PM Modi: ಡಬಲ್ ಇಂಜಿನ್ ಸರ್ಕಾರಗಳ ಬಗ್ಗೆ ಜನ ಏನಂತಾರೆ? ಬಿಜೆಪಿ ಮಾಧ್ಯಮ ಟೀಂಗೆ ಮೋದಿ ಪ್ರಶ್ನೆ

ಬೆಂಗಳೂರು: ರಾಜ್ಯದಲ್ಲಿ ಮೂರು ಬಾರಿ ಬಿಜೆಪಿ (BJP) ಅಧಿಕಾರಕ್ಕೆ ಬಂದರೂ ಇದುವರೆಗೂ ಚುನಾವಣೆಯಲ್ಲಿ (Elections) ಸರಳ ಬಹುಮತಗಳಿಸಿಲ್ಲ. ಸರ್ಕಸ್ ಮಾಡಿ ಸರ್ಕಾರ ರಚನೆ ಮಾಡಿದ ಮೇಲೆ ಈಗ ಪ್ರಯೋಗದ ಪರೀಕ್ಷೆಯನ್ನು ಎದುರಿಸಬೇಕಿದೆ. ಇಂತಹದ್ದೊಂದು ನಿರ್ಣಾಯಕ ಘಟ್ಟದಲ್ಲಿ ಇಂದು ಪ್ರಧಾನಿ ಮೋದಿ (PM Modi) ಬಹುಮತದ ಬಿಜೆಪಿ (BJP) ಸರ್ಕಾರಕ್ಕಾಗಿ ಮತಯಾಚನೆ ಮಾಡಿದ್ದಾರೆ. ಹುಮ್ನಾಬಾದ್, ವಿಜಯಪುರ, ಕುಡಚಿಯಲ್ಲಿ ಇಂದು ಮೋದಿ ಪ್ರಚಾರ ನಡೆಸಿದ್ದು, ಬೆಂಗಳೂರು (Bengaluru) ಉತ್ತರ ಕ್ಷೇತ್ರಗಳಲ್ಲಿ ಭರ್ಜರಿ ರೋಡ್​ ಶೋ ನಡೆಸಿದ್ದಾರೆ. ರೋಡ್​ ಶೋ ಬಳಿಕ ರಾಜಭವನಕ್ಕೆ (Raj Bhavana) ತೆರಳಿದ್ದಾರೆ. ಇದಕ್ಕೂ ಮುನ್ನ ಬಿಜೆಪಿ ಮಾಧ್ಯಮ ತಂಡದೊಂದಿಗೆ ಸುಮಾರು 10 ನಿಮಿಷಗಳ ಕಾಲ ಮೋದಿ ಚರ್ಚೆ ನಡೆಸಿದ್ದರು, ಮಾದಾವರ ಹೆಲಿಪ್ಯಾಡ್ ಸುಮಾರು 25 ಜನರ ತಂಡದೊಂದಿಗೆ ಮೋದಿ ಚರ್ಚೆ ನಡೆಸಿದ್ದಾರೆ.

ರಾಜ್ಯ ಸರ್ಕಾರದ ಯೋಜನೆಗಳು ಫಲಾನುಭವಿಗಳಿಗೆ ತಲುಪಿದೆಯಾ?

ಕರ್ನಾಟಕ ಚುನಾವಣೆಯ ಹಿನ್ನೆಲೆಯಲ್ಲಿ ಬಹುಮತದೊಂದಿಗೆ ಅಧಿಕಾರಕ್ಕೆ ಬರಲು ಉದ್ದೇಶಿಸಿರುವ ಬಿಜೆಪಿ ಮಾಧ್ಯಮ ತಂಡದೊಂದಿಗೆ ಭರ್ಜರಿ ಪ್ರಚಾರ ನಡೆಸುತ್ತಿದೆ. ಈ ಹಿನ್ನೆಲೆಯಲ್ಲಿ ತಂಡದ ಸದಸ್ಯರೊಂದಿಗೆ ಮಾತುಕತೆ ನಡೆಸಿದ ಮೋದಿ, ಕೇಂದ್ರ ಹಾಗೂ ರಾಜ್ಯ ಸರ್ಕಾರದ ಯೋಜನೆಗಳು ಫಲಾನುಭವಿಗಳಿಗೆ ತಲುಪಿದೆಯಾ? ಡಬಲ್ ಇಂಜಿನ್ ಸರ್ಕಾರಗಳ ಬಗ್ಗೆ ಜನರು ಏನಂತಾರೆ? ನನ್ನ ಬಗ್ಗೆ ಕರುನಾಡಿನ ಜನರು ಏನಂತಾರೆ? ಖರ್ಗೆ ವಿಷ ಸರ್ಪದ ಮಾತಿಗೆ ಜನರು ಏನಂತಿದ್ದಾರೆ? ಎಂದು ಹಲವು ಪ್ರಶ್ನೆಗಳನ್ನು ಮುಂದಿಟ್ಟಿದ್ದಾರೆ.

ಕಾಂಗ್ರೆಸ್​​ನ ಗ್ಯಾರಂಟಿ ಯೋಜನೆಗಳ ಬಗ್ಗೆ ಜನರು ಏನು ಮಾತಾಡ್ತಿದ್ದಾರೆ?

ಪ್ರಮುಖವಾಗಿ ಈ ಬಾರಿ ಕಾಂಗ್ರೆಸ್ ಗ್ಯಾರೆಂಟಿ ಯೋಜನೆಗಳೊಂದಿಗೆ ಮತದಾರರನ್ನು ಸೆಳೆಯಲು ಮುಂದಾಗಿದ್ದು, ಕಾಂಗ್ರೆಸ್​​ನ ಗ್ಯಾರಂಟಿ ಯೋಜನೆಗಳ ಬಗ್ಗೆ ಜನರು ಏನು ಮಾತಾಡ್ತಿದ್ದಾರೆ? ರಾಜ್ಯದ ಆರು ಕಡೆಗಳಲ್ಲಿ ಮಾಧ್ಯಮ ಕೇಂದ್ರದ ನಿರ್ವಹಣೆ ಹೇಗಿದೆ ಅಂತಲೂ ಪ್ರಶ್ನಿಸಿ ಮಾಹಿತಿ ಪಡೆದುಕೊಂಡಿದ್ದಾರೆ.

ಇದೇ ವೇಳೆ ಡಬಲ್ ಇಂಜಿನ್ ಸರ್ಕಾರ ಬರಲು ಹಗಲು ರಾತ್ರಿ ಕೆಲಸ ಮಾಡಿ, ಇನ್ನೂ 10 ದಿನಗಳ ಕಾಲ ವಿಶ್ರಮಿಸಿದೇ ಕೆಲಸ ಮಾಡಿ ಎಂದು ಮಾಧ್ಯಮ ಟೀಂಗೆ ಹೇಳಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ. ಇತ್ತ ಮೋದಿ ಅವರೊಂದಿಗೆ ಮಾತುಕತೆ ನಡೆಸಿ ಹಲವು ವಿಚಾರಗಳನ್ನು ಹಂಚಿಕೊಂಡಿರುವ ಬಿಜೆಪಿ ಮಾಧ್ಯಮ ವಿಭಾಗದ ಸದಸ್ಯರು ಕೂಡ ಸಖತ್​ ಸಂತೋಷ್​ ಪಟ್ಟಿದ್ದಾರೆ.