ChatGPT: ಏನೇನೆಲ್ಲ ಮಾಡುತ್ತೆ ಚಾಟ್‌ ಜಿಪಿಟಿ? ಶಿಕ್ಷಣದಲ್ಲಿ ಕ್ರಾಂತಿಯನ್ನೇ ಮಾಡುತ್ತಾ ಹೊಸ AI ಟೆಕ್ನಾಲಜಿ?

ದಿನ ದಿನವೂ ಬೆಳಕಿಗೆ ಬರುತ್ತಿರುವ ಹೊಸ ಹೊಸ ತಂತ್ರಜ್ಞಾನವು (Technology) ನಮ್ಮ ಅನೇಕ ಕಷ್ಟದ ಕೆಲಸವನ್ನು ಹೆಚ್ಚು ಸರಳಗೊಳಿಸುತ್ತಿವೆ. ಚಿಟಿಕೆ ಹೊಡೆಯುವುದರಲ್ಲಿ ಕೆಲಸ ಆಗುವಂತೆ ಮಾಡಬಹುದು. ಈಗೆಲ್ಲ ಏನನ್ನು ಬೇಕಾದರೂ ಇಂಟರ್‌ನೆಟ್‌ನಲ್ಲಿ ಹುಡುಕಬಹುದು. ಸಮುದ್ರದಷ್ಟಿರುವ ಇಲ್ಲಿನ ಮಾಹಿತಿಗಳನ್ನು ಯಾವಾಗ ಬೇಕಾದರೂ ಪಡೆದುಕೊಳ್ಳಬಹುದು. ಬರೀ ಟೈಪ್‌ ಮಾಡಿ ಹುಡುಕುವುದಲ್ಲ, ವಾಯ್ಸ್‌ ಕಮಾಂಡ್‌ಗಳನ್ನೂ (Voice Commond) ನೀಡಿ ನಮಗೆ ಬೇಕಾದ ಮಾಹಿತಿಯನ್ನು ಪಡೆದುಕೊಳ್ಳಬಹುದು. ಇವೆಲ್ಲದರ ಹೊರತಾಗಿ ಇತ್ತೀಚಿಗೆ ಚಾಟ್‌ಜಿಪಿಟಿ ಇಂಟರ್‌ನೆಟ್‌ ಲೋಕದಲ್ಲಿ ಧೂಳೆಬ್ಬಿಸಿದೆ ಎಂದರೆ ತಪ್ಪಾಗೋದಿಲ್ಲ. ಚಾಟ್‌ಜಿಪಿಟಿ (ChatGPT) ಎಂಬುದು ಓಪನ್‌ಎಐ ಅನ್ನೋ ಕಂಪನಿ ಅಭಿವೃದ್ಧಿಪಡಿಸಿದ ಕೃತಕ ಬುದ್ಧಿಮತ್ತೆ ಆಧಾರಿತ ಚಾಟ್‌ಬಾಟ್ (Chatbot) ಆಗಿದೆ. ಇದು ಆರಂಭವಾಗಿದ್ದು ಕಳೆದ ವರ್ಷ ಅಂದರೆ 2022ರ ನವೆಂಬರ್‌ನಲ್ಲಿ.

ಇದು ವ್ಯಕ್ತಿಗಳ ಮಾತನ್ನು ಅರ್ಥಮಾಡಿಕೊಂಡು ಅದನ್ನು ಸುಲಭವಾಗಿ ಅರ್ಥವಾಗುವ ಬರವಣಿಗೆ ರೂಪದಲ್ಲಿ ನಮಗೆ ನೀಡುವಂಥ ಸಾಮರ್ಥ್ಯವನ್ನು ಹೊಂದಿದೆ.

ಸದ್ಯ ಎಲ್ಲೆಡೆ ಚರ್ಚೆಗೆ ಒಳಗಾಗಿರುವ ಈ ಚಾಟ್‌ಜಿಪಿಟಿ ಎಂದರೇನು? ಅದನ್ನು ಹೇಗೆ ಬಳಸುವುದು, ಅದು ಉಚಿತವಾಗಿ ಸಿಗುತ್ತದೆಯೇ ಅಥವಾ ಅದನ್ನು ಬಳಸಲು ಶುಲ್ಕವನ್ನು ಪಾವತಿಸಬೇಕೇ? ಇದು ಶಿಕ್ಷಣ ಕ್ಷೇತ್ರದ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ? ಮುಂತಾದ ಪ್ರಶ್ನೆಗಳಿಗೆ ಉತ್ತರಗಳನ್ನು ಈ ಲೇಖನದ ಮೂಲಕ ಪಡೆಯಿರಿ.

ಏನಿದು ಚಾಟ್‌ ಜಿಪಿಟಿ?

ಚಾಟ್ ಜಿಪಿಟಿ ಎಂಬುದರ ಪೂರ್ಣ ರೂಪವು ಜನರೇಟಿವ್ ಪ್ರಿ-ಟ್ರೇನ್ಡ್ ಟ್ರಾನ್ಸ್‌ಫಾರ್ಮರ್ ಎಂದು. ಇದು ಹೊಸ ಪೀಳಿಗೆಯ ಎಐ ಅಥವಾ ಕೃತಕ ಬುದ್ಧಿಮತ್ತೆಯ ಭಾಗವಾಗಿದೆ. ಅದು ಡಿಜಿಟಲ್ ಪುಸ್ತಕಗಳು, ಆನ್‌ಲೈನ್ ಬರಹಗಳು ಮತ್ತು ಇತರ ಮಾಧ್ಯಮಗಳ ವ್ಯಾಪಕ ಡೇಟಾಬೇಸ್‌ನಿಂದ ಕಲಿತದ್ದನ್ನು ಆಧರಿಸಿ ಸಂಭಾಷಣೆ, ಓದಬಲ್ಲ ಪಠ್ಯವನ್ನು ಇದು ರಚಿಸುತ್ತದೆ. ಅಲ್ಲದೇ ಇದರಿಂದ ಕಾದಂಬರಿ ಚಿತ್ರಗಳು ಮತ್ತು ವೀಡಿಯೊಗಳನ್ನು ಸಹ ಉತ್ಪಾದಿಸಬಹುದು.

ಆಲ್ಟ್‌ಮ್ಯಾನ್, ಮಸ್ಕ್ ಮತ್ತು ಇತರ ಸಿಲಿಕಾನ್ ವ್ಯಾಲಿ ಹೂಡಿಕೆದಾರರು 2015 ರಲ್ಲಿ ಕೃತಕ ಬುದ್ಧಿಮತ್ತೆ ಸಂಶೋಧನಾ ಲಾಭರಹಿತ ಸಂಸ್ಥೆಯನ್ನು ರಚಿಸಿದರು. ಚಾಟ್‌ ಜಿಪಿಟಿಯನ್ನು ನವೆಂಬರ್ 30, 2022 ರಂದು ಜಗತ್ತಿಗೆ ಅನಾವರಣಗೊಳಿಸಿದರು. ಅಂದಹಾಗೆ ಇದು ಸಂಭಾಷಣೆಗಳನ್ನು ರಚಿಸಲು ನೈಸರ್ಗಿಕ ಭಾಷಾ ಸಂಸ್ಕರಣೆಯನ್ನು (NLP) ಬಳಸುತ್ತದೆ.

ಇದನ್ನೂ ಓದಿ: ಓದಿನಲ್ಲಿ ಹಿಂದೆ ಬಿದ್ದ ಕನ್ನಡ ಮಾಧ್ಯಮದ ಶೇ.60ರಷ್ಟು ಮಕ್ಕಳು; ವರದಿಯಲ್ಲಿ ಬಹಿರಂಗ

ಚಾಟ್‌ಜಿಪಿಟಿ ಒಂದು ಚಾಟ್ ಟೂಲ್ ಆಗಿದ್ದು ಅದು ಸಂವಾದಾತ್ಮಕ ರೀತಿಯಲ್ಲಿ ಮಾತುಕತೆ ನಡೆಸಲು ನಿಮಗೆ ಅನುಮತಿ ನೀಡುತ್ತದೆ. ಇದು ನಿಮ್ಮ ಎಲ್ಲಾ ಅನುಮಾನಗಳಿಗೆ ಉತ್ತರಗಳನ್ನು ನೀಡುತ್ತದೆ.

ಅಲ್ಲದೇ ಉತ್ತರಗಳನ್ನು ಸರಿಪಡಿಸುತ್ತದೆ. ಜೊತೆಗೆ ತನ್ನ ತಪ್ಪುಗಳನ್ನು ಒಪ್ಪಿಕೊಳ್ಳುತ್ತದೆ. ಹಾಗೆಯೇ ಅನುಚಿತ ವಿನಂತಿಗಳನ್ನು ತಿರಸ್ಕರಿಸುತ್ತದೆ. ಚಾಟ್‌ ಜಿಪಿಟಿಯೆಂಬ ಈ AI ಉಪಕರಣವು ನಿಮಗಾಗಿ ಪ್ರಬಂಧಗಳು, ಬ್ಲಾಗ್‌ಗಳು ಮುಂತಾದವುಗಳನ್ನು ಬರೆದು ಕೊಡುತ್ತದೆ.

ಪಠ್ಯವನ್ನು ಉತ್ಪಾದಿಸಲು ತರಬೇತಿ ಪಡೆದ ಭಾಷಾ ಮಾದರಿಯಾದ GPT-3.5 ಅನ್ನು ಆಧರಿಸಿ, ಚಾಟ್‌ಜಿಪಿಟಿಯನ್ನು ಪ್ರತಿಕ್ರಿಯೆಯೊಂದಿಗೆ ಸಂವಾದಕ್ಕೆ ಹೊಂದುವಂತೆ ತಯಾರು ಮಾಡಲಾಗಿದೆ. ChatGPTಯಿಂದ ಹೊರಹೊಮ್ಮುವ ಪ್ರತಿಕ್ರಿಯೆಗಳು ಮಾನವನಂತೆ ಧ್ವನಿಸುತ್ತದೆ. ಏಕೆಂದರೆ ಜನರು ಬರೆದ ಅಪಾರ ಪ್ರಮಾಣದ ಡೇಟಾಗಳೊಂದಿಗೆ ಅವುಗಳು ತರಬೇತಿ ಪಡೆದಿವೆ.

ಚಾಟ್‌ಜಿಪಿಟಿಗೆ ಶುಲ್ಕ ಪಾವತಿಸಬೇಕಾ?

ಚಾಟ್‌ಜಿಪಿಟಿ ಬಳಸಲು ಉಚಿತವಾಗಿದೆ. ಇಂಟರ್ನೆಟ್ ಸಂಪರ್ಕ ಹೊಂದಿರುವ ಯಾರಾದರೂ ಈ ಉಪಕರಣವನ್ನು ಉಚಿತವಾಗಿ ಬಳಸಬಹುದು. ಆದಾಗ್ಯೂ, ಓಪನ್‌ ಎಐ, ಅಮೆರಿಕದಲ್ಲಿ ಚಾಟ್‌ಜಿಪಿಟಿಯ ಪಾವತಿಸಿದ ಆವೃತ್ತಿಯನ್ನು ಸಹ ಪ್ರಾರಂಭಿಸಿದೆ. ಚಾಟ್‌ಜಿಪಿಟಿಯ ಪಾವತಿಸಿದ ಆವೃತ್ತಿಯನ್ನು ಚಾಟ್‌ಜಿಪಿಟಿಪ್ಲಸ್ ಎಂದು ಕರೆಯಲಾಗುತ್ತದೆ.

ಚಾಟ್​ಜಿಪಿಟಿ

ಚಾಟ್‌ಜಿಪಿಟಿಯ ಪಾವತಿಸಿದ ಆವೃತ್ತಿಯನ್ನು ಬಳಸಲು ಬಯಸುವ ಜನರು ತಿಂಗಳಿಗೆ 20 ಯುಎಸ್‌ ಡಾಲರ್‌ ಪಾವತಿಸುವ ಮೂಲಕ ಅದನ್ನು ಬಳಸಬಹುದು. ಅಲ್ಲದೇ ಫ್ರೀಯಾಗಿ ಬೇಕು ಅನ್ನುವವರು ಈ ಅಪ್ಲಿಕೇಶನ್‌ನ ಉಚಿತ ಆವೃತ್ತಿಯನ್ನು ಬಳಸಬಹುದು.

ಚಾಟ್‌ಜಿಪಿಟಿ ಯಾವೆಲ್ಲ ಕೆಲಸಗಳನ್ನು ಮಾಡುತ್ತದೆ?

• ಕೋಡ್‌ಗಳನ್ನು ಬರೆಯುವುದು


• ಪಠ್ಯವನ್ನು ಒಂದು ಭಾಷೆಯಿಂದ ಇನ್ನೊಂದು ಭಾಷೆಗೆ ಅನುವಾದಿಸುವುದು


• ಡೀಬಗ್


• ಸಂಶೋಧನಾ ಪ್ರಬಂಧಗಳಂತಹ ಸುದೀರ್ಘ ವಿಷಯವನ್ನು ಬರೆಯುವುದು


• ವೈಯಕ್ತಿಕಗೊಳಿಸಿದ ಸಂವಹನ ಮಾಡುವುದು. ಉದಾಹರಣೆಗೆ, ಇಮೇಲ್ ಪ್ರತಿಕ್ರಿಯೆಗಳು


• ನಿಮಗೆ ಹಾಡುಗಳು, ಪಾರ್ಟಿ ಕಲ್ಪನೆಗಳು ಇತ್ಯಾದಿಗಳನ್ನು ಶಿಫಾರಸು ಮಾಡುವುದು


• ಕವಿತೆ ಅಥವಾ ಪಠ್ಯವನ್ನು ಬರೆಯುವುದು


• ಕಾನೂನು ಪರೀಕ್ಷೆಗೆ ತಯಾರಾಗಲು ಸಹಾಯ ಮಾಡುವುದು


• ನಿಮ್ಮ ಶಾಲೆ ಅಥವಾ ಕಾಲೇಜಿನ ಪ್ರಬಂಧವನ್ನು ಬರೆಯುವುದು


• ನಿಮ್ಮ ನೆಚ್ಚಿನ ಖಾದ್ಯಕ್ಕಾಗಿ ಪಾಕವಿಧಾನವನ್ನು ನೀಡುವುದು


• ಇಷ್ಟವಾದ ಹಾಡಿನ ಸಾಹಿತ್ಯವನ್ನು ನೀಡುವುದು

ಚಾಟ್‌ಜಿಪಿಟಿ ಇದೀಗ ಬೀಟಾದಲ್ಲಿದೆ. ಇದನ್ನು ಬಳಸಲು ನೀವು ಮೊದಲು chat.openai.comಗೆ ಹೋಗಬೇಕಾಗುತ್ತದೆ. ನಿಮ್ಮ ಖಾತೆಯನ್ನು ಹೊಂದಿಸಲು ಸೈನ್ ಅಪ್ ಕ್ಲಿಕ್ ಮಾಡಿ.

ಒಮ್ಮೆ ನೀವು ನಿಮ್ಮ ಖಾತೆಯನ್ನು ರಚಿಸಿದ ನಂತರ, ChatGPT ಉಪಕರಣದೊಂದಿಗೆ ನೀವು ಏನು ಮಾಡಬಹುದು ಎಂಬುದರ ಕುರಿತು ಉದಾಹರಣೆಗಳನ್ನು ಒದಗಿಸಲಾಗುತ್ತದೆ. ನಿಮ್ಮ ಮೊದಲ ಪ್ರಶ್ನೆಗಳನ್ನು ಚಾಲನೆ ಮಾಡುವ ಪ್ರಕ್ರಿಯೆಯ ಮೂಲಕ ನಿಮಗೆ ಅದು ಸಹಾಯ ಮಾಡುತ್ತದೆ.

ಶಿಕ್ಷಣದ ಮೇಲೆ ಚಾಟ್‌ಜಿಪಿಟಿ ಪ್ರಭಾವ

ಶಿಕ್ಷಣದ ಮೇಲೆ ಕೃತಕ ಬುದ್ಧಿಮತ್ತೆಯ ಈ ತಂತ್ರಜ್ಞಾನ ಸಾಕಷ್ಟು ಪ್ರಭಾವ ಬೀರುತ್ತದೆ ಎನ್ನಲಾಗಿದೆ. ಚಾಟ್‌ಜಿಪಿಟಿ ಶಿಕ್ಷಕರಿಗೆ ತಮ್ಮ ಪಾಠಗಳನ್ನು ಸರಳೀಕರಿಸಲು ಸಹಾಯ ಮಾಡುತ್ತದೆ. ಅಲ್ಲದೇ ಅವರ ವಿದ್ಯಾರ್ಥಿಗಳಿಗೆ ಹೆಚ್ಚು ತೊಡಗಿಸಿಕೊಳ್ಳುವ ಮತ್ತು ಲಾಭದಾಯಕ ಶೈಕ್ಷಣಿಕ ಅನುಭವವನ್ನು ಒದಗಿಸುತ್ತದೆ. ವಿದ್ಯಾರ್ಥಿಗಳಿಗೆ ಪ್ರಬಂಧವನ್ನು ಬರೆಯಲು, ಸಂಶೋಧನಾ ಪ್ರಬಂಧಗಳಂತಹ ಸುದೀರ್ಘ ವಿಷಯವನ್ನು ಬರೆಯಲು ಕೂಡ ಇದು ಸಹಕಾರಿ.

ಚಾಟ್​ಜಿಪಿಟಿ

ಆದಾಗ್ಯೂ, ಶಿಕ್ಷಣ ವ್ಯವಸ್ಥೆಯಲ್ಲಿ ಕೃತಕ ಬುದ್ಧಿಮತ್ತೆಯ ಪರಿಕರವನ್ನು ಬಳಸುವುದರಲ್ಲಿ ವಿರೋಧಾಭಾಸಗಳಿವೆ. ಏಕೆಂದರೆ ಇದು ವಿದ್ಯಾರ್ಥಿಗಳು ತಂತ್ರಜ್ಞಾನದ ಮೇಲೆ ಹೆಚ್ಚು ಅವಲಂಭಿತರಾಗಲು ಕಾರಣವಾಗಬಹುದು ಎಂಬುದಾಗಿ ಶಿಕ್ಷಣ ತಜ್ಞರು ಅಭಿಪ್ರಾಯ ಪಡುತ್ತಾರೆ. ಇನ್ನು, ಸೆಂಟ್ರಲ್ ಬೋರ್ಡ್ ಆಫ್ ಸೆಕೆಂಡರಿ ಎಜುಕೇಶನ್ (CBSE) ಈ ವರ್ಷ 10 ಮತ್ತು 12 ನೇ ತರಗತಿಯ ಬೋರ್ಡ್ ಪರೀಕ್ಷೆಗಳಲ್ಲಿ ಚಾಟ್‌ಜಿಪಿಟಿ ಬಳಕೆಯನ್ನು ನಿಷೇಧಿಸಿದೆ.

ಮಂಡಳಿಯ ಅಧಿಕಾರಿಗಳ ಪ್ರಕಾರ, ಚಾಟ್‌ಜಿಪಿಟಿ ಬಳಕೆಯು ಪರೀಕ್ಷೆಯಲ್ಲಿ ಅನ್ಯಾಯದ ವಿಧಾನಗಳನ್ನು ಬಳಸುತ್ತದೆ. ಪರೀಕ್ಷಾ ಕೇಂದ್ರದೊಳಗೆ ವಿದ್ಯಾರ್ಥಿಗಳು ಯಾವುದೇ ಎಲೆಕ್ಟ್ರಾನಿಕ್ ಸಾಧನಗಳನ್ನು ಕೊಂಡೊಯ್ಯಲು ಅನುಮತಿಸಲಾಗುವುದಿಲ್ಲ ಎಂದು ಮಂಡಳಿಯ ಹಿರಿಯ ಅಧಿಕಾರಿಯೊಬ್ಬರು ಹೇಳಿದರು.

ಮತ್ತೊಂದೆಡೆ, ಇನ್ಫೋಸಿಸ್ ಸಂಸ್ಥಾಪಕ ಎನ್‌.ಆರ್ ನಾರಾಯಣ ಮೂರ್ತಿ ಅವರು ಇತ್ತೀಚೆಗೆ ಶಾಲೆಗಳು ಅಥವಾ ಕಾಲೇಜುಗಳಲ್ಲಿ ಚಾಟ್‌ಜಿಪಿಟಿಯನ್ನು ನಿಷೇಧಿಸುವುದು ಒಳ್ಳೆಯದಲ್ಲ ಎಂದಿದ್ದಾರೆ. ಜ್ಞಾನವನ್ನು ಹೆಚ್ಚಿಸುವಲ್ಲಿ ಚಾಟ್‌ಬಾಟ್ ತುಂಬಾ ಉಪಯುಕ್ತವಾಗಲಿದೆ ಎಂದು ಮೂರ್ತಿಯವರು ಅಭಿಪ್ರಾಯ ಪಟ್ಟಿದ್ದಾರೆ.

ನನ್ನ ಮಗ ಕೆಲ ತಿಂಗಳುಗಳ ಹಿಂದೆ ನನಗೆ ಚಾಟ್‌ಜಿಪಿಟಿ ಗೆ ಪರಿಚಯಿಸಿದ. ಜನರಿಗೆ ಜ್ಞಾನವನ್ನು ನೀಡುವಲ್ಲಿ ಇದು ಅತ್ಯಂತ ಶಕ್ತಿಯುತ ಸಾಧನವಾಗಿದೆ ಮತ್ತು ಇದು ತುಂಬಾ ಉಪಯುಕ್ತವಾಗಿದೆ ಎಂದು ನಾನು ಭಾವಿಸುತ್ತೇನೆ“ ಎಂಬುದಾಗಿ ಅವರು ಹೇಳುತ್ತಾರೆ.

ಅಲ್ಲದೇ ವಿಶ್ವವಿದ್ಯಾನಿಲಯದಲ್ಲಿ ಚಾಟ್‌ಜಿಪಿಟಿಯನ್ನು ನಿಷೇಧಿಸುವುದು ಒಳ್ಳೆಯದಲ್ಲ. ಏಕೆಂದರೆ ನಮ್ಮ ಯುವಕರು ಚಾಟ್ ಜಿಪಿಟಿಯನ್ನು ಬಳಸಿಕೊಂಡು ಬಹಳ ಬಲವಾದ ವಾದಗಳನ್ನು, ಲೇಖನಗಳನ್ನು, ಉತ್ತರಗಳನ್ನು ತಯಾರಿಸಲು ಎಷ್ಟು ಬುದ್ಧಿವಂತರು ಎಂಬುದನ್ನು ನೋಡಬಹುದಾಗಿದೆ” ಎಂದು ಅವರು ಹೇಳಿದ್ದಾರೆ. ಇನ್ನು, ಟೆಕ್ ದೈತ್ಯ ಮೈಕ್ರೋಸಾಫ್ಟ್‌ನ ಸಹ-ಸಂಸ್ಥಾಪಕ ಬಿಲ್ ಗೇಟ್ಸ್ ಸಹ ಚಾಟ್‌ಜಿಪಿಟಿಯು ಹಲವಾರು ವಿಧದಲ್ಲಿ ಸಹಾಯಕವಾಗಿದೆ ಎನ್ನುತ್ತಾರೆ.

ಈ ತಂತ್ರಜ್ಞಾನವು ಇನ್‌ವಾಯ್ಸ್‌ಗಳು, ಪತ್ರಗಳನ್ನು ಬರೆಯಲು ಸಹಾಯ ಮಾಡುವ ಮೂಲಕ ಅನೇಕ ಕಚೇರಿ ಕೆಲಸಗಳನ್ನು ಹೆಚ್ಚು ಪರಿಣಾಮಕಾರಿಯಾಗಿ ಮಾಡುತ್ತದೆ ಎಂದು ಬಿಲ್‌ಗೇಟ್ಸ್‌ ಅಭಿಪ್ರಾಯ ಪಡುತ್ತಾರೆ.

"ಇಲ್ಲಿಯವರೆಗೆ, ಕೃತಕ ಬುದ್ಧಿಮತ್ತೆ ಓದಲು ಮತ್ತು ಬರೆಯಲು ಸಹಾಯ ಮಾಡುತ್ತಿತ್ತು. ಆದರೆ ವಿಷಯವನ್ನು ಅರ್ಥಮಾಡಿಕೊಳ್ಳಲು ಸಾಧ್ಯವಾಗಿರಲಿಲ್ಲ.

ಚಾಟ್‌ಜಿಪಿಟಿ ಯಂತಹ ಹೊಸ ಕಾರ್ಯಕ್ರಮಗಳು ಇನ್‌ವಾಯ್ಸ್‌ಗಳು ಅಥವಾ ಪತ್ರಗಳನ್ನು ಬರೆಯಲು ಸಹಾಯ ಮಾಡುವ ಮೂಲಕ ಅನೇಕ ಕಚೇರಿ ಕೆಲಸಗಳನ್ನು ಹೆಚ್ಚು ಪರಿಣಾಮಕಾರಿಯಾಗುವಂತೆ ಮಾಡುತ್ತದೆ. ಇದು ನಮ್ಮ ಜಗತ್ತನ್ನು ಬದಲಾಯಿಸುತ್ತದೆ ” ಎಂದು ಅವರು ಹೇಳಿದ್ದಾರೆ.

ಚಾಟ್‌ಜಿಪಿಟಿ ಮಿತಿಗಳು

ಈ ಮಧ್ಯೆ, ಚಾಟ್‌ಜಿಪಿಟಿ ಪ್ರಬಲ AI-ಆಧಾರಿತ ಚಾಟ್‌ಬಾಟ್ ವ್ಯವಸ್ಥೆಯಾಗಿದ್ದರೂ, ಇದು ಕೆಲವು ಮಿತಿಗಳನ್ನು ಹೊಂದಿದೆ. ಇದು ತರಬೇತಿ ಪಡೆದ ಡೇಟಾವನ್ನು ಆಧರಿಸಿ ಮಾತ್ರ ಉತ್ತರಗಳನ್ನು ಒದಗಿಸಬಹುದು.

ಚಾಟ್‌ಜಿಪಿಟಿ ಒಂದು ಸರ್ಚ್ ಇಂಜಿನ್ ಅಲ್ಲ. ಆದ್ದರಿಂದ ಇದು ಮಾಹಿತಿಗಾಗಿ ಇಂಟರ್ನೆಟ್ ಅನ್ನು ಹುಡುಕುವ ಸಾಮರ್ಥ್ಯವನ್ನು ಹೊಂದಿಲ್ಲ. ಬದಲಿಗೆ ಇದು ಪ್ರತಿಕ್ರಿಯೆಗಳನ್ನು ರಚಿಸಲು ತರಬೇತಿ ಡೇಟಾದಿಂದ ಕಲಿತ ಮಾಹಿತಿಯನ್ನು ಬಳಸುತ್ತದೆ. ಆದ್ದರಿಂದ ಎಲ್ಲಾ ಔಟ್‌ಪುಟ್ ನಿಖರತೆಗಾಗಿ ಮತ್ತೊಮ್ಮೆ ಸರಿಯಾಗಿದೆಯೇ ಎಂಬು ಪರಿಶೀಲಿಸುವುದು ಮುಖ್ಯ.