Dope Test: ಡೋಪ್ ಟೆಸ್ಟ್ ಎಂದರೇನು?; ದೇಹದಲ್ಲಿರುವ ಡ್ರಗ್ಸ್​ ಪತ್ತೆ ಹಚ್ಚುವುದು ಹೇಗೆ?; ಇಲ್ಲಿದೆ ಪೂರ್ತಿ ಮಾಹಿತಿ

Dope Test Meaning: ಮಾದಕ ವಸ್ತುಗಳ ಪತ್ತೆಗೆ ಮಾಡೋ ಪರೀಕ್ಷೆ ಏನು? ಅದರಿಂದಾಗಿ ನಿಜಕ್ಕೂ ಎಲ್ಲಾ ವಿಚಾರಗಳು ತಿಳಿಯುತ್ತವಾ? ಎಷ್ಟು ದಿನಗಳವರೆಗೆ ರಕ್ತದಲ್ಲಿ ಮಾದಕ ವಸ್ತುಗಳ ಕಣಗಳು ಇರುತ್ತವೆ? ಅವೆಲ್ಲವನ್ನೂ ಯಾವಾಗ ಬೇಕಾದರೂ ಪರೀಕ್ಷಿಸಿ ಪತ್ತೆ ಹಚ್ಚಬಹುದಾ? ಇಲ್ಲಿದೆ ಪೂರ್ತಿ ಮಾಹಿತಿ...

news18-kannada
Updated:September 11, 2020, 1:38 PM IST
Dope Test: ಡೋಪ್ ಟೆಸ್ಟ್ ಎಂದರೇನು?; ದೇಹದಲ್ಲಿರುವ ಡ್ರಗ್ಸ್​ ಪತ್ತೆ ಹಚ್ಚುವುದು ಹೇಗೆ?; ಇಲ್ಲಿದೆ ಪೂರ್ತಿ ಮಾಹಿತಿ
ಸಾಂದರ್ಭಿಕ ಚಿತ್ರ
  • Share this:
ಬೆಂಗಳೂರು (ಸೆ. 11): ಸದ್ಯ ದೇಶದಲ್ಲೇ ಸಂಚಲನ ಮೂಡಿಸಿರುವ ಡ್ರಗ್ಸ್ ಜಾಲದಲ್ಲಿ ಆಗಾಗ ಕೇಳಿಬರುತ್ತಿರುವ ಪದ ಡೋಪ್ ಟೆಸ್ಟ್​ನದ್ದು. ಆರೋಪಿಗಳ ಬ್ಲಡ್ ಸ್ಯಾಂಪಲ್ ತೆಗೆದುಕೊಂಡರು, ರಿಪೋರ್ಟ್ ಬರ್ಬೇಕು, ಯೂರಿನ್ ಸ್ಯಾಂಪಲ್ ತೆಗೆದುಕೊಂಡರು ಎನ್ನುವ ಮಾತುಗಳನ್ನು ಕೇಳ್ತಾನೇ ಇರ್ತೀವಿ. ಹಾಗಾದರೆ, ಮಾದಕ ವಸ್ತುಗಳ ಪತ್ತೆಗೆ ಮಾಡೋ ಪರೀಕ್ಷೆ ಏನು? ಅದರಿಂದಾಗಿ ನಿಜಕ್ಕೂ ಎಲ್ಲಾ ವಿಚಾರಗಳು ತಿಳಿಯುತ್ತವಾ? ಎಷ್ಟು ದಿನಗಳವರೆಗೆ ರಕ್ತದಲ್ಲಿ ಮಾದಕ ವಸ್ತುಗಳ ಕಣಗಳು ಇರುತ್ತವೆ? ಅವೆಲ್ಲವನ್ನೂ ಯಾವಾಗ ಬೇಕಾದರೂ ಪರೀಕ್ಷಿಸಿ ಪತ್ತೆ ಹಚ್ಚಬಹುದಾ? ಡೋಪ್ ಟೆಸ್ಟ್ ಬಗ್ಗೆ ಇಲ್ಲಿದೆ ಪೂರ್ತಿ ಮಾಹಿತಿ...

ಪ್ರತಿಯೊಂದು ಮಾದಕ ವಸ್ತುವೂ ವ್ಯಕ್ತಿಗಳ ದೇಹದ ಮೇಲೆ ಬೇರೆ ಬೇರೆಯಾಗಿ ಪ್ರತಿಕ್ರಿಯಿಸುತ್ತವೆ. ವ್ಯಕ್ತಿಯ ವಯಸ್ಸು, ದೇಹದ ತೂಕ, ಜೀರ್ಣಕ್ರಿಯೆಯ ಶಕ್ತಿ ಮುಂತಾದವುಗಳ ಮೇಲೆ ಇವು ಅವಲಂಬಿತ. ಸಾಮಾನ್ಯವಾಗಿ ವ್ಯಕ್ತಿ ಮಾದಕ ವಸ್ತುಗಳನ್ನು ಬಳಕೆ ಮಾಡುತ್ತಿದ್ದರಾ ಇಲ್ಲವಾ ಎನ್ನುವುದನ್ನು ಈ ಪರೀಕ್ಷೆಗಳಿಂದ ಬಹುತೇಕ ತಿಳಿಯಬಹುದು. ಆದರೆ ಅನೇಕ ಸಂದರ್ಭದಲ್ಲಿ ತಿಳಿಯದೆಯೂ ಹೋಗುವ ಸಾಧ್ಯತೆ ಇರುತ್ತದೆ.

ವ್ಯಕ್ತಿ ಮಾದಕ ವ್ಯಸನಿಯಾಗಿದ್ದರೆ ಈ ಪರೀಕ್ಷೆಗಳಿಂದ ಗುರುತಿಸಬಹುದು. ಯಾಕೆಂದರೆ ವ್ಯಸನಿಗಳು ನಿಯಮಿತವಾಗಿ ಮಾದಕ ವಸ್ತುಗಳ ಸೇವನೆ ಮಾಡುತ್ತಾರೆ. ಆದರೆ ಕೆಲವರು ಅಪರೂಪಕ್ಕೆ ಮಾತ್ರ ಈ ವಸ್ತುಗಳ ಬಳಕೆ ಮಾಡ್ತಾರೆ. ಅಂಥಾ ಪ್ರಕರಣಗಳಲ್ಲಿ ಕೆಲವು ಬಾರಿ ಪರೀಕ್ಷೆಗಳು ಸರಿಯಾದ ರಿಸಲ್ಟ್ ನೀಡದೇ ಇರಬಹುದು.‌ ಪರೀಕ್ಷೆಗಳಿಗಾಗಿ ರಕ್ತ ಮತ್ತು ಯೂರಿನ್ ಸ್ಯಾಂಪಲ್ ಪಡೆಯಲಾಗುತ್ತದೆ.‌ ಹೆರಾಯಿನ್, ಕೊಕೇನ್, ಟ್ರೆಮೆಡಾಲ್, ಕೆನಬಿಸ್, ಬುಪ್ರೆನಾರ್ಫೀನ್, ಕೊಡೇನ್ ಮತ್ತು ಬೆನ್ಜೋಡಯಾಜೆಪೈನ್ ಗಳನ್ನು ಪತ್ತೆಹಚ್ಚಲು ಸಾಮಾನ್ಯವಾಗಿ ರಕ್ತ ಮತ್ತು ಯೂರಿನ್ ಸ್ಯಾಂಪಲ್ ಪಡೆಯಲಾಗುತ್ತದೆ.

ಇದನ್ನೂ ಓದಿ: Ragini Dwivedi: ಸ್ಯಾಂಡಲ್​ವುಡ್​ ಡ್ರಗ್​ ಪ್ರಕರಣ; ನಟಿ ರಾಗಿಣಿ ದ್ವಿವೇದಿಗೆ ಇಂದು ಜೈಲಾ? ಜಾಮೀನಾ?

ಕೆನಬಿಸ್ ಬಹುಕಾಲದವರಗೆ ರಕ್ತದಲ್ಲಿ ಇರುತ್ತದೆ.‌ ಅತೀ ಹೆಚ್ಚು ಬಳಕೆಯಾಗುವ ಡ್ರಗ್ ಇದೇ ಆದ್ದರಿಂದ ರಕ್ತದ ಸ್ಯಾಂಪಲ್ ಟೆಸ್ಟಿಂಗ್ ನಲ್ಲಿ ಕೆನಬಿಸ್ ಪತ್ತೆಯಾಗುತ್ತದೆ. ನಿಯಮಿತವಾಗಿ ಬಳಸದೆ, ಕೆಲ ದಿನಗಳ ಹಿಂದೆ ಅಪರೂಪಕ್ಕೆ ಪಾರ್ಟಿಗಳಲ್ಲಿ ಮಾತ್ರ ಸೇವನೆ ಮಾಡಿದ್ದರೂ ಟೆಸ್ಟ್ ರಿಸಲ್ಟ್ ಪಾಸಿಟಿವ್ ಬರುತ್ತದೆ. ಅದೇ ನಿಯಮಿತವಾಗಿ ಹೆರಾಯಿನ್ ಬಳಸುವ ವ್ಯಕ್ತಿ ಕೇವಲ ಮೂರ್ನಾಲ್ಕು ದಿನಗಳಿಂದ ತೆಗೆದುಕೊಳ್ಳದೇ ಇದ್ದರೂ ಸ್ಯಾಂಪಲ್ ರಿಸಲ್ಟ್ ನೆಗೆಟಿವ್ ಬರಬಹುದು. ಹಾಗಾಗಿ ವ್ಯಕ್ತಿಯ ಜೊತೆಗೆ ಯಾವೆಲ್ಲಾ ಮಾದಕ ವಸ್ತುಗಳು ಸಿಕ್ಕವು ಎನ್ನುವುದರ ಮಾಹಿತಿ ಬಹಳ ಮುಖ್ಯ. ದೇಹ ಮಾದಕ ವಸ್ತುಗಳನ್ನು ಆದಷ್ಟು ಬೇಗ ದೇಹದಿಂದ ಹೊರಹಾಕಲು ಪ್ರಯತ್ನಿಸುತ್ತದೆ.‌ ವ್ಯಕ್ತಿಯ ದೇಹದ ಮೆಟಬಾಲಿಸಂ (ಜೀರ್ಣಕ್ರಿಯೆ) ಉತ್ತಮವಾಗಿದ್ದರೆ ಬೇಗನೆ ದೇಹದಿಂದ ಹೊರಹೋಗುತ್ತದೆ.

ದೇಹದ ಕೊಬ್ಬಿನ ಕಣಗಳು ಅಥವಾ ಅಡಿಪೋಸ್ ಟಿಶ್ಶುಗಳಲ್ಲಿ ಮಾದಕ ದ್ರವ್ಯದ ಕಣಗಳು ಇರುತ್ತವೆ. ವ್ಯಕ್ತಿಯ ಮಾನಸಿಕ ಕ್ಷಮತೆ ಮೇಲೆ ಕೂಡ ಈ ಮಾದಕ ದ್ರವ್ಯಗಳು ದೇಹದ ಮೇಲೆ ಉಂಟುಮಾಡುವ ಪರಿಣಾಮವನ್ನು ನಿರ್ಧರಿಸುತ್ತವೆ.‌ ಆದ್ದರಿಂದಲೇ ಇವುಗಳನ್ನು ಸೈಕೋಆಕ್ಟಿವ್ ಡ್ರಗ್ಸ್ ಎಂದೂ ಕರೆಯುತ್ತಾರೆ. ಕೇವಲ ರಕ್ತ ಮತ್ತು ಯೂರಿನ್ ಸ್ಯಾಂಪಲ್ ಅಲ್ಲದೆ ಎಂಜಲು, ಬೆವರು ಮತ್ತು ಕೂದಲಿನಿಂದಲೂ ಡೋಪ್ ಟೆಸ್ಟ್ ಸಾಧ್ಯವಿದೆ. ಗ್ಯಾಸ್ ಕ್ರೊಮ್ಯಾಟೋಗ್ರಫಿ ಮತ್ತು ಮಾಸ್ ಸ್ಪೆಕ್ಟ್ರೊಫೊಟೊಮೆಟ್ರಿ (GC-MS) ಎನ್ನುವ ಸಂಕೀರ್ಣ ವಿಧಾನಗಳನ್ನು ಈ ಪರೀಕ್ಷೆಗಳಲ್ಲಿ ಬಳಸಲಾಗುತ್ತದೆ. ಈ ವಿಧಾನಗಳ ಬಳಕೆಯಿಂದ ರಿಸಲ್ಟ್ ಬರಲು 3 ರಿಂದ 8 ದಿನಗಳಷ್ಟು ಸಮಯ ತೆಗೆದುಕೊಳ್ಳಬಹುದು.
ಹೆರಾಯಿನ್​ನಂತಹ ಮಾದಕ ದ್ರವ್ಯಗಳು 6 ಗಂಟೆಗಳಿಂದ 2 ದಿನಗಳವರೆಗೂ ದೇಹದಲ್ಲಿದ್ದು, ಪತ್ತೆ ಹಚ್ಚಬಹುದಾಗಿದೆ. ರೆಗ್ಯುಲರ್ ಆಗಿ ಡ್ರಗ್ಸ್ ಬಳಸುವವರು ಅಂದರೆ ವ್ಯಸನಿಗಳ ದೇಹದಲ್ಲಿ ನಿಯಮಿತವಾಗಿ ದ್ರವ್ಯಗಳು ಹೋಗುತ್ತಲೇ ಇರುವುದರಿಂದ ಅವು ವರ್ಷಗಟ್ಟಲೆ ರಕ್ತದೊಳಗೆ ಸೇರಿ ಪತ್ತೆಯಾಗುತ್ತವೆ.
Published by: Sushma Chakre
First published: September 11, 2020, 1:33 PM IST
ಮತ್ತಷ್ಟು ಓದಿರಿ
ಮುಂದಿನ ಸುದ್ದಿ

Top Stories

corona virus btn
corona virus btn
Loading