ಹಿಂದೂಸ್ಥಾನ್ ಪೆಟ್ರೋಲಿಯಂ ಜತೆಗೆ ಕೈ ಜೋಡಿಸಿದ ಅಮೆಜಾನ್ ಇಂಡಿಯಾ; ಇನ್ಮುಂದೆ ಗ್ಯಾಸ್ ಸಿಲಿಂಡರ್ ಬುಕ್ ಮಾಡುವುದು ಮತ್ತಷ್ಟು ಸುಲಭ

ಇ ಕಾಮರ್ಸ್​ ತಾಣವಾದ ಅಮೆಜಾನ್​ ಇಂಡಿಯಾ ಇದೀಗ ಹಿಂದೂಸ್ಥಾನ್​ ಪೆಟ್ರೋಲಿಯಂ ಕಾರ್ಪೊರೇಶನ್​ ಲಿಮಿಟೆಡ್​ ಜೊತೆಗೆ ಕೈಜೋಡಿಸಿಕೊಂಡಿದ್ದು, ಗ್ರಾಹಕರಿಗೆ ಹೆಚ್​ಪಿ ಗ್ಯಾಸ್​ ಸಿಲಿಂಡರ್​ ಅನ್ನು ಮರುಪೂರಣ ಮಾಡಲು ಮುಂದಾಗಿದೆ. ಅಮೆಜಾನ್​ ವೆಬ್​ಸೈಟ್​ ಮತ್ತು ಆ್ಯಪ್​ಗೆ ತೆರಳುವ ಮೂಲಕ ಅಮೆಜಾನ್​ ಪೇ ಟ್ಯಾಬ್​ನಲ್ಲಿ ಗ್ಯಾಸ್​ ಸಿಲಿಂಡರ್​ ಬುಕ್​ ಮಾಡುವ ಆಯ್ಕೆಯನ್ನು ನೀಡಿದೆ. ಯುಪಿಐ, ಡೆಬಿಟ್​ಕಾರ್ಡ್​, ಕ್ರೆಡಿಟ್​ ಕಾರ್ಡ್​ ಹಾಗೂ ನೆಟ್​ಬ್ಯಾಂಕಿಂಗ್​ ಪಾವತಿ ಮೂಲಕ ಸಿಲಿಂಡರ್​ ಖರೀದಿಸಬಹುದಾಗಿದೆ.

ಅಮೆಜಾನ್​ ಪೇ ಸಿಇಒ ಮಹೇಂದ್ರ ನೆರೂರ್​ಕರ್​​ ಈ ಬಗ್ಗೆ ಮಾತನಾಡಿದ್ದು, ‘ನಮ್ಮ ಗ್ರಾಹಕರಿಗೆ ಡಿಜಿಟಲ್​ ಪಾವತಿ ಮಾಡುವ ಮೂಲಕ ಸಿಲಿಂಡರ್​ ಬುಕ್​ ಮಾಡುವ ಅವಕಾಶವನ್ನು ಮತ್ತು ಹೊಸ ಅನುಭವನ್ನು ನೀಡುತ್ತಿದ್ದೇವೆ. ಹೆಚ್ಚಿನ ಗ್ರಾಹಕರು ಹೆಚ್​ಪಿ ಸಿಲಿಂಡರ್​ಗಾಗಿ ನಗದು ಪಾವತಿ ಮಾಡಲು ಬಯಸುತ್ತಾರೆ. ಆದರೆ ಹಿಂದೂಸ್ಥಾನ್​​ ಪೆಟ್ರೋಲಿಯಂ ಕಾರ್ಪೊರೇಶನ್​ ಲಿಮಿಟೆಡ್​ ಜೊತೆಗೆ ನಾವು ಸಹಭಾಗಿತ್ವವನ್ನು ಹೊಂದಿದ್ದು, ಹೆಚ್​ಪಿ ಗ್ಯಾಸ್​​ ಅನ್ನು ಆನ್​ಲೈನ್ ಮೂಲಕ ಬುಕ್ಕಿಂಗ್​ ಮಾಡಿ ಖರೀದಿಸುವ ಅವಕಾಶವನ್ನು ನೀಡುತ್ತಿದ್ದೇವೆ. ಇದರಿಂದ ಲಕ್ಷಾಂತರ ಗ್ರಾಹಕರಿಗೆ ಪ್ರಯೋಜನ ಸಿಗಲಿದೆ ಎಂದರು.

ಇನ್ನು ಧ್ವನಿ ಮೂಲಕ ಅಲೆಕ್ಸಾದಲ್ಲೂ ಗ್ಯಾಸ್​​ ಬುಕ್​ ಮಾಡಬಹುದಾಗಿದೆ. ಅಷ್ಟು ಮಾತ್ರವಲ್ಲದೆ, ಅಮೆಜಾನ್​ ಎಕೋ, ಫೈರ್​ ಟಿವಿ ಸ್ಟಿಕ್​ ಮೂಲಕವು ಖರೀದಿಸಬಹುದಾಗಿದೆ. ಅಮೆಜಾನ್​​ ಪೇ ಮೂಲಕ ಹೆಚ್​ಪಿ ಗ್ಯಾಸ್​ ನಂಬರ್​/ ಎಲ್​ಪಿಜಿ ಐಡಿ ಲಿಂಕ್​ ನಮೂದಿಸಿ ಗ್ಯಾಸ್​ ಕಾಯ್ದಿರಿಸುವ ಅವಕಾಶ ಮಾಡಿಕೊಟ್ಟಿದೆ.

ಗ್ರಾಹಕರು ಅಮೆಜಾನ್​​ ಪೇ ಮೂಲಕ ಸಿಲಿಂಡರ್​ ಬುಕ್​ ಮಾಡುವಾಗ ಮತ್ತು ಪಾವತಿಸುವಾಗ 50 ರೂ. ಕ್ಯಾಶ್​ಬ್ಯಾಕ್​ ಪಡೆಯಬಹುದಾಗಿದೆ ಎಂದು ಅಮೆಜಾಣ್​ ತಿಳಿಸಿದೆ.