Eid al-Adha 2021: ಭಾರತದಲ್ಲಿ ಬಕ್ರೀದ್​ ಹಬ್ಬ ಯಾವಾಗ? ಮಹತ್ವವೇನು? ಮಾಹಿತಿ ಇಲ್ಲಿದೆ

ದೇಶದಾದ್ಯಂತ ಬಕ್ರೀದ್​ ಹಬ್ಬದ ಆಚರಣೆಗೆ ಒಂದೇ ದಿನ ಬಾಕಿ ಇದೆ. ಜುಲೈ 21ರಂದು ದೇಶದ ಪತಿಯೊಬ್ಬ ಮುಸಲ್ಮಾನನು ಈ ಹಬ್ಬವನ್ನು ಸಡಗರದಿಂದ ಸಂಭ್ರಮಿಸಲು ಕಾಯುತ್ತಿದ್ದಾರೆ. ಇಸ್ಲಾಮಿಕ್​ ಕ್ಯಾಲೆಂಡರ್​ ಕೊನೆಯ ತಿಂಗಳಾದ ಧು ಅಲ್​-ಹಿಜ್ಜಾದ ಇಸ್ಲಾಮಿಕ್​ ತಿಂಗಳ 10ನೇ ದಿನದಂದು ಆಚರಿಸಲಾಗುತ್ತದೆ. ಭಾರತದಲ್ಲಿ ಈ ವರ್ಷ ಈ ತಿಂಗಳ ಚಂದ್ರನನ್ನು ಜುಲೈ 11ರಂದು ನೋಡಲಾಯಿತು. ಹಾಗಾಗಿ ಜುಲೈ 12ರಿಂದ ಧು ಅಲ್​–ಹಿಜ್ಜಾ ಅಥವಾ ಜುಲ್​ ಹಿಜ್ಜಾ ಭಾರತದಲ್ಲಿ ಪ್ರಾರಂಭವಾಯಿತು. ಹೀಗಾಗಿ ಜುಲೈ 21, ಧು ಅಲ್​-ಹಿಜ್ಜಾದ 10ನೇ ದಿನವನ್ನು ಈದ್​ ಅಲ್​-ಅಧಾ ಎಂದು ಆಚರಿಸಲಾಗುತ್ತದೆ.

ಮುಸಲ್ಮಾನರ ಹಜ್​ ತೀರ್ಥಯಾತ್ರೆಯನ್ನು ಆಯೋಜಿಸುವ ಸೌದಿ ಅರೇಬಿಯಾದಲ್ಲಿ ಬಕ್ರಿದ್​ ಹಬ್ಬವನ್ನು ಜುಲೈ 20ರಂದು ಆಚರಿಸಲಾಗುತ್ತದೆ.

ಬಕ್ರೀದ್​ ಹಬ್ಬದ ಮಹತ್ವ

ಮುಸಲ್ಮಾನರ ಪವಿತ್ರ ಪುಸ್ತಕ ಕುರಾನ್​ನಲ್ಲಿ ಬರುವ ಪ್ರವಾದಿ ಇಬ್ರಾಹಿಂ ಅವರ ಕಥೆಯನ್ನು ವಿವರಿಸುತ್ತದೆ. ದೇವರ ಮೇಲಿನ ಭಕ್ತಿಯನ್ನು ಸಾಬೀತುಪಡಿಸಲು ಅಲ್ಲಾಹನು ತನ್ನ ಮಗನನ್ನು ತ್ಯಾಗ ಮಾಡುವಂತೆ ಪ್ರವಾದಿ ಇಬ್ರಾಹಿಂನನ್ನು ಕೇಳಿದನೆಂದು ಈ ಕಥೆ ವಿವರಿಸುತ್ತದೆ.

ಈದ್​ ಅಲ್​-ಅಧಾ ಆಚರಣೆ

ಮುಸ್ಲಿಂಮರು ಆಡುಗಳನ್ನು ಬಲಿ ನೀಡುವ ಮೂಲಕ ಈ ಹಬ್ಬವನ್ನು ಆಚರಿಸುತ್ತಾರೆ. ಆರ್ಥಿಕವಾಗಿ ಸಮರ್ಥರಾದವರು ಆಡುಗಳನ್ನು ಖರೀದಿಸಿ ಬಲಿ ನೀಡುತ್ತಾರೆ. ಅಗತ್ಯವಿರುವವರಿಗೆ, ಸಮುದಾಯದ ಸದಸ್ಯರಿಗೆ, ಕುಟುಂಬಸ್ಥರಿಗೆ ಮಾಂಸವನ್ನು ವಿತರಿಸುತ್ತಾರೆ. ಮನೆಯಲ್ಲಿ ಅಥವಾ ಮಸೀದಿಯಲ್ಲಿ ಈದ್​ ನಮಾಜ್​ ಮಾಡುವ ಮೂಲಕ ಪ್ರಾರ್ಥನೆ ಸಲ್ಲಿಸುತ್ತಾರೆ.

ಬಕ್ರೀದ್ ಹಬ್ಬದ ವಿಶೇಷ ದಿನದಂದು ಮುಸಲ್ಮಾನರ ಮನೆಯಲ್ಲಿ ಭಕ್ಷ್ಯಬೋಜನಗಳನ್ನು ತಯಾರು ಮಾಡುತ್ತಾರೆ. ಬಿರಿಯಾನಿ, ಸೆವಾಯಿನ್​ ಸೇರಿದಂತೆ ವಿಶೇಷ ಅಡುಗೆ ತಯಾರಿಸಲಾಗುತ್ತದೆ. ಜುಲೈ 22ರಂದು ಹಜ್​ ತೀರ್ಥಯಾತ್ರೆ ಮುಕ್ತಾಯಗೊಳ್ಳುತ್ತದೆ.