Bengaluru: ಆಟೋ ಹತ್ತಿದಾಕೆಯ ಮಗಳನ್ನೇ ಪಟಾಯಿಸಿದ, ಸೂಸೈಡ್​ ನಾಟಕ ಮಾಡಿದ ಯುವತಿ ಸಾವು!

ಬೆಂಗಳೂರು: ಆಟೋ ಡ್ರೈವರ್ (Auto Driver)​ ಜೊತೆಗೆ ಪ್ರೀತಿಗೆ ಬಿದ್ದಿದ್ದ ಮಗಳಿಗೆ ಪೋಷಕರು ಬುದ್ಧಿಮಾತು ಹೇಳಲು ಮುಂದಾಗಿದ್ದರು. ಆದರೆ ಈ ವೇಳೆ ಆತ್ಮಹತ್ಯೆ ಮಾಡಿಕೊಳ್ಳುವ ನಾಟಕ ಮಾಡಿದ್ದ ಯುವತಿ, ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿರುವ ಘಟನೆ ಬೆಂಗಳೂರು ನಗರದ (Bengaluru) ಹೆಚ್​​ಎಎಲ್​​ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ (HAL Police Station) ನಡೆದಿದೆ. ಮೃತ ಯುವತಿಯನ್ನು ಲಾವಣ್ಯ ಎಂದು ಗುರುತಿಸಲಾಗಿದ್ದು, ತನ್ನ ಪ್ರೀತಿಯನ್ನು (Love) ಸಾಬೀತು ಪಡಿಸಲು ಮುಂದಾಗಿ ವಿಷ ಸೇವನೆ ಮಾಡಿದ್ದ ಯುವತಿ ಸಾವು ಬದುಕಿನ ನಡುವಿನ ಹೋರಾಟದಲ್ಲಿ ಕೊನೆಯುಸಿರೆಳೆದಿದ್ದಾಳೆ.

ಏನಿದು ಪ್ರಕರಣ?

ಹೆಚ್​ಎಎಲ್ ಪೊಲೀಸ್​ ಠಾಣಾ ವ್ಯಾಪ್ತಿಯಲ್ಲಿ ವಾಸಿಸುತ್ತಿದ್ದ ಚಂದ್ರಮ್ಮ ಎಂಬಾಕೆಗೆ ಸಹಾಯ ಮಾಡುವ ನೆಪದಲ್ಲಿ ಆಟೋ ಡ್ರೈವರ್​ ನವೀನ್​ ಪರಿಚಯವಾಗಿದ್ದನಂತೆ. ಆ ಬಳಿಕ ಮಹಿಳೆಯನ್ನು ಕೆಲಸದ ಸ್ಥಳದಿಂದ ಮನೆಗೆ ಪಿಕ್​ಅಪ್​ ಮತ್ತು ಡ್ರಾಪ್​ ಮಾಡುವ ಕೆಲಸ ಮಾಡುತ್ತಿದ್ದನಂತೆ. ಈ ನಡುವೆ ಚಂದ್ರಮ್ಮ ಪುತ್ರಿಯಾದ ಲಾವಣ್ಯ ಪರಿಚಯ ನವೀನ್​ಗೆ ಆಗಿತ್ತು. ಕೆಲಸ ಸಮಯದ ಬಳಿಕ ಇಬ್ಬರ ನಡುವಿನ ಪರಿಚಯ ಪ್ರೀತಿಗೆ ತಿರುಗಿತ್ತು ಎನ್ನಲಾಗಿದೆ.

ಸಾಂದರ್ಭಿಕ ಚಿತ್ರ

ಇದನ್ನೂ ಓದಿ: Car Accident: ಮೊನ್ನೆ ಬೈಕ್, ಇಂದು ಕಾರು! ಬಾನೆಟ್‌ ಮೇಲೆ ಹತ್ತಿದ ಯುವಕನನ್ನು 1 ಕಿಮೀ ಎಳೆದೊಯ್ದ ಮಹಿಳೆ!

ಯಾರು ಇಲ್ಲದ ವೇಳೆ ಯುವತಿಯನ್ನ ಕರೆದುಕೊಂಡು ಹೋಗಿದ್ದ ಆರೋಪಿ

ಇತ್ತ ಪ್ರತಿದಿನ ಆಟೋ ಹತ್ತುತ್ತಿದ್ದ ಮಹಿಳೆಯ ಮಗಳನ್ನೇ ಪಟಾಯಿಸಿದ ನವೀನ್​​, ಜನವರಿ 12ರಂದು ಮನೆಯಲ್ಲಿ ಯಾರು ಇಲ್ಲದ ವೇಳೆ ಲಾವಣ್ಯನನ್ನ ಹೊರಗಡೆ ಕರೆದುಕೊಂಡು ಹೋಗಿದ್ದನಂತೆ. ಈ ಮಾಹಿತಿ ಕುಟುಂಬಸ್ಥರಿಗೆ ಸಿಕ್ಕಿ ಯುವತಿಗೆ ಬುದ್ಧಿ ಮಾತು ಹೇಳಿದ್ದರಂತೆ. ಅಲ್ಲದೇ ನವೀನ್​​ಗೆ ವಿರುದ್ಧ ಪೊಲೀಸ್ ಕಂಪ್ಲೆಂಟ್ ಕೊಡ್ತೀನಿ ಎಂದು ಎಚ್ಚರಿಕೆ ನೀಡಿದ್ದರಂತೆ.

ಆದರೆ, ಪೊಲೀಸರಿಗೆ ದೂರು ನೀಡುತ್ತೀನಿ ಎಂದ ಕೂಡಲೇ ತನ್ನ ಪ್ರೀತಿಯನ್ನು ಸಾಬೀತು ಪಡಿಸಿಕೊಳ್ಳಲು ಮುಂದಾದ ಯುವತಿ, ಆತ್ಮಹತ್ಯೆ ಮಾಡಿಕೊಳ್ಳುತ್ತೇನೆ ಎಂದು ಪೋಷಕರನ್ನು ಹೆದರಿಸಲು ಮುಂದಾಗಿ ಮಾತ್ರೆಯೊಂದನ್ನು ಸೇವನೆ ಮಾಡಿದ್ದಳಂತೆ. ಸ್ವತಃ ನವೀನ್​​ ಈ ಮಾತ್ರೆಯನ್ನು ಯುವತಿಗೆ ನೀಡಿ ನಿಮ್ಮ ಮನೆಯವರು ಏನಾದರೂ ಮಾತನಾಡಿದರೆ ವಿಷ ತಿಂತೀನಿ ಅಂತ ಹೆದರಿಸಲು ಮಾತ್ರೆ ನೀಡಿದ್ದನಂತೆ.

ಸಾವು ಬದುಕಿನ ಹೋರಾಟದಲ್ಲಿ ಕೊನೆಯುಸಿರೆಳೆದ ಯುವತಿ

ನವೀನ್​ ಕೊಟ್ಟ ಮಾತ್ರೆ ಸೇವಿಸಿದ್ದ ಯುವತಿ ಕೆಲ ಸಮಯದಲ್ಲೇ ಕುಸಿದು ಬಿದ್ದಿದ್ದು, ಕೂಡಲೇ ಪೋಷಕರು ಆಕೆಯನ್ನು ಆಸ್ಪತ್ರೆಗೆ ದಾಖಲು ಮಾಡಿ ಚಿಕಿತ್ಸೆ ಕೊಡಿಸಿದ್ದಾರೆ. ಆದರೆ ಆಸ್ಪತ್ರೆಯಲ್ಲಿ ಸಾವು ಬದುಕಿನ ಹೋರಾಟ ನಡೆಸಿದ್ದ ಯುವತಿ ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿದ್ದಾಳೆ.

ಇದನ್ನೂ ಓದಿ: Vijayapura: ಚುನಾವಣಾ ಹೊಸ್ತಿಲಲ್ಲಿ ಜೆಡಿಎಸ್​ಗೆ ಭಾರೀ ಆಘಾತ; ಪಂಚರತ್ನ ಯಾತ್ರೆಯಲ್ಲಿ ಭಾಗಿಯಾಗಿದ್ದ ಅಭ್ಯರ್ಥಿ ಸಾವು

ಯುವತಿ ಸಾವನ್ನಪ್ಪುತ್ತಿದ್ದಂತೆ ಆರೋಪಿ ನವೀನ್ ನಾಪತ್ತೆ

ಸದ್ಯ ಆಟೋ ಡ್ರೈವರ್ ನವೀನ್​ ವಿರುದ್ಧ ಯುವತಿ ಪೋಷಕರು ದೂರು ನೀಡಿದ್ದು, ಕೊಲೆಗೆ ಪ್ರಚೋದನೆ ನೀಡಿದ ಆರೋಪದ ಮೇರೆಗೆ ದೂರು ದಾಖಲಿಸಿದ್ದಾರೆ. ಇನ್ನು, ಆಸ್ಪತ್ರೆಯಲ್ಲಿ ಯುವತಿ ಚಿಕಿತ್ಸೆ ಪಡೆಯುತ್ತಿದ್ದ ವೇಳೆ ನವೀನ್​​ನನ್ನು ಠಾಣೆಗೆ ಕರೆತಂದು ವಿಚಾರಣೆ ಮಾಡಿದ್ದ ಪೊಲೀಸರು, ಮತ್ತೆ ಹೇಳಿದಾಗ ಬರಬೇಕು ಎಂದು ಸೂಚನೆ ನೀಡಿ ಕಳುಹಿಸಿದ್ದರಂತೆ.

ಆದರೆ ಯುವತಿ ಆಸ್ಪತ್ರೆಯಲ್ಲಿ ಸಾವನ್ನಪ್ಪುತ್ತಿದ್ದಂತೆ ಆರೋಪಿ ನವೀನ್​ ನಾಪತ್ತೆಯಾಗಿದ್ದಾನೆ. ಮೃತ ಲಾವಣ್ಯ ತಾಯಿ ನೀಡಿರುವ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಂಡಿರುವ ಹೆಚ್​ಎಎಲ್ ಠಾಣೆ ಪೊಲೀಸರು ಆರೋಪಿಗಾಗಿ ಹುಡುಕಾಟ ನಡೆಸಿದ್ದಾರೆ.