕ್ತಿಯುತವಾದ ಎಲೆಕ್ಟ್ರಾನ್ ಸೂಕ್ಷ್ಮದರ್ಶಕಕ್ಕಿಂತ ಹೆಚ್ಚಾಗಿ ಸಾಮಾನ್ಯ ಬೆಳಕಿನ ಸೂಕ್ಷ್ಮದರ್ಶಕದ ಅಡಿಯಲ್ಲಿ ಗೋಚರಿಸುತ್ತವೆ ಎಂದು ತಿಳಿಸಿದ್ದಾರೆ.

ಅಮೀಬಾಗಳಿಗೆ ಸೋಂಕು ವರ್ಗಾವಣೆ

ಪಂಡೋರಾವೈರಸ್ ಯೆಡೋಮಾ ಎಂದು ಕರೆಯಲ್ಪಡುವ ಈ ವೈರಸ್‌ ಹತ್ತಿರತ್ತಿರ 50,000 ವರ್ಷಗಳಷ್ಟು ಹಳೆಯದು. ಈ ಹಿಂದೆ ಅಂದರೆ 2012 ರಲ್ಲಿ ಇದೇ ತಂಡವು 30,000 ವರ್ಷಗಳಷ್ಟು ಹಳೆಯದಾದ ಒಂದು ವೈರಸ್‌ ಅನ್ನು ಪತ್ತೆ ಮಾಡಿತ್ತು.

ಆದಾದ ನಂತರ ಬಹಿರಂಗಪಡಿಸಿದ ಈ ಸಮೀಕ್ಷೆ ಹಿಂದಿನ ದಾಖಲೆಯನ್ನು ಮುರಿದಿದೆ. 2014 ರಲ್ಲಿ ತಂಡವು ಪರ್ಮಾಫ್ರಾಸ್ಟ್‌ನಿಂದ ಪ್ರತ್ಯೇಕಿಸಲ್ಪಟ್ಟ ವೈರಸ್ ಅನ್ನು ಪುನರುಜ್ಜೀವನಗೊಳಿಸುವಲ್ಲಿ ಯಶಸ್ವಿಯಾದರು, ಇದನ್ನು ಅಮೀಬಾಗಳಿಗೆ ವರ್ಗಾಯಿಸಲಾಯಿತು.

ರಷ್ಯಾ, ಜರ್ಮನಿ ಮತ್ತು ಫ್ರಾನ್ಸ್‌ನ ಸಂಶೋಧಕರ ತಂಡವು ಅವರು ಅಧ್ಯಯನ ಮಾಡಿದ ವೈರಸ್‌ಗಳನ್ನು ಪುನಶ್ಚೇತನಗೊಳಿಸುವ ಜೈವಿಕ ಅಪಾಯವು ಸಂಪೂರ್ಣವಾಗಿ ನಗಣ್ಯ ಎಂದು ಗುರಿಪಡಿಸಿದ ತಳಿಗಳಿಂದಾಗಿ, ಪ್ರಮುಖವಾಗಿ ಅಮೀಬಾ ಸೂಕ್ಷ್ಮಜೀವಿಗಳಿಗೆ ಸೋಂಕು ತಗುಲಿಸುವ ಸಾಮರ್ಥ್ಯವನ್ನು ಹೊಂದಿದೆ ಎಂದು ಹೇಳಿದ್ದಾರೆ. ಪ್ರಾಣಿಗಳು ಅಥವಾ ಮನುಷ್ಯರಿಗೆ ಸೋಂಕು ತಗುಲಿಸುವ ಈ ವೈರಸ್‌ನ ಅಪಾಯಕಾರಿ ಅಂತಾನೂ ತಂಡವು ಹೇಳಿದೆ.

ಸಾಂಕ್ರಾಮಿಕವಾಗುವ ಅಪಾಯ ಹೆಚ್ಚು ಎಂದು ವಿಜ್ಞಾನಿಗಳಿಂದ ಎಚ್ಚರಿಕೆ

ಹೊಸ ತಳಿಯು ಅಧ್ಯಯನದಲ್ಲಿ ವಿವರಿಸಿದ 13 ವೈರಸ್‌ಗಳಲ್ಲಿ ಒಂದಾಗಿದೆ. ಪ್ರತಿಯೊಂದೂ ತನ್ನದೇ ಆದ ಜೀನೋಮ್ ಅನ್ನು ಹೊಂದಿದೆ. ಬೃಹದಾಕಾರದ ತುಪ್ಪಳದಿಂದ ಹಿಡಿದು ಸೈಬೀರಿಯನ್ ತೋಳಗಳ ಕರುಳಿನವರೆಗೆ ಈ ವೈರಸ್​ ಅನ್ನು ಕಂಡುಹಿಡಿಯಲಾಗಿದೆ.

ಎಲ್ಲಾ ಜೋಂಬಿ ವೈರಸ್ ಗಳು ಸಾಂಕ್ರಾಮಿಕವಾಗುವ ಸಾಮರ್ಥ್ಯವನ್ನು ಹೊಂದಿವೆ ಎಂದು ವಿಜ್ಞಾನಿಗಳು ಕಂಡುಕೊಂಡಿದ್ದಾರೆ. ಅಮೀಬಾ-ಸೋಂಕಿತ ವೈರಸ್‌ಗಳು ಬಹಳ ಸಮಯದ ನಂತರವೂ ಸಾಂಕ್ರಾಮಿಕವಾಗಿವೆ, ಇದು ದೊಡ್ಡ ಅಪಾಯದ ಸೂಚನೆ ಎಂದು ಕ್ಲಾವೆರಿ ಎಚ್ಚರಿಕೆ ನೀಡಿದ್ದಾರೆ.

ಮತ್ತಷ್ಟು ಅಪಾಯವನ್ನು ಹೆಚ್ಚಿಸುತ್ತದೆ ಹಿಮನದಿ ಕರಗುವಿಕೆ

ವಿಜ್ಞಾನಿಗಳ ಪ್ರಕಾರ, ಮಂಜುಗಡ್ಡೆಯ ದೊಡ್ಡ ಪ್ರಮಾಣದ ಕರಗುವಿಕೆಯ ಪ್ರಮಾಣವು ಪರಿಸರಕ್ಕೆ ಬಿಡುಗಡೆಯಾಗುವ ಸೂಕ್ಷ್ಮಜೀವಿಗಳ ಸಂಖ್ಯೆಯಲ್ಲಿ ಹೆಚ್ಚಳಕ್ಕೆ ಕಾರಣವಾಗುತ್ತದೆ.

ಈ ಬ್ಯಾಕ್ಟೀರಿಯಾಗಳು ಅಪಾಯಕಾರಿಯಾದ ರೋಗಗಳನ್ನು ಒಳಗೊಂಡಿರಬಹುದು ಎಂದು ವಿಜ್ಞಾನಿಗಳು ಎಚ್ಚರಿಕೆ ರವಾನಿಸಿದ್ದಾರೆ. ಅಲ್ಲದೇ ಈ ವೈರಸ್‌ಗಳು ಇಂದಿನ ಪರಿಸ್ಥಿತಿಗಳಿಗೆ ಒಮ್ಮೆ ಒಡ್ಡಿಕೊಂಡರೆ ಎಷ್ಟು ಸಮಯದವರೆಗೆ ಸಾಂಕ್ರಾಮಿಕವಾಗಿ ಉಳಿಯಬಹುದು ಅಥವಾ ವೈರಸ್ ಎಷ್ಟು ಅಪಾಯಕಾರಿಯಾಗುತ್ತದೆ ಎಂಬುದರ ಬಗ್ಗೆ ಊಹಿಸಲು ಸಾಧ್ಯವಿಲ್ಲ ಎಂದಿದ್ದಾರೆ ವಿಜ್ಞಾನಿಗಳು.

ಎಲ್ಲಾ ವೈರಸ್‌ಗಳು ರೋಗವನ್ನು ಉಂಟುಮಾಡುವ ರೋಗಕಾರಕಗಳಲ್ಲ; ಕೆಲವು ಸೌಮ್ಯವಾಗಿರುತ್ತವೆ ಎಂದಿದ್ದಾರೆ.