Google: ನಿಯಮ ಉಲ್ಲಂಘಿಸಿದ ಗೂಗಲ್​ಗೆ ಭಾರೀ ದಂಡ

ಟೆಕ್ ಮಾರುಕಟ್ಟೆಯಲ್ಲಿ (Tech Market) ಭಾರೀ ಮುಂಚೂಣಿಯಲ್ಲಿರುವ ಕಂಪೆನಿಯೆಂದರೆ ಅದು ಗೂಗಲ್​. ಈ ಕಂಪೆನಿ ಟೆಕ್ನಾಲಜಿಯಲ್ಲಿ ತನ್ನದೇ ಒಂದು ಪ್ರಾಬಲ್ಯತೆಯನ್ನು ಪಡೆದುಕೊಂಡಿದೆ. ಆದರೆ ಇತ್ತೀಚೆಗೆ ಗೂಗಲ್ (Google)​ ತನ್ನ ಟೆಕ್ ಮಾರುಕಟ್ಟೆಯಲ್ಲಿರುವ ಪ್ರಾಬಲ್ಯವನ್ನು ದುರುಪಯೋಗ ಮಾಡುತ್ತಿದೆ ಎಂಬ ಸುದ್ದಿಗಳು ಹರಿದಾಡುತ್ತಿದೆ. ಇನ್ನು  ಗೂಗಲ್​ ಆಂಡ್ರಾಯ್ಡ್​ ಮಾರುಕಟ್ಟೆಯಲ್ಲಿ (Android) ತನಗಿರುವ ಸ್ಥಾನವನ್ನೇ ಗುರಿಯಾಗಿಸಿಕೊಂಡು ಸ್ಪರ್ಧಾತ್ಮಕ ಯುಗದಲ್ಲಿ ಸಮಸ್ಯೆಯನ್ನುಂಟು ಮಾಡುತ್ತಿದೆ ಎಂಬ ಆರೋಪದಡಿಯಲ್ಲಿ ಭಾರತೀಯ ಸ್ಪರ್ಧಾ ಆಯೋಗ (Compitition Commission Of India) ಗೂಗಲ್​ಗೆ ದಂಡ ವಿಧಿಸಿತ್ತು. ಇದೀಗ ಈ ದಂಡವನ್ನು ಟೆಕ್​ ದೈತ್ಯ ಗೂಗಲ್​ ಸಂಪೂರ್ಣವಾಗಿ ಪಾವತಿಸಿದೆ.

ಹೌದು, ಗೂಗಲ್​ ಟೆಕ್ ಮಾರುಕಟ್ಟೆಯಲ್ಲಿ ತನ್ನ ಪ್ರಾಬಲ್ಯವನ್ನು ದುರುಪಯೋಗ ಮಾಡುತ್ತಿದೆ ಎಂಬ ಸುದ್ದಿಗಳು ಕೇಳಿ ಬರುತ್ತಲೇ ಇದೆ. ಅದೇ ಕಾರಣಕ್ಕೆ ಇತ್ತೀಚೆಗೆ ಗೂಗಲ್​ಗೆ ಸಿಸಿಐ 1,337.76 ಕೋಟಿ ರೂಪಾಯಿ ದಂಡ ವಿಧಿಸಿತ್ತು. ಇದೀಗ ಆ ಮೊತ್ತವನ್ನು ಗೂಗಲ್ ಸಂಪೂರ್ಣವಾಗಿ ಪಾವತಿಸಿದೆ.

ಭಾರತೀಯ ಕಂಪೆನಿಯಿಂದ ವಿಧಿಸಿದ ದಂಡ

ಇನ್ನು ಭಾರತೀಯ ಆಡಳಿತ ಪ್ರಾಧಿಕಾರದ ಆದೇಶಕ್ಕೆ ತಕ್ಕಂತೆ ಜಾಗತಿಕವಾಗಿ ಭಾರೀ ಮುನ್ನಡೆಯಲ್ಲಿದ್ದ ಟೆಕ್​ ಕಂಪೆನಿ ಇದರ ಆದೇಶವನ್ನು ಒಪ್ಪಿ ದಂಡ ಪಾವತಿಸಿದ್ದು ಇದೇ ಮೊದಲು ಎಂದು ಕೆಲವರದಿಗಳು ಹೇಳಿವೆ. ಹಾಗೆಯೇ ಈ ಪ್ರಕರಣ ಭಾರತದ ಡಿಜಿಟಲ್ ಇಂಡಿಯಾದ ಅಭಿವೃದ್ಧಿಗೆ ಒಂದು ಹೊಸ ಮಾದರಿಯಾಗಿ ರೂಪುಗೊಳ್ಳಬಹುದು. ಇನ್ಮುಂದೆ ಭಾರತದಲ್ಲಿ ಡಿಜಿಟಲ್​ ನಿಯಮಗಳನ್ನು ಸ್ಥಾಪಿಸುವಾಗ ಈ ರೀತಿಯ ಕ್ರಮಗಳು ಬಹಳಷ್ಟು ಸಹಕಾರಿಯಾಗಬಹುದು ಎಂದು ಹೇಳಲಾಗಿದೆ.

ಇದನ್ನೂ ಓದಿ: ಕಾರಿನಲ್ಲಿ ಎಸಿ ಬಳಸಿದ್ರೆ ನಿಜವಾಗ್ಲೂ ಪೆಟ್ರೋಲ್​ ಖಾಲಿಯಾಗುತ್ತಾ?

ಗೂಗಲ್​ಗೆ ಇಷ್ಟು ದೊಡ್ಡ ಮೊತ್ತದಲ್ಲಿ ದಂಡ ವಿಧಿಸಿದ್ದು ಏಕೆ?

ಗೂಗಲ್ ಕಂಪೆನಿ ಭಾರೀ ಹಿಂದಿನಿಂದಳು ಟೆಕ್ ಮಾರುಕಟ್ಟೆಯಲ್ಲಿ ಪ್ರಾಬಲ್ಯತೆಯನ್ನು ಗುರುತಿಸಿಕೊಂಡು ಬಂದಿದೆ. ಅದರಲ್ಲೂ ಸ್ಮಾರ್ಟ್​​ಫೋನ್​ ಮಾರುಕಟ್ಟೆಯಲ್ಲಿ ಒಂದಲ್ಲ ಒಮದು ಕಾರಣಕ್ಕೆ ಪ್ರಸಿದ್ಧಿಯನ್ನು ಪಡೆದಿದೆ. ಸ್ಮಾರ್ಟ್​​ಫೋನ್​ಗಳಲ್ಲಿ ಐಫೋನ್​​ಗಳು ಬಿಟ್ಟರೆ ಹೆಚ್ಚಾ ಆಂಡ್ರಾಯ್ಡ್​ ಸ್ಮಾರ್ಟ್​ಫೋನ್​ಗಳೇ ಇದೆ. ಈ ಆಂಡ್ರಾಯ್ಡ್​ ಡಿವೈಸ್​ಗಳಲ್ಲಿ ಗೂಗಲ್​ ತನ್ನ ಅಸ್ತಿತ್ವವನ್ನು ಉಳಿಸಿಕೊಂಡು ಬಂದಿದೆ. ಆದರೆ ಇದನ್ನೇ ಬಲಪಡಿಸಿಕೊಂಡ ಗೂಗಲ್​ ಇತ್ತೀಚೆಗೆ ತನ್ನ ಪ್ರಾಬಲ್ಯತೆಯನ್ನು ದುರುಪಯೋಗ ಪಡಿಸಿಕೊಳ್ಳುತ್ತಿದೆ ಎಂಬ ದೂರುಗಳು ಕೇಳಿಬರುತ್ತಿದೆ.

ಗೂಗಲ್​

ಅಂದರೆ, ಆಂಡ್ರಾಯ್ಡ್​ ಫೋನ್​ಗಳಲ್ಲಿ ಗೂಗಲ್ ಅಪ್ಲಿಕೇಶನ್​ಗಳು ಈಗಾಗಲೇ ಪ್ರೀಇನ್​ಸ್ಟಾಲ್​​ ಆಗಿರುತ್ತದೆ. ಅದೇ ರೀತಿ ಗೂಗಲ್​ ಪ್ಲೇ ಸ್ಟೋರ್​ನಲ್ಲೂ ಕೆಲವೊಂದು ಆ್ಯಪ್​ಗಳ ಮೇಲೆ ತಾರತಮ್ಯವನ್ನು ಮಾಡುತ್ತಿದೆ ಎಂಬ ದೂರುಗಳು ಕೇಳಿಬರುತ್ತಿದೆ. ಅಂದರೆ ಯಾವ ಆ್ಯಪ್​ ಕಂಪನಿಗಳು ಗೂಗಲ್​ಗೆ ಹಣ ಪಾವತಿಸಿರುತ್ತದೆಯೇ ಆ ಆ್ಯಪ್​ಗಳನ್ನು ಮಾತ್ರ ಬಳಕೆದಾರರಿಗೆ ಪ್ಲೇ ಸ್ಟೋರ್​ನಲ್ಲಿ ಕಾಣುವಂತೆ ಮಾಡುತ್ತದೆ. ಇದೇ ಕಾರಣವನ್ನು ಎತ್ತಿಹಿಡಿದು ಕಾಂಪಿಟೇಷನ್ ಕಮಿಷನ್ ಆಫ್ ಇಂಡಿಯಾ ಗೂಗಲ್​ ಅನ್ನು ಆರೋಪಿಯನ್ನಾಗಿ ಮಾಡಿದೆ. ಇದಕ್ಕಾಗಿ 2022ರ ಅಕ್ಟೋಬರ್ 20ರಂದು ಗೂಗಲ್​ಗೆ 1,337.76 ಕೋಟಿ ರೂ ದಂಡ ಕಟ್ಟುವಂತೆ ಆದೇಶಿಸಿತು.

ದಂಡ ವಿಧಿಸಿದ ಬಗ್ಗೆ ವಿರೋಧ ವ್ಯಕ್ತ ಪಡಿಸಿದ ಗೂಗಲ್​

ಇನ್ನು ಕಾಂಪಿಟೇಷನ್​ ಕಮಿಷನ್ ಆಫ್​ ಇಂಡಿಯಾ ಗೂಗಲ್​ಗೆ ವಿಧಿಸಿದ ದಂಡವನ್ನು ನೋಡಿದ ತಕ್ಷಣ, ಗೂಗಲ್​ ಈ ದೂರಿನಲ್ಲಿ ಯಾವುದೇ ಸಾಕ್ಷಿಗಳಿಲ್ಲ. ಟೆಕ್​ ಯುಗದಲ್ಲಿ ಇತರೆ ಕಂಪನಿಗಳ ಬೆಳವಣಿಗೆ ಧಕ್ಕೆ ತರುವಂತಹ ಕೆಲಸ ನಾವೇನು ಮಾಡಿಲ್ಲ. ಯೂರೋಪ್​ನ ಪ್ರಕರಣವೊಂದರಲ್ಲಿ ನೀಡಿದ್ದ ವಿಷಯವನ್ನೇ ಕಾಪಿ ಮಾಡಿ ನಮಗೆ ಆದೇಶವನ್ನು ನೀಡಿದೆ ಎಂದು ಹೇಳಿ ಗೂಗಲ್ ಇದನ್ನು ತೀವ್ರವಾಗಿ ವಿರೋಧಿಸಿತ್ತು. ಆದರೆ ಸಿಸಿಐ ನೀಡಿದ ಆದೇಶವನ್ನು ಎನ್​ಸಿಎಲ್​ಎಟಿ (Company Law Appellate Tribunal) ಸಹ ಒಪ್ಪಿಕೊಂಡು 30 ದಿನದೊಳಗೆ ದಂಡ ಪಾವತಿಸುವಂತೆ 2023 ಮಾರ್ಚ್ 31ರಂದು ಗೂಗಲ್​ಗೆ ತಿಳಿಸಿತು. ಅದೇ ರೀತಿಯಂತೆ ಗೂಗಲ್ ನಂತರ ಕಂಪನಿಗೆ ದಂಡವನ್ನು ಪಾವತಿಸಿದೆ.