Travel In India: ಭಾರತದಲ್ಲಿ ‘ಸೀನಿಯರ್ ಸಿಟಿಜನ್’ ಭೇಟಿ ನೀಡಲೇಬೇಕಾದ 6 ಪ್ರವಾಸಿ ತಾಣಗಳಿವು!

ಯಾರಿಗೆ ತಾನೇ ಈ ಮಹಾನಗರಗಳಲ್ಲಿರುವ ಭಾರಿ ಜನ ದಟ್ಟಣೆ, ವಾಹನ ದಟ್ಟಣೆ, ವಾಯುಮಾಲಿನ್ಯ ಮತ್ತು ಶಬ್ದ ಮಾಲಿನ್ಯದಿಂದ ಸ್ವಲ್ಪ ದಿನಗಳ ಕಾಲ ಆಗಾಗ ಈ ಮಹಾನಗರಗಳಿಂದಾಚೆಗೆ ದೂರದ ಸ್ಥಳಗಳಿಗೆ ಹೋಗಿ ಸ್ವಲ್ಪ ಹಸಿರು ಬೆಟ್ಟ ಕಾಡುಗಳ ಮಧ್ಯೆ ಮತ್ತು ನದಿ, ಸಮುದ್ರಗಳ ತೀರದಲ್ಲಿ ವಿಶ್ರಮಿಸಿ ಬರಬೇಕೆಂದು ಮನಸ್ಸಾಗುವುದಿಲ್ಲ ಹೇಳಿ? ಶಾಲೆಗೆ (School) ಹೋಗುವ ಮಕ್ಕಳಿಂದ ಹಿಡಿದು ವಯೋವೃದ್ಧರ ವರೆಗೆ ಎಲ್ಲರಿಗೂ ಹೀಗೆ ಅನ್ನಿಸುತ್ತಲೇ ಇರುತ್ತದೆ. ಅದಕ್ಕೆ ನಮ್ಮ ಜನರು ಅವರಿಗೆ ಬ್ಯುಸಿ ಕೆಲಸದಿಂದ (Busy Work) ರಜೆ ಸಿಕ್ಕರೆ ಸಾಕು ಮನೆಯಲ್ಲಿ ಇರುವ ಮಕ್ಕಳು ಮತ್ತು ಪೋಷಕರನ್ನು ಕಾರಿನಲ್ಲಿ ಕೂರಿಸಿಕೊಂಡು ದೂರದ ಸ್ಥಳಗಳಿಗೆ ಪ್ರವಾಸಕ್ಕೆ ಅಂತ ಹೋಗಿ ಬರುತ್ತಾರೆ. ಹೀಗೆ ಕುಟುಂಬದ (Family) ಜೊತೆಗೆ ಹೋಗುವ ಪ್ರವಾಸವು ಬ್ಯುಸಿ ಜೀವನದಿಂದ ಸ್ವಲ್ಪ ವಿಶ್ರಾಂತಿಯನ್ನು ನೀಡುತ್ತವೆ ಮತ್ತು ಎಲ್ಲರ ಮನಸ್ಸಿಗೆ ಸಂತೋಷವನ್ನು ನೀಡುತ್ತವೆ.

ಹಿರಿಯ ನಾಗರಿಕರಿಗೆ ಅಂತ ಭಾರತದಲ್ಲಿವೆ ಅನೇಕ ಪ್ರವಾಸಿ ಸ್ಥಳಗಳು

ನಮ್ಮ ಭಾರತ ದೇಶದಲ್ಲಿಯಂತೂ ನೋಡಲು ಅನೇಕ ಪ್ರವಾಸಿ ಸ್ಥಳಗಳಿವೆ, ಪ್ರತಿ ಹೊಸ ಸ್ಥಳಕ್ಕೆ ಹೋದಾಗಲೂ ಸಹ ಅಲ್ಲಿನ ವೈವಿಧ್ಯಮಯ ಸಂಸ್ಕೃತಿಗಳನ್ನು ತಿಳಿದುಕೊಳ್ಳುವ ಅವಕಾಶ ನಮಗೆ ಸಿಗುತ್ತದೆ. ಅದರಲ್ಲೂ ಮನೆಯಲ್ಲಿನ ಹಿರಿಯರು ತಮ್ಮ ಮಾನಸಿಕ ಯೋಗಕ್ಷೇಮವನ್ನು ಚೆನ್ನಗಿರಿಸಿಕೊಳ್ಳಲು, ಆಗಾಗ್ಗೆ ಈ ರೀತಿಯ ಪ್ರವಾಸಿ ತಾಣಗಳಿಗೆ ಹೋಗಿ ಬರುತ್ತಿರಬೇಕು.

ಇಂತಹ ಹೊಸ ಹೊಸ ಸ್ಥಳಗಳನ್ನು ಅನ್ವೇಷಿಸುವುದರಿಂದ ತಮ್ಮ ದೈನಂದಿನ ದಿನಚರಿಗಳಿಂದ ಹೊರಬಂದು, ಅವರು ಜೀವನವನ್ನು ಹೊಸ ದೃಷ್ಟಿಕೋನದಿಂದ ನೋಡಲು ಸಾಧ್ಯವಾಗುತ್ತದೆ. ಅರ್ಥಪೂರ್ಣವಾದ ಪ್ರಯಾಣವು ಹಿರಿಯರಿಗೆ ಹೊಸ ವ್ಯಕ್ತಿಗಳೊಂದಿಗೆ ಸಂಪರ್ಕ ಸಾಧಿಸಲು, ಸಾಮಾಜಿಕವಾಗಿ ಬೇರೆ ಜನರೊಂದಿಗೆ ಬೆರೆಯಲು ಸಹಾಯ ಮಾಡುತ್ತದೆ. ಅಷ್ಟೇ ಅಲ್ಲದೆ ಈ ರೀತಿಯ ಪ್ರವಾಸಿ ತಾಣಗಳಿಗೆ ಹೋಗುವುದರಿಂದ ಹಿರಿಯ ಜನರ ಜೀವನವು ಗಮನಾರ್ಹ ರೀತಿಯಲ್ಲಿ ಬದಲಾವಣೆಯನ್ನು ಕಾಣಲು ಅನುವು ಮಾಡಿಕೊಡುತ್ತದೆ, ಸಂತೃಪ್ತಿಯ ಪ್ರಜ್ಞೆಯನ್ನು ಬೆಳೆಸುತ್ತದೆ.

ಸೀನಿಯರ್ ವರ್ಲ್ಡ್ ನ ಸಿಲ್ವರ್ ವಿಂಗ್ಸ್ ಹಾಲಿಡೇಸ್ ಹಿರಿಯ ನಾಗರಿಕ ಸ್ನೇಹಿ ಅನುಭವಗಳನ್ನು ನೀಡುವ ಭಾರತದ ಆರು ಪ್ರವಾಸ ತಾಣಗಳ ಪಟ್ಟಿಯನ್ನು ಇಲ್ಲಿ ನಮ್ಮೊಂದಿಗೆ ಹಂಚಿಕೊಂಡಿದ್ದಾರೆ ನೋಡಿ. ನೀವು ಮುಂದಿನ ಬಾರಿ ಪ್ರವಾಸಕ್ಕೆ ಅಂತ ಹೋಗುವ ಮುನ್ನ ಈ ಸ್ಥಳಗಳ ಬಗ್ಗೆ ಚೆನ್ನಾಗಿ ತಿಳಿದುಕೊಂಡು ಹೋಗುವುದು ನಿಮಗೆ ಇನ್ನಷ್ಟು ಆನಂದವನ್ನು ನೀಡುತ್ತದೆ.

ಕಾಶ್ಮೀರ

ಕಾಶ್ಮೀರ ಅಂತ ಹೆಸರು ಕೇಳಿದ ತಕ್ಷಣ ನಮ್ಮಲ್ಲಿ ಅನೇಕರಿಗೆ ‘ಅಬ್ಬಾ ಎಂತಹ ದೂರದ ಸ್ಥಳದ ಬಗ್ಗೆ ಮಾತಾಡ್ತಿದ್ದಾರೆ’ ಅಂತ ಅನ್ನಿಸುವುದು ಸಹಜ. ಕಾಶ್ಮೀರವು ಹಿಮದಿಂದ ಆವೃತವಾದ ಪರ್ವತಗಳು, ಹೊಳೆಯುವ ಸರೋವರಗಳು ಮತ್ತು ಸುಂದರವಾದ ಕಣಿವೆಗಳನ್ನು ಒಳಗೊಂಡಂತೆ ಬೆರಗುಗೊಳಿಸುವ ನೈಸರ್ಗಿಕ ಸೌಂದರ್ಯಕ್ಕೆ ಹೆಸರುವಾಸಿಯಾಗಿದೆ.

ಇದನ್ನೂ ಓದಿ: ಅಬ್ಬಾ, ಈ ನಾಯಿಯ ನಾಲಿಗೆಯನ್ನು ನೋಡಿದ್ರೆ ಬೆಚ್ಚಿ ಬೀಳ್ತೀರ! ಗಿನ್ನಿಸ್ ವಿಶ್ವ ದಾಖಲೆ ನಿರ್ಮಿಸಿದ್ಯಂತೆ ಈ ಸೂಪರ್​ ಡಾಗ್​

ಶ್ರೀನಗರದ ದಾಲ್ ಸರೋವರ, ಪಹಲ್ಗಾಮ್, ಸೋನ್ಮಾರ್ಗ್ ಮತ್ತು ಗುಲ್ಮಾರ್ಗ್ ನಂತಹ ಸ್ಥಳಗಳನ್ನು ಅನ್ವೇಷಿಸಲು ಕಾಶ್ಮೀರದಲ್ಲಿ ಸಾಕಷ್ಟು ಸ್ಥಳಗಳಿವೆ. ಈ ಪ್ರದೇಶದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆಯು ಅದರ ವಾಸ್ತುಶಿಲ್ಪ, ಪಾಕಪದ್ಧತಿ ಮತ್ತು ಉತ್ಸವಗಳಲ್ಲಿ ಸ್ಪಷ್ಟವಾಗಿದೆ.

ಅಷ್ಟೇ ಅಲ್ಲದೆ ಶಂಕರಾಚಾರ್ಯ ದೇವಾಲಯ, ಅಮರನಾಥ ಗುಹೆ ಮತ್ತು ಜಾಮಾ ಮಸೀದಿಯಂತಹ ಈ ಪ್ರದೇಶದಾದ್ಯಂತ ಹರಡಿರುವ ದೇವಾಲಯಗಳು ಮತ್ತು ಮಸೀದಿಗಳಿಗೆ ಭೇಟಿ ನೀಡುವ ಮೂಲಕ ಹಿರಿಯರು ಆಧ್ಯಾತ್ಮಿಕ ಪ್ರವಾಸೋದ್ಯಮದಲ್ಲಿ ತೊಡಗಬಹುದು.

ಕಾಶ್ಮೀರದ ಒರಟಾದ ಭೂಪ್ರದೇಶ ಮತ್ತು ನೈಸರ್ಗಿಕ ಸೌಂದರ್ಯವು ಹಿರಿಯರಿಗೆ ಚಾರಣ, ಸ್ಕೀಯಿಂಗ್ ಮತ್ತು ರಾಫ್ಟಿಂಗ್ ನಂತಹ ಸಾಹಸ ಚಟುವಟಿಕೆಗಳನ್ನು ಆನಂದಿಸಲು ಸಹ ಸೂಕ್ತ ತಾಣವಾಗಿದೆ. ಶಾಂತಿಯುತ ವಾತಾವರಣ ಮತ್ತು ಆತಿಥ್ಯ ನೀಡುವ ಸ್ಥಳೀಯರು ಕಾಶ್ಮೀರವನ್ನು ದೈನಂದಿನ ಜೀವನದ ಜಂಜಾಟದಿಂದ ಪಾರಾಗಲು ಸೂಕ್ತ ಸ್ಥಳವನ್ನಾಗಿ ಮಾಡುತ್ತದೆ.

ಮೇಘಾಲಯ

"ಮೋಡಗಳ ವಾಸಸ್ಥಾನ" ಎಂದು ಕರೆಯಲ್ಪಡುವ ಮೇಘಾಲಯವು ನಿಜವಾಗಿಯೂ ಹಿರಿಯ ನಾಗರೀಕರ ಸ್ನೇಹಿ ತಾಣವಾಗಿದ್ದು, ಇದು ಅನನ್ಯ ಅನುಭವವನ್ನು ನೀಡುತ್ತದೆ.

ಇಲ್ಲಿ ಉಮ್ಗೊಟ್ ನದಿ ಗಮನಾರ್ಹ ಆಕರ್ಷಣೆಯಾಗಿದೆ. ಇಂಡೋ-ಬಾಂಗ್ಲಾದೇಶ ಗಡಿಯ ಬಳಿ ಹರಿಯುವ ಈ ನದಿಯು ಸ್ಫಟಿಕ-ಸ್ಪಷ್ಟ ನದಿಯಾಗಿದೆ ಮತ್ತು ಏಷ್ಯಾದ ಅತ್ಯಂತ ಸ್ವಚ್ಛವಾದ ನದಿಗಳಲ್ಲಿ ಒಂದಾಗಿದೆ. ಇದು ದೇವರ ಸ್ವಂತ ತೋಟ ಎಂದೂ ಸಹ ಕರೆಯಲ್ಪಡುವ ಏಷ್ಯಾದ ಅತ್ಯಂತ ಸ್ವಚ್ಛ ಗ್ರಾಮವಾದ ಮಾವ್ಲಿನ್ನಾಂಗ್ ಮೂಲಕ ಹಾದು ಹೋಗುತ್ತದೆ. ಮೇಘಾಲಯ, ತನ್ನ ರಮಣೀಯ ಸೌಂದರ್ಯದೊಂದಿಗೆ, ದೃಶ್ಯ ವೀಕ್ಷಣೆ, ಚಾರಣ, ಸಾಹಸ ಮತ್ತು ಸುಂದರವಾದ ದೃಶ್ಯಗಳನ್ನು ಸಂಯೋಜಿಸುವ ಮೂಲಕ ಸೂಕ್ತವಾದ ರಜಾ ತಾಣವನ್ನು ನೀಡುತ್ತದೆ.

ಇದನ್ನೂ ಓದಿ: ಒಂದು ಕಣ್ಣು ಮಾತ್ರ ಮಸುಕು ಆಗುತ್ತಿದೆಯಾ? ಅದು ಬ್ರೈನ್ ಟ್ಯೂಮರ್ ಇರಬಹುದು ಎಚ್ಚರ!

ಅಂಡಮಾನ್ ದ್ವೀಪಗಳು

ಮನಮೋಹಕ ಅಂಡಮಾನ್ ದ್ವೀಪಗಳು ತಮ್ಮ ಸಾಟಿಯಿಲ್ಲದ ನೈಸರ್ಗಿಕ ವೈಭವ ಮತ್ತು ಪ್ರಶಾಂತ ವಾತಾವರಣದಿಂದ ಪ್ರಯಾಣಿಕರನ್ನು ಆಕರ್ಷಿಸುತ್ತವೆ. ಪ್ರಾಚೀನ ಕಡಲತೀರಗಳು, ಸೊಂಪಾದ ಕಾಡುಗಳು ಮತ್ತು ಅಭಿವೃದ್ಧಿ ಹೊಂದುತ್ತಿರುವ ಸಮುದ್ರ ಪರಿಸರ ವ್ಯವಸ್ಥೆಯನ್ನು ಹೊಂದಿರುವ ಇದು ಪ್ರಶಾಂತತೆಯನ್ನು ಬಯಸುವ ಹಿರಿಯರಿಗೆ ಒಂದು ಸುಂದರವಾದ ವಿಶ್ರಾಂತಿ ತಾಣವಾಗಿದೆ.

ಸ್ಕೂಬಾ ಡೈವಿಂಗ್, ಚಾರಣ, ಪಕ್ಷಿ ವೀಕ್ಷಣೆ ಮತ್ತು ಹೆಚ್ಚಿನವುಗಳಂತಹ ಪುನರುಜ್ಜೀವನಗೊಳಿಸುವ ಅನುಭವಗಳನ್ನು ಒದಗಿಸುವ ಇದು ದ್ವೀಪಗಳ ಬೆರಗುಗೊಳಿಸುವ ಭೂದೃಶ್ಯಗಳ ನಡುವೆ, ಹಿರಿಯರಿಗೆ ವಿಶ್ರಾಂತಿ ಪಡೆಯಲು ಮತ್ತು ದ್ವೀಪದ ಅಸಾಧಾರಣ ಸೌಂದರ್ಯದೊಂದಿಗೆ ಸಂಪರ್ಕಿಸುವ ಉತ್ತೇಜಕ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳಲು ಪರಿಪೂರ್ಣ ವಾತಾವರಣವನ್ನು ಒದಗಿಸುತ್ತದೆ.

ಕೇರಳ

ಕೇರಳ ಅಂತ ಹೆಸರು ಕೇಳಿದರೆ ಸಾಕು ನಮಗೆ ನೆನಪಿಗೆ ಬರುವ ಮಾತು ಎಂದರೆ ಅದು "ದೇವರ ಸ್ವಂತ ನಾಡು" ಅಂತ. ಕೇರಳವು ಒಂದು ಆಕರ್ಷಕ ತಾಣವಾಗಿದ್ದು, ಮುನ್ನಾರ್ ಒಂದು ಮೋಡಿ ಮಾಡುವ ಗಿರಿಧಾಮವಾಗಿದೆ. ಈ ಪ್ರದೇಶವು ಸುಂದರವಾದ ಕಣಿವೆಗಳು, ಹಸಿರು ಕಾಡುಗಳು, ಬೆಟ್ಟಗಳು, ಹರಿಯುವ ತೊರೆಗಳು ಮತ್ತು ಬೆರಗುಗೊಳಿಸುವ ಜಲಪಾತಗಳನ್ನು ಒಳಗೊಂಡಂತೆ ಸುಂದರವಾದ ಭೂದೃಶ್ಯಗಳನ್ನು ಹೊಂದಿದೆ. ಹಿರಿಯರು ಸೊಂಪಾದ ಪರಿಸರದ ಮೂಲಕ ಚಾರಣ, ದೈಹಿಕ ವ್ಯಾಯಾಮವನ್ನು ಆನಂದಿಸುತ್ತಾ ಅನೇಕ ರೀತಿಯ ನೈಸರ್ಗಿಕ ಅದ್ಭುತಗಳನ್ನು ಅಪ್ಪಿಕೊಳ್ಳುವಂತಹ ಉತ್ತೇಜಕ ಚಟುವಟಿಕೆಗಳಲ್ಲಿ ತೊಡಗಬಹುದು.

ಪ್ರಶಾಂತ ವಾತಾವರಣದ ನಡುವೆ ಕ್ಯಾಂಪಿಂಗ್ ಪ್ರಕೃತಿಯೊಂದಿಗೆ ಮರು ಸಂಪರ್ಕಿಸಲು ಅವಕಾಶವನ್ನು ನೀಡುತ್ತದೆ, ವಿಹಂಗಮ ನೋಟಗಳನ್ನು ಮತ್ತು ಸುತ್ತಮುತ್ತಲಿನೊಂದಿಗೆ ಸಾಮರಸ್ಯದ ಪ್ರಜ್ಞೆಯನ್ನು ಒದಗಿಸುತ್ತದೆ. ಆಗಸ್ಟ್ ನಲ್ಲಿ ಮಳೆಯು ಅದರ ಸೌಂದರ್ಯವನ್ನು ಹೆಚ್ಚಿಸಿದಾಗ ಮುನ್ನಾರ್ ನ ಮೋಡಿ ಇನ್ನಷ್ಟು ಉತ್ತುಂಗಕ್ಕೇರುತ್ತದೆ, ಇದು ತುಂಬಾನೇ ಸೂಕ್ತವಾದ ರಜಾ ತಾಣವಾಗಿದೆ. ಕಾಸ್ಕೇಡಿಂಗ್ ಜಲಪಾತಗಳು, ಕಣಿವೆಗಳು ಹೆಚ್ಚು ರೋಮಾಂಚಕವಾಗಿರುತ್ತವೆ ಮತ್ತು ಚಹಾ ಮತ್ತು ಮಸಾಲೆ ತೋಟಗಳ ಸುವಾಸನೆ ಗಾಳಿಯಲ್ಲಿ ಸೇರಿಕೊಂಡಿರುತ್ತದೆ.

ಆಹ್ಲಾದಕರ ಹವಾಮಾನ, ಮಂತ್ರಮುಗ್ಧಗೊಳಿಸುವ ದೃಶ್ಯಾವಳಿಗಳೊಂದಿಗೆ ಸಂಯೋಜಿಸಲ್ಪಟ್ಟು, ಹಿತವಾದ ವಾತಾವರಣವನ್ನು ಸೃಷ್ಟಿಸುತ್ತದೆ, ಅಲ್ಲಿ ಹಿರಿಯರು ವಿಶ್ರಾಂತಿ ಪಡೆಯಬಹುದು.

ವಾರಣಾಸಿ – ಸಾರನಾಥ್

ವಿಶ್ವದ ಅತ್ಯಂತ ಹಳೆಯ ನಗರಗಳಲ್ಲಿ ಒಂದಾದ ವಾರಣಾಸಿ ಮಂತ್ರಮುಗ್ಧಗೊಳಿಸುವ ಅನುಭವವನ್ನು ನೀಡುತ್ತದೆ. ಘಟ್ಟಗಳ ಉದ್ದಕ್ಕೂ ಅಡ್ಡಾಡುವುದು, ಗಂಗಾ ನದಿಯಲ್ಲಿ ದೋಣಿ ಸವಾರಿ ಮಾಡುತ್ತಾ ಸೂರ್ಯೋದಯವನ್ನು ನೋಡುವುದು ಅಥವಾ ದೀಪಗಳ ಈ ನಗರದ ಘಾಟ್ ಗಳಲ್ಲಿನ ಪೂಜೆ, ಆಚರಣೆಗಳನ್ನು ಕಣ್ತುಂಬಿಕೊಳ್ಳುವುದು ನಿಜವಾಗಿಯೂ ಎಂತವರನ್ನಾದರೂ ಮೋಡಿ ಮಾಡುತ್ತದೆ.

ವಾರಣಾಸಿಯಿಂದ ಕೇವಲ 10 ಕಿಲೋ ಮೀಟರ್ ದೂರದಲ್ಲಿರುವ ಸಾರನಾಥದಲ್ಲಿ ಗೌತಮ ಬುದ್ಧ ತನ್ನ ಮೊದಲ ಧರ್ಮೋಪದೇಶವನ್ನು ಬೋಧಿಸಿದ ಸ್ಥಳವಾಗಿದೆ. ಇದು ಪುರಾತತ್ವ ವಸ್ತುಸಂಗ್ರಹಾಲಯಗಳು, ಸ್ತೂಪಗಳು ಮತ್ತು ಮಠಗಳನ್ನು ಹೊಂದಿದೆ, ಇದು ಒಂದು ಆಧ್ಯಾತ್ಮಿಕ ಸ್ಥಳವಾಗಿದೆ.

ಈ ಎರಡೂ ಸ್ಥಳಗಳಲ್ಲಿ, ಹಿರಿಯರು ಸಾಂತ್ವನ ಮತ್ತು ಸ್ಫೂರ್ತಿಯನ್ನು ಕಂಡುಕೊಳ್ಳುತ್ತಾರೆ, ಏಕೆಂದರೆ ಈ ಸ್ಥಳಗಳು ಪ್ರಶಾಂತತೆ, ಸಾಂಸ್ಕೃತಿಕ ಶ್ರೀಮಂತಿಕೆ ಮತ್ತು ಪ್ರಾಚೀನ ಸಂಪ್ರದಾಯಗಳೊಂದಿಗೆ ಸಂಪರ್ಕವನ್ನು ಹೊಂದಿವೆ. ಇದು ಆಧ್ಯಾತ್ಮಿಕತೆಯ ನವೀಕೃತ ಪ್ರಜ್ಞೆಯನ್ನು ಪ್ರತಿಬಿಂಬಿಸಲು, ಆಲೋಚಿಸಲು ಮತ್ತು ಕಂಡುಕೊಳ್ಳಲು ಅನುವು ಮಾಡಿಕೊಡುವ ಒಂದು ಗಮ್ಯಸ್ಥಾನವಾಗಿದೆ, ಇದು ಅರ್ಥಪೂರ್ಣ ಪ್ರಯಾಣದ ಅನುಭವಗಳನ್ನು ಹುಡುಕುವ ಹಿರಿಯ ನಾಗರಿಕರಿಗೆ ಅಚ್ಚುಮೆಚ್ಚಿನ ಆಯ್ಕೆಯಾಗಿದೆ.

ಲಡಾಖ್

ವಿಸ್ಮಯಕಾರಿ ಭೂದೃಶ್ಯಗಳು, ಅಡೆತಡೆಯಿಲ್ಲದ ಜೀವನಶೈಲಿ ಮತ್ತು ಅನನ್ಯ ಅನುಭವಗಳಿಗೆ ಹೆಸರುವಾಸಿಯಾದ ಲಡಾಖ್ ಹಿರಿಯ ನಾಗರಿಕರಿಗೆ ಅತ್ಯುತ್ತಮ ತಾಣವಾಗಿದೆ. ಅಲ್ಲಿನ ಸ್ವಚ್ಛವಾದ ನೀಲಿ ಆಕಾಶ ಮತ್ತು ಭವ್ಯವಾದ ಹಿಮದಿಂದ ಆವೃತವಾದ ಪರ್ವತಗಳಿಂದ ಸುತ್ತುವರೆದಿರುವ ದೃಶ್ಯವು ಮನಸ್ಸನ್ನು ಉಲ್ಲಾಸಗೊಳಿಸುವುದಲ್ಲದೆ, ತುಂಬಾ ವರ್ಷಗಳವರೆಗೆ ನೆನಪಿನಲ್ಲಿ ಉಳಿಯುವಂತಹ ಅನುಭವವನ್ನು ಸಹ ಕಟ್ಟಿಕೊಡುತ್ತದೆ.

ಈ ಪ್ರವಾಸಿ ತಾಣವು ಸುಂದರವಾದ ಕಣಿವೆಗಳು, ಆಕರ್ಷಕ ಹಳ್ಳಿಗಳು ಮತ್ತು ಪ್ರಾಚೀನ ಸರೋವರಗಳನ್ನು ಒಳಗೊಂಡಂತೆ ಬೆರಗುಗೊಳಿಸುವ ನೈಸರ್ಗಿಕ ಅದ್ಭುತಗಳಿಂದ ತುಂಬಿದೆ. ಇಲ್ಲಿರುವ ಪಾಂಗೊಂಗ್ ತ್ಸೊ ಸರೋವರವು ನೀಲಿ ಬಣ್ಣದ ಮೋಡಿ ಮಾಡುವ ಛಾಯೆಗಳಿಗೆ ಹೆಸರುವಾಸಿಯಾಗಿದೆ.

ವಯಸ್ಸಾದ ಪ್ರಯಾಣಿಕರಿಗೆ ಅಂತ ಈ ಸ್ಥಳದಲ್ಲಿ ಅನೇಕ ರೀತಿಯ ಹಿರಿಯ ನಾಗರೀಕ ಸ್ನೇಹಿ ಸೌಲಭ್ಯಗಳನ್ನು ಅಭಿವೃದ್ಧಿಪಡಿಸಿದೆ, ಆರಾಮದಾಯಕ ಮತ್ತು ಆನಂದದಾಯಕ ಅನುಭವವನ್ನು ಇದು ಖಾತ್ರಿಪಡಿಸುತ್ತದೆ. ಈ ಪ್ರದೇಶದ ಅತಿದೊಡ್ಡ ಆಕರ್ಷಣೆಯೆಂದರೆ ಇದು ನಗರ ಜೀವನದ ಬ್ಯುಸಿಯಾದ ಜೀವನದಿಂದ ಪ್ರಶಾಂತವಾದ ಸಮಯವನ್ನು ಒದಗಿಸುತ್ತದೆ, ಒಟ್ಟಿನಲ್ಲಿ ಹಿರಿಯ ಪ್ರವಾಸಿಗರಿಗೆ ಈ ಸ್ಥಳ ಪ್ರಶಾಂತತೆ ಮತ್ತು ಮನಸ್ಸಿಗೆ ನೆಮ್ಮದಿಯನ್ನು ಒದಗಿಸುತ್ತದೆ.