ಎರಡು ಬಾರಿ ಮದುವೆಯಾದ ಹುಡುಗಿಯನ್ನು ವಿವಾಹವಾಗಿ 11 ಲಕ್ಷ ರೂ. ಕಳೆದುಕೊಂಡ ಶಿವಮೊಗ್ಗ ಅರ್ಚಕ

ಬೆಂಗಳೂರು (ಡಿ.6): ಮದುವೆಯಾಗಬೇಕೆಂದುಕೊಂಡಿದ್ದರೂ ಅನೇಕರಿಗೆ ಕಂಕಣಭಾಗ್ಯ ಕೂಡಿ ಬಂದಿರುವುದಿಲ್ಲ. ಇಂಥ ಸಂದರ್ಭಗಳಲ್ಲಿ ವಿವಾಹವಾಗಲೇಬೇಕು ಎನ್ನುವ ಛಲಕ್ಕೆ ಬೀಳುವ ಕೆಲವರು ಮೋಸ ಹೋಗುತ್ತಾರೆ. ಬೆಂಗಳೂರಿನಲ್ಲೂ ಇದೇ ರೀತಿ ಆಗಿದೆ. ವರ್ಷ 42 ತುಂಬಿದ್ದರೂ ಮದುವೆಯಾಗಿಲ್ಲ ಎನ್ನುವ ಕೊರಗಿನಲ್ಲಿದ್ದ ಶಿವಮೊಗ್ಗ ಅರ್ಚಕರು ಯುವತಿಯೊಬ್ಬಳನ್ನು ಮದುವೆಯಾಗಿದ್ದಾರೆ. ಮದುವೆ ನಂತರ ಈ ಅರ್ಚಕ ಬರೋಬ್ಬರಿ 11 ಲಕ್ಷ ರೂಪಾಯಿ ಕಳೆದುಕೊಂಡಿದ್ದಾರೆ.

ಶಿವಮೊಗ್ಗದ ಜಿ ಭಟ್​ ಎಂಬುವವರು ಮೋಸ ಹೋದವರು. ಇವರಿಗೆ ವಯಸ್ಸು 42 ಆದರೂ ಯಾರೊಬ್ಬರೂ ಕನ್ಯಾದಾನ ಮಾಡಲು ಮುಂದೆ ಬಂದಿರಲಿಲ್ಲ. ಅನೇಕ ಬ್ರೋಕರ್​​ಗಳನ್ನು ಇವರು ಸಂಪರ್ಕ ಮಾಡಿದ್ದರೂ ಮದುವೆಯಾಗಲು ಹೆಣ್ಣು ಸಿಕ್ಕಿರಲೇ ಇಲ್ಲ. ಕೊನೆಗೆ, ಗಣೇಶ್​ ಬಿ ಎನ್ನುವ ಬ್ರೋಕರ್​ ಮದುವೆ ಮಾಡಿಸಲು ಮುಂದೆ ಬಂದಿದ್ದ.

“ನಯನ ಕುಮಾರಿ ಎನ್ನುವ ಅನಾಥೆಯನ್ನು ಬೆಳೆಸಿ ದೊಡ್ಡವಳನ್ನಾಗಿ ಮಾಡಿದ್ದೇನೆ. ಆಕೆಗೆ ಇನ್ನೂ 27 ವರ್ಷ. ನನ್ನದೇ ಮನೆಯಲ್ಲಿ ಆಕೆ ಬೆಳೆದಿದ್ದಾಳೆ. ನಾನು, ಶ್ರೀಕಾಂತ್​ ಐತಾಳ್​, ಅಚ್ಯುತ್​ ಹೆಬ್ಬಾರ್​ ಹೆಸರಿನ ಬ್ರೋಕರ್​ ಜೊತೆಗೂಡಿ ನಿನಗೆ ಮುದವೆ ಮಾಡಿಸುತ್ತೇವೆ. ಇದಕ್ಕಾಗಿ ಮೂರು ಲಕ್ಷ ರೂಪಾಯಿ ನೀಡಬೇಕು,” ಎಂದಿದ್ದರು ಬ್ರೋಕರ್​ ಗಣೇಶ್​.

ಇದನ್ನೂ ಓದಿ: ಪಶುವೈದ್ಯೆ ಅತ್ಯಾಚಾರಿಗಳನ್ನು ಎನ್​ಕೌಂಟರ್​ ಮಾಡಿದ ಪೊಲೀಸ್​ ಅಧಿಕಾರಿ ಹುಬ್ಬಳಿ ಮೂಲದವರು!

ಕುಂದಾಪುರದ ದೇವಾಲಯದಲ್ಲಿ ಜಿ ಭಟ್​ ನಯನಾಳನ್ನು ವಿವಾಹವಾಗಿದ್ದರು. ಮದುವೆಯಾದ ಒಂದು ವಾರದಲ್ಲಿ ಈ ಜೋಡಿ ಬೆಂಗಳೂರಿಗೆ ಆಗಮಿಸಿತ್ತು. ಮದುವೆಯಾದ ಒಂದು ತಿಂಗಳಲ್ಲಿ ನಯನಾ ಭಾರೀ ಬದಲಾಗಿದ್ದಳು. ‘ನನಗೆ ಕಿರಿಕಿರಿ ಉಂಟಾಗುತ್ತಿದೆ. ಒಂದಷ್ಟು ದಿನ ಏಕಾಂತ ಬೇಕೆಂದು,’ ಆಕೆ ಮನೆ ಬಿಟ್ಟು ತೆರಳಿದ್ದಳು. ಈ ವೇಳೆ ನಯನಾ 8 ಲಕ್ಷ ಮೌಲ್ಯದ ಚಿನ್ನಾಭರಣಗಳನ್ನು ಹೊತ್ತೊಯ್ದಿದ್ದಳು.

ಪ್ರಕರಣಕ್ಕೆ ಸಂಬಂಧಿಸಿ ಜಿ ಭಟ್​ ದೂರು ನೀಡಿದ್ದು, ಶ್ರೀಕಾಂತ್​ ಐತಾಳ್​ನನ್ನು ಬಂಧಿಸಲಾಗಿದೆ. ಈ ವೇಳೆ ನಯನಾಗೆ ಈ ಮೊದಲು ಎರಡು ಬಾರಿ ಮದುವೆಯಾಗಿತ್ತು ಎನ್ನು ವಿಚಾರ ಹೇಳಿಕೊಂಡಿದ್ದಾನೆ. ಬ್ರೋಕರ್​ ಗಣೇಶ್​ ಈ ಮೊದಲು ಅನೇಕ ಬಾರಿ ಇದೇ ರೀತಿ ಮಾಡಿದ್ದ ಎನ್ನಲಾಗಿದೆ.