ಶೌಚಾಲಯದ ರೂಪ ತಾಳಲಿದೆ ಕೆಎಸ್​ಆರ್​ಟಿಸಿ ಬಸ್​; ಮೆಜೆಸ್ಟಿಕ್​ನಲ್ಲಿ ಶೀಘ್ರವೇ ವಿಶೇಷ ‘ಸ್ತ್ರೀ ಟಾಯ್ಲೆಟ್​’

ಬೆಂಗಳೂರು (ಮಾ.11): ವಾಹನ ಹಳೆಯದಾದಂತೆ ಅವನ್ನು ಬೇರೆಯವರಿಗೆ ಮಾರುತ್ತೇವೆ. ಇನ್ನು, ವಾಹನ ಬಳಕೆಗೆ ಅಸಮರ್ಥ ಎಂದೆನಿಸಿದರೆ ಅವುಗಳನ್ನು ಗುಜರಿಗೆ ಹಾಕುತ್ತೇವೆ. ಆದರೆ, ಕೆಎಸ್​ಆರ್​ಟಿಸಿ ಬಳಕೆಯಲ್ಲಿರದ ಹಳೆಯ ಬಸ್ಅನ್ನು ಮೊಬೈಲ್​​ ಟಾಯ್ಲೆಟ್​ ಆಗಿ ಮಾರ್ಪಾಡು ಮಾಡಲು ನಿರ್ಧರಿಸಿದೆ.

ಬಸ್​ಸ್ಟ್ಯಾಂಡ್​ಗಳಲ್ಲಿ, ಕೆಲ ಸಾರ್ವಜನಿಕ ಪ್ರದೇಶಗಳಲ್ಲಿ ಶೌಚಾಲಯವಿಲ್ಲದೆ ಮಹಿಳೆಯರು ಪರದಾಡುವ ಪರಿಸ್ಥಿತಿ ಇರುತ್ತದೆ. ಹೀಗಾಗಿ ಮಹಿಳೆಯರಿಗೆ ಸಹಕಾರಿಯಾಗುವ ನಿಟ್ಟಿನಲ್ಲಿ ಬಳಕೆಯಿಲ್ಲದ ಕೆಎಸ್​ಆರ್​ಟಿಸಿ ಬಸ್​ಅನ್ನು ಟಾಯ್ಲೆಟ್​ ರೀತಿ ಬದಲಿಸಲು ನಿರ್ಧರಿಸಲಾಗಿದೆ.

ಪುಣೆಯ ಖಾಸಗಿ ಸಂಸ್ಥೆಯೊಂದು ಮೊಬೈಲ್​ ಟಾಯ್ಲೆಟ್​ ನಿರ್ಮಾಣ ಮಾಡುವ ಕಾರ್ಯದಲ್ಲಿ ತೊಡಗಿದೆ. ಈ ಸಂಸ್ಥೆಯ ಸಹಕಾರದೊಂದಿಗೆ 2016ರಲ್ಲಿ ಪುಣೆ ಮುನ್ಸಿಪಲ್​ ಕಾರ್ಪೋರೇಷನ್​ ಹಾಗೂ ಮಹಾನಗರ್​ ಪರಿವಾಹನ ಮಹಾಮಂಡಲ ಜಂಟಿಯಾಗಿ ಆರು ಬಸ್​ಗಳನ್ನು ಮೊಬೈಲ್​ ಟಾಯ್ಲೆಟ್​ ಆಗಿ ಬದಲಿಸಿತ್ತು.

ಬಸ್​ನಲ್ಲಿ ಒಟ್ಟು 6 ಟಾಯ್ಲೆಟ್​ಗಳು ಇರಲಿವೆ. 3 ಭಾರತೀಯ ಶೈಲಿಯ ಶೌಚಾಲಯವಾದರೆ, ಉಳಿದ ಮೂರು ಪಾಶ್ಚಿಮಾತ್ಯ ಶೈಲಿಯಲ್ಲಿರಲಿದೆ. ಟಾಯ್ಲೆಟ್​ ಜೊತೆ, ಮಗುವಿಗೆ ಹಾಲುಣಿಸಲು ವಿಶೇಷ ಕೊಠಡಿ, ಮಗುವಿಗೆ ಡೈಪರ್​ ಬದಲಿಸುವ ಕೊಠಡಿ ಕೂಡ ಬಸ್​ನಲ್ಲಿ ಇರಲಿದೆ.

ಇದನ್ನೂ ಓದಿ: ಚಿಕ್ಕ ಸಿಗರೇಟ್ ಮೇಲೆ 7186 ಅಕ್ಷರ ಬರೆದು ದಾಖಲೆ; ಧೂಮಪಾನದ ವಿರುದ್ಧದ ಅರಿವಿಗೆ ಯುವಕನ ವಿಭಿನ್ನ ಪ್ರಯತ್ನ

ವಿಶ್ವ ಮಹಿಳಾ ದಿನಾಚರಣೆಗೆ ಈ ಟಾಯ್ಲೆಟ್ ಕಾರ್ಯಾರಂಭಿಸಬೇಕಿತ್ತು. ಆದರೆ, ಕೆಲಸಗಳು ಬಾಕಿ ಉಳಿದಿದ್ದರಿಂದ ಈ ತಿಂಗಳಾಂತ್ಯಕ್ಕೆ ಮೊಬೈಲ್​ ಟಾಯ್ಲೆಟ್​ ಹಸ್ತಾಂತರ ಮಾಡುವುದಾಗಿ ಪುಣೆಯ ಖಾಸಗಿ ಸಂಸ್ಥೆ ತಿಳಿಸಿದೆ. ಮುಂದಿನ ದಿನಗಳಲ್ಲಿ ಬಳಕೆಯಲ್ಲಿರದ ಮತ್ತಷ್ಟು ಬಸ್​ಗಳನ್ನು ಟಾಯ್ಲೆಟ್​ ಆಗಿ ಬದಲಿಸುವ ಆಲೋಚನೆಯಲ್ಲಿ ಸರ್ಕಾರ ಇದೆ. ಈ ಯೋಜನೆಗೆ ‘ಸ್ತ್ರೀ ಟಾಯ್ಲೆಟ್​’ ಎಂದು ನಾಮಕರಣ ಮಾಡಲಾಗಿದೆ. ಮೆಜೆಸ್ಟಿಕ್​ನಲ್ಲಿ ಈ ಮೊಬೈಲ್​ ಟಾಯ್ಲೆಟ್​ಅನ್ನು ಸ್ಥಾಪನೆ ಮಾಡಲು ನಿರ್ಧರಿಸಲಾಗಿದೆ.