Technology Updates: 2022ರಲ್ಲಿ ಭಾರತದಲ್ಲಿ ಅಭಿವೃದ್ಧಿಯಾದ ತಂತ್ರಜ್ಞಾನಗಳಿವು!

ಇನ್ನೇನು ಕೆಲವೇ ದಿನಗಳಲ್ಲಿ 2022 ಅಂತ್ಯಗೊಂಡು ಹೊಸವರ್ಷ (New Year) ಬಂದಾಗುತ್ತೆ. ಆದರೆ ಈ ವರ್ಷದಲ್ಲಿ ತಂತ್ರಜ್ಞಾನದ (Technology) ಪ್ರಗತಿ ಸಾಕಷ್ಟಾಗಿದೆ. ಇದರಿಂದ ಜನರಿಗೂ ಸಹ ಬಹಳಷ್ಟು ಉಪಯೋಗವಾಗಿದೆ. ಇದೀಗ ತಂತ್ರಜ್ಞಾನದ ಬೆಳವಣಿಗೆಯಲ್ಲಿ ಸದ್ದು ಮಾಡಿದ ಮುಖ್ಯವಿಷಯವೆಂದರೆ 5ಜಿ ನೆಟ್​ವರ್ಕ್​ ಸೇವೆ. ಇದೇ ರೀತಿ ಟೆಕ್ನಾಲಜಿ ಯುಗವನ್ನು ಬದಲಾವಣೆ ಮಾಡುವತ್ತ ಹಲವಾರು ಕಂಪನಿಗಳು ಹಗಲಿರುಳು ಎನ್ನದೆ ದುಡಿಯುತ್ತಿದೆ. ಕೊರೊನಾ ಲಾಕ್​ಡೌನ್​ ಬಂದ ನಂತರ ತಂತ್ರಜ್ಞಾನದ ಮೂಲಕವೇ ಹೆಚ್ಚು ಕೆಲಸ ಮಾಡುವವರಾಗಿದ್ದಾರೆ ಇದನ್ನೆಲ್ಲಾ ಗಮನಿಸಿದ ಟೆಕ್​ ಕಂಪನಿಗಳು ಅಭಿವೃದ್ಧಿಯ ದೃಷ್ಟಿಯಿಂದ ಈ ನಿರ್ಧಾರಗಳನ್ನೆಲ್ಲಾ ಕೈಗೊಂಡಿದೆ ಎಂದು ಹೇಳ್ಬಹುದು. 

ತಂತ್ರಜ್ಞಾನದ ಪ್ರಗತಿ ಇಡೀ ದೇಶದ ಪ್ರಗತಿ ಅಂತಾನೇ ಹೇಳ್ಬಹುದು. ಅದೇ ರೀತಿ ಈ ಬಾರಿ ಹಲವಾರು ಟೆಕ್ನಾಲಜಿಗಳನ್ನು ಅಭಿವೃದ್ಧಿ ಮಾಡುವಲ್ಲಿ ಕಂಪನಿಳು ಯಶಸ್ವಿಯಾಗಿದೆ. ಹಾಗಿದ್ರೆ ಈ ಬಾರಿ ಟೆಕ್ನಾಲಜಿ ಯುಗದಲ್ಲಾದ ಅಭಿವೃದ್ಧಿಗಳು ಯಾವುದೆಲ್ಲಾ ಎಂಬುದನ್ನು ಈ ಲೇಖನದ ಮೂಲಕ ತಿಳಿಯಿರಿ.

ಭಾರತದೆಲ್ಲೆಡೆ 5ಜಿ ಸೇವೆ ಆರಂಭ

5ಜಿ ನೆಟ್​ವರ್ಕ್​ ಸೇವೆ ಎಂಬುದು ಈ ಬಾರಿ ತಂತ್ರಜ್ಞಾನದ ಪ್ರಗತಿಯಲ್ಲಿ ಬಹಳಷ್ಟು ದೊಡ್ಡ ಮಟ್ಟಿನಲ್ಲಿ ಪಾತ್ರವಹಿಸಿದೆ ಎಂದು ಹೇಳ್ಬಹುದು. ಈ ವರ್ಷದ ಅಕ್ಟೋಬರ್‌ನಲ್ಲಿ ಇಂಡಿಯಾ ಮೊಬೈಲ್ ಕಾಂಗ್ರೆಸ್ 2022 ರ ಆರಂಭಿಕ ದಿನದಂದು 5ಜಿ ಸೇವೆಯನ್ನು ಪ್ರಧಾನಿ ನರೇಂದ್ರ ಮೋದಿ ಅವರು ಅಧಿಕೃತವಾಗಿ ಪ್ರಾರಂಭಿಸಿದ್ದಾರೆ. ಇದಾದ ನಂತರ ಜಿಯೋ ಹಾಗೂ ಏರ್‌ಟೆಲ್‌ ವಿವಿಧ ಮೆಟ್ರೋ ನಗರಗಳಲ್ಲಿ ಈ 5ಜಿ ಸೇವೆಯನ್ನು ನೀಡುತ್ತಾ ಯಶಸ್ವಿಯಾಗಿದೆ. ಹಾಗೆಯೇ ಮಾರ್ಚ್ 2024 ರ ವೇಳೆಗೆ ಏರ್‌ಟೆಲ್ ಎಲ್ಲಾ ಕಡೆ 5ಜಿ ನೆಟ್​ವರ್ಕ್​ ಸೇವೆಯನ್ನು ವಿಸ್ತರಣೆ ಮಾಡುವುದಾಗಿ ಘೋಷಿಸಿದೆ.

ಇದನ್ನೂ ಓದಿ: ನಿಮ್ಮನ್ನು ಕೊರೊನಾ ವೈರಸ್‌ನಿಂದ ಬಚಾವ್ ಮಾಡುತ್ತೆ ಈ ಡಿವೈಸ್! ಏನಿದು? ಇದರ ವಿಶೇಷತೆ ಏನು ಗೊತ್ತಾ?

ಡಿಜಿಟಲ್​ ಕರೆನ್ಸಿಯತ್ತ ಯೋಜನೆ:

ಭಾರತೀಯ ರಿಸರ್ವ್ ಬ್ಯಾಂಕ್ ಈ ವರ್ಷದ ಅಕ್ಟೋಬರ್‌ನಲ್ಲಿ ಭಾರತೀಯ ರೂಪಾಯಿಯ ಡಿಜಿಟಲ್ ಪ್ರತಿರೂಪವಾಗಿ ಇ-ರೂಪಾಯಿ ಅಥವಾ ಡಿಜಿಟಲ್ ರೂಪಾಯಿಯನ್ನು ಅಧಿಕೃತವಾಗಿ ಲಾಂಚ್‌ ಮಾಡಿದೆ. ಇ-ರೂಪಾಯಿಯು ಸೆಂಟ್ರಲ್ ಬ್ಯಾಂಕ್ ಡಿಜಿಟಲ್ ಕರೆನ್ಸಿಯಾಗಿದ್ದು, ಇದನ್ನು ಆರ್‌ಬಿಐ ನಿರ್ವಹಿಸುತ್ತದೆ. ಇದು ಫಿಯೆಟ್ ಕರೆನ್ಸಿಯಂತೆಯೇ ವ್ಯಾಪಾರ ಮೌಲ್ಯವನ್ನು ಹೊಂದಿರುತ್ತದೆ. ಆದರೆ, ಇದು ರೂಪಾಯಿಯಿಂದ ಬೆಂಬಲಿತವಾಗಿರುವುದರಿಂದ, ಬಿಟ್‌ಕಾಯಿನ್ ಅಥವಾ ಡಾಗ್‌ಕಾಯಿನ್ ಅಥವಾ ಎಥೆರಿಯಮ್‌ನಂತಹ ಕ್ರಿಪ್ಟೋಕರೆನ್ಸಿಗಳಂತೆ ಅಸ್ಥಿರವಾಗಿಲ್ಲ.

ಭಾರತದಲ್ಲಿ ಐಫೋನ್​ ಉತ್ಪಾದನೆ

ಭಾರತ ಸರ್ಕಾರವು 2020 ರಲ್ಲಿ PLI, SPECS ಮತ್ತು EMC 2.0 ಅನ್ನು ಒಳಗೊಂಡಿರುವ ವಿವಿಧ ಸಬ್ಸಿಡಿ ಯೋಜನೆಗಳನ್ನು ಪರಿಚಯಿಸಿದ್ದು, ಇದಾದ ನಂತರ ಭಾರತವು ತನ್ನ ಸೆಮಿಕಂಡಕ್ಟರ್​ ಉತ್ಪಾದನಾ ಸಾಮರ್ಥ್ಯಗಳನ್ನು ಹೆಚ್ಚಿಸುವತ್ತ ಗಮನಹರಿಸುತ್ತಿದೆ. ಅಂದಿನಿಂದ, ಹಲವಾರು ಟೆಕ್ ಕಂಪನಿಗಳು ಭಾರತದಲ್ಲಿ ತಮ್ಮ ನೆಲೆಯನ್ನು ಕಂಡುಕೊಂಡಿವೆ. ಈ ಮೂಲಕ ಅಗತ್ಯ ಉತ್ಪಾದನಾ ಸಾಮರ್ಥ್ಯಗಳನ್ನು ವಿಸ್ತರಿಸಿವೆ. ಅದರಲ್ಲೂ ವೇದಾಂತ ಗ್ರೂಪ್‌ನಂತಹ ಸ್ಥಳೀಯ ತಯಾರಕರು ತಮ್ಮ ಸಾಮರ್ಥ್ಯಗಳನ್ನು ಮತ್ತಷ್ಟು ಅಪ್‌ಗ್ರೇಡ್ ಮಾಡಲು ಮತ್ತು ವಿಸ್ತರಿಸಲು ಪ್ರೇರೇಪಿಸಿದೆ.

ಇದರ ಜೊತೆಗೆ ಆ್ಯಪಲ್​ ಚೀನಾದ ಮೇಲಿನ ತನ್ನ ಅವಲಂಬನೆಯನ್ನು ಕಡಿಮೆ ಮಾಡಲು ಮತ್ತು ಪ್ರಪಂಚದಾದ್ಯಂತದ ಮಾರುಕಟ್ಟೆಗಳಲ್ಲಿ ಅದರ ಉತ್ಪಾದನಾ ಸಾಮರ್ಥ್ಯಗಳನ್ನು ವೈವಿಧ್ಯಗೊಳಿಸಲು ಮುಂದಾಗಿದ್ದು, ಈ ಮೂಲಕ ಭಾರತದಲ್ಲೂ ಉತ್ಪಾದನಾ ಸೌಲಭ್ಯವನ್ನು ಸ್ಥಾಪಿಸಿದೆ. ಅಂತೆಯೇ ಫಾಕ್ಸ್‌ಕಾನ್ ಭಾರತದಲ್ಲಿ ಹೆಚ್ಚುವರಿ $500 ಮಿಲಿಯನ್ ಹೂಡಿಕೆ ಮಾಡಿದೆ.

ಒಂದೇವಿಧದಲ್ಲಿ ಮೊಬೈಲ್​ ಚಾರ್ಜಿಂಗ್​ ವ್ಯವಸ್ಥೆ

ಈ ಹಿಂದೆ ಮೊಬೈಲ್​ ಚಾರ್ಜರ್​ಗಳು ವಿಧವಿಧವಾಗಿ ಬರುತ್ತಿತ್ತು. ಆದರೆ ಮೂಂದಿನ ದಿನಗಳಲ್ಲಿ ಒಂದೇ ರೂಪದಲ್ಲಿ ಬರುವಂತೆ ತಂತ್ರಜ್ಞಾನ ಕಂಪನಿಗಳು ನಿರ್ಧರಿಸಿದೆ. ಈ ಬಗ್ಗೆ ಕೇಂದ್ರ ಅಂತರ ಸಚಿವಾಲಯದ ಕಾರ್ಯಪಡೆ ಒಮ್ಮತಕ್ಕೂ ಬಂದಿದೆ. ಈ ನಿಯಮವನ್ನು ವರ್ಷದ ಆರಂಭದಲ್ಲಿ ಯುರೋಪಿಯನ್ ಯೂನಿಯನ್ ಪರಿಚಯಿಸಿತ್ತು. ಇನ್ನು ಈ ಹೊಸ ನಿಯಮದ ಪ್ರಕಾರ ಆ್ಯಪಲ್​ನಂತಹ ಕಂಪನಿಗಳಿಗೆ ಸಾರ್ವತ್ರಿಕ ಚಾರ್ಜಿಂಗ್‌ಗೆ ಬದಲಾಗುವಂತೆ ತಿಳಿಸಲಾಗಿದೆ.