Technology: ಇಂಟೆಲ್​ ಕಂಪೆನಿಯಿಂದ ವಿಶ್ವದ ಮೊದಲ ವೇಗದ ಡೆಸ್ಕ್​​ಟಾಪ್ ಪ್ರೊಸೆಸರ್​ ಲಾಂಚ್!

ಟೆಕ್ನಾಲಜಿ ಕಂಪೆನಿಗಳು (Technology Company) ಇತ್ತೀಚೆಗೆ ಬಹಳಷ್ಟು ಅಭಿವೃದ್ಧಿಯಾಗುತ್ತಿದೆ. ಹೊಸ ಹೊಸ ಅನ್ವೇಷಣೆಗಳನ್ನು ಮಾಡುವ ಮೂಲಕ ಮಾರುಕಟ್ಟೆಗೆ ಹೊಸ ಮಾದರಿಯ ತಂತ್ರಜ್ಞಾನಗಳನ್ನು ಬಿಡುಗಡೆ ಮಾಡುತ್ತದೆ. ಅದ್ರಲ್ಲೂ ಈಗಿನ ಕಾಲಮಾನದಲ್ಲಿ ಲ್ಯಾಪ್​ಟಾಪ್​ಗಳಂತೂ ವಿಶೇಷ ಫೀಚರ್ಸ್​ಗಳೊಂದಿಗೆ ಬಿಡುಗಡೆಯಾಗುತ್ತಿದೆ. ಆದರೆ ಕೆಲವೊಂದು ಬಾರಿ ನಾವು ಬಳಕೆ ಮಾಡುವಂತಹ ಲ್ಯಾಪ್​ಟಾಪ್​ ಅಥವಾ ಕಂಪ್ಯೂಟರ್​ಗಳು ಸರಿಯಾಗಿ ಕಾರ್ಯನಿರ್ವಹಿಸುವುದಿಲ್ಲ. ಇದಕ್ಕೆ ಮುಖ್ಯ ಕಾರಣ ಪ್ರೊಸೆಸರ್ (Desktop Processor)​ ಗುಣಮಟ್ಟದಲ್ಲಿ ಇರದೇ ಇರುವುದು. ಆದರೆ ಇದೀಗ ಇಂಟೆಲ್​ ಕಂಪೆನಿ (Intel Company) ಈ ತೊಂದರೆಯನ್ನು ತಪ್ಪಸುವ ಕಾರಣಕ್ಕೆ ಹೊಸ ಪ್ರೊಸೆಸರ್​ ಒಂದನ್ನು ಲಾಂಚ್ ಮಾಡಲು ರೆಡಿಯಾಗಿದೆ. ಈ ಪ್ರೊಸೆಸರ್​ ಬಹಳಷ್ಟು ಫೀಚರ್ಸ್​ಗಳನ್ನು ಒಳಗೊಂಡಿದ್ದು, ಕಂಪ್ಯೂಟರ್​ಗಳು ವೇಗವಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗುತ್ತದೆ.

ಜನಪ್ರಿಯ ಟೆಕ್ನಾಲಜಿ ಕಂಪೆನಿಯಾಗಿರುವ ಇಂಟೆಲ್ ಇಂದು ತನ್ನ 13 ನೇ ಜೆನ್ ಇಂಟೆಲ್ ಕೋರ್ i9-13900KS ಡೆಸ್ಕ್‌ಟಾಪ್ ಪ್ರೊಸೆಸರ್ ಬಗ್ಗೆ ಘೋಷಣೆ ಮಾಡಿದೆ. ಈ ಪ್ರೊಸೆಸರ್‌ ವಿಶ್ವದ ಅತ್ಯಂತ ವೇಗದ ಡೆಸ್ಕ್‌ಟಾಪ್ ಪ್ರೊಸೆಸರ್ ಆಗಿರಲಿದೆ ಎಂದು ಕಂಪೆನಿ ಹೇಳಿದೆ.

ಇಂಟೆಲ್​​ ಡೆಸ್ಕ್​ಟಾಪ್​ ಪ್ರೊಸೆಸರ್​ನ ಫೀಚರ್ಸ್​ ಹೇಗಿದೆ?

ಇಂಟೆಲ್​ ಕಂಪೆನಿಯಿಂದ ಹೊಸ ಮಾದರಿಯಲ್ಲಿ ಬಿಡುಗಡೆಯಾಗುತ್ತಿರುವ ಡೆಸ್ಕ್‌ಟಾಪ್ ಪ್ರೊಸೆಸರ್ ಇಂಟೆಲ್ ಥರ್ಮಲ್ ವೆಲಾಸಿಟಿ ಬೂಸ್ಟ್‌ನೊಂದಿಗೆ 6ಜಿಹೆಚ್​​ಝಡ್​ ವರೆಗೆ  ಟರ್ಬೊ ಆವರ್ತನವನ್ನು ಹೊಂದಿರುತ್ತದೆ ಎಂದು ಕಂಪೆನಿ ಹೇಳಿದೆ. ಹಾಗೆಯೇ ಇದು ಪಿಸಿ ಉದ್ಯಮದಲ್ಲಿ ಓವರ್‌ಕ್ಲಾಕಿಂಗ್ ಇಲ್ಲದೆ ಆ ವೇಗವನ್ನು ತಲುಪುವ ಮೊದಲ ಸಿಪಿಯು ಆಗಿರಲಿದೆ.

13 ನೇ ಜನ್ ಇಂಟೆಲ್‌ ಕೋರ್ i9-13900KS ಪ್ರೊಸೆಸರ್ ಇಂಟೆಲ್ ಅಡಾಪ್ಟಿವ್ ಬೂಸ್ಟ್ ಟೆಕ್ನಾಲಜಿಯೊಂದಿಗೆ ಪ್ಯಾಕ್‌ ಆಗಿರಲಿದ್ದು, ಇದು ಹೆಚ್ಚಿನ ಮಲ್ಟಿಕೋರ್ ಟರ್ಬೊ ಫೀಚರ್ಸ್​ಗಳನ್ನು ಹೊಂದಿದೆ. ಈ ಕೋರ್​ಗಳು ಕಂಪ್ಯೂಟರ್​ ಗೇಮರ್​​ಗಳಿಗೆ ಉತ್ತಮ ಅನುಭವವನ್ನು ನೀಡಲಿದೆ ಎಂದು ಕಂಪೆನಿ ತಿಳಿಸಿದೆ.

ವಿನ್ಯಾಸ 

ಇನ್ನು ಈ ಇಂಟೆಲ್​ನ ಪ್ರೊಸೆಸರ್​ನ ವಿನ್ಯಾಸದ ಬಗ್ಗೆ ಹೇಳುವುದಾದರೆ, ಈ ಹೊಸ ಪ್ರೊಸೆಸರ್ ಒಟ್ಟು 24 ಕೋರ್‌ಗಳನ್ನು ಹೊಂದಿರಲಿದೆ. ಇದರಲ್ಲಿ ಎಂಟು ಕಾರ್ಯಕ್ಷಮತೆ ಕೋರ್‌ಗಳು ಮತ್ತು 16 ಎಫಿಸಿಯೆಂಟ್​ ಕೋರ್‌ಗಳು, 32 ಥ್ರೆಡ್‌ಗಳು ಇರಲಿವೆ. ಈ ಮೂಲಕ ನಿಮ್ಮ ಕಂಪ್ಯೂಟರ್​ ಇನ್ನೂ ವೇಗವಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗುತ್ತದೆ.

ಇಂಟೆಲ್​ ಡೆಸ್ಕ್​ಟಾಪ್​ ಪ್ರೊಸೆಸರ್​

ಇದರೊಂದಿಗೆ ಈ ಸಾಧನ 150W ಪ್ರೊಸೆಸರ್ ಬೇಸ್ ಪವರ್, 36ಎಮ್​ಬಿ ಇಂಟೆಲ್ ಸ್ಮಾರ್ಟ್ ಕ್ಯಾಶ್ ಹಾಗೂ 16 PCIe 5.0 ಲೇನ್‌ಗಳು ಮತ್ತು ನಾಲ್ಕು PCIe 4.0 ಲೇನ್‌ಗಳನ್ನು ಒಳಗೊಂಡಿದೆ. ಒಟ್ಟಾರೆ 20 PCIe ಲೇನ್‌ಗಳು ಇದರಲ್ಲಿವೆ.

ಇನ್ನು ಈ ಇಂಟೆಲ್​ ಪ್ರೊಸೆಸರ್​ನ ಸ್ಟೋರೇಜ್‌ ಸಾಮರ್ಥ್ಯದ ಬಗ್ಗೆ ಹೇಳುವುದಾದರೆ ಇದು DDR5 5600 MT/s ಮತ್ತು DDR4 3200 MT/s ವರೆಗೆ ಬೆಂಬಲವನ್ನು ನೀಡಲಿದೆ.

ಮದರ್​​ಬೋರ್ಡ್​ ಫೀಚರ್ಸ್​

ಇಂಟೆಲ್ ತನ್ನ 13 ನೇ ಜೆನ್ ಇಂಟೆಲ್ ಕೋರ್ i9-13900KS ಪ್ರೊಸೆಸರ್ Z790 ಮತ್ತು Z690 ಮದರ್‌ಬೋರ್ಡ್‌ಗಳೊಂದಿಗೆ ಹೊಂದಿಕೊಳ್ಳುತ್ತದಂತೆ. ಅದರಲ್ಲೂ ಇತ್ತೀಚಿನ ಬಿಐಓಎಸ್​ ನೊಂದಿಗೆ ಉತ್ತಮ ಗೇಮಿಂಗ್ ಮತ್ತು ಕಂಟೆಂಟ್ ಕ್ರಿಯೇಟರ್ಸ್​ಗಳನ್ನು ಗಮನದಲ್ಲಿಟ್ಟುಕೊಂಡು ರಚಿಸಲಾಗಿದೆ ಎಂದು ಹೇಳಲಾಗಿದೆ.

ಇದನ್ನೂ ಓದಿ: 75 ಸಾವಿರದ ಸ್ಮಾರ್ಟ್​ಫೋನ್​ ಅನ್ನು ಕೇವಲ 15 ಸಾವಿರ ರೂಪಾಯಿಗೆ ಪಡೆಯಿರಿ! ಯಾವುದು ಆ ಸ್ಮಾರ್ಟ್​ಫೋನ್?

ಬೆಲೆ ಮತ್ತು ಲಭ್ಯತೆ

ಇಂಟೆಲ್‌ ಕಂಪೆನಿ ಪರಿಚಯಿಸಿದ ಈ ವಿಶೇಷ ಮಾದರಿಯ ಡೆಸ್ಕ್​ಟಾಪ್​ ಪ್ರೊಸೆಸರ್​ ಜನವರಿ 12, 2023 ರಿಂದ ಜಾಗತಿಕವಾಗಿ ಮಾರುಕಟ್ಟೆಯಲ್ಲಿ ಬಿಡುಗಡೆಯಾಗುತ್ತದೆ. ಇನ್ನು ಈ ಪ್ರೊಸೆಸರ್​ $699 ಅಂದರೆ ಭಾರತದಲ್ಲಿ ಸುಮಾರು 56,813 ರೂಪಾಯಿಗಳ ಆರಂಭಿಕ ಬೆಲೆಯಲ್ಲಿ ಲಭ್ಯವಿರುತ್ತದೆ. ಹಾಗೆಯೇ ಇದನ್ನು ಜನವರಿ 12ರಿಂದ ವಿಶ್ವದಾದ್ಯಂತ ರೀಟೇಲ್ ಸ್ಟೋರ್​ಗಳಲ್ಲಿಯೂ ಖರೀದಿ ಮಾಡಬಹುದಾಗಿದೆ.