ಕ್ರೀಡಾ ಕ್ಷೇತ್ರದಲ್ಲಿ ಅತ್ಯುನ್ನತ ಸಾಧನೆ ಮಾಡಿದ 'ಸಬಿಯಾ'ಗೆ 'ಕೆಂಪೇಗೌಡ ಪ್ರಶಸ್ತಿ'

ನ್ಯೂಸ್ 18 ಕನ್ನಡ

ಬಿಬಿಎಂಪಿಯ ಪ್ರತಿಷ್ಠಿತ ಕೆಂಪೇಗೌಡ ಪ್ರಶಸ್ತಿ ಪ್ರಧಾನ ಸಮಾರಂಭ ಬಿಬಿಎಂಪಿಯ ಗಾಜಿನ ಮನೆಯಲ್ಲಿ ನಡೆದಿದ್ದು, ಕ್ರೀಡಾ ಕ್ಷೇತ್ರದಲ್ಲಿ ಅತ್ಯುನ್ನತ ಸಾಧನೆ ಮಾಡಿದ ಸಬಿಯಾ ಎಸ್ ಅವರು ಮೇಯರ್ ಸಂಪತ್ ರಾಜ್​​ರಿಂದ ಪ್ರಶಸ್ತಿ ಸ್ವೀಕರಿಸಿದರು.

19 ವರ್ಷ ವರ್ಷದ ಸಬಿಯಾ ಇತ್ತೀಚೆಗಷ್ಟೆ ಬಾಂಗ್ಲಾದೇಶದ ಢಾಕಾದಲ್ಲಿ ನಡೆದ ಅಂತರಾಷ್ಟ್ರೀಯ ಥ್ರೋ ಬಾಲ್ ಚಾಂಪಿಯನ್​ಶಿಪ್​ ಟೂರ್ನಮೆಂಟ್​​ನಲ್ಲಿ ಭಾರತದ ಪರವಾಗಿ ಆಡಿದ್ದರು. ಈ ಪಂದ್ಯದಲ್ಲಿ ಭಾರತದ ಗೆಲುವಿಗೆ ಸಬಿಯಾ ಪ್ರಮುಖ ಪಾತ್ರ ವಹಿಸಿದ್ದರು. ಅಷ್ಟೇ ಅಲ್ಲದೆ ಏಳು ಅಂತರಾಷ್ಟ್ರೀಯ ಥ್ರೋ ಬಾಲ್ ಪಂದ್ಯಗಳನ್ನು ಆಡಿದ್ದು, ಆ ಏಳೂ ಪಂದ್ಯಗಳಲ್ಲಿ ಭಾರತ ಜಯಶಾಲಿಯಾಗಿದೆ ಎಂಬುವುದು ಗಮನಾರ್ಹ ವಿಚಾರ. ಏ. 2013ರ ಕೊಲಂಬೋದಲ್ಲಿ ನಡೆದ ಇಂಡೋ-ಥೈಲ್ಯಾಂಡ್​ ಟೂರ್ನಿಯಲ್ಲಿ ಶ್ರೀಲಂಕಾದ ಥ್ರೋ ಬಾಲ್ ಫೆಡರೇಷನ್ ಸಬಿಯಾ ಅವರಿಗೆ ಬೆಸ್ಟ್ ಥ್ರೋ ಬಾಲ್ ಪ್ಲೇಯರ್ ಎಂದು ಸನ್ಮಾನಿಸಿತ್ತು. ಕೇವಲ ಥ್ರೋ ಬಾಲ್ ಮಾತ್ರವಲ್ಲದೆ ಫುಟ್ಬಾಲ್, ಕಬಡ್ಡಿ, ಬ್ಯಾಡ್ಮಿಂಟನ್​, ವಾಲಿಬಾಲ್, ಲಾಂಗ್​ಜಂಪ್, ಹೈಜಂಪ್​​ನಲ್ಲು ಸಬಿಯಾ ಅವರ ಸಾಧನೆ ಉತ್ತಮವಾಗಿದೆ.

ಸದ್ಯ ಇದನ್ನೆಲ್ಲ ಮನಗಂಡು ಸಾಧಕರಿಗೆ ಬಿಬಿಎಂಪಿ ವತಿಯಿಂದ ನೀಡಲಾಗುವ 2018ನೇ ಸಾಲಿನ ನಾಡಪ್ರಭು ಕೆಂಪೇಗೌಡ ಪ್ರಶಸ್ತಿಗೆ ಸಬಿಯಾ ಅವರು ಭಾಜನರಾಗಿದ್ದಾರೆ.