WhatsApp Update: ವಾಟ್ಸಾಪ್​ನಿಂದ ಹೊಸ ಫೀಚರ್​ ಬಿಡುಗಡೆ! ಕೆಲವರಿಗೆ ಮಾತ್ರ ಬಳಸಲು ಅವಕಾಶ

ಜನಪ್ರಿಯ ಮೆಸೇಜಿಂಗ್ ಅಪ್ಲಿಕೇಶನ್ (Messaging Application) ಆಗಿರುವ ವಾಟ್ಸಾಪ್​​ ಹಲವಾರು ಫೀಚರ್ಸ್​​ಗಳನ್ನು ಬಿಡುಗಡೆ ಮಾಡುವ ಮೂಲಕ ದೇಶದಲ್ಲಿ ಭಾರೀ ಮಾತುಕತೆಯಲ್ಲಿದೆ. ಇದಲ್ಲದೆ ದೇಶದಲ್ಲಿ ಅತೀ ಹೆಚ್ಚು ಗ್ರಾಹಕರನ್ನು ಹೊಂದಿರುವ ಮೆಸೇಜಿಂಗ್ ಅಪ್ಲಿಕೇಶನ್ ಎಂದೂ ಗುರುತಿಸಿಕೊಂಡಿದೆ. ಸಾಮಾನ್ಯವಾಗಿ ಒಂದೇ ಮೊಬೈಲ್‌ನಲ್ಲಿ (Mobile) ಎರಡು ಆ್ಯಪ್​​ಗಳನ್ನು ಬಳಕೆ ಮಾಡುವ ಅವಕಾಶ ಕಲ್ಪಿಸಿಲಾಗಿದ್ದು, ಈ ಮೂಲಕ ಮೊಬೈಲ್‌ ಬಳಕೆದಾರರು ಸಾಕಷ್ಟು ಪ್ರಯೋಜನ ಪಡೆಯುತ್ತಿದ್ದಾರೆ. ಅದೇ ರೀತಿ ಈಗ ಟ್ಯಾಬ್ಲೆಟ್‌ಗಳಲ್ಲಿ ವಾಟ್ಸಾಪ್‌ ಸ್ಪ್ಲಿಟ್ ವ್ಯೂ ಗೆ ಅವಕಾಶ ಮಾಡಿಕೊಡಲು ಮೆಟಾ ಮುಂದಾಗಿದೆ. ವಾಟ್ಸಾಪ್​ ಈ ಬಾರಿ ಬಿಡುಗಡೆ ಮಾಡಿದ ಫೀಚರ್ಸ್​ಗಳಲ್ಲಿ ಇದೊಂದು ಬಹಳಷ್ಟು ವಿಶೇಷ ಫೀಚರ್ (WhatsApp New Feature)​ ಅಂತಾನೇ ಹೇಳ್ಬಹುದು.

ಹೌದು, ಇದುವರೆಗೆ ಕೇವಲ ಸ್ಮಾರ್ಟ್​​ಫೋನ್​ಗಳಲ್ಲಿ ಎರಡು ಆ್ಯಪ್​ಗಳನ್ನು ಒಂದೇ ಬಾರಿಗೆ ಬಳಕೆ ಮಾಡಬಹುದಿತ್ತು. ಆದರೆ ಇನ್ಮುಂದೆ ವಾಟ್ಸಾಪ್​ನಲ್ಲೂ ಈ ಫೀಚರ್​ ಬರ್ತಾ ಇದೆ. ಆದರೆ ಈ ಫೀಚರ್​ ಕೆಲವು ಬಳಕೆದಾರರಿಗೆ ಮಾತ್ರ ಲಭ್ಯವಿರುತ್ತದೆ. ಹಾಗಿದ್ರೆ ಈ ಫೀಚರ್​ ಹೇಗೆ ಕಾರ್ಯನಿರ್ವಹಿಸುತ್ತದೆ, ಯಾರಿಗೆಲ್ಲಾ ಲಭ್ಯವಿದೆ ಎಂದು ಈ ಲೇಖನದ ಮೂಲಕ ತಿಳಿಯಿರಿ.

ವಾಟ್ಸಾಪ್​ ಇದೀಗ ತನ್ನ ಬಳಕೆದಾರರಿಗಾಗಿ ಸ್ಪ್ಲಿಟ್​ ವ್ಯೂ ಎಂಬ ಫೀಚರ್​ ಅನ್ನು ಬಿಡುಗಡೆ ಮಾಡಿದೆ.

ಏನಿದು ಸ್ಪ್ಲಿಟ್​ ವ್ಯೂ?

ಸ್ಪ್ಲಿಟ್ ವ್ಯೂ ಎಂಬುದು ಸ್ಮಾರ್ಟ್‌ ಡಿವೈಸ್‌ ಬಳಕೆದಾರರಿಗೆ ಅಗತ್ಯವಾಗಿರುವ ಒಂದು ಪ್ರಮುಖ ಫೀಚರ್ಸ್‌ ಆಗಿದ್ದು, ಒಮ್ಮೆಲೆ ಒಂದೇ ಡಿಸ್‌ಪ್ಲೇನಲ್ಲಿ ಎರಡು ಆ್ಯಪ್​​ಗಳನ್ನು ಓಪನ್‌ ಮಾಡಲು ಅವಕಾಶ ನೀಡುತ್ತದೆ. ಅದರಲ್ಲೂ ಈ ಸೌಲಭ್ಯ ಇತ್ತೀಚಿನ ಸ್ಮಾರ್ಟ್‌ಫೋನ್‌ಗಳಲ್ಲಿದ್ದು, ಆಯ್ದ ಆ್ಯಪ್​​ಗಳು ಮಾತ್ರ ಈ ಸೇವೆಗೆ ಬೆಂಬಲ ನೀಡುತ್ತವೆ. ಇದರ ಸಾಲಿಗೆ ಈಗ ವಾಟ್ಸಾಪ್‌ ಸಹ ಸೇರಿಕೊಳ್ಳಲಿದೆ.

ಇದನ್ನೂ ಓದಿ: ಇದು ಜಗತ್ತಿನ ದುಬಾರಿ ನೈಲ್ ಪಾಲಿಶ್ ಅಂತೆ, ಇದ್ರ ಬೆಲೆ ಬರೋಬ್ಬರಿ 1 ಕೋಟಿ 90 ಲಕ್ಷ!

ಟ್ಯಾಬ್​ ಬಳಕೆದಾರರಿಗೆ ಮಾತ್ರ ಲಭ್ಯ

ಈ ಸ್ಪ್ಲಿಟ್ ವ್ಯೂ ಅನ್ನು ಸದ್ಯಕ್ಕೆ ಪರೀಕ್ಷಿಸಲಾಗುತ್ತಿದ್ದು, ಟ್ಯಾಬ್ಲೆಟ್‌ಗಳಿಗಾಗಿ ಆಂಡ್ರಾಯ್ಡ್ ಬೀಟಾದಲ್ಲಿ ಇದನ್ನು ಹೊರತರಲು ಯೋಜಿಸಲಾಗುತ್ತಿದೆ. ಈ ಮೂಲಕ ಯಾರೆಲ್ಲಾ ಬಳಕೆದಾರರು ಟ್ಯಾಬ್ಲೆಟ್‌ಗಳಲ್ಲಿ ವಾಟ್ಸಾಪ್‌ ಬಳಸುತ್ತಾರೋ ಅವರು ಇನ್ಮುಂದೆ ಈ ಸೌಲಭ್ಯ ಪಡೆದುಕೊಳ್ಳಬಹುದು. ಜೊತೆಗೆ ಈ ವೇಳೆ ಒಬ್ಬರ ಜೊತೆ ಚಾಟಿಂಗ್‌ ಮಾಡುವುದರ ಜೊತೆಗೆ ಇನ್ನೊಂದು ಬದಿಯಲ್ಲಿ ವಾಟ್ಸಾಪ್‌ನ ಇತರೆ ಫೀಚರ್ಸ್‌ ಅನ್ನು ಸಹ ಬಳಕೆ ಮಾಡಿಕೊಳ್ಳಬಹುದಾಗಿದೆ.

ವಾಬೀಟಾಇನ್ಫೋ ವರದಿಯ ಪ್ರಕಾರ

ಈ ಸಂಬಂಧ ಈ ಬದಲಾವಣೆಯನ್ನು WABetaInfo ಗಮನಿಸಿದ್ದು, ಇದರ ವರದಿಯ ಪ್ರಕಾರ ಆಂಡ್ರಾಯ್ಡ್ ಟ್ಯಾಬ್ಲೆಟ್ ಬಳಕೆದಾರರು ವಾಟ್ಸಾಪ್‌ನ ಸ್ಪ್ಲಿಟ್ ವ್ಯೂ ಫೀಚರ್ಸ್‌ ಅನ್ನು ಬಳಕೆ ಮಾಡಲು ಅನುಮತಿಸಲಾಗುತ್ತದೆ ಎಂದು ಉಲ್ಲೇಖಿಸಿದೆ. ಇನ್ನು ಸಾಮಾನ್ಯವಾಗಿ ಟ್ಯಾಬ್ಲೆಟ್‌ನಲ್ಲಿ ವಾಟ್ಸಾಪ್‌ ಬಳಕೆ ಮಾಡುವಾಗ ವಾಟ್ಸಾಪ್‌ ಸಂಪೂರ್ಣ ಡಿಸ್‌ಪ್ಲೇ ಯನ್ನು ಆಕ್ರಮಿಸಿಕೊಳ್ಳುತ್ತದೆ. ಈ ವೇಳೆ ಇತರೆ ಚಾಟ್‌ ವಿಭಾಗವನ್ನು ತೆರೆಯಬೇಕು ಎಂದರೆ ಚಾಟ್ ಲೀಸ್ಟ್‌ಗೆ ಹಿಂತಿರುಗಿ ನಂತರ ಬೇಕಾದ ಚಾಟ್ ಓಪನ್‌ ಮಾಡಬೇಕು. ಇನ್ಮುಂದೆ ಈ ಸಮಸ್ಯೆ ಇರುವುದಿಲ್ಲ.

ವಾಟ್ಸಾಪ್​ನಲ್ಲಿ ಕಾಲ್​ ಅನ್ನು ಶೆಡ್ಯೂಲ್ ಮಾಡುವ ಫೀಚರ್​

ವಾಟ್ಸಾಪ್‌ನಲ್ಲಿ ಈಗಾಗಲೇ ವಾಯ್ಸ್‌ ಹಾಗೂ ವಿಡಿಯೋ ಕರೆ ಮಾಡಲು ಅವಕಾಶ ನೀಡಲಾಗಿದೆ. ಅದಾಗ್ಯೂ ಈ ವಿಭಾಗದಲ್ಲಿ ಇನ್ನಷ್ಟು ಹೊಸ ಸೌಲಭ್ಯ ಕಲ್ಪಿಸಿಕೊಡಲು ಮುಂದಾಗಿರುವ ವಾಟ್ಸಾಪ್ ಬಳಕೆದಾರರಿಗೆ ಮುಂಚಿತವಾಗಿಯೇ ಕರೆಯನ್ನು ನಿಗದಿಪಡಿಸುವ ಆಯ್ಕೆಯ ಫೀಚರ್ಸ್‌ ನೀಡುವಲ್ಲಿ ಕಾರ್ಯನಿರ್ವಹಿಸುತ್ತಿದೆ ಎಂದು ತಿಳಿದುಬಂದಿದೆ.

ಇನ್ನು ಈ ಶೆಡ್ಯೂಲ್ ಕರೆ ಸೌಲಭ್ಯ ಆಂಡ್ರಾಯ್ಡ್ ಬಳಕೆದಾರರಿಗೆ ಲಭ್ಯವಿರಲಿದ್ದು, ಈ ಮೂಲಕ ಬೇಕಾದವರ ಜೊತೆಗೆ ಸಮಯಕ್ಕಿಂತ ಮುಂಚಿತವಾಗಿ ಸ್ನೇಹಿತರು ಮತ್ತು ಕುಟುಂಬದೊಂದಿಗೆ ಕರೆಯನ್ನು ಯೋಜಿಸಬಹುದಾಗಿದೆ. ಈ ಮೂಲಕ ಇನ್ಮುಂದೆ ಬಳಕೆದಾರರು ಯಾವುದೇ ಕಾಲ್​ಗಳನ್ನು ವಾಟ್ಸಾಪ್​ನಲ್ಲಿ ಮಿಸ್​ ಮಾಡಿಕೊಳ್ಳುವುದಿಲ್ಲ ಎಂದು ಕಂಪೆನಿ ಹೇಳಿದೆ. ಇನ್ನು ವಾಟ್ಸಾಪ್​ ಪರಿಚಯಿಸಿರುವ ಈ ಹೊಸ ಫೀಚರ್​ ಇನ್ನೇನು ಕೆಲವೇ ದಿನಗಳಲ್ಲಿ ಬಳಕೆದಾರರಿಗೆ ಲಭ್ಯವಾಗುತ್ತದೆ ಎಂದು ಹೇಳಲಾಗಿದೆ.