2013ರಲ್ಲಿ ಬಿಜೆಪಿಗೆ ಯಾವ ಸ್ಥಿತಿ ಬಂತೋ ಅದೇ ಪರಿಸ್ಥಿತಿ 2023ರಲ್ಲಿ ರಿಪೀಟ್ ಆಗಲಿದೆ; ಮಾಜಿ ಸಚಿವ ರಾಮಲಿಂಗಾರೆಡ್ಡಿ 

ದೇವನಹಳ್ಳಿ:  ರಾಜ್ಯ ಕಾಂಗ್ರೆಸ್  ಮುಖಂಡರ ಮಹತ್ವದ ಸಭೆ ಸಾದಹಳ್ಳಿಯ ಕ್ಲಾರ್ಕ್  ಎಕ್ಸೋಟಿಕಾ ರೆಸಾರ್ಟ್  ನಲ್ಲಿ ನಡೆಯುತ್ತಿದ್ದು, ಸಭೆಯಲ್ಲಿ ಭಾಗವಹಿಸಲು ಆಗಮಿಸಿದ್ದ  ಮಾಜಿ ಸಚಿವ ರಾಮಲಿಂಗಾರೆಡ್ಡಿ ಬಿಜೆಪಿ ಒಳ ಜಗಳದ ಬಗ್ಗೆ ಪ್ರತಿಕ್ರಿಯೆ  ನೀಡುತ್ತಾ, 2013 ರಲ್ಲಿ ಬಿಜೆಪಿ  ಪಕ್ಷಕ್ಕೆ  ಯಾವ ಸ್ಥಿತಿ  ಬಂದಿತ್ತೊ ಅದೇ ಪರಿಸ್ಥಿತಿ 2023 ರಲ್ಲಿ ರಿಪೀಟ್  ಆಗಲಿದೆ ಎಂದು ಭವಿಷ್ಯ ನುಡಿದರು.

ಬಿಜೆಪಿ  ಬಣ ರಾಜಕೀಯದ ಬಗ್ಗೆ  ಮಾತನಾಡಿದ ರಾಮಲಿಂಗಾರೆಡ್ಡಿ, ನಮ್ಮಲ್ಲೂ‌ ಸಣ್ಣಪುಟ್ಟ ಭಿನ್ನಾಬಿಪ್ರಾಯಗಳಿವೆ. ಆದರೆ ನಮಗಿಂತ ಅವರಲ್ಲೇ  ಹೆಚ್ಚು ಭಿನ್ನಾಭಿಪ್ರಾಯಗಳಿವೆ. ಯಡಿಯೂರಪ್ಪ ಅವರನ್ನು ಅಧಿಕಾರದಿಂದ ಕೆಳಗೆ ಇಳಿಸುವ ಪ್ರಯತ್ನ ಬಿಜೆಪಿ  ಪಕ್ಷದಲ್ಲಿಯೇ  ನಡೆಯುತ್ತಿದೆ. ಬಿಜೆಪಿ ಹೀಗೇ ಇರೋದಿಲ್ಲ. ಬಣ ರಾಜಕೀಯದಿಂದ 2013 ರಲ್ಲಿ ಬಿಜೆಪಿಗೆ ಯಾವ ಸ್ಥಿತಿ ಬಂತೊ ಅದೇ ಸ್ಥಿತಿ ಮುಂದಿನ ಚುನಾವಣೆಯಲ್ಲಿ ನಿರ್ಮಾಣ ಆಗುತ್ತೆ. 2023 ರ ಚುನಾವಣೆಯಲ್ಲಿ  ರಿಪೀಟ್ ಆಗಲಿದೆ. ಆಗ ಯಡಿಯೂರಪ್ಪ ಒಂದು, ಶ್ರೀರಾಮುಲು ಒಂದೊಂದು ಪಕ್ಷ ಕಟ್ಟಿಕೊಂಡರು. ಅದೇ ರೀತಿಯಲ್ಲಿ ಮುಂದೆ ಬಿಜೆಪಿಯಲ್ಲಿ ಆಗುತ್ತೆ. ಬೇರೆ ಬೇರೆ ಕಾರಣಗಳಿಂದ ಬಿಜೆಪಿಯಲ್ಲಿ ಶಾಸಕರು ಇರಲ್ಲ. ಅದಕ್ಕೆ ನಾವು ಈಗಿನಿಂದಲೇ ಸಿದ್ದತೆ ನಡೆಸಿದ್ದು, 2023 ರ ಚುನಾವಣೆ ಟಾರ್ಗೆಟ್ ಮಾಡುತ್ತಿದ್ದೇವೆ ಎಂದರು.

ಇದನ್ನು ಓದಿ: ಸಿ.ಪಿ. ಯೋಗೇಶ್ವರ್​ಗೆ ಮಂತ್ರಿಸ್ಥಾನ ನಿಶ್ಚಿತ; ಅಚ್ಚರಿ ಹುಟ್ಟಿಸಿದ ಸಿಎಂ ಯಡಿಯೂರಪ್ಪ ಹೇಳಿಕೆ

ಐದಾರು ತಿಂಗಳಿಂದ ಕಾಂಗ್ರೆಸ್  ಪಕ್ಷದ ಸಭೆ ಮಾಡಿಲ್ಲ. ಕೊರೋನಾ ಮತ್ತು ಚುನಾವಣೆ ಇತ್ತು. ಹಾಗಾಗಿ ಸಭೆ ಮಾಡಲು ಆಗಲಿಲ್ಲ. ಈಗ ಪಕ್ಷದ  ಅಧ್ಯಕ್ಷರು ಸಭೆ ಕರೆದಿದ್ದಾರೆ.  ಇವತ್ತಿನ ಸಭೆಯಲ್ಲಿ ಪ್ರಸ್ತುತ ವಿದ್ಯಮಾನಗಳ ಬಗ್ಗೆ ಚರ್ಚೆ ಮಾಡುತ್ತೇವೆ. ಇತ್ತೀಚಿನ ಚುನಾವಣೆಗಳಲ್ಲಿ ನಮಗೆ ಸೋಲಾಗಿದೆ. ಜನರ ಅಭಿಪ್ರಾಯ ರೂಲಿಂಗ್ ಪಕ್ಷದ ಕಡೇ ಇರುತ್ತೆ.  ಚುನಾವಣೆಯಲ್ಲಿ ಬಿಜೆಪಿ ಪಕ್ಷದವರು ವಿಪರೀತ ಹಣ ಖರ್ಚು ಮಾಡಿದರು. ಇನ್ನೂ ವಿಧಾನಸಭೆ ಚುನಾವಣೆಗೆ ಎರಡೂವರೆ ವರ್ಷ ಇದೆ.  ಸಭೆಯಲ್ಲಿ ಅದರ ಬಗ್ಗೆ ಮಾತಾಡ್ತೀವಿ  ಎಂದು ತಿಳಿಸಿದರು.