Jiomart Digital- ಸ್ಮಾರ್ಟ್​ಫೋನ್ ಕ್ಷೇತ್ರದ ಮೇಲೆ ಹಿಡಿತಕ್ಕೆ ರಿಲಾಯನ್ಸ್ ಮಾಸ್ಟರ್​ಪ್ಲಾನ್ ಇದು

ನವದೆಹಲಿ: ಐದು ವರ್ಷಗಳ ಹಿಂದೆ ಜಗತ್ತಿಗೆ ಕಾಲಿಟ್ಟ ರಿಲಾಯನ್ಸ್ ಜಿಯೋ ಈಗಾಗಲೇ ಸಾಕಷ್ಟು ಬೆಳವಣಿಗೆ ಕಂಡಿದೆ. ಟೆಲಿಕಾಂ ಕ್ಷೇತ್ರದಲ್ಲಿ ಪಾರಮ್ಯ ಮೆರೆಯುತ್ತಿದೆ. ಆದರೆ, ಇನ್ನೂ 2ಜಿ ನೆಟ್​ವರ್ಕ್​ನಲ್ಲೇ ಇರುವ ಕೋಟ್ಯಂತರ ಮಂದಿಯನ್ನ 4ಜಿ ನೆಟ್​ವರ್ಕ್​ಗೆ ಕರೆತರುವ ದೊಡ್ಡ ಪ್ರಯತ್ನದಲ್ಲಿದೆ. ಜಿಯೋ ಫೋನ್ ಮೂಲಕ ಆ ಕೆಲಸದಲ್ಲಿ ತಕ್ಕಮಟ್ಟಿಗೆ ಯಶಸ್ವಿಯೂ ಆಗುತ್ತಿದೆ. ಇದೀಗ ಸ್ಮಾರ್ಟ್​ಫೋನ್ ಕ್ಷೇತ್ರದಲ್ಲಿ ಸಂಚಲನ ಮೂಡಿಸಲು ಜಿಯೋ ಸಜ್ಜಾಗಿದೆ. ಅದರಲ್ಲೂ ಸ್ಮಾರ್ಟ್​ಫೋನ್​ನ ಆನ್​ಲೈನ್ ಮಾರುಕಟ್ಟೆಗೆ ಸೆಡ್ಡು ಹೊಡೆಯುವ ಮಾಸ್ಟರ್ ಪ್ಲಾನ್ ಮಾಡಿದೆ. ಅಮೇಜಾನ್, ಫ್ಲಿಪ್​ಕಾರ್ಟ್​ನಂಥ ದೈತ್ಯ ಇ-ಕಾಮರ್ಸ್ ಸಂಸ್ಥೆಗಳು ಆನ್​ಲೈನ್ ಎಲೆಕ್ಟ್ರಾನಿಕ್ ವ್ಯವಹಾರದಲ್ಲಿ ಹೊಂದಿರುವ ಪ್ರಾಬಲ್ಯವನ್ನು ಮುರಿಯಲು ರಿಲಾಯನ್ಸ್ ಕಸರತ್ತು ನಡೆಸುತ್ತಿದೆ. ಆ ನಿಟ್ಟಿನಲ್ಲಿ ರಿಲಾಯನ್ಸ್ ಜಿಯೋ ಫೋನ್ ನೆಕ್​ಸ್ಟ್ (Jio Phone Next) ಫೋನ್ ಒಂದು ಹೆಜ್ಜೆ.

ಗೂಗಲ್ ಸಂಸ್ಥೆಯ ಸಹಯೋಗದೊಂದಿಗೆ ಜಿಯೋ ಫೋನ್ ನೆಕ್​ಸ್ಟ್ ಫೋನನ್ನು ತಯಾರಿಸಲಾಗಿದೆ. ಇದು 5ಜಿ ನೆಟ್​ವರ್ಕ್ ಸಾಮರ್ಥ್ಯದ ಫೋನ್ ಆಗಿದ್ದು ಕಡಿಮೆ ಬೆಲೆಯಲ್ಲಿ ಲಭ್ಯ ಇರುತ್ತದೆ. ಈಗಾಗಲೇ ಜಿಯೋ ಫೋನ್ ಎಂಬ ಫೀಚರ್ ಫೋನ್ ತಯಾರಿಸಿ ಬಿಡುಗಡೆ ಮಾಡಲಾಗಿತ್ತು. ಈ ಜಿಯೋ ಫೋನ್ 10 ಕೋಟಿಗೂ ಹೆಚ್ಚು ಹ್ಯಾಂಡ್​ಸೆಟ್​ಗಳು ಮಾರಾಟವಾಗಿದ್ದವು. ಇದೀಗ ಜಿಯೋ ಫೋನ್ ನೆಕ್ಸ್​ಟ್ 30 ಕೋಟಿಯಷ್ಟು ಮಾರಾಟ ಮಾಡುವ ಗುರಿಯನ್ನ ಇಟ್ಟುಕೊಳ್ಳಲಾಗಿದೆ. ಇದೇ ಸೆಪ್ಟಂಬರ್​ನಲ್ಲಿ Jio Phone Next ಹೊರಬರಲಿದೆ. ಇದು ಟಚ್ ಸ್ಕ್ರೀನ್ ಆಗಿರಲಿದ್ದು, ಬಹುತೇತ ಆ್ಯಪ್​ಗಳನ್ನ ಸಪೋರ್ಟ್ ಮಾಡುತ್ತದೆ. ಭಾರತದಲ್ಲಿ ಈಗಲೂ 2ಜಿ ಹ್ಯಾಂಡ್​ಸೆಟ್ ಬಳಸುತ್ತಿರುವ 30 ಕೋಟಿ ಜನರಿದ್ದಾರೆ. ಇವರನ್ನೇ ಬಹುತೇಕವಾಗಿ ಟಾರ್ಗೆಟ್ ಮಾಡಿಕೊಳ್ಳಲಾಗಿದೆ ಎಂದು ದಿ ಕೆನ್ ಡಾಟ್ ಕಾಮ್ ವರದಿಯಲ್ಲಿ ತಿಳಿಸಲಾಗಿದೆ.

ರಿಲಾಯನ್ಸ್ ಸಂಸ್ಥೆ ಈಗಾಗಲೇ ಸ್ಮಾರ್ಟ್​ಫೋನ್ ಹಾಗೂ ಎಲೆಕ್ಟ್ರಾನಿಕ್ಸ್ ಉತ್ಪನ್ನಗಳ ಮಾರಾಟಕ್ಕೆ ಸಮರ್ಪಕವಾದ ಆಫ್​ಲೈನ್ ನೆಟ್​ವರ್ಕ್ ನಿರ್ಮಿಸುತ್ತಿದೆ. ದಿನೋಪಯೋಗಿ ವಸ್ತುಗಳನ್ನ ಮಾರಾಟ ಮಾಡಲು ದೇಶಾದ್ಯಂತ ವಿವಿಧ ಸ್ಥಳೀಯ ದಿನಸಿ ಅಂಗಡಿಗಳ ಸಹಭಾಗಿತ್ವದೊಂದಿಗೆ ಜಿಯೋ ಮಾರ್ಟ್ ಮಾಡಿ ಅಪಾರ ಯಶಸ್ಸು ಕಂಡ ರಿಲಾಯನ್ನ್ ಈಗ ಅದೇ ಪ್ರಯೋಗವನ್ನು ಎಲೆಕ್ಟ್ರಾನಿಕ್ ಮಳಿಗೆಯಲ್ಲೂ ಮಾಡಹೊರಟಿದೆ. ರಿಲಾಯನ್ಸ್​ನಿಂದ ಜಿಯೋಮಾರ್ಟ್ ಡಿಜಿಟಲ್ ಎಂಬ ಹೊಸ ವ್ಯವಹಾರ ಆರಂಭಗೊಳ್ಳಲಿದೆ.

ಇದನ್ನೂ ಓದಿ: ಪಾಲಿಸ್ಟರ್ ಫೈಬರ್ ಮರುಬಳಕೆ ಸಾಮರ್ಥ್ಯ ದುಪ್ಪಟ್ಟುಗೊಳಿಸಲು ಮುಂದಾದ ರಿಲಯನ್ಸ್: ಆಂಧ್ರದಲ್ಲಿ ಪಿಎಸ್ಎಫ್ ಘಟಕ ಸ್ಥಾಪನೆ

ಸ್ಮಾರ್ಟ್​ಫೋನ್ ಮಾರುಕಟ್ಟೆಯಲ್ಲಿ ಸಿಂಹಪಾಲು ಹೊಂದಿರುವುದು ಇ-ಕಾಮರ್ಸ್ ಕಂಪನಿಗಳೇ. ಭಾರತದಲ್ಲಿ ಮಾರಾಟವಾಗುವ ಸ್ಮಾರ್ಟ್​ಫೋನ್​ಗಳ ಪೈಕಿ ಶೆ. 30-40ರಷ್ಟು ಸ್ಮಾರ್ಟ್​​ಫೋನ್​ಗಳು ಅಮೇಜಾನ್ ಮತ್ತು ಫ್ಲಿಪ್​ಕಾರ್ಟ್ ಆ್ಯಪ್​ಗಳಲ್ಲೇ ಮಾರಾಟ ಆಗುತ್ತವೆ. ಆಫ್​ಲೈನ್ ಮಳಿಗೆಗಳಿಗಿಂತಲೂ ಆನ್​ಲೈನ್​ನಲ್ಲೇ ಹೆಚ್ಚು ಫೋನ್​ಗಳು ಮಾರಾಟವಾಗುತ್ತವೆ. ದೇಶಾದ್ಯಂತ ಇರುವ 500 ರಿಲಾಯನ್ಸ್ ಡಿಜಿಟಲ್ ಮಳಿಗೆಗಳಲ್ಲಿ ಮಾರಾಟ ಆಗಿರುವ ಸ್ಮಾರ್ಟ್​ಫೋನ್​ಗಳು ಕೇವಲ ಶೇ. 5 ಮಾತ್ರ. ಆ ಮಟ್ಟಕ್ಕೆ ಅಮೇಜಾನ್ ಮತ್ತು ಫ್ಲಿಪ್​ಕಾರ್ಟ್ ಸಂಸ್ಥೆಗಳು ಪಾರಮ್ಯ ಮೆರೆದಿವೆ. ದಿ ಕೆನ್ ಡಾಟ್ ಕಾಮ್ ವರದಿ ಪ್ರಕಾರ ಅಮೇಜಾನ್ ಮತ್ತು ಫ್ಲಿಪ್​ಕಾರ್ಟ್ ರೀತಿಯಲ್ಲೇ ಜಿಯೋದಿಂದ ಆನ್​ಲೈನ್ ಮಾರುಕಟ್ಟೆಸ್ಥಳ ಸೃಷ್ಟಿಯಾಗಲಿದೆಯಂತೆ. ಆ ನಿಟ್ಟಿನಲ್ಲಿ ರಿಲಾಯನ್ಸ್ ಕಾರ್ಯೋನ್ಮುಖವಾಗಿದೆ.

ರಿಲಾಯನ್ಸ್ ಸಂಸ್ಥೆ ತನ್ನ ಆಫ್​ಲೈನ್ ನೆಟ್​ವರ್ಕ್ ಅನ್ನು ಇನ್ನಷ್ಟು ಬಲಯುತಗೊಳಿಸುವುದರತ್ತ ಗಮನ ಹರಿಸುತ್ತಿದೆ. ರಿಲಾಯನ್ಸ್ ಸ್ಟೋರ್ಸ್​ಗಳನ್ನ ಎಲೆಕ್ಟ್ರಾನಿಕ್ ಉತ್ಪನ್ನಗಳ ಸಂಗ್ರಹ ಹಾಗು ವಿಲೇವಾರಿಗೆ ಬಳಸಿಕೊಳ್ಳುವ ಯೋಜನೆ ಇದೆ. ಈ ವಿಚಾರದಲ್ಲಿ ಬೇರೆ ಇ-ಕಾಮರ್ಸ್ ದೈತ್ಯ ಕಂಪನಿಗಳಿಗಿಂತ ರಿಲಾಯನ್ಸ್ ಮೇಲುಗೈ ಹೊಂದಿದೆ.

ಮಾಹಿತಿ ಕೃಪೆ: the-ken.com