WhatsApp Update: ವಾಟ್ಸಾಪ್​ನಲ್ಲಿ ಇನ್ಮುಂದೆ ಕರೆಯನ್ನು ಶೆಡ್ಯೂಲ್ ಮಾಡ್ಬಹುದು! ಯಾರಿಗೆಲ್ಲಾ ಈ ಫೀಚರ್ ಲಭ್ಯ?

ಜನಪ್ರಿಯ ಮೆಸೇಜಿಂಗ್ ಅಪ್ಲಿಕೇಶನ್ (Messaging Application) ಆಗಿರುವ ವಾಟ್ಸಾಪ್​ ಇತ್ತೀಚೆಗಂತೂ ಹೊಸ ಫೀಚರ್ಸ್​ಗಳನ್ನು ಪರಿಚಯಿಸುವ ಮೂಲಕ ಭಾರೀ ಮಾತುಕತೆಯಲ್ಲಿದೆ. ವಾಟ್ಸಾಪ್ ತನ್ನ ಬಳಕೆದಾರರಿಗಾಗಿ ಕಳೆದ ವರ್ಷ ಹಲವಾರು ಫೀಚರ್ಸ್​​ಗಳನ್ನು ಹೊರತಂದಿದೆ. ಅದೇ ರೀತಿಯಲ್ಲಿ 2023ರಲ್ಲಿ ಇನ್ನೂ ಹಲವಾರು ನವೀಕರಣಗಳು ಬರಲಿದೆ ಎಂಬ ಭರವಸೆಯನ್ನೂ ನೀಡಿತ್ತು. ಅದೇ ರೀತಿ ಈ ವರ್ಷದ ಆರಂಭದಿಂದಲೇ ವಾಟ್ಸಾಪ್ (WhatsApp)​ ತನ್ನಲ್ಲಿನ ಕಾರ್ಯವೈಖರಿಯಲ್ಲಿ ಬದಲಾವಣೆಯನ್ನು ತರುತ್ತಲೇ ಇದೆ. ಕೆಲದಿನಗಳ ಹಿಂದಷ್ಟೇ ವಾಟ್ಸಾಪ್​ ಸ್ಟೇಟಸ್​ನಲ್ಲಿ ವಾಯ್ಸ್ ಮೆಸೇಜ್ ಶೇರ್ ಮಾಡುವ ಫೀಚರ್ ಅನ್ನು ಬಿಡುಗಡೆ ಮಾಡಿತ್ತು. ತದನಂತರದಲ್ಲಿ ಬ್ಲಾಕ್​ ಶಾರ್ಟ್​ಕಟ್ (Block Shortcut)​ ಮಾಡುವ ಫೀಚರ್ ಅನ್ನು ಪರಿಚಯಿಸಿತ್ತು. ಇದೀಗ ಮತ್ತೆ ಹೊಸ ಅಪ್ಡೇಟ್​ ಅನ್ನು ಬಿಡುಗಡೆ ಮಾಡಿದೆ.

ವಾಟ್ಸಾಪ್​ ಸದ್ಯ ಪರಿಚಯಿಸುತ್ತಿರುವ ಈ ಫೀಚರ್ ಇದುವರೆಗೆ ಬೇರೆ ಯಾವುದೇ ಅಪ್ಲಿಕೇಶನ್​ಗಳಲ್ಲೂ ಬಿಡುಗಡೆಯಾಗಿಲ್ಲ. ಇನ್ಮುಂದೆ ವಾಟ್ಸಾಪ್​ನಲ್ಲಿ ಕಾಲ್​ ಅನ್ನು ಶೆಡ್ಯೂಲ್​ ಮಾಡಿಯೂ ಇಟ್ಟುಕೊಳ್ಳಬಹುದು.

ಕಾಲ್ ಶೆಡ್ಯೂಲ್​ ಮಾಡಿಟ್ಟುಕೊಳ್ಳಬಹುದು

ವಾಟ್ಸಾಪ್‌ನಲ್ಲಿ ಈಗಾಗಲೇ ವಾಯ್ಸ್‌ ಹಾಗೂ ವಿಡಿಯೋ ಕರೆ ಮಾಡಲು ಅವಕಾಶ ನೀಡಲಾಗಿದೆ. ಅದಾಗ್ಯೂ ಈ ವಿಭಾಗದಲ್ಲಿ ಇನ್ನಷ್ಟು ಹೊಸ ಸೌಲಭ್ಯ ಕಲ್ಪಿಸಿಕೊಡಲು ಮುಂದಾಗಿರುವ ವಾಟ್ಸಾಪ್ ಬಳಕೆದಾರರಿಗೆ ಮುಂಚಿತವಾಗಿಯೇ ಕರೆಯನ್ನು ನಿಗದಿಪಡಿಸುವ ಆಯ್ಕೆಯ ಫೀಚರ್ಸ್‌ ನೀಡುವಲ್ಲಿ ಕಾರ್ಯನಿರ್ವಹಿಸುತ್ತಿದೆ ಎಂದು ತಿಳಿದುಬಂದಿದೆ.

ಇದನ್ನೂ ಓದಿ: ಜಿಯೋನ ಈ ರೀಚಾರ್ಜ್ ಮಾಡಿದ್ರೆ 336 ದಿನ ಟೆನ್ಷನ್​​ ಇರುವುದಿಲ್ಲ! ಪ್ರಯೋಜನಗಳು ಏನೆಲ್ಲಾ ಇದೆ?

ಇನ್ನು ಈ ಶೆಡ್ಯೂಲ್ ಕರೆ ಸೌಲಭ್ಯ ಆಂಡ್ರಾಯ್ಡ್ ಬಳಕೆದಾರರಿಗೆ ಲಭ್ಯವಿರಲಿದ್ದು, ಈ ಮೂಲಕ ಬೇಕಾದವರ ಜೊತೆಗೆ ಸಮಯಕ್ಕಿಂತ ಮುಂಚಿತವಾಗಿ ಸ್ನೇಹಿತರು ಮತ್ತು ಕುಟುಂಬದೊಂದಿಗೆ ಕರೆಯನ್ನು ಯೋಜಿಸಬಹುದಾಗಿದೆ. ಈ ಮೂಲಕ ಇನ್ಮುಂದೆ ಬಳಕೆದಾರರು ಯಾವುದೇ ಕಾಲ್​ಗಳನ್ನು ವಾಟ್ಸಾಪ್​ನಲ್ಲಿ ಮಿಸ್​ ಮಾಡಿಕೊಳ್ಳುವುದಿಲ್ಲ ಎಂದು ಕಂಪೆನಿ ಹೇಳಿದೆ. ಇನ್ನು ವಾಟ್ಸಾಪ್​ ಪರಿಚಯಿಸಿರುವ ಈ ಹೊಸ ಫೀಚರ್​ ಇನ್ನೇನು ಕೆಲವೇ ದಿನಗಳಲ್ಲಿ ಬಳಕೆದಾರರಿಗೆ ಲಭ್ಯವಾಗುತ್ತದೆ ಎಂದು ಹೇಳಲಾಗಿದೆ.

ಸಾಂದರ್ಭಿಕ ಚಿತ್ರ

ಈ ಫೀಚರ್​ನ ಪ್ರಯೋಜನ

ವಾಟ್ಸಾಪ್​ ಪರಿಚಯಿಸಿರುವ ಈ ಫೀಚರ್​ನಿಂದ ಬಳಕೆದಾರರಿಗೆ ಹಲವಾರು ರೀತಿಯಲ್ಲಿ ಸಹಕಾರಿಯಾಗುತ್ತದೆ. ಕಾರಣವೇನೆಂದರೆ ಕೆಲವರ್ಷಗಳ ಹಿಂದೆ ವಾಟ್ಸಾಪ್ ಅನ್ನು ಕೇವಲ ತಮ್ಮ ಸ್ನೇಹಿತರ ಜೊತೆ, ಕುಟುಂಬದವರ ಜೊತೆ ಚಾಟ್ ಮಾಡಲು ಮಾತ್ರ ಬಳಸುತ್ತಿದ್ದರು. ಆದರೆ ಈಗ ವಿಡಿಯೋ ಕಾಲ್​​ಗಳನ್ನು , ವಾಯ್ಸ್​ ಕಾಲ್​ಗಳನ್ನು ಸಹ ಮಾಡಬಹುದಾಗಿದೆ. ಇತ್ತೀಚೆಗಷ್ಟೇ ವಾಟ್ಸಾಪ್​ ಕಾಲ್ ಮಾಡುವ ವಿಷಯದಲ್ಲಿ ಬಹಳಷ್ಟು ಫೀಚರ್​ ಅನ್ನು ಬಿಡುಗಡೆ ಮಾಡಿದೆ. ಇದೀಗ ಮತ್ತೆ ವಾಟ್ಸಾಪ್​ನಲ್ಲಿ ಕಾಲ್​ ಶೆಡ್ಯೂಲ್ ಮಾಡುವಂತಹ ಫೀಚರ್ ಅನ್ನು ಬಿಡುಗಡೆ ಮಾಡಲು ರೆಡಿಯಾಗಿದೆ.

ಈ ಮೂಲಕ ಇನ್ಮುಂದೆ ಯಾರ ಜೊತೆಯೂ ಕಾಲ್​ ಮಾಡ್ಬೇಕಾದ್ರೂ ಶೆಡ್ಯೂಲ್ ಮಾಡಿಕೊಂಡು ಕರೆಯಲ್ಲಿ ಮಾತನಾಡಬಹುದಾಗಿದೆ. ಇನ್ನೂ ಕೆಲವರು ಯಾವುದೇ ಕೆಲಸಕ್ಕೆ ಸಂದರ್ಶನ ಮಾಡಬೇಕಾದರು ವಾಟ್ಸಾಪ್​ನಲ್ಲೇ ಮಾಡುತ್ತಾರೆ. ಈ ವೇಳೆ ಸಂದರ್ಶಕರು ಸಂದರ್ಶನಕ್ಕೆ ಹಾಜರಾಗುವ ವ್ಯಕ್ತಿ ಜೊತೆ ಯಾವ ಸಮಯದಲ್ಲಿ ಮಾತನಾಡಬೇಕು ಎಂಬುದನ್ನು ಶೆಡ್ಯೂಲ್ ಮಾಡಿಟ್ಟುಕೊಳ್ಳಬಹುದಾಗಿದೆ.

ಸಮಯ, ದಿನಾಂಕವನ್ನೂ ಆ್ಯಡ್ ಮಾಡ್ಬಹುದು

ಇನ್ನು ವಾಟ್ಸಾಪ್‌ ಬಳಕೆದಾರರು ತಮ್ಮ ಈ ವಿಶೇಷ ಕರೆಗಾಗಿ ಟೈಟಲ್​, ದಿನಾಂಕ ಮತ್ತು ಸಮಯವನ್ನು ಸೆಲೆಕ್ಟ್​ ಮಾಡಲು ಅನುಕೂಲ ಮಾಡಿಕೊಡಲಾಗುತ್ತಿದ್ದು, ಹಾಗೆಯೇ ಗ್ರೂಪ್‌ ಕರೆ ವಿಚಾರದಲ್ಲೂ ನಿಗದಿತ ಕರೆಯನ್ನು ಯಾವಾಗ ಮಾಡಲಾಗುತ್ತದೆ ಎಂಬುದರ ಕುರಿತು ಗುಂಪಿನಲ್ಲಿರುವ ಪ್ರತಿಯೊಬ್ಬರೂ ತಿಳಿದುಕೊಳ್ಳಬಹುದಾಗಿದೆ. ಈ ರೀತಿ ನಿಗದಿ ಮಾಡುವುದರಿಂದ ಕಾಲ್​ನಲ್ಲಿ ಪಾಲ್ಗೊಳ್ಳುವವರು ಮೊದಲೇ ತಯಾರಿಯನ್ನು ಮಾಡಿಟ್ಟುಕೊಳ್ಳಬಹುದು.

ಇನ್ನು ಈ ಫೀಚರ್​ ಕೆಲವೇ ದಿನಗಳಲ್ಲಿ ಇತ್ತೀಚಿನ ವರ್ಷನ್ ಹೊಂದಿರುವ ವಾಟ್ಸಾಪ್​ ಬಳಕೆದಾರರಿಗೆ ಲಭ್ಯವಾಗುತ್ತದೆ. ಸದ್ಯ ವಾಟ್ಸಾಪ್ ಕಂಪೆನಿ ಇದರ ಪರೀಕ್ಷೆಯಲ್ಲಿದೆ.