ಬೈಗುಳವನ್ನೂ ಮಹಿಳೆಯರು ಖುಷಿಯಿಂದ ಸ್ವೀಕರಿಸುವ ವಿಶಿಷ್ಟ ಸಂಪ್ರದಾಯ ಎಲ್ಲಿದೆ ಗೊತ್ತಾ?

ಈ ಗಂಡಸರ ಗುಂಪು ಆಯ್ದ ಮನೆಗಳ ಮುಂದೆ ಹೋಗಿ ನಿಂತು ಅಲ್ಲಿ ಅಡ್ಡಲಾಗಿ ಹಾಕಲಾಗಿರುವ ಬಂಬೂಗೆ ಕಟ್ಟಿಗೆಯಿಂದ ಹೊಡೆಯುತ್ತಾರೆ. ಅಲ್ಲದೇ, ತಮ್ಮ ಬಂಜಾರಾ ಭಾಷೆಯಲ್ಲಿ ಆ ಮನೆಯ ಮಹಿಳೆಯನ್ನು ಅಸಭ್ಯ ಪದ ಬಳಸಿ ಬಯ್ಯತ್ತಾರೆ. ಹೀಗೆ ಬೈಯ್ಯಿಸಿಕೊಳ್ಳುವವರು ಕೋಪಗೊಳ್ಳದೆ ಖುಷಿಯಿಂದ ಅದನ್ನು ಸ್ವೀಕರಿಸುತ್ತಾರೆ. 

ತಾಂಡಾದ ಮಹಿಳೆಯರು.

ತಾಂಡಾದ ಮಹಿಳೆಯರು.

  • Share this:
ವಿಜಯಪುರ; ಬೈಗುಳ ಕೇಳಿದರೆ ಸಾಕು, ಜನ ಜಗಳಕ್ಕೆ ಮುಂದಾಗುತ್ತಾರೆ. ಇನ್ನು ಇದು ವಿಕೋಪಕ್ಕೆ ತಿರುಗಿದರೆ ಜಗಳ ಕೊಲೆಯಲ್ಲಿ ಅಂತ್ಯಗೊಂಡ ಹಲವು ಉದಾಹರಣೆಗಳು ನಮ್ಮ ಮುಂದಿವೆ. ಆದರೆ, ಇಲ್ಲಿ ಮಾತ್ರ ಬೈಗಳ ಬೈಯ್ಯುವವರು ಮತ್ತು ಬೈಯ್ಯಿಸಿಕೊಳ್ಳುವವರು ಇಬ್ಬರೂ ಸಂತೋಷ ಪಡುವ ಆಚರಣೆಯೊಂದು ಬಸವನಾಡು ವಿಜಯಪುರ ಜಿಲ್ಲೆಯ ಎಲ್ಲ ಲಂಬಾಣಿ ತಾಂಡಾಗಳಲ್ಲಿ ತಲೆತಲಾಂತರಗಳಿಂದ ಆಚರಣೆಯಲ್ಲಿದೆ.

ಹೋಳಿ ಹಬ್ಬ ಎಂದರೆ ಸಾಕು ಎಲ್ಲ ಕಡೆಗಳಲ್ಲಿ ಬಣ್ಣದಾಟ ಸಾಮಾನ್ಯ. ಆದರೆ, ಇಲ್ಲಿನ ಲಂಬಾಣಿ ತಾಂಡಾಗಳಲ್ಲಿ ಗಂಡಸರು ಹೊಸ ಬಟ್ಟೆ ತೊಟ್ಟು ಇಡೀ ತಾಂಡಾಗಳಲ್ಲಿ ಗುಂಪುಗುಂಪಾಗಿ ಸಂಚರಿಸಿ ಹಾಡು ಹೇಳುತ್ತ ಸಾಮೂಹಿಕ ನೃತ್ಯ ಮಾಡುತ್ತಾರೆ.  ಇವರು ಹೀಗೆ ನೃತ್ಯ ಮಾಡುವುದರ ಹಿಂದೆಯೂ ಒಂದು ಸಂಪ್ರದಾಯವಿದೆ. ತಮ್ಮಲ್ಲಿ ಸಹೋದರತ್ವ, ಸಹಜೀವನ ಉತ್ತಮವಾಗಿರಲಿ ಎಂಬುದು ಇದರ ಉದ್ದೇಶವಾಗಿದೆ.  ಹೀಗೆ ಗುಂಪುಗುಂಪಾಗಿ ತಂಡಗಳಲ್ಲಿ ಸಂಚರಿಸುವ ಇವರು ಅಲ್ಲಲ್ಲಿ ನಿಂತು ಹಾಡು ಹೇಳುತ್ತ ನೃತ್ಯ ಮಾಡುತ್ತಾರೆ. ಇದು ನಮ್ಮ ಸಂಪ್ರದಾಯವಾಗಿದೆ ಎನ್ನುತ್ತಾರೆ ವಿಜಯಪುರ ಜಿಲ್ಲೆಯ ಅರಕೇರಿ ಲಂಬಾಣಿ ತಾಂಡಾ ಸಂಖ್ಯೆ-3ರ ಯುವಕ ಪ್ರಕಾಶ ಗಂಗಾರಾಮ ರಾಠೋಡ.

ತಾಂಡಾದ ಪುರುಷರಿಂದ ಸಾಮೂಹಿಕ ನೃತ್ಯ.


ಇದೇ ಸಂದರ್ಭಗಲ್ಲಿ ಈ ಗಂಡಸರ ಗುಂಪು ಆಯ್ದ ಮನೆಗಳ ಮುಂದೆ ಹೋಗಿ ನಿಂತು ಅಲ್ಲಿ ಅಡ್ಡಲಾಗಿ ಹಾಕಲಾಗಿರುವ ಬಂಬೂಗೆ ಕಟ್ಟಿಗೆಯಿಂದ ಹೊಡೆಯುತ್ತಾರೆ. ಅಲ್ಲದೇ, ತಮ್ಮ ಬಂಜಾರಾ ಭಾಷೆಯಲ್ಲಿ ಆ ಮನೆಯ ಮಹಿಳೆಯನ್ನು ಅಸಭ್ಯ ಪದ ಬಳಸಿ ಬಯ್ಯತ್ತಾರೆ. ಹೀಗೆ ಬೈಯ್ಯಿಸಿಕೊಳ್ಳುವವರು ಕೋಪಗೊಳ್ಳದೆ ಖುಷಿಯಿಂದ ಅದನ್ನು ಸ್ವೀಕರಿಸುತ್ತಾರೆ.

ಗಂಡು ಮಗುವನ್ನು ಪರಿಚಯಿಸುತ್ತಿರುವುದು.


ಪ್ರತಿವರ್ಷ ಹೋಳಿ ಹುಣ್ಣಿಮೆಯ ಮೊದಲು ಜನಿಸುವ ಗಂಡು ಮಗುವಿನ ಮನೆಯ ಮುಂದೆ ಹೋಗಿ ಇವರು ಹೀಗೆ ಗುಂಪು ಗುಂಪಾಗಿ ಬೈಗುಳದ ಹಾಡು ಹೇಳುವ ಮೂಲಕ ಅತ್ತಿಗೆಯನ್ನು ಕೀಟಲೆ ಮಾಡುತ್ತಾರೆ. ಈ ಮೂಲಕ ಆ ಮನೆಯಲ್ಲಿ ಹೋಳಿ ಹುಣ್ಣಿಮೆಗಿಂತಲೂ ಮೊದಲು ಜನಿಸಿದ ಮಗುವನ್ನು ನಾಮಕರಣದ ಮೂಲಕ ಸಮಾಜಕ್ಕೆ ಪರಿಚಯಿಸುತ್ತಾರೆ ಎನ್ನುತ್ತಾರೆ ವಿಜಯಪುರ ಜಿಲ್ಲಾ ಪಂಚಾಯಿತಿ ಮಾಜಿ ಅಧ್ಯಕ್ಷ ಮತ್ತು ಬಂಜಾರಾ ಸಮಾಜದ ಮುಖಂಡ ಅರ್ಜುನ ಹೀರು ರಾಠೋಡ.

ಇದನ್ನು ಓದಿ: ಕುಸಿದ ನಿರ್ಮಾಣ ಹಂತದ ರೈಲ್ವೇ ಮೇಲ್ಸೇತುವೆ: ಜನರ ಪ್ರಾಣ ಉಳಿಸಿದ ಕೊರೋನಾ ಭೀತಿ

ಈ ಹೋಳಿ ಹುಣ್ಮಿಮೆಯ ಮರುದಿನ ಮಗು ಜನಿಸಿದರೂ ಅದನ್ನು ಮುಂದಿನ ಹೋಳಿ ಹುಣ್ಣಿಮೆಯ ದಿನ ನಾಮಕರಣ ಮಾಡಿ ಸಮಾಜಕ್ಕೆ ಪರಿಚಯಿಸುವುದು ಈ ಲಂಬಾಣಿ ಸಂಪ್ರದಾಯಗಳಲ್ಲಿ ಒಂದು.  ಹೀಗಾಗಿ ಈ ಒಂದು ದಿನ ಪುರುಷರು ಬಂದು ತಮ್ಮ ಮನೆಯ ಮುಂದೆ ನಿಂತು ಅಶ್ಲೀಲವಾಗಿ ಬೈದರೂ ಅದಕ್ಕೆ ಮಾನ್ಯತೆ ಇದೆ ಎನ್ನುತ್ತಾರೆ ಲಂಬಾಣಿ ಮಹಿಳೆ ಜಯಲತಾ ರಾಠೋಡ. ಹೋಳಿ ಹುಣ್ಣಿಮೆ ಎಂದರೆ ಬಣ್ಣಗಳ ಹಬ್ಬ ಎಂದು ರಂಗು ರಂಗೀನ ಚಿತ್ತಾರದಲ್ಲಿ ಜನತೆ ಮುಳುಗಿದರೆ, ಈ ತಾಂಡಾಗಳಲ್ಲಿ ಮಾತ್ರ ಗಂಡು ಮಗುವನ್ನು ಸಮಾಜಕ್ಕೆ ಪರಿಚಯಿಸುವ ಮತ್ತು ಗಂಡು ಮಕ್ಕಳು, ಯುವಕರು ಮತ್ತು ಪುರುಷರು ಹೊಸ ಬಟ್ಟೆ ತೊಟ್ಟು ಸಾಮೂಹಿಕವಾಗಿ ಹೋಳಿ ಆಚರಿಸುವುದು ಶ್ಲಾಘನೀಯವಾಗಿದೆ.
First published: