IIT Madras ರೂಪಿಸಿದೆ ‘ಶಕ್ತಿಮಾನ್’ ಪ್ರೊಸೆಸರ್! ಏನಿದೆ ಇದರ ವಿಶೇಷತೆ?

ಚೆನ್ನೈ: ಭಾರತದ ಒಟ್ಟು 15  ಭಾರತೀಯ ತಂತ್ರಜ್ಞಾನ ಸಂಸ್ಥೆಗಳ  ಪೈಕಿಮೂರನೇ ಸ್ಥಾನದಲ್ಲಿರುವ ಐಐಟಿ ಮದ್ರಾಸ್ ಇತ್ತೀಚೆಗೆ ಸ್ಥಳೀಯ ಪ್ರೊಸೆಸರ್ ಒಂದನ್ನು ರೂಪಿಸಿದೆ.‌ ಈಗಾಗಲೇ ಅಸ್ತಿತ್ವದಲ್ಲಿರುವ ಪ್ರೊಸೆಸರ್ ಗಳಲ್ಲಿರುವ ಅನಾನುಕೂಲಗಳನ್ನು ಗಮನದಲ್ಲಿಟ್ಟುಕೊಂಡು ಅದನ್ನು ಸರಿದೂಗಿಸುವ ಪ್ರಯತ್ನದಲ್ಲಿ, ಐಐಟಿ ಮದ್ರಾಸ್ ತನ್ನದೇ ಆದ ‘ಶಕ್ತಿಮಾನ್‌’ ಪ್ರೊಸೆಸರ್ ನೊಂದಿಗೆ ಮಾರುಕಟ್ಟೆಗೆ (Market) ಕಾಲಿಡಲಿದೆ. ಇದು ಆರ್ಟಿಫೀಶಿಯಲ್ ಇಂಟೆಲಿಜೆನ್ಸ್ (AI) ಗಾಗಿ ರೂಪಿಸಲಾಗಿರುವ ಹಾರ್ಡ್ ವೇರ್ ಆಕ್ಸಲೇಟರ್ ಆಗಿದ್ದು, ಸ್ಥಳೀಯ ಮೈಕ್ರೊಪ್ರೊಸೆಸರ್ ಗಳ ಅಪ್ಲಿಕೇಶನ್‌ಗಳನ್ನು (Application) ಹಲವಾರು ಪಟ್ಟು ವೇಗವಾಗಿ ಚಲಾಯಿಸಲು ಅವಕಾಶ ನೀಡುತ್ತದೆ. ಆಬ್ಜೆಕ್ಟ್ ಡಿಟೆಕ್ಷನ್, ಸೆಲ್ಫ್ ಡ್ರೈವಿಂಗ್ ಕಾರ್‌ಗಳು ಮತ್ತು ಚಾಟ್ ಜಿಪಿಟಿ (Chat GPT) ಒಳಗೊಂಡಂತೆ ದೊಡ್ಡ ಮಾದರಿಗಳ ಆರ್ಟಿಫೀಶಿಯಲ್ ಇಂಟೆಲಿಜೆನ್ಸ್ ಅಪ್ಲಿಕೇಶನ್‌ಗಳಲ್ಲಿ ಇದನ್ನು ಬಳಸಬಹುದು.

“ಸದ್ಯದಲ್ಲಿ ನಮ್ಮಲ್ಲಿರುವ ಸಾಂಪ್ರದಾಯಿಕ ಕಂಪ್ಯೂಟರ್ ಗಳನ್ನು ಸರಳ ಹಾಗೂ ಸಾಮಾನ್ಯ ಬಳಕೆಗಾಗಿ ಮಾತ್ರವೇ ವಿನ್ಯಾಸಗೊಳಿಸಿರುವುದರಿಂದ ಅವುಗಳಲ್ಲಿ ಇತ್ತೀಚೆಗೆ ರೂಪಿಸಲಾಗುತ್ತಿರುವ AI ಅಪ್ಲಿಕೇಶನ್‌ಗಳನ್ನು ನಿರ್ವಹಿಸಲು ಸಾಧ್ಯವಿಲ್ಲ” ಎಂದು ಈಗಾಗಲೇ ಸಂಶೋಧಕರು ಹೇಳಿದ್ದಾರೆ.

ಮಾತ್ರವಲ್ಲದೆ, AI ಗಳು ಹೆಚ್ಚಿನ ವಿದ್ಯುತ್ ಅನ್ನು ಬಳಸುತ್ತದೆ. ಈಗ, IIT-M ನಲ್ಲಿನ ಸಂಶೋಧಕರು ಶಕ್ತಿಮಾನ್‌ನೊಂದಿಗೆ ( MAAN - multiply and Accumulate Network) ಶಕ್ತಿ ಮೈಕ್ರೊಪ್ರೊಸೆಸರ್ ಅನ್ನು ಬಳಸಿಕೊಂಡು ನೂತನ ಮಾದರಿಯ ಕಂಪ್ಯೂಟರ್ ಅನ್ನು ಸಹ ನಿರ್ಮಿಸುತ್ತಿದ್ದಾರೆ.

ಶಕ್ತಿ ನೀಡಲಿರುವ ಶಕ್ತಿಮಾನ್

• ಆಬ್ಜೆಕ್ಟ್ ಡಿಟೆಕ್ಷನ್, ಸೆಲ್ಫ್ ಡ್ರೈವಿಂಗ್ ಕಾರ್‌ಗಳು ಮತ್ತು ಚಾಟ್ ಜಿಪಿಟಿ ಒಳಗೊಂಡಂತೆ ದೊಡ್ಡ ಮಾದರಿಗಳ ಆರ್ಟಿಫೀಶಿಯಲ್ ಇಂಟೆಲಿಜೆನ್ಸ್ ಅಪ್ಲಿಕೇಶನ್‌ಗಳಲ್ಲಿ ಇದನ್ನು ಬಳಸಬಹುದು.


• ಇದು ಕಡಿಮೆ ವಿದ್ಯುತ್ ಅನ್ನು ಬಳಸುತ್ತದೆ


• ಚಿಪ್ ವಿನ್ಯಾಸವನ್ನು ಮರುಸಂರಚಿಸಬಹುದು


• ಹಾರ್ಡ್ ವೇರ್ ಸಿದ್ಧವಾಗಿದ್ದು, ಸಾಫ್ಟ್ ವೇರ್ ಅಭಿವೃದ್ಧಿ ಪ್ರಗತಿಯಲ್ಲಿದೆ.

“ಶಕ್ತಿಮಾನ್ ಪ್ರೊಸೆಸರ್ ಸಣ್ಣ ಸಂಸ್ಕರಣಾ ಅಂಶಗಳ ಒಂದು ಶ್ರೇಣಿ. ಈ ಮುಖ್ಯ ಪ್ರೊಸೆಸರ್ ಇತರ ಅಂಶಗಳಿಗೆ ಕಾರ್ಯವನ್ನು ನಿಯೋಜಿಸುತ್ತದೆ. ಇದು ನಿಯೋಜಿಸಲಾದ ಕಾರ್ಯಗಳನ್ನು ಏಕಕಾಲದಲ್ಲಿ ಹೆಚ್ಚು ವೇಗವಾಗಿ ಪೂರ್ಣಗೊಳಿಸುತ್ತದೆ” ಎಂದು ಐಐಟಿ-ಎಂ ನಿರ್ದೇಶಕ ವಿ ಕಾಮಕೋಟಿ ಹೇಳಿದ್ದಾರೆ.

ಇವರು ಈ ಹಿಂದೆ ಸ್ಥಳೀಯ ಮೈಕ್ರೊಪ್ರೊಸೆಸರ್ ‘ಶಕ್ತಿ’ ಯನ್ನು ಅಭಿವೃದ್ಧಿಪಡಿಸಿದ ತಂಡದ ಮುಖ್ಯಸ್ಥರಾಗಿದ್ದರು. "ಈ ಪ್ರೊಸೆಸರ್, ಮಾನವನ ಮೆದುಳಿನ ಕಾರ್ಯವೈಖರಿಯನ್ನು ಸ್ವಲ್ಪಮಟ್ಟಿಗೆ ಹೋಲುತ್ತದೆ. ಆದರೆ, ಇದು ಸೂಪರ್ ಕಂಪ್ಯೂಟರ್ ಅಲ್ಲ,” ಎಂದು ಸ್ಪಷ್ಟನೆ ನೀಡಿದ್ದಾರೆ.

"ಇದು ಆಳವಾದ ಕಲಿಕೆಯ ಆಲ್ಗಾರಿದಂಗಳನ್ನು ಪರಿಣಾಮಕಾರಿಯಾಗಿ ಕಾರ್ಯಗತಗೊಳಿಸಲು ವಿನ್ಯಾಸಗೊಳಿಸಲಾದ Google ನ ಟೆನ್ಸರ್ ಪ್ರೊಸೆಸಿಂಗ್ ಯುನಿಟ್ (TPU) ಅನ್ನು ಹೋಲುತ್ತದೆ.

ಈ ಪ್ರೊಸೆಸರ್ ಕಡಿಮೆ ವಿದ್ಯುತ್ ಅನ್ನು ಬಳಸಿಯೂ ಸಹ ವೇಗವಾಗಿ ಕಾರ್ಯ ನಿರ್ವಹಿಸುತ್ತದೆ. ಸದ್ಯದ ಪರಿಸ್ಥಿತಿಯಲ್ಲಿ AI ಅಪ್ಲಿಕೇಶನ್‌ಗಳ ಸುಪ್ತತೆ ಮತ್ತು ವಿದ್ಯುತ್ ಅವಶ್ಯಕತೆಗಳನ್ನು ಪೂರೈಸುವ ಹೊಸ ಮಾದರಿಯ ಕಂಪ್ಯೂಟರ್‌ಗಳನ್ನು ಅಭಿವೃದ್ಧಿಪಡಿಸುವುದು ಅತ್ಯಗತ್ಯವಾಗಿದೆ. ಹಾರ್ಡ್‌ವೇರ್ ಈಗಾಗಲೇ ಸಿದ್ಧವಾಗಿದ್ದು ಸಾಫ್ಟ್‌ವೇರ್‌ನ ಕೆಲಸ ನಡೆಯುತ್ತಿದೆ. ”ಎಂದು ಸಂಶೋಧನಾ ವಿದ್ಯಾರ್ಥಿ ಹೇಮಂತ್ ಕುಮಾರ್ ತಿಳಿಸಿದ್ದಾರೆ.

ಇದನ್ನೂ ಓದಿ: Layoff ಆದ್ರೂ ಶೇಕಡ 30ರಷ್ಟು ಜಾಸ್ತಿ ಸಂಬಳದ ಕೆಲಸ ಗಿಟ್ಟಿಸಿಕೊಂಡ ಅಮೆಜಾನ್‌ ಎಂಜಿನಿಯರ್!

ಸಾಫ್ಟ್‌ವೇರ್ ಸಿದ್ಧವಾದ ನಂತರ ಆಕ್ಸಲರೇಟರ್ ಅನ್ನು ಆಬ್ಜೆಕ್ಟ್ ಡಿಟೆಕ್ಷನ್‌ನಲ್ಲಿ ಪರೀಕ್ಷಿಸಲು ಸಂಶೋಧಕರ ತಂಡವು ಯೋಚಿಸುತ್ತಿದೆ. “ನಾವು ಹೆಚ್ಚು ಮರುಸಂರಚಿಸುವ ShakiMAAN ಅನ್ನು ನಿರ್ಮಿಸಿದ್ದೇವೆ ಮತ್ತು ಪರಿಶೀಲನೆಯನ್ನು ಸಹ ಮಾಡಿದ್ದೇವೆ. ಚಿಕ್ಕ ಶಕ್ತಿಮಾನ್‌ನೊಂದಿಗೆ ಶಕ್ತಿ-ಶಕ್ತಿಮಾನ್ ವ್ಯವಸ್ಥೆಯಲ್ಲಿ 50 ಪಟ್ಟು ಹೆಚ್ಚು ವೇಗ ಸಾಧ್ಯವಿದೆ. ಸ್ಥಳೀಯ AI ಕಂಪ್ಯೂಟರ್ ಅನ್ನು ಅರಿತುಕೊಳ್ಳಲು ಇದೊಂದು ಮಹತ್ವದ ಹಂತ,” ಎಂದು ಸಹ ಅವರು ಹೇಳಿದ್ದಾರೆ.

ಈ ಯೋಜನೆಯು ಈಗಾಗಲೇ ಸಾವಿರಾರು ವಿದ್ಯಾರ್ಥಿಗಳನ್ನು ಆಕರ್ಷಿಸುತ್ತಿದ್ದು, ಈ ತಂಡವು ಇನ್ನಷ್ಟು ದೊಡ್ಡದಾಗುವ ಸಾಧ್ಯತೆಯಿದೆ. ಹೆಚ್ಚಿನ ವಿದ್ಯಾರ್ಥಿಗಳು ಈ ತಂಡಕ್ಕೆ ಜೊತೆಯಾಗಲು ಉತ್ಸಾಹ ತೋರುತ್ತಿದ್ದಾರೆ.