ಕೋವಿಡ್ ವ್ಯಾಕ್ಸಿನ್ ಪಡೆದ ಖುಷಿಯಲ್ಲಿ ಹೆಪ್ಪುಗಟ್ಟಿದ ಸರೋವರದ ಮೇಲೆ ಪಂಜಾಬಿ ವ್ಯಕ್ತಿಯ ನೃತ್ಯ ಸಖತ್ ವೈರಲ್

ಕೊರೋನಾ ಮಹಾಮಾರಿಯ ರುದ್ರನರ್ತನ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಕಳೆದ ಒಂದು ವರ್ಷದಿಂದ ಲಕ್ಷಾಂತರ ಮಂದಿಯ ಜೀವ ತೆಗೆದಿರುವ ಕೊರೋನಾ ಎರಡನೇ ಅಲೆಯು ಜನರನ್ನು ಮತ್ತಷ್ಟು ಹೈರಾಣ ಮಾಡುತ್ತಿದೆ. ಆದರೆ ಇದೆಲ್ಲದರ ನಡುವೆ ಕೊರೋನಾ ವ್ಯಾಕ್ಸಿನ್ ಬಂದಿರುವುದು ಕೊಂಚ ಸಮಾಧಾನ ತಂದರೂ ಕೊರೋನಾ ಅಟ್ಟಹಾಸ ನಿಲ್ಲದಿರುವುದಕ್ಕೆ ಜನರು ಭಯಭೀತರಾಗಿದ್ದಾರೆ. 45 ರಿಂದ ಮೇಲ್ಪಟ್ಟ ಸಾರ್ವಜನಿಕರು, ಕೊರೋನಾ ವಾರಿಯರ್ಸ್ ಕೊರೋನಾ ವ್ಯಾಕ್ಸಿನೇಷನ್ ಮಾಡಿಸಿಕೊಳ್ಳುವಂತೆ ಸರ್ಕಾರ ಘೋಷಿಸಿದೆ. ಭಾರತ ಸೇರಿದಂತೆ ಪ್ರಪಂಚದ ಹಲವೆಡೆ ಜನರು ತಪ್ಪದೇ ವ್ಯಾಕ್ಸಿನೇಷನ್ ಮೊರೆ ಹೋಗುತ್ತಿದ್ದಾರೆ. ಮೆಚ್ಚುಗೆಯನ್ನು ವ್ಯಕ್ತಪಡಿಸುತ್ತಿದ್ದಾರೆ. ಇಂತಹ ವೇಳೆ ಕೆನಡಾದ ಸಿಖ್‌ ವೊಬ್ಬರು ತಾವು 2ನೇ ಕೋವಿಡ್ ಲಸಿಕೆಯ ಡೋಸ್‌ ಪಡೆದುಕೊಂಡ ಖುಷಿಯಲ್ಲಿ ಕುಣಿದು ಕುಪ್ಪಳಿಸಿದ್ದಾರೆ. ಸಾಮಾನ್ಯವಾಗಿ ಪಂಜಾಬಿ ಸಮುದಾಯದವರು ಪ್ರತಿಯೊಂದನ್ನು ಬಹಳ ಸಂಭ್ರಮದಿಂದ ಆಚರಿಸುತ್ತಾರೆ. ಕೆನಡಿಯನ್ ಬಾಗ್ರಾ ಕಲಾವಿದ ಗುರುದೀಪ್ ಪಂದೇರ್ ಎಂಬಾತ ಕೊರೋನಾ ವ್ಯಾಕ್ಸಿನ್ ತೆಗೆದುಕೊಂಡ ಖುಷಿಯನ್ನು ಕೆನಡಾದ ಫ್ರಜೆನ್ ಲೇಕ್ ದಡದಲ್ಲಿ ಬಾಂಗ್ರಾ ನೃತ್ಯ ಮಾಡುವ ಮೂಲಕ ಸಂಭ್ರಮಿಸಿದ್ದಾರೆ.

ಕೆನಡಾದ ಹೆಪ್ಪುಗಟ್ಟಿದ ಸರೋವರದ ಮಂಜಿನ ಮೇಲೆ ನಡೆಯುವುದೇ ಕಷ್ಟ. ಅಂತಹದರಲ್ಲಿ ಫ್ರೋಜನ್ ಲೇಕ್‍ನ ಮಂಜಿನ ಮೇಲೆ ಗುರುದೀಪ್ ಪಂದೇರ್ ಮಾಡಿರುವ ಡ್ಯಾನ್ಸ್ ಅನ್ನು ನೆಟ್ಟಿಗರು ಸಖತ್ ಇಷ್ಟಪಟ್ಟಿದ್ದಾರೆ. ಏಪ್ರಿಲ್ 7ರಂದು ಆತ ಶೇರ್ ಮಾಡಿರುವ ವಿಡಿಯೋ ಕೇವಲ ಮೂರೇ ದಿನದಲ್ಲಿ ಏಳು ಲಕ್ಷ ಜನರು ವೀಕ್ಷಿಸಿದ್ದಾರೆ. 28 ಸಾವಿರ ಜನರು ಇಷ್ಟಪಟ್ಟಿದ್ದಾರೆ. ಸಾವಿರಕ್ಕೂ ಹೆಚ್ಚು ಮಂದಿ ರೀಟ್ವೀಟ್ ಮಾಡಿದ್ದಾರೆ.

ವಿಡಿಯೋ ಶೇರ್ ಮಾಡಿರುವ ಅವರು, ನಾನು ಎರಡನೇ ಹಂತದ ಕೋವಿಡ್ ಲಸಿಕೆ ಪಡೆದುಕೊಂಡೆ. ಕೋವಿಡ್ ಲಸಿಕೆ ಪಡೆದುಕೊಂಡ ಖುಷಿಯನ್ನು ಫ್ರೋಜನ್ ಲೇಕ್‍ನ ದಡದ ಮೇಲೆ ಪಂಜಾಬಿನ ಜಾನಪದ ನೃತ್ಯ ಬಾಂಗ್ರಾ ನೃತ್ಯದ ಮೂಲಕ ವ್ಯಕ್ತಪಡಿಸಿದ್ದು, ವ್ಯಾಕ್ಸಿನೇಷನ್‍ನ ಸಕಾರಾತ್ಮಕತೆ, ಆತ್ಮವಿಶ್ವಾಸ ಹೆಚ್ಚಿದೆ. ಕೆನಡಾ ದೇಶದ ಜನರ ಉತ್ತಮ ಆರೋಗ್ಯ ಹಾಗೂ ವ್ಯಾಕ್ಸಿನೇಷನ್‌ ಅನ್ನು ಬೆಂಬಲಿಸಿ ನೃತ್ಯದ ಮೂಲಕ ಆರೋಗ್ಯ ಉತ್ತಮವಾಗಿ ಇರಿಸಿಕೊಳ್ಳುವ ಸಂದೇಶ ಸಾರುತ್ತಿದ್ದೇನೆ ಎಂದು ಡ್ಯಾನ್ಸ್ ವಿಡಿಯೋ ಟ್ವೀಟ್ ಮಾಡಿದ್ದಾರೆ.

Today, I received my second dose of the Covid-19 vaccine. Then I went to a frozen lake in the lap of pure nature to dance Punjabi Bhangra on it for joy, hope and positivity, which I'm dispatching to Canada and beyond for everyone's good health.
YouTube: https://t.co/xGalq3TbEH pic.twitter.com/GvivlIk5KY

— Gurdeep Pandher of Yukon (@GurdeepPandher) April 7, 2021

ಗುರುದೀಪ್ ಅವರು ಎರಡನೇ ಹಂತದ ವ್ಯಾಕ್ಸಿನೇಷನ್ ಪಡೆದುಕೊಂಡಿರುವುದಕ್ಕೆ ನೆಟ್ಟಿಗರು ಶುಭಾಶಯ ಕೋರಿದ್ದು, ವಿಡಿಯೋ ಶೇರ್ ಮಾಡಿರುವುದಕ್ಕೂ ಧನ್ಯವಾದ ಸಲ್ಲಿಸಿದ್ದಾರೆ. ಇದನ್ನು ನೋಡಿದ ನೆಟ್ಟಿಗರೊಬ್ಬರು ಈ ವಿಡಿಯೋ ನನ್ನ ಸಮತೋಷವನ್ನು ಇಮ್ಮಡಿಗೊಳಿಸಿದೆ ಎಂದು ಪ್ರತಿಕ್ರಿಯಿಸಿದರೆ ಮತ್ತೊಬ್ಬರು, ಸಮತೋಷದ ಹಲವು ಮಜಲುಗಳ ವಿಡಿಯೋವನ್ನು ಶೇರ್ ಮಾಡಿರುವುದಕ್ಕೆ ಧನ್ಯವಾದಗಳು. 2ನೇ ಹಂತದ ಲಸಿಕೆ ಪಡೆದ ನಂತರ ನನಗೂ ಇದೇ ರೀತಿಯ ಅನುಭವವಾಯಿತು. ನಿಜಕ್ಕೂ ಖುಷಿಯಾಯಿತು ಎಂದು ಟ್ವೀಟ್ ಮಾಡಿದ್ದಾರೆ.

ತಮ್ಮ ಕೋವಿಡ್ ವ್ಯಾಕ್ಸಿನ್‍ನ ಸಂತಸವನ್ನು ಎಲ್ಲರಿಗೂ ಪಸರಿಸಿರುವುದಕ್ಕೂ ವಂದನೆಗಳು, ನಿಮ್ಮ ಮುಖದಲ್ಲಿದ್ದ ನಗು, ಡ್ಯಾನ್ಸ್‌ನಲ್ಲಿರುವ ಉತ್ಸಾಹ ಕಂಡು ಬೆರಗಾಗಿದ್ದೇನೆ. ಆತ್ಮವಿಶ್ವಾಸ, ಕೋವಿಡ್ ವ್ಯಾಕ್ಸಿನೇಷನ್ ಕುರಿತು ಸಕಾರಾತ್ಮಕತೆ ಹರಡಿದ ನಿಮಗೆ ಧನ್ಯವಾದಗಳು ಎಂದಿದ್ದಾರೆ.